Kontinyen batir kongregasyon

“Alor ankouraz e fortifye kanmarad.”—1 TESA. 5:11.

1. Ki benediksyon nou gannyen lefet ki nou form parti kongregasyon Kretyen, me ki defi nou rankontre kantmenm sa?

I VREMAN en gran benediksyon pour form parti kongregasyon Kretyen. Ou annan en bon relasyon avek Zeova. Lefet ki ou depan lo son Parol konman en gid, sa i protez ou kont bann move konsekans ki en dimoun i fer fas avek ler i pa viv en lavi Kretyen. Ou antoure avek bann vre zanmi ki anvi sa ki byen pour ou. Wi, i annan en kantite benediksyon. Me laplipar Kretyen pe lalit avek diferan kalite problenm. Serten parmi zot i bezwen led pour konpran bann lansennyman o profon dan Parol Bondye. Lezot i malad oubyen deprimen ouswa zot kapab pe soufer akoz konsekans bann move desizyon ki zot in fer. Nou tou nou bezwen viv dan sa lemonn ki elwannyen avek Bondye.

2. Ki mannyer nou devret reazir ler nou bann frer pe pas atraver difikilte e akoz?

² Napa personn ki kontan pour vwar nou bann konpanyon Kretyen soufer oubyen lalit avek zot problenm. Zapot Pol ti konpar kongregasyon avek en lekor e i ti dir ki “si en parti lekor i soufer, tou lezot parti i soufer avek li.” (1 Kor. 12:12, 26) Dan bann sirkonstans parey, nou devret fer bokou zefor pour siport nou bann frer ek ser. I annan en kantite resi Labib ki rakonte ki mannyer bann manm kongregasyon ti ed lezot pour arive fer fas e sirmont zot difikilte. Anmezir ki nou egzamin sa bann resi, esey mazinen ki mannyer ou kapab ofer ou led dan sa menm fason. Ki mannyer ou kapab ed ou frer ek ser dan en sans spirityel e osi batir kongregasyon Zeova?

“Zot ti anmenn li kot zot”

3, 4. Dan ki fason Akila ek Prisil ti ed Apolos?

³ Ler Apolos ti al reste Efez, i ti deza pe pres avek devouman. Sa resi dan liv Akt i dir: “Plen avek lantouzyasm, i ti prese e ansenny egzakteman bann fe konsernan Zezi. Me i ti konn zis batenm Zan.” Apolos pa ti konnen ki si sa ganny batize “o non di-Per, di-Fis e di-Sent-Espri.” Sa i montre ki i ti’n ganny laverite avek bann disip Zan Batis ouswa bann disip Zezi avan Lapannkot lannen 33 N.L. Kantmenm i ti devoue, i ti annan serten lansennyman enportan ki Apolos pa ti konpran. Lefet ki i ti asosye avek lezot konpanyon Kretyen, ki mannyer sa ti ed li?—Akt 1:4, 5; 18:25; Mat. 28:19.

⁴ Akila ek Prisil, en koup Kretyen, ti tann Apolos pe ansenny avek lasirans dan sinagog, zot ti anmenn li kot zot e zot ti ansenny li lezot keksoz. (Lir Akt 18:24-26.) Zot ti azir dan en fason ki demontre lanmour. Byensir Akila ek Prisil ti servi bon zizman e rod fason pli efikas pour apros Apolos akoz zot pa ti anvi fer li santi konmsi zot ti pe kritik li. I pa ti konn sa bann lansennyman tou senpleman akoz i pa ti ankor konn listwar kongregasyon Kretyen depi son konmansman. San dout Apolos ti vreman apresye sa bann detay enportan ki son bann nouvo konpanyon ti partaz avek li. Sa bann lenformasyon ki Apolos ti’n gannyen ti “vreman itil” pour son bann frer ki ti reste Akai e i ti donn en bon temwannyaz.—Akt 18:27, 28.

