Eski ou pe reflekte laglwar Zeova?

“Nou reflekte laglwar Zeova parey en laglas.”​—2 KOR. 3:18, NW.

KI OU POU REPONN?

Ki mannyer nou kapab glorifye Zeova menm si nou enparfe?

Ki mannyer lapriyer e asiste renyon Kretyen i ed nou reflekte laglwar Bondye?

Kwa ki pou ed nou kontinyen glorifye Zeova?

1, 2. Akoz i rezonnab pour dir ki nou kapab imit bann kalite Zeova?

NOU tou nou resanble nou paran dan en fason oubyen en lot. Alor nou pa vwar li drol si en dimoun i dir avek en pti garson: ‘Ou parey ou papa,’ ouswa avek en pti fiy: ‘Ou fer mwan mazin ou manman.’ Souvan bann zanfan i imit sa ki zot paran i fer. Me ki nou pou dir lo nou? Eski nou kapab imit Zeova, nou Papa ki dan lesyel? Menm si nou pa vwar li, nou kapab konn son bann zoli kalite par obzerv son kreasyon, etidye e medit lo son Parol espesyalman lo bann keksoz ki Son Garson Zezi Kri ti dir e fer. (Zan 1:18; Rom. 1:20) Alor i posib pour nou reflekte laglwar Zeova.

² Avan ki Adan ek Ev ti ganny kree, Bondye ti konnen ki imen ti pou kapab akonplir plan ki i ti annan pour zot, reflekte son bann kalite e rann li glwar. (Lir Zenez 1:26, 27.a) Konman bann ki kontan Bondye, nou devret demontre bann kalite ki sa Enn ki’n fer nou i annan. Si nou fer sa, nou annan sa gran privilez pour reflekte son laglwar menm si nou kiltir, ledikasyon oubyen lorizin i diferan. Akoz? Parski “Bondye pa fer preferans pour personn, me dan nenport ki nasyon tou dimoun ki annan respe pour li e ki fer sa ki byen Bondye i kontan li.”​—Akt 10:34, 35.

 3. Ki santiman bann Kretyen i annan kan zot servi Zeova?

³ Bann Kretyen swazir i reflekte laglwar Zeova. Zapot Pol, enn parmi zot ti ekrir: “Nou tou ki vwal i’n ganny tire lo nou figir, nou [“reflekte laglwar Zeova parey en laglas,” NW], sortan dan en laglwar pour al dan en laglwar bokou pli gran.” (2 Kor. 3:18) Kan Moiz ti sorti lo Montanny Sinai avek sa de tablet ki ti annan sa Dis Komannman lo la, bann reyon lalimyer ti pe sorti lo son figir akoz Zeova ti’n koz avek li. (Egz. 34:29, 30) Menm si bann Kretyen pa’n pas dan menm leksperyans avek Moiz e bann reyon lalimyer pa pe sorti lo zot figir, bann dimoun i vwar ki zot annan lazwa kan zot koz avek lezot lo Zeova, son bann kalite ek son zoli plan pour imen. Bann Kretyen swazir ek zot bann konpanyon i reflekte laglwar Zeova dan zot lavi ek minister parey en laglas an metal ki ti annan dan letan lontan ki’n byen ganny poli. (2 Kor. 4:1) Eski ou pe reflekte laglwar Zeova par annan en bon kondwit e partisip regilyerman dan predikasyon?

NOU ANVI REFLEKTE LAGLWAR ZEOVA

4, 5. (a) Kwa ki nou bezwen lit avek parey Pol? (b) Ki lefe pese in annan lo nou?

⁴ Konman bann serviter Zeova, nou sirman anvi onor e glorifye nou Kreater dan tou sa ki nou fer. Me souvandfwa nou pa arive fer sa. Pol ti annan menm problenm. (Lir Romen 7:21-25.) I ti eksplike akoz nou bezwen lite, an dizan: “Parski tou dimoun in fer pese e pa’n arive ganny laglwar Bondye.” (Rom. 3:23) Vi ki nou’n erit pese avek Adan, imen in vin anba dominasyon pese, sa move met.​—Rom. 5:12; 6:12.

⁵ Ki savedir pese? I tou sa ki lekontrer avek personnalite, fason fer, standar ek lavolonte Zeova. Pese i gat nou relasyon avek Bondye. Pese i anpes nou reflekte laglwar Zeova zis parey en dimoun ki pe tir fles i mank son target. Nou kapab fer pese dan de fason, par fer en fot oubyen par ekspre. (Nom. 15:27-31) Pese in byen anrasinen dan imen e sa i kre en baryer ant zot ek zot Kreater. (Ps. 51:5; Iza. 59:2; Kol. 1:21) Mazorite dimoun pa pe viv dapre standar Bondye e sa i fer zot perdi sa bon loportinite pour reflekte son laglwar. Napa nanryen ki annan en pli move lefe lo imen ki pese.

