Kongregasyon i bezwen ganny batir

“Sa letan la [kongregasyon] ti pe viv an-pe . . .; i ti vin for.”—AKT 9:31.

 1. Ki kestyon nou kapab demande konsernan “kongregasyon Bondye”?

ZOUR Lapannkot lannen 33 N.L., Zeova ti aksepte ofisyelman en group disip Kris konman en nouvo nasyon, “Izrael Bondye.” (Galat 6:16, NW) Sa bann Kretyen swazir ti vin osi sa ki Labib i apel “kongregasyon Bondye.” (1 Korentyen 11:22, NW) Me ki sa ti enplike? Ki mannyer “kongregasyon Bondye” ti pou ganny organize? Konman kongregasyon ti pou fonksyonnen partou lo later? E finalman, konman nou lavi ek boner i relye avek kongregasyon?

2, 3. Ki mannyer Zezi ti montre ki kongregasyon ti pou byen organize?

² Parey nou ti vwar dan sa lartik avan, Zezi ti predir ki kongregasyon bann Kretyen swazir ti pou ganny formen ler i ti dir zapot Pyer: “Lo sa ros [Zezi Kri] mon pou bati mon [kongregasyon], e pisans lanmor pa pou ranport laviktwar kont li.” (Matye 16:18) Deplis, ler Zezi ti ankor avek son bann zapot, i ti donn bann lenstriksyon lo konman sa fitir kongregasyon ti pou marse e ganny organize.

³ Zezi ti montre par son parol ek aksyon ki serten dan kongregasyon ti pou pran latet. Zot ti pou fer sa par servi oubyen travay pour lezot dan sa kongregasyon. Kris ti dir: “Zot konnen ki bann sef nasyon i konmann zot pep konman zot met. Bann personnaz enportan i fer santi zot lotorite. Me i pa devre koumsa parmi zot. Zot, okontrer, si enn parmi zot i oule vin enportan i bezwen vin serviter lezot. Si i oule vin premye i bezwen vin lesklav zot tou.” (Mark 10:42-44) Vreman, ‘kongregasyon Bondye’ pa ti pou konpoze avek dimoun ki ador Bondye sakenn pour li. I pa ti pou en kongregasyon ki pa vreman organize. Plito, i ti pou en kongregasyon ki byen organize e annord, konpoze avek bann manm ki korpere ansanm.

4, 5. Ki mannyer nou konnen ki kongregasyon ti pou bezwen lenstriksyon spirityel?

⁴ Sef sa kongregasyon, Zezi, ti montre ki son bann zapot ek lezot ki ti vin son disip ti pou annan bann responsabilite spesifik vizavi larestan dan kongregasyon. Ki responsabilite? Responsabilite enportan pour donn lenstriksyon spirityel bann manm kongregasyon. Ou kapab mazin sa ki Zezi ti dir Pyer dan prezans lezot zapot apre son rezireksyon. I ti dir: “Simon, garson Zan, eski ou kontan mwan?” Pyer ti reponn li: “Wi Senyer, ou konnen ki mon kontan ou.” Zezi ti dir li: “[Donn manze] mon bann lanyo. . . . Pran swen avek mon bann [pti] mouton. . . . [Donn manze] mon bann [pti] mouton.” (Zan 21:15-17) Sa ti vreman en misyon serye!

⁵ Parey nou’n vwar dan parol Zezi, sa bann ki form parti kongregasyon i ganny konpare avek bann mouton dan en troupo. Sa bann mouton, setadir zonm, fanm ek zanfan dan kongregasyon, i bezwen ganny nouri spirityelman e ganny en bon swen. Deplis, vi ki Zezi ti demann tou son bann disip pour ansenny lezot e fer dimoun vin son disip, tou bann nouvo mouton dan son troupo pou bezwen ganny en formasyon pour zot osi akonpli sa travay ki Bondye in donnen.—Matye 28:19, 20.

 6. Ki laranzman ti annan dan sa nouvo ‘kongregasyon Bondye’?

⁶ Apre ki ‘kongregasyon Bondye’ ti ganny formen, son bann manm ti zwenn regilyerman pour resevwar lenstriksyon e ankouraz kanmarad: “Zot ti pas bokou letan pour aprann avek bann zapot, zot ti viv ansanm, an komen konman frer; zot ti kas dipen, e partisip ansanm dan lapriyer.” (Akt 2:42, 46, 47) En lot pwen ase enportan dan sa resi, se ki bann zonm kalifye ti ganny swazir pour donn lanmen okip serten keksoz materyel. Zot pa ti ganny swazir akoz zot ti annan en gran ledikasyon oubyen abilite. Sa bann zonm ti ‘ranpli avek lespri sen ek bokou lasazes.’ Sa resi i dir ki Etyenn, enn sa bann zonm, ti “ranpli avek lafwa ek Sent-Espri.” Vi ki ti annan sa laranzman dan bann kongregasyon, sa ti anmenn en bon rezilta akoz “Parol Bondye ti kontinyen fannen; lakantite bann ki ti krwar dan Zezi ti ogmant bokou dan Zerizalenm.”—Akt 6:1-7.