5. Ki led ranpli avek lanmour plizyer proklanmater Rwayonm i ofer e ki rezilta sa in anmennen?

⁵ En kantite frer ek ser dan kongregasyon Kretyen ozordi i vreman rekonesan anver bann dimoun ki’n ed zot konpran Labib. En kantite etidyan in devlop en gran lanmitye avek zot ansenyan. Dan laplipar ka i demann annan en progranm letid regilye pandan plizyer mwan pour kapab ed en dimoun konpran laverite. Me bann proklanmater Rwayonm i anvi fer sa sakrifis akoz zot konpran ki lavi bann dimoun i an danze. (Zan 17:3) Pa i en lazwa pour vwar bann dimoun aksepte laverite, viv dapre sa ki zot in aprann konsernan laverite e servi zot lavi pour fer lavolonte Zeova!

Zot “ti dir bokou dibyen lo li”

6, 7. (a) Akoz Pol ti swazir Timote konman son konpanyon pour vwayaz avek li? (b) Ki progre Timote ti fer avek led ki i ti gannyen?

⁶ Ler Silas ti al vizit Lis avek zapot Pol pandan son dezyenm vwayaz misyonner, zot ti rankontre en zenn onm ki ti apel Timote, ki petet ti annan 19 an oubyen 20-t-an. “Bann frer ki ti reste Lis ek Ikonyonm ti dir bokou dibyen lo li.” Enis, manman Timote ek son granmanman Lois ti bann Kretyen batize, me son papa ti en non krwayan. (2 Tim. 1:5) Petet Pol ti’n fer konnesans avek son fanmir pandan son premye vizit dan sa landrwa detrwa lannen pli boner. Me aprezan zapot Pol ti vreman annan en gran lentere dan Timote akoz i paret ki i ti en zenn onm avek bann kalite remarkab. Alor avek laprouvasyon konsey ansyen dan sa bann kongregasyon, Timote ti akonpanny Pol dan son aktivite misyonner.—Lir Akt 16:1-3.

⁷ I ti annan en kantite keksoz pour Timote aprann avek son konpanyon ki ti pli aze ki li. Telman i ti en bon zelev, sa ti fer ki pli tar Pol ti annan konfyans pour anvoy li vizit bann kongregasyon e servi li konman son reprezantan. Pandan sa 15 an oubyen plis ki Timote ti asosye avek Pol, sa zenn onm ki ti mank leksperyans e timid ti progrese e vin en bon sirveyan.—Fili. 2:19-22; 1 Tim. 1:3.

8, 9. Ki kongregasyon i kapab fer pour ankouraz bann zenn? Donn en legzanp.

⁸ I annan bokou zenn onm ek zenn fiy dan kongregasyon ozordi ki annan en gran potansyel. Si bann konpanyon ki demontre devouman dan zot servis i ankouraz zot e pran swen avek zot, sa i kapab fer sa bann zenn fer plis zefor pour kalifye e aksepte bann gran responsabilite parmi pep Zeova. Get otour ou dan kongregasyon. Eski ou vwar okenn zenn ki ti pou kapab fer parey Timote? Avek ou led ek lankourazman, zot pou kapab vin pionye, Betelit, misyonner, sirveyan distrik oubyen rezyonal. Ki ou kapab fer pour ed zot fer zefor pour atenn sa bann lobzektif?

⁹ I fer 20-t-an depi ki Martin i form parti lafanmir Betel. I rapel avek rekonesans lentere ki en sirveyan rezyonal ti demontre dan li 30-t-an pase ler zot ti pe pres ansanm. Sa sirveyan ti koz avek lantouzyasm konsernan son servis dan Betel ler i ti en zenn onm. I ti ankouraz Martin pour fer parey setadir reflesir lo konman i kapab fer li disponib pour servi konman en Betelit. Martin i krwar ki i pa pou zanmen oubliy sa konversasyon ki ti annan en gran lefe lo bann swa ki i ti fer plitar. Alor ou pa zanmen konnen ki dibyen ou kapab fer pour bann zenn ki ou zanmi avek ler ou koz avek zot konsernan lobzektif spirityel ki zot kapab fikse.

‘Koz dan en fason konsolan avek bann ki dan depresyon’

10. Ki mannyer Epafrodit ti santi e akoz?

¹⁰ Epafrodit ti fer en gran vwayaz byen fatigan sorti Filip ziska Ronm pour rann vizit zapot Pol, ki ti dan prizon akoz son lafwa. I ti fer sa vwayaz konman en reprezantan kongregasyon Filip. I pa ti zis anmenn bann kado pour sa zapot me i ti osi pe mazin pour reste avek li pour fer tou sa ki i kapab pour ed Pol dan son sityasyon difisil. Ler i ti Ronm, Epafrodit ti tonm malad “e pre pour mor.” Epafrodit ti tonm dan depresyon akoz i ti mazinen ki i pa ti’n reisi akonplir son misyon.—Fili. 2:25-27.

