Fikse ou regar lo sa pri

“Mon tay for pour mwan ariv lo bit, pour ganny sa pri.”—FILI. 3:14.

1. Ki sa pri ki zapot Pol ti’n ganny ofer?

ZAPOT Pol, ki ti osi koni konman Sol ki sorti Tars, ti sorti dan en fanmir enportan. I ti ganny ansennyen dan larelizyon son bann zanset par Gamalyel, en profeser Lalwa ki ti renonmen. (Akt 22:3) Pol ti annan sa ki dimoun ti kapab konsider konman en bon karyer devan li, me pourtan i ti kit son larelizyon pour vin en Kretyen. Apre i ti esper avek enpasyans pour ganny lavi eternel, sa pri ki i ti’n ganny ofer, setadir pour vin en lerwa ek pret imortel dan Rwayonm Bondye. Sa Rwayonm pou egzers son dominasyon dan paradi lo later.—Mat. 6:10; Rev. 7:4; 20:6.

2, 3. Ki kantite valer sa pri pour al viv dan lesyel ti annan pour Pol?

² Pour montre ki kantite valer sa pri ti annan pour li, Pol ti dir: “Tou sa bann keksoz ki mon ti krwar ti en gen pour mwan, aprezan mon konsider zot konman en pert akoz Kris. Pa zis sa bann keksoz, me mon konsider tou keksoz konpletman konman en pert, akoz sa valer bokou pli siperyer ki annan dan konnesans mon Senyer, Kris Zezi. Akoz li, mon’n rezet tou, mon konsider tousala konman salte.” (Fili. 3:7, 8) Bann keksoz ki laplipar dimoun i konsider konman enportan, setadir pozisyon, larises, karyer ek popilarite, ti bann keksoz ki Pol ti konsider konman salte apre ki i ti’n aprann laverite lo plan Zeova pour limanite.

³ Apartir sa moman, sa ki ti vreman pli enportan pour Pol ti sa konnesans presye lo Zeova ek Kris, ki Zezi ti mansyonnen ler i ti priy Bondye: “Savedir, pour ganny lavi eternel zot bezwen aprann konn ou konman sel vre Bondye ek sa enn ki ou’n anvoye, Zezi Kri.” (Zan 17:3, NW) Nou klerman vwar sa gran dezir ki Pol ti annan pour ganny lavi eternel dan bann parol ki i ti ekrir dan Filipyen 3:14: “Mon tay for pour mwan ariv lo bit, pour ganny sa pri, ki Bondye par Kris-Zezi, in apel nou pour resevwar lao.” Wi, i ti fikse son regar lo sa pri pour ganny lavi eternel dan lesyel konman en manm dan Rwayonm Bondye.

Viv pour touzour lo later

4, 5. Ki pri plizyer milyon dimoun ki pe fer lavolonte Bondye ozordi in ganny ofer?

⁴ Pour lamazorite dimoun ki swazir pour fer lavolonte Bondye, sa pri ki zot merit travay dir pour gannyen i lavi eternel dan nouvo lemonn Bondye. (Ps. 37:11, 29) Zezi ti konfirmen ki sa ti en lespwar byen solid. I ti dir: “Byennere bann ki dou[s], akoz zot pou posed later.” (Mat. 5:5) Zezi li menm i sa enn prensipal pour erit nou later, parey Psonm 2:8 i montre, e i pou annan 144,000 dimoun ki pou dirize avek li dan lesyel. (Dan. 7:13, 14, 22, 27) Lezot mouton ki pou an realite viv lo later, pou “erit” later ki pou anba dominasyon sa Rwayonm “ki’n ganny prepare pour zot depi kreasyon lemonn.” (Mat. 25:34, 46) Nou annan lasirans ki sa pou arive akoz Bondye, sa enn ki’n fer sa promes, “pa zanmen manti.” (Tit 1:2) Nou kapab annan sa menm konfyans dan lakonplisman bann promes Bondye, parey Zozye ti annan ler i ti dir avek bann Izraelit: “Napa okenn parol parmi tou bann bon parol ki Zeova zot Bondye in dir zot ki pa’n reisi. Tousala in vin vre pour zot. Napa en parol ki pa’n reisi.”—Zoz. 23:14.

⁵ Dan nouvo lemonn Bondye, lavi pa pou parey ozordi kot nou pa santi nou vreman ere. I pou vreman diferan: i pou napa lager, krim, lapovrete, lenzistis, maladi ek lanmor. Bann dimoun pou annan en lasante parfe e zot pou viv lo en later ki pou’n vin en paradi. Nou pou annan en lavi byen ranpli e satisfezan ki pou depas tou sa ki nou ti’n kapab ekspekte o fon nou leker. Wi, tou le zour pou en zour kot nou pou trouv bokou plezir pour viv. Pa sa i vreman en zoli pri!

