Aprann avek Parol Bondye

Akoz aprann avek Bondye?

Sa lartik i soulev bann kestyon ki ou’n petet reflesir lo la e i montre kote ou kapab trouv larepons sa bann kestyon dan ou Labib. I pou en plezir pour Temwen Zeova ed ou pour trouv larepons sa bann kestyon.

 1. Akoz aprann avek Bondye?

Bondye i annan en bon nouvel konsernan en keksoz meyer pour limanite. I koz avek nou lo la dan Labib. Labib i parey en let ki sorti kot nou Papa lanmour dan lesyel.​—Lir Zeremi 29:11.

 2. Ki sa bon nouvel?

Limanite i bezwen en bon gouvernman. Napa okenn dirizan imen ki’n deza arive soulaz limanite avek vyolans, lenzistis, maladi oubyen lanmor. Me i annan en bon nouvel. Bondye pou donn limanite en bon gouvernman ki pou delivre nou avek tou sa ki fer nou soufer.​—Lir Danyel 2:44.

 3. Akoz i vreman enportan pour aprann avek Bondye?

Byento, Bondye pou elimin tou bann dimoun lo later ki pe fer lezot soufer. Me pour lemoman, i pe ansenny plizyer milyon dimoun ki annan limilite pour ki zot benefisye avek en meyer lavi baze lo lanmour. Atraver Parol Bondye, bann dimoun pe aprann konman pour fer fas avek bann problenm lavi, konman pour trouv vre boner e konman pour fer plezir Bondye.​—Lir Tsefanya 2:3.

 4. Lekel Loter Labib?

I annan 66 pti liv dan Labib. Labib in ganny ekrir par apepre 40 zonm. Sa senk premye liv Labib in ganny ekrir par Moiz anviron 3,500-z-an pase. Sa dernyen liv ti ganny ekrir par zapot Zan plis ki 1,900-z-an pase. Me bann ekriven Labib ti ekrir panse Bondye, non pa zot panse. Alor i Bondye ki Loter Labib.​—Lir 2 Timote 3:16; 2 Pyer 1:21.

Nou konnen ki Labib i sorti kot Bondye akoz in predir dan en fason egzakt e an detay sa ki pou arive dan lavenir. Napa okenn zonm ki kapab fer sa. (Izai 46:9, 10) Labib, i osi fer nou konn bann kalite dan personnalite Bondye. I annan sa pouvwar pour fer bann dimoun sanz zot lavi pour enn ki pli meyer. Sa bann laverite in konvenk plizyer milyon dimoun ki Labib i Parol Bondye.​—Lir Zozye 23:14; 1 Tesalonisyen 2:13.

 5. Ki mannyer ou kapab arive konpran Labib?

Zezi ti renonmen konman en ansenyan Parol Bondye. Menm si laplipar dimoun ki i ti koz avek ti familye avek Labib, zot ti bezwen led pour konpran sa liv. Pour ed zot, Zezi ti refer avek bann verse Labib enn apre lot e answit eksplik zot “pour [ki] zot kapab konpran Lekritir.” Dan sa seri lartik, “Aprann avek Parol Bondye,” sa menm metod pou ganny servi pour ed ou.​—Lir Lik 24:27, 45.

Napa bokou keksoz ki sitan enteresan pour nou, ki aprann avek Bondye konsernan bi lavi. Me petet serten dimoun pa pou kontan ki ou pe lir Labib. Pa bezwen dekouraze. Fodre ou aprann konn Bondye pour ou annan lespwar pour ganny lavi eternel.​—Lir Matye 5:10-12; Zan 17:3.

Pour plis lenformasyon, vwar sapit 2 dan liv Ki Labib i vreman dir? pibliye par Temwen Zeova.