11. (a) Akoz nou pa devret sirprann si serten dan kongregasyon i tonm dan depresyon? (b) Ki Pol ti demann bann frer ek ser pour fer pour Epafrodit?

¹¹ Dimoun i tonm dan depresyon ozordi akoz zot fer fas avek tou sort kalite presyon. Bann sif ki sorti kot Lorganizasyon Mondyal pour Lasante i montre ki 1 dimoun lo 5 dan lemonn i kapab tonm dan depresyon en moman dan zot lavi. Bann serviter Zeova osi i kapab fer fas avek sa problenm. En dimoun i kapab santi li dekouraze pour plizyer rezon. Par egzanp, i kapab annan difikilte pour pran swen avek son fanmir, i annan en move lasante, i dekouraze akoz fot ki i’n fer ouswa lezot keksoz. Ki bann Filipyen ti kapab fer pour ed Epafrodit? Pol ti ekrir: “Alor revwar li avek en gran lazwa konman en frer dan Senyer. Zot devre montre respe pour bann zonm parey li, parski i ti pre pour mor pour travay Kris. I’n riske son lavi pour ed mwan, parski zot menm zot pa ti kapab fer li.”—Fili. 2:29, 30.

12. Kwa ki kapab rekonfort en dimoun ki dan depresyon?

¹² Nou osi nou bezwen ankouraz nou bann frer ek ser ki dekouraze oubyen deprimen. San dout i annan bann keksoz pozitif ki nou kapab dir konsernan zot servis. Petet zot in fer bann sanzman dan zot lavi pour zot vin Kretyen oubyen fer servis a plen tan. Nou apresye zot zefor e nou kapab asir zot ki i leka osi pour Zeova. Si laz oubyen maladi i anpes serten serviter fidel fer tou sa ki zot ti kapab fer, nou merit kantmenm annan respe pour zot pour tou sa bann lannen ki zot in pase dan servis. Nenport ki sityasyon ki zot ladan aprezan, Zeova i donn sa konsey avek tou son bann serviter fidel: “Koz dan en fason konsolan avek bann ki dan depresyon e ed bann ki feb, pran pasyans avek tou dimoun.”—1 Tesa. 5:14, NW.

“Pardonn li e ankouraz” li

13, 14. (a) Ki aksyon serye bann Korentyen ti pran e akoz? (b) Ki lefe sa disiplin ti annan?

¹³ I ti annan en sityasyon ki ti arive dan kongregasyon Korent dan premye syek kot en zonm ti komet fornikasyon e i pa ti demontre ki i ti’n repantir. Son kondwit ti kapab sali kongregasyon e sa ti menm sokan pour bann dimoun ki pa ti krwayan. Alor Pol ti annan rezon demande ki sa zonm i ganny retire dan kongregasyon.—1 Kor. 5:1, 7, 11-13.

¹⁴ Sa disiplin ti annan en bon lefe. Sa ti protez kongregasyon kont okenn move lenfliyans e sa peser ti retourn a larezon e senserman repantir. Apre ki zapot Pol ti’n aprann ki sa zonm ti’n prouve par son aksyon ki i ti’n repantir, dan son dezyenm let i ti dir avek kongregasyon ki sa zonm i devret ganny reentegre dan kongregasyon. Pa zis sa ki Pol ti demann zot pour fer, i ti osi demann kongregasyon pour “pardonn li e ankouraz [sa peser ki’n repantir] pangar i ava tro ganny akable e tonm dan dezespwar.”—Lir 2 Korentyen 2:5-8.