6, 7. (a) Ki mannyer Zezi ti demontre sa ki nou kapab ekspekte pour arive dan nouvo lemonn Bondye? (b) Konman bann dimoun mor pou ganny sa posibilite pour rekonmans en nouvo lavi?

⁶ Kan Zezi ti lo later, Bondye ti donn li pouvwar atraver Son lespri sen pour li montre bann keksoz merveye ki pou ganny akonplir lo later antye dan sa nouvo lemonn. Par egzanp, Zezi ti dir en zonm ki ti’n paralize pour 38 an, leve e marse. Labib i dir ki sa zonm ti fer egzakteman sa ki Zezi ti demann li pour fer. (Lir Zan 5:5-9.) En lot fwa, Zezi ti rankontre “en zonm ki ti aveg depi son nesans” e i ti geri li. Pli tar, sa zonm ki oparavan ti aveg ti ganny kestyonnen konsernan sa enn ki ti’n geri li, e i ti reponn: “Depi lemonn in konmanse, personn pa’n deza tan[de] ki en dimoun in fer en aveg war kler. Si sa zonm pa ti sorti kot Bondye i pa ti pou kapab fer nanryen.” (Zan 9:1, 6, 7, 32, 33) Zezi ti kapab fer tousala akoz i ti ganny pouvwar sorti kot Bondye. Partou kot i ti ale, Zezi ti “geri bann ki ti bezwen gerizon.”—Lik 9:11.

⁷ Zezi pa ti zis kapab geri dimoun ki ti malad oubyen andikape me i ti osi kapab resisit dimoun mor. Par egzanp, lanmor sa pti fiy ki ti annan 12 an ti anmenn gran sagrinasyon pour son paran. Me Zezi ti dir: “Pti fiy, mon dir ou, leve!” Sa pti fiy ti leve. Eski ou kapab mazinen ki ti reaksyon sa paran ek lezot dimoun ki ti la prezan? (Lir Mark 5:38-42.) Dan nouvo lemonn Bondye, pou annan en ‘gran letonnman ek lazwa’ ler plizyer bilyon dimoun pou resisite, akoz “tou dimoun bon konman move pou resisite.” (Akt 24:15; Zan 5:28, 29) Apartir sa moman, sa bann dimoun pou ganny sa posibilite pour rekonmans en nouvo lavi e menm annan sa lespwar pour viv pour touzour.

8, 9. (a) Ki pou arive avek pese ki nou’n erite avek Adan pandan sa Mil an ki Kris pou dirize? (b) Lo ki baz bann mor pou ganny zize?

⁸ Sa bann ki pou resisite pa pou ganny resisite pour zot perdi lavi. Bann dimoun ki pou ganny resisite pa pou ganny zize pour pese ki zot ti komet avan ki zot ti mor. (Rom. 6:7) Pandan sa Mil an ki Kris pou dirize, anmezir ki byenfe sa sakrifis i ganny aplike, bann dimoun obeisan anba dominasyon son Rwayonm pou gradyelman vin parfe e finalman zot pou ganny libere avek bann konsekans ki pese Adan in anmennen. (Rom. 8:21) Zeova “pou anval lanmor pour touzour, e Souvren Senyer Zeova pou sirman eswiy larm lo tou figir.” (Iza. 25:8) Parol Bondye i osi dir ki “bann liv [pou ganny] ouver,” sa i montre ki bann dimoun ki pou viv dan sa letan pou ganny nouvo lenformasyon. (Rev. 20:12) Anmezir ki later i ganny transformen pour vin en paradi, “se ladrwatir ki bann zabitan later pou vreman aprann.”—Iza. 26:9.

⁹ Bann dimoun ki pou resisite pa pou ganny zize pour keksoz mal ki zot in fer akoz pese ki zot in erite avek Adan, me dapre sa ki zot zot menm zot swazir pour fer. Revelasyon 20:12 i dir: “Bann mor ti ganny zize dapre sa ki zot ti’n fer, e ki ti’n ganny ekri[r] dan sa bann liv,” sa i vedir sa ki zot pou fer apre zot rezireksyon. Pa i en zoli legzanp kot Zeova i demontre lazistis, mizerikord, ek lanmour! Deplis, bann keksoz dan lepase dan sa vye lemonn ki’n fer zot soufer “pa pou vin dan [zot] lespri, zot pa pou ni vin dan leker.” (Iza. 65:17) Avek sa bann nouvo lenformasyon ankourazan ki pou disponib e en lavi ranpli avek bann bon keksoz, zot pou nepli sagren akoz bann move keksoz ki zot in pas atraver dan lepase. Tou sa bann move leksperyans ki zot in pas ladan dan lepase pou ganny efase dan zot memwar. (Rev. 21:4) Sa “gran lafoul” ki pou sirviv Armagedon pou eksperyans menm keksoz.—Rev. 7:9, 10, 14.

