Zeova i sa ‘Bondye ki donn lape’

“Ki Bondye, ki donn lape, i ava avek zot tou.”​—ROM. 15:33.

1, 2. Ki sityasyon difisil Zenez 32 ek 33 i koz lo la e ki ti arive finalman?

PROS avek Penouel, o bor vale Yabok, lo kote les larivyer Zourden, Ezai ti’n tande ki Zakob son frer zimo ti pe retourn se li. Menm si 20 an ti’n pase depi ki Ezai ti’n vann son drwa konman premye ne, Zakob ti per ki son frer ti anvi revanze e touy li. Ansanm avek 400 zonm, Ezai ti al zwenn son frer. Vi ki i ti per reaksyon son frer, Zakob ti anvoy bann kado enn deryer lot, ki ti plis ki 550 zannimo. Sak fwa ki i ti anvoy sa bann zannimo, son bann serviter ti dir Ezai ki sa ti en kado sorti kot son frer.

² A lafen de fen zot ti zwenn! Avek kouraz, Zakob ti al ver son frer e prosternen, pa zis en fwa me set fwa. Zakob ti’n fini fer sa keksoz pli enportan pour fer lape avek son frer. I ti’n priy Zeova pour li ganny delivre dan lanmen Ezai. Eski Zeova ti ekout son lapriyer? Wi. Labib i dir nou: “Ezai ti konmans taye pour zwenn li, e i ti may li, ser li dan son likou e anbras li.”​—Zen. 32:11-20; 33:1-4.

 3. Ki nou aprann avek sa resi lo Zakob ek Ezai?

³ Sa resi lo Zakob ek Ezai i montre ki nou devret fer tou sa ki nou kapab pour rezourd bann problenm ki kapab leve pour gat lape dan kongregasyon. Zakob ti esey fer lape avek son frer, pa akoz i ti’n fer en fot kont son frer e i ti anvi demann leskiz. O kontrer, Ezai ki ti’n mepriz son privilez konman premye ne e vann li avek Zakob pour en bol lantiy. (Zen. 25:31-34; Ebr. 12:16) Toudmenm, lafason ki Zakob ti tret son frer i montre ziska ki degre nou devret pare pour fer zefor pour prezerv lape avek nou bann frer ek ser. I osi montre nou ki Bondye i beni bann zefor ek lapriyer pour fer lape. Dan Labib, i annan bokou legzanp ki montre ki nou devret vin bann dimoun ki fer lape.

Pli bon legzanp pour swiv

 4. Ki Bondye in fer pour sov limanite avek pese ek lanmor?

⁴ Zeova i sa pli bon legzanp an sa ki konsern fer lape, i sa ‘Bondye ki donn lape.’ (Rom. 15:33) Zis mazin tou sa ki Zeova in pare pour fer pour nou kapab annan en relasyon anpe avek li. Konman bann desandans Adan ek Ev, nou tou nou’n ganny ‘rekonpans pour pese setadir lanmor.’ (Rom. 6:23) Me, Zeova i telman kontan nou ki i’n fer laranzman pour nou ganny sove ler i ti anvoy son Garson byenneme sorti dan lesyel pour vin lo later konman en imen parfe. Son Garson ti pare pour fer sa e les li ganny touye par bann lennmi Bondye. (Zan 10:17, 18) Sa vre Bondye ti resisit son Garson ki ti mont dan lesyel pour prezant valer son disan oubyen pri pour liber bann peser ki’n repantir avek lanmor eternel.​—Lir Ebre 9:14, 24.

5, 6. Ki lefe sakrifis Garson Bondye i annan lo relasyon bann imen avek Bondye?

⁵ Vi ki bann imen ti’n vin lennmi Bondye, ki lefe sakrifis Garson Bondye ti pou annan lo relasyon ant Bondye ek bann imen? Izai 53:5 i dir: “Pinisyon ki ti sipoze anmenn lape pour nou in vin lo li, e akoz son bann blesir nou’n ganny geri.” Olye ganny konsidere konman bann lennmi Bondye, bann imen obeisan i aprezan kapab annan en relasyon anpe avek Bondye. Labib i dir: “Dan [Zezi], nou’n ganny delivrans par son disan, nou’n resevwar pardon nou pese.”​—Efe. 1:7.