Bann Zonm ki Bondye i servi

7, 8. (a) Ki rol bann zapot ek bann ansyen Zerizalenm ti zwe dan lepok bann premye Kretyen? (b) Ki rezilta sa ti anmennen ler bann kongregasyon ti swiv gidans ki zot ti gannyen?

⁷ I fer sans ki bann zapot ti pran latet dan lorganizasyon bann kongregasyon, me zot pa ti tousel. Par egzanp, Pol ek bann ki ti avek li ti retourn Antyos an Siri. La sa ki nou lir dan Akt 14:27: “Kan Pol ek Barnabas ti ariv Antyos, zot ti reini ansanm tou bann manm [“kongregasyon,” NW] e zot ti rakont tou sa ki Bondye ti’n fer avek zot.” Me lanmenm dan sa kongregasyon ler zot ti ankor la, en kestyon ti leve, eski bann Kretyen ki pa ti sirkonsi ti bezwen fer li? Pour rezourd sa sitiasyon, Pol ek Barnabas ti ganny demande pour “mont Zerizalenm pour diskit sa problenm avek bann zapot ek bann ansyen.” I evidan ki bann zapot ek sa bann ansyen Zerizalenm ti form en konsey direkter.—Akt 15:1-3.

⁸ Zak demi frer Zezi ki ti en ansyen me pa en zapot, ti tyermenn sa renyon kot “bann zapot ek bann ansyen ti reini ansanm pour konsider sa kestyon.” (Akt 15:6) Ti annan en bon diskisyon e avek led lespri sen, zot ti tonm lo en konklizyon ki an akor avek Lekritir. Zot ti met sa desizyon an ekrir e anvoy li kot bann kongregasyon. (Akt 15:22-32) Bann ki ti ganny sa let ti aksepte e swiv sa desizyon. Ki rezilta sa ti anmennen? Sa ti batir e ankouraz bann frer ek ser. Labib i dir: “Ensi bann [kongregasyon] ti grandi e vin pli for e la kantite manm ti ogmante toulezour.”—Akt 16:5.

 9. Dapre Labib, ki rol bann zonm kalifye i annan dan kongregasyon?

⁹ Me ki mannyer bann kongregasyon ti pou fonksyonnen zour apre zour? Par egzanp, i ti annan bann kongregasyon lo sa zil Kret. Menm si en bon pe dimoun lo sa zil ti annan en move repitasyon, serten ti sanze e ti vin bann vre Kretyen. (Tit 1:10-12; 2:2, 3) Zot ti viv dan diferan lavil lo sa zil, e zot tou ti byen lwen avek konsey direkter Zerizalenm. Sa pa ti en tro gro problenm akoz bann “ansyen” ti ganny apwente dan sak kongregasyon lo sa zil parey ti leka dan lezot landrwa. Sa bann zonm ti ranpli bann kalifikasyon ki nou trouve dan Labib. Zot ti ganny apwente ansyen oubyen sirveyan e zot ti “kapab ansenny lezot dapre sa vre doktrin [e] osi montre lerer bann ki kontredir li.” (Tit 1:5-9; 1 Timote 3:1-7) Serten zonm spirityel ti kalifye pour servi konman dyak oubyen asistan ministeryel.—1 Timote 3:8-10, 12, 13.

10. Dapre Matye 18:15-17, ki mannyer bann problenm serye ti bezwen ganny regle?

¹⁰ Zezi ti montre ki i ti pou annan en serten lorganizasyon dan kongregasyon. Mazin Matye 18:15-17, kot i ti dir ki serten difikilte i kapab arive ant de dimoun parmi pep Bondye, par egzanp si enn ti fer en fot kont en lot. Sa enn ki ti ganny ofanse ti sipoze al vwar sa lot e “montre li son fot,” an prive setadir zis ant zot de. Si sa pa ti ase, enn ou de ki ti konn sa zafer ti kapab ganny demande pour ede. Me si i pa ti rezourd menm? Zezi ti dir: ‘Me si i refize ekout zot, dir [kongregasyon]. E si i refize ekout [kongregasyon] konsider li konman en payen oubyen en kolekter taks.’ Ler Zezi ti dir sa, bann Zwif ti ankor ‘kongregasyon Bondye,’ alor okonmansman son parol ti aplik pour zot.a Toudmenm, ler kongregasyon Kretyen ti ganny etablir, sa konsey Zezi ti pou aplik dan kongregasyon Kretyen. Sa i en lot levidans ki pep Bondye ti pou ganny organize an kongregasyon pour sak Kretyen ganny batir oubyen gide.