10. (a) Ki mannyer lavi pou ete dan nouvo lemonn Bondye? (b) Ki ou kapab fer pour fikse ou regar lo sa pri?

¹⁰ Dan nouvo lemonn Bondye, bann dimoun pou kapab viv san ki zot tonm malad ankor oubyen mor. “Okenn zabitan pa pou dir: ‘Mon malad.’” (Iza. 33:24) Finalman, bann zabitan sa nouvo later pou leve tou le bomaten avek en lasante parfe, e avek en gran lakontantman pour eksperyans en lot zour merveye. Zot pou enpasyan pour annan en travay satisfezan e pour asosye avek lezot dimoun ki annan zot zentere aker. Pa en lavi koumsa i vreman en zoli pri! Akoz ou pa ouver ou Labib e lir sa bann profesi dan Izai 33:24 ek 35:5-7? Esey vwar ou dan sa senn. Sa pou ed ou fikse ou regar lo sa pri.

Serten ti aret fikse zot regar lo sa pri

11. Eksplike ki mannyer renny Salomon ti byen konmanse.

¹¹ Enn fwa ki nou’n aprann konsernan sa pri, nou bezwen travay dir pour kontinyen fikse nou regar lo la, akoz nou kapab ganny distrer avek lezot keksoz. Par egzanp, ler Salomon ti vin lerwa Izrael dan lepase, i ti priy Bondye avek limilite pour ganny konprenezon ek disernman pour li kapab ziz Son pep dan en bon fason. (Lir 1 Lerwa 3:6-12.) An rezilta sa, Labib i dir: “Bondye ti kontinyen donn Salomon en kantite lasazes ek konprenezon.” Vreman, “Salomon ti annan en pli gran lasazes ki tou dimoun dan bann pei Les e son lasazes ti pli gran ki lasazes Lezip.”—1 Rwa. 4:29-32.

12. Ki lavertisman Zeova ti donn avek bann ki ti pou vin lerwa Izrael?

¹² Me pli boner Zeova ti averti ki nenport dimoun ki vin lerwa “pa devret rod en kantite seval pour li” e ki i “pa devret rod en kantite madanm pour li, pour ki son leker pa elwannyen.” (Det. 17:14-17) En lerwa ki ti rod en kantite seval pour li, ti pou montre ki i ti pe depan lo son larme pour protez son nasyon olye depan lo Zeova, konman en Protekter. I ti pou danzere pour li rod en kantite madanm akoz sa bann madanm ti kapab sorti dan bann nasyon payen dan zot zalantour e ki ti pe partisip dan fo ladorasyon. Sa bann madanm ti a kapab fer sa lerwa elwannyen avek vre ladorasyon Zeova.

13. Kwa ki ti fer Salomon aret fikse son regar lo sa ki i ti’n ganny ofer?

¹³ Salomon pa ti ekout sa bann lavertisman. I ti plito fer sa ki Zeova ti’n klerman dir bann lerwa pa fer. I ti akimil plizyer milye seval ek kavalye. (1 Rwa. 4:26) I ti osi annan 700 madanm ek 300 konkibin sorti dan bann nasyon payen dan zalantour. Zot ti “fer son leker swiv lezot bondye; e son leker pa ti tou pour Zeova.” Salomon ti partisip dan fo ladorasyon degoutan sa bann nasyon payen ki son bann madanm etranze ti fer li swiv. Se pour sa rezon ki Zeova ti dir ki i ti “pou aras [Salomon] sa rwayonm.”—1 Rwa. 11:1-6, 11.

14. Ki ti rezilta dezobeisans Salomon ek nasyon Izrael ti anmennen?

¹⁴ Salomon ti aret fikse son regar lo sa privilez presye ki i ti annan pour reprezant sa vre Bondye. I ti pe vreman pratik fo ladorasyon. Avek letan, sa nasyon an antye ti vin aposta, e i ti ganny detrir dan lannen 607 A.N.L. Menm si finalman bann Zwif ti reetablir sa vre ladorasyon, plizyer syek pli tar Zezi ti santi li pouse pour dir: “Zot pou ganny arase Rwayonm Bondye, e i pou ganny donnen avek en lot nasyon ki pou prodwi son fri.” Se egzakteman sanmenm ki ti arive. Zezi ti dir: “Lala! [O]u lakaz aprezan in ganny abandonnen.” (Mat. 21:43; 23:37, 38) Akoz Salomon pa ti reste fidel, sa nasyon ti perdi sa gran privilez pour reprezant sa vre Bondye. An 70 N.L., larme Romen ti detrir Zerizalenm ek son tanp, e en kantite Zwif ki ti sirviv ti vin lesklav.