15. Ki latitid nou devret annan anver bann dimoun ki’n repantir e ki’n ganny reentegre dan kongregasyon?

¹⁵ Ki nou aprann atraver sa resi? Nou tris kan bann dimoun i ganny ekskli dan kongregasyon. Zot kapab sali non Bondye e gat repitasyon kongregasyon. Zot menm kapab fer pese kont nou. Me ler en peser i repantir, i merit ganny reentegre dan kongregasyon par bann ansyen ki’n ganny demande pour egzamin son ka anba gidans Zeova, sa i vedir ki Zeova in pardonn li. (Mat. 18:17-20) Eski pa nou devret imit Li? Byensir, si nou azir dan en fason dir e pa oule pardonnen, sa i montre ki nou pe opoz Zeova. Eski pa nou devret plito montre avek bann ki’n repantir e ganny reentegre dan kongregasyon ‘ki nou kontan’ zot si nou oule kontribye anver lape ek linite dan kongregasyon e ganny laprouvasyon Zeova?—Mat. 6:14, 15; Lik 15:7.

“I itil pour mwan”

16. Akoz Pol ti dezapwente avek Mark?

¹⁶ En lot resi Labib i montre ki nou pa devret gard bann santiman negatif kont bann dimoun ki’n dezapwent nou. Par egzanp, Mark ti vreman dezapwent zapot Pol. Ki mannyer? Ler Pol ek Barnabas ti konmans zot premye vwayaz misyonner Mark ti al avek zot. Me en serten moman pour en rezon ki pa’n ganny mansyonnen, Mark ti kit son bann konpanyon e retourn kot li. Pol ti telman dezapwente avek sa desizyon ki Mark ti pran ki ler i ti plàn pour fer son dezyenm vwayaz, en gro dispit ti leve ant zot de Barnabas konsernan Mark. Akoz sa ki ti arive lo premye vwayaz, Pol pa ti dakor ki Mark i vwayaz avek zot.—Lir Akt 13:1-5, 13; 15:37, 38.

17, 18. Ki mannyer nou konnen ki sa problenm ant Pol ek Mark ti ganny rezourd e ki leson nou kapab tire?

¹⁷ Menm si Pol ti refize ki Mark i vwayaz avek li ankor, i kler ki Mark pa ti les sa tro dekouraz li akoz i ti kontiny son aktivite misyonner avek Barnabas dan en lot teritwar. (Akt 15:39) Parol ki Pol ti ekrir detrwa lannen plitar ti donn laprev ki i ti reste fidel e ki i ti diny konfyans. Plitar ler Pol ti dan prizon Ronm, i ti ekrir Timote e demann li pour vin vwar li. Dan sa menm let, Pol ti dir: “Anmenn Mark avek ou, i itil pour mwan dan servis Bondye.” (2 Tim. 4:11) Wi Pol ti’n remarke ki Mark ti’n fer bann bon progre.

¹⁸ Nou kapab aprann en leson atraver sa resi. Mark ti devlop bann kalite ki ti fer li vin en bon misyonner. I pa ti aret son servis pour Zeova menm si Pol ti refize ki i vin avek li. Pol ek Mark ti bann zonm spirityel e zot pa ti gard rankin antre zot. O kontrer plitar Pol ti rekonnet ki Mark ti en led vreman itil pour li. Alor ler bann frer oubyen ser i rankontre difikilte e sa problenm i ganny regle, i pli meyer pour al annavan e kontinyen ed lezot fer progre spirityel. Ler nou pozitif, sa i batir kongregasyon.

Kongregasyon ek ou

19. Ki led tou dimoun dan kongregasyon i kapab ofer kanmarad?

¹⁹ Dan sa bann “letan difisil” ki nou pe viv ladan, ou bezwen led ou bann frer ek ser dan kongregasyon e zot osi zot bezwen ou led. (2 Tim. 3:1) Petet bann Kretyen i pa touzour konnen ki zot pou fer pour zot reisi fer fas avek bann sityasyon ki zot pas atraver, me Zeova li i konnen. I kapab servi diferan manm dan kongregasyon enkli ou pour ed lezot swiv sa bon semen. (Iza. 30:20, 21; 32:1, 2) Pa i ti pou byen pour pran aker konsey zapot Pol! Alor, annou kontinyen “ankouraz e fortifye kanmarad, parey zot pe fer.”—1 Tesa. 5:11.

Ki ou pou reponn?

• Akoz i neseser pour ankouraz oubyen batir kanmarad dan kongregasyon?

• Ki kalite difikilte ou kapab ed lezot sirmonte?

• Akoz nou bezwen ed lezot dan nou kongregasyon?