⁶ Labib i osi dir nou ki Bondye i servi Zezi pour akonplir son plan. Ki plan Zeova? I anvi “rekonsilye avek li menm liniver an antye . . . par lanmor son Garson.” Bondye i anvi fer lape avek “tou keksoz” setadir “bann keksoz swa lo later ou dan lesyel.” Ki sa bann keksoz?​—Lir Kolosyen 1:19, 20.

 7. Ki sa bann keksoz “dan lesyel” e “lo later” ki pou annan en bon relasyon avek Bondye?

⁷ Sakrifis Zezi in fer li posib pour bann Kretyen swazir ki’n “ganny zistifye” konman bann garson Bondye “annan lape avek Bondye.” (Lir Romen 5:1.) Zot menm zot sa bann keksoz ki “dan lesyel” akoz zot annan lespwar pour al viv dan lesyel e “rennyen lo later” konman bann lerwa ek pret. (Rev. 5:10) De lot kote, bann keksoz ki “lo later” pe refer avek bann imen ki repantir e ki finalman pou viv pour touzour lo later.​—Ps. 37:29.

 8. Ki nou kapab aprann avek legzanp Zeova an sa ki konsern fer zefor pour fer lape avek lezot?

⁸ Zapot Pol ti eksprim son rekonesans pour Zeova ler i ti ekrir bann Kretyen swazir Efez: “Bondye dan son gran konpasyon . . . , ler nou ti mor atraver nou dezobeisans ti fer nou reviv ansanm avek Kris. (Se par lagras ki zot in ganny sove).” (Efe. 2:4, 5) Ki swa nou annan lespwar pour viv dan lesyel ouswa lo later, nou vreman rekonesan anver Bondye pour son mizerikord ek son labonte ekstraordiner. Nou leker i ranpli avek rekonesans pour tou sa ki Zeova in fer pour limanite e annan en relasyon anpe avek li. Ler nou rankontre bann sityasyon ki kapab en danze pour linite kongregasyon, pa nou devret reflesir lo legzanp Bondye e vin bann dimoun ki fer lape!

Legzanp Abraam ek Izaak

9, 10. Ki mannyer Abraam ti montre ki i vreman kontan fer lape ler problenm ti leve avek Lot ek son bann gardyen troupo?

⁹ Konsernan sa zonm fidel Abraam, Labib i dir: “‘Abraam ti krwar dan Bondye, akoz son lafwa i ti ganny konsidere konman zis’, e i ti ganny apele zanmi Bondye.” (Zak 2:23) En fason ki Abraam ti montre ki i ti annan lafwa dan Bondye i akoz i ti toultan fer lape. Par egzanp, vi ki bann troupo Abraam ti pe ogmante, serten problenm ti leve ant son bann gardyen troupo ek gardyen troupo Lot, son neve. (Zen. 12:5; 13:7) Solisyon senp se ki Abraam ek Lot i separe. Ki Abraam ti pou fer dan sa sityasyon? Akoz son pozisyon ek son laz, Abraam ti’n kapab dir son neve ki i ti bezwen fer, me i ti montre ki i ti en dimoun ki ti vreman kontan fer lape.

¹⁰ Abraam ti dir son neve: “Silvouple annou pa les okenn dispit kontinyen antre mwan ek ou, ant mon bann gardyen troupo ek ou bann gardyen troupo, akoz nou nou frer.” I ti osi dir: “Eski pa pei antye i devan ou? Silvouple, annou separe. Si ou al a gos, alor mwan mon pou al a drwat; me si ou al a drwat, alor, mwan mon pou al a gos.” Lot ti swazir sa pli bon rezyon dan sa pei, me Abraam pa ti gard okenn rankin avek Lot akoz sa. (Zen. 13:8-11) Pli tar, ler Lot ti ganny tyonbo par son lennmi, Abraam pa ti ezite pour al ed son neve.​—Zen. 14:14-16.