15. Lekel sa bann zonm ki ti aret fikse zot regar lo sa ki vreman enportan?

¹⁵ Zida Iskaryot ti enn parmi sa 12 zapot Zezi. Zida ti tann bann zoli lansennyman ki Zezi ti donnen e i ti vwar bann mirak ki i ti akonplir avek led lespri sen Bondye. Pourtan, Zida pa ti protez son leker. I ti’n ganny sa responsabilite pour ansarz larzan Zezi ek son 12 zapot. Me i “ti abitye vol larzan dan zot sak.” (Zan 12:6) I pa ti kapab kontrol son vorasite ziska ki i ti menm fer konplo avek bann sef relizye pour trai Zezi pour 30 pyes larzan. (Mat. 26:14-16) Demas, ki ti travay ansanm avek zapot Pol, ti en lot dimoun ki ti aret fikse son regar lo sa pri. Demas pa ti protez son leker. Pol ti dir: “Demas in abandonn mwan . . . akoz i pli kontan sa [le]monn prezan.”—2 Tim. 4:10; lir Proverb 4:23.

En leson pour sakenn ant nou

16, 17. (a) Ki mwayen pwisan Satan i servi pour opoz nou? (b) Kwa ki kapab ed nou pour fer fas avek nenport latak ki Satan i lans lo nou?

¹⁶ Tou bann serviter Bondye i devret pran aker sa bann legzanp ki dan Labib, akoz Labib i dir nou: “Tousala ti ariv zot pour servi legzanp pour lezot, me in ganny ekri[r] konman en lavertisman pour nou, ki’n ariv dan letan lafen.” (1 Kor. 10:11) Ozordi, nou pe viv dan bann dernyen zour sa move lemonn.—2 Tim. 3:1, 13.

¹⁷ Satan, “bondye . . . sa syek” i konnen ki “i reste li ankor zis en pti pe letan.” (2 Kor. 4:4; Rev. 12:12) I pou fer tou sa ki i kapab pour fer bann serviter Zeova kas zot fidelite avek Zeova. Satan pe kontrol sa lemonn, enkli bann diferan mwayen ki bann propagann i ganny propaze. Me pep Zeova i annan en keksoz pli pwisan, sa i “sa p[w]isans ki napa son parey.” (2 Kor. 4:7) Nou kapab depan lo pwisans Bondye pour fer fas avek nenport ki latak Satan i lans lo nou. Alor, nou ganny ankouraze pour priy regilyerman, e pour annan konfyans ki Zeova “pou donn son Lespri Sen tou bann ki demann li.”—Lik 11:13.

18. Ki latitid nou devret annan anver sa lemonn ozordi?

¹⁸ Nou osi ganny fortifye akoz nou konnen ki byento lemonn Satan pou ganny detrir me bann vre Kretyen pou sirviv. “Lemonn pou disparet ek tou son bann dezir; me sa ki fer lavolonte Bondye i reste eternelman.” (1 Zan 2:17) Vi ki nou konn sa, pa i ti pou demontre en mank lasazes pour en serviter Bondye mazinen ki i annan en keksoz dan sa lemonn ozordi ki kapab annan en valer pli dirab ki son relasyon avek Zeova! Sa lemonn ki anba kontrol Satan i parey en bato ki pe koule. Zeova in donn kongregasyon Kretyen konman en “bato sovtaz” pour son bann serviter fidel. Anmezir ki zot vin pli pros avek sa nouvo lemonn, zot kapab annan konfyans dan sa promes: “Bann mesan pou ganny detrir, me sa bann ki esper Zeova, zot pou reste lo later.” (Ps. 37:9) Alor, kontinyen gard zot regar fikse lo sa zoli pri!

Eski ou rapel?

• Ki mannyer Pol ti santi lo sa pri ki i ti’n ganny ofer?

• Lo ki baz bann ki pou viv pour touzour lo later pou ganny zize?

• Ki pli bon fason pour ou viv ozordi?

[Portre lo paz 13]

Eski ou vwar ou pe ganny sa pri ler ou lir bann resi Labib?