11. Ki mannyer bann ansyen i enplike pour rezourd bann problenm dan kongregasyon?

¹¹ Alor i apropriye ki bann ansyen oubyen sirveyan ti pou reprezant kongregasyon e se zot ki ti pou ede rezourd bann problenm ouswa tret bann sitiasyon kot en pese ti enplike. Sa i an akor avek bann kalifikasyon ki bann ansyen i devret annan dapre Tit 1:9. I vre ki bann ansyen dan sak kongregasyon pa ti parfe. Tit osi ti enparfe, pourtan Pol ti anvoy li dan bann kongregasyon pour “met lord dan bann keksoz kot i fodre.” (Tit 1:4, 5) Ozordi, bann ki pe ganny rekomande pour servi konman ansyen in devret prouv zot lafwa ek devosyon pour en serten letan. Dan sa fason, lezot dan kongregasyon pou kapab annan konfyans dan gidans ek direksyon bann ansyen dan kongregasyon.

12. Ki responsabilite bann ansyen i annan vizavi kongregasyon?

¹² Pol ti dir bann ansyen dan kongregasyon Efez: “Vey byen zot lekor e pran swen troupo ki Sent-Espri in konfye zot konman bann gardyen. Pran swen [kongregasyon] ki Bondye in gannyen par disan son prop Garson.” (Akt 20:28) Sa i aplik osi pour nou letan. Bann sirveyan dan kongregasyon in ganny apwente ‘pour pran swen troupo oubyen kongregasyon Bondye.’ Zot merit fer li avek lanmour, pa fer dominer avek kongregasyon. (1 Pyer 5:2, 3) Bann sirveyan i devret fer zot mye pour batir e ed tou dimoun dan kongregasyon.

Reste byen atase avek Kongregasyon

13. Parler ki kapab arive dan en kongregasyon e akoz?

¹³ Bann ansyen ek tou lezot dan kongregasyon pa parfe, alor tanzantan bann mal konprenezon ouswa problenm i arive, parey i ti arive dan premye syek ler serten bann zapot ti ankor vivan. (Filipyen 4:2, 3) En sirveyan oubyen en lot dimoun i kapab dir en keksoz ki nou pa kontan ouswa ki paret dir oubyen pa toutafe vre. Kekfwa nou kapab krwar ki en keksoz mal pa pe ganny trete par bann ansyen dan kongregasyon menm si i paret zot okouran sa ki pe deroule. Byensir, petet bann ansyen in tret ouswa pe okip sa sitiasyon oubyen zot konn bann keksoz ki nou pa konnen. Me menm si sitiasyon i mal parey nou krwar, nou kapab reflesir lo sa ki ti arive dan kongregasyon Korent. Annefe menm si Zeova ti enterese avek sa kongregasyon osi, i ti annan en keksoz vreman mal ki ti pe arive laba. Avek letan, Zeova ti fer fason ki sa keksoz mal ti ganny korize korekteman e dan en fason ferm. (1 Korentyen 5:1, 5, 9-11) Nou kapab demann nou lekor, ‘Si mon ti dan kongregasyon Korent sa letan, ki mannyer mon ti pou reakte?’

14, 15. Akoz serten ti aret swiv Zezi? Ki leson nou kapab tire?

¹⁴ Prezan nou get en lot legzanp. Fer konmsi en dimoun dan kongregasyon i vwar li difisil pour konpran oubyen aksepte en serten lansennyman dan Labib. Petet i’n fer bann resers dan Labib ek bann piblikasyon ki nou gannyen dan kongregasyon. I’n kapab osi rod led avek serten frer ek ser matir dan kongregasyon, kekfwa menm avek bann ansyen. Toudmenm, i vwar li difisil pour vreman konpran ouswa dakor avek sa pwen. Ki i kapab fer? En keksoz en pe koumsa ti arive apepre enn an avan Zezi ti mor. Zezi ti dir: “Mwan menm dipen lavi” e i ti osi dir ki pour ganny lavi eternel en dimoun i devret “manz laser Fis-de-Lonm, e bwar son disan.” Sa ti sok serten son bann disip. Olye demande ki savedir sa oubyen pasyante pour ganny plis lenformasyon, plizyer disip “ti aret swiv li.” (Zan 6:35, 41-66) Ankor enn fwa demann nou lekor sa kestyon, ki nou ti pou fer?