11. Ki mannyer Abraam ti fer lape avek son vwazen bann Filisten?

¹¹ Mazin osi lafason ki Abraam ti fer lape avek son bann vwazen Filisten dan pei Kanaan. Sa bann dimoun ti’n “pran pardfors” sa pwi ki bann serviter Abraam ti’n fouye Beer-seba. Abraam ti’n defet kat lerwa pour kapab ed son neve Lot. Ki i ti’n kapab fer dan sa sityasyon avek bann Filisten? Olye lager avek zot pour repran son pwi, i ti plito reste trankil. Pli tar, lerwa Filisten ti vizit Abraam pour fer en lalyans lape avek li. I ti promet lerwa Filisten ki i ti pou tret byen son desandans. Apre sa, Abraam ti koz lo son pwi ki ti’n ganny vole. Sa lerwa pa ti oule krwar sa ki ti’n arive e i ti redonn li sa pwi. Abraam li ti kontinyen reste anpe avek bann zabitan dan sa pei.​—Zen. 21:22-31, 34.

12, 13. (a) Ki mannyer Izaak ti swiv legzanp son papa? (b) Ki mannyer Zeova ti beni Izaak akoz i ti kontan fer lape?

¹² Parey son papa Abraam, Izaak ti kontan fer lape avek lezot. Sa i evidan dan lafason ki Izaak ti tret bann Filisten. Izaak ek son fanmir ti reste Beer-laay-roy dan Negeb, en rezyon sek. Akoz lafamin dan sa pei, zot ti al dan nor dan en landrwa ki ti apel Gerar ki ti dan teritwar bann Filisten. Dan sa rezyon, Zeova ti beni Izaak avek bann bon rekolt e son troupo ti ogmante. Bann Filisten ti zalou li. Zot pa ti oule ki Izaak i vin ris parey son papa, alor zot ti bous bann pwi ki bann serviter Abraam ti’n fouye dan sa rezyon. Finalman, lerwa Filisten ti dir Izaak sorti dan sa landrwa. Izaak ti kontan lape, alor i ti ale.​—Zen. 24:62; 26:1, 12-17.

¹³ Apre ki Izaak ti’n avans en pti pe pli lwen, son bann berze ti fouy en lot pwi. Bann berze Filisten ti dir ki sa delo ti pour zot. Parey son papa Abraam, Izaak pa ti lager avek zot pour en pwi. O kontrer, i ti fer son bann zonm fouy en lot pwi. Bann Filisten ti dir ki sa pwi osi ti pour zot. Pour gard sa lape antre zot, Izaak ti lev kan e al dan en lot landrwa ankor. Laba, son bann serviter ti fouy en lot pwi ki Izaak ti apel Reobot. Avek letan, i ti al reste dan en landrwa pli fertil dan rezyon Beer-Seba, kot Zeova ti beni li e dir li: “Pa bezwen per akoz mon avek ou, e mon pou beni ou e fer ou desandans vin bokou akoz Abraam mon serviter.”​—Zen. 26:17-25.

14. Ki mannyer Izaak ti montre ki i ti en dimoun ki kontan fer lape kan lerwa Filisten ti vin fer en lalyans lape avek li?

¹⁴ Sirman Izaak ti’n kapab lager akoz i ti annan drwa servi bann pwi ki son bann serviter ti’n fouye. Apre tou, lerwa Filisten ek son bann zofisye ti’n vin vizit li Beer-Seba e zot ti anvi fer en lalyans lape avek li an dizan: “San okenn dout, nou’n vwar ki Zeova i vreman avek ou.” Kantmenm sa, pour prezerv lape, Izaak ti plifere sanz landrwa plis ki en fwa olye lager. Sa moman osi Izaak ti montre ki i ti en dimoun ki kontan fer lape. Sa resi istorik i dir: “I ti fer en festen pour [son bann viziter] e zot ti manze e bwar. Lannmen bomaten zot ti lev boner e zot ti fer en serman avek kanmarad. Apre sa, Izaak ti fer zot ale . . . anpe.”​—Zen. 26:26-31.

Legzanp sa garson ki Zakob ti kontan en kantite

15. Akoz bann frer Zozef pa ti koz byen avek li?

¹⁵ Zakob, garson Izaak ti grandi pour vin “en zonm san repros.” (Zen. 25:27) Parey i’n ganny dir o konmansman, Zakob ti rod fason pour fer lape avek son frer Ezai. San okenn dout, Zakob ti’n benefisye avek legzanp son papa Izaak dan sa domenn. Me ki pour dir lo bann garson Zakob? Parmi son 12 garson, Zozef ti sa enn ki Zakob ti pli kontan. Zozef ti en garson obeisan ki ti annan respe e i ti vreman enterese avek byennet son papa. (Zen. 37:2, 14) Me, bann frer Zozef ti sitan zalou li ki zot pa ti zanmen koz byen avek li. Zot ti vann Zozef konman en lesklav e zot ti fer krwar avek zot papa ki Zozef ti’n ganny touye par en bebet feros.​—Zen. 37:4, 28, 31-33.

16, 17. Ki mannyer Zozef ti montre ki i ti kontan pour fer lape avek son bann frer?

¹⁶ Zeova ti beni Zozef. Avek letan, Zozef ti vin premye minis Lezip, dezyenm zis apre Faraon. Bann frer Zozef ti al Lezip akoz en lafanmin terib, me zot pa ti rekonnet li dan son lenz ofisyel bann Ezipsyen. (Zen. 42:5-7) I ti’n kapab fasil pour Zozef fer son bann frer peye pour sa martir ki zot ti’n fer li ek son papa. Me, olye revanze, Zozef ti fer lape avek zot. Kan i ti evidan ki son bann frer ti’n repantir, i ti fer zot konnen lekel li an dizan: “Pa bezwen sagren e pa ankoler avek zot lekor akoz zot ti vann mwan isi; akoz Bondye in anvoy mwan par devan pour ki lavi i ganny sove.” Apre sa, i ti anbras tou son bann frer e plere ansanm avek zot.​—Zen. 45:1, 5, 15.

¹⁷ Apre lanmor zot papa Zakob, bann frer Zozef ti krwar ki Zozef ti pou revanze. Anmezir zot ti eksprim zot lafreyer, Zozef “ti plere” e dir: “Pa bezwen per. Mwan ki pou kontinyen donn zot ek zot zanfan manze.” Zozef, sa zonm ki kontan lape ti “rekonfort zot e reasir zot par son parol.”​—Zen. 50:15-21.

“Ekri pour nou lansennyman”

18, 19. (a) Ki mannyer ou’n benefisye avek legzanp bann dimoun ki’n fer lape dan sa lartik? (b) Ki nou pou etidye dan lot lartik?

¹⁸ Pol ti ekrir: “Tou sa ki’n ganny ekri dan lepase in ganny ekri pour nou lansennyman, pour ki par pasyans ek konsolasyon ki Lekritir i donnen nou posed lesperans.” (Rom. 15:4) Ki mannyer nou’n benefisye avek sa ki nou’n egzaminen lo bon legzanp Zeova, e osi lo bann resi dan Labib lo Abraam, Izaak, Zakob ek Zozef?

¹⁹ Ler nou reflesir lo sa ki Zeova ti pare pour fer pour li annan en bon relasyon avek bann imen peser, pa sa i devret motiv nou pour fer tou sa ki nou kapab pour fer lape avek lezot? Legzanp Abraam, Izaak, Zakob ek Zozef i montre bann paran ki zot kapab annan en bon lenfliyans lo zot zanfan. Deplis, sa bann resi i montre ki Zeova i beni zefor sa bann ki esey fer lape. I pa drol alor ki Pol ti dir ki Zeova i sa ‘Bondye ki donn lape.’ (Lir Romen 15:33; 16:20.) Lot lartik pou montre akoz Pol ti met lanfaz lo lenportans pour fer lape e ki mannyer nou kapab fer li.

Ki ou’n aprann?

• Ki Zakob ti fer pour fer lape ler i ti pe al zwenn Ezai?

• Zeova in fer zefor pour ki limanite i anpe avek li. Ki lefe sa i annan lo ou?

• Ki ou’n aprann avek Abraam, Izaak, Zakob ek Zozef, bann zonm ki ti kontan fer lape?

[Portre lo paz 19]

Ki keksoz pli enportan Zakob ti fer pour fer lape avek Ezai?