¹⁵ Dan nou letan, serten in aret asosye avek kongregasyon akoz zot panse ki zot pou servi Bondye zot tousel. Petet zot pou dir ki en dimoun dan kongregasyon in ofans zot, en keksoz mal pa pe ganny aranze dan kongregasyon, oubyen zot pa kapab aksepte en serten lansennyman. Eski en latitid koumsa i fer sans? I evidan ki tou Kretyen i bezwen annan en relasyon personnel avek Bondye, me nou bezwen aksepte ki Zeova pe servi en kongregasyon mondyal parey i ti fer dan letan bann zapot. Deplis, Zeova ti servi e beni bann kongregasyon dan premye syek. I ti osi fer laranzman pour servi bann ansyen ek asistan ministeryel kalifye pour pran swen avek kongregasyon. Sa i ankor leka ozordi.

16. Si nou ti annan lide pour kit kongregasyon, lo kwa nou ti kapab reflesir?

¹⁶ Si en Kretyen i krwar i kapab depan selman lo son relasyon avek Bondye, i pe rezet laranzman ki Bondye in met an plas ki enkli kongregasyon mondyal e osi sak kongregasyon pep Bondye. Petet sa dimoun i kapab ador Bondye li tousel oubyen pe zis asosye avek ennde lezot Kretyen, me alor dan son ka, oli laranzman pour annan bann ansyen ouswa asistan ministeryel dan kongregasyon? I enportan pour rapel ki ler Pol ti ekri kongregasyon Kolos, i ti demande ki sa let i ganny lir osi Laodise. Dan sa let, i ti koz lo lenportans pour ‘vin anrasinen dan [Kris]; bati zot lavi lo li.’ Se bann ki ti dan kongregasyon, pa serten ki ti kit kongregasyon, ki ti pou kapab benefisye avek sa.—Kolosyen 2:6, 7; 4:16.

Kongregasyon i Pilye ek Sipor Laverite

17. Ki 1 Timote 3:15 i montre lo kongregasyon?

¹⁷ Dan sa premye let pour Timote ki ti en ansyen, zapot Pol ti detay bann kalifikasyon ki bann ansyen ek asistan ministeryel dan kongregasyon i bezwen annan. Zis apre sa, Pol ti koz lo “[kongregasyon] Bondye vivan, ki pilye ek sipor laverite.” (1 Timote 3:15) Kongregasyon antye konpoze avek bann Kretyen swazir ti vreman sa pilye dan premye syek. Deplis, i evidan ki sak Kretyen ti pe prensipalman resevwar laverite atraver son kongregasyon. Se la kot zot ti pou kapab tann laverite pe ganny byen eksplike e prouve, e kot zot ti pou batir zot spirityalite.

18. Akoz bann renyon kongregasyon i tre enportan?

¹⁸ Pareyman ozordi kongregasyon Kretyen partou dan lemonn i fanmiy Bondye, “pilye ek sipor laverite.” Nou lasistans regilye ek nou partisipasyon dan bann renyon kongregasyon i en fason enportan pour nou relasyon avek Bondye ganny batir e fortifye e pour ed nou fer son lavolonte. Ler Pol ti ekri kongregasyon Korent, i ti met lanfaz lo sa ki ti ganny dir pandan bann renyon. I ti oule ki sa ki ganny dir dan bann renyon i kler, fasil pour konpran pour ki lodyans i ganny batir e “fortifye.” (1 Korentyen 14:12, 17-19) Ozordi, nou kapab ganny fortifye si nou aksepte ki se Zeova ki’n met an plas sa laranzman pour annan bann kongregasyon e ki i pe siport sa fason fer.

19. Akoz ou santi ou vreman rekonesan pour sa ki kongregasyon in fer pour ou?

¹⁹ Wi, si nou, Kretyen, nou oule ganny fortifye, nou plas i dan kongregasyon. Depi lontan, i en proteksyon solid kont bann fo lansennyman, e Bondye in servi kongregasyon pour anons sa bon nouvel Rwayonm lo later antye. Vreman, Bondye in akonpli en kantite atraver kongregasyon Kretyen.—Efezyen 3:9, 10.

[Not anba lo paz]

Eski ou rapel?

• Akoz nou kapab ekspekte ki Bondye i servi bann kongregasyon lo later?

• Menm si zot pa parfe, ki bann ansyen i fer pour kongregasyon?

• Ki mannyer ou ganny batir atraver kongregasyon?

[Portre lo paz 15]

Bann zapot ek bann ansyen Zerizalenm ti servi lo en konsey direkter

[Portre lo paz 16]

Bann ansyen ek asistan ministeryel i resevwar lenstriksyon pour ki zot kapab byen desarz zot responsabilite dan kongregasyon