 6. Ki mannyer nou kapab glorifye Bondye menm si nou enparfe?

⁶ Malgre nou lenperfeksyon, Zeova in demontre ki i sa ‘Bondye ki donn lesperans.’ (Rom. 15:13) I’n servi sakrifis Zezi pour aboli pese. Kan nou egzers lafwa dan sa sakrifis, nou nepli en “lesklav pese” o kontrer, nou pou kapab reflekte laglwar Bondye e vin son zanmi. (Rom. 5:19; 6:6; Zan 3:16) Si nou kontinyen reste konman en zanmi Bondye, nou pou kapab ganny son benediksyon ozordi menm e dan lavenir nou pou kapab viv en lavi parfe pour touzour. Bondye i vwar sakenn nou konman bann dimoun ki kapab reflekte son laglwar. Pa sa i en gran benediksyon pour bann imen enparfe!

ANNOU REFLEKTE LAGLWAR BONDYE

 7. Ki nou bezwen admet pour nou kapab reflekte laglwar Bondye?

⁷ Pour nou kapab byen reflekte laglwar Bondye, nou bezwen rekonnet nou natir enparfe. (2 Kron. 6:36) Alor nou tou nou bezwen fer bokou zefor pour kontrol sa bann tandans pour fer pese pour nou kapab reflekte laglwar Bondye. Par egzanp, si nou’n tonm dan sa move labitid pour get pornografi, nou devret rekonnet ki nou bezwen rod led spirityel. (Zak 5:14, 15) Sa i sa premye pa ki nou bezwen pran pour viv en lavi ki vreman anmenn loner lo Bondye. Konman bann adorater Zeova, nou bezwen kontinyen egzamin nou lekor pour konnen si nou pe viv dapre son bann standar drwat. (Prov. 28:18; 1 Kor. 10:12) Nenport ki pese ki nou annan tandans pour komet, nou devret kontinyen fer zefor pour kontrol zot pour nou kapab reflekte laglwar Bondye.

 8. Ki nou devret fer menm si nou enparfe?

⁸ Zezi ti sa sel imen ki’n toultan fer sa ki fer plezir Bondye e reflekte Son laglwar. Menm si nou parfe parey Zezi, nou kapab e devret fer zefor pour swiv son legzanp. (1 Pyer 2:21) Zeova i vwar nou zefor ek progre ki nou fer pour glorifye li e i donn nou son benediksyon.

 9. Ki rol Labib i zwe dan lavi bann Kretyen ki anvi viv an armoni avek bann prensip Bondye?

⁹ Parol Zeova i kapab ed nou pour reflekte son laglwar pli byen. I enportan ki nou fer letid Labib o profon e medit lo sa ki nou lir. (Ps. 1:1-3) Si nou lir Labib tou le zour sa pou ed nou pour fer progre. (Lir Zak 1:22-25.) Sa ki nou aprann dan Labib pou batir nou lafwa e fer nou vin pli determinen pour pa tonm dan bann pese grav e pour fer plezir Zeova.​—Ps. 119:11, 47, 48.

10. Ki mannyer lapriyer i kapab ed nou pour servi Zeova pli byen?

¹⁰ Pour nou kapab reflekte laglwar Bondye, nou osi bezwen “priye tou letan.” (Rom. 12:12) Nou bezwen e devret priye ki Zeova i ed nou pour servi li dan sa fason ki i kontan. Nou osi kapab demann li son lespri sen, plis lafwa, lafors pour reziste tantasyon ek abilite pour “anons byen mesaz laverite.” (2 Tim. 2:15; Mat. 6:13; Lik 11:13; 17:5) Zis parey en zanfan i depan lo son papa, nou osi nou bezwen depan lo Zeova nou Papa ki dan lesyel. Si nou demann li pour ed nou servi li pli byen nou kapab annan konfyans ki i pou fer li. Pa zanmen krwar ki nou en fardo pour li! O kontrer, atraver lapriyer annou rann li glwar, remersi li, rod son gidans espesyalman kan nou pe fer fas avek problenm e demann li pour ed nou pour servi li dan en fason ki pou glorifye son non sen.​—Ps. 86:12; Zak 1:5-7.

11. Ki mannyer bann renyon kongregasyon i ed nou pour reflekte laglwar Zeova?

¹¹ Bondye in donn “lesklav fidel e pridan” sa responsabilite pour pran swen avek son bann mouton presye. (Mat. 24:45-47, NW; Ps. 100:3) Sa lesklav i anvi ed nou tou pour reflekte laglwar Zeova pli byen. Pour fer sa, sa lesklav i servi bann renyon kongregasyon pour ed nou devlop bann bon kalite zis parey en koudriyez i fer bann azisteman lo nou lenz pour ki nou annan en pli bon laparans. (Ebr. 10:24, 25) Alor i pour sa rezon ki nou devret asiste renyon aler. Si nou annan sa labitid pour ariv tar nou pa pou benefisye plennman avek led ki nou kapab gannyen pour amelyor nou bann kalite spirityel.

ANNOU FER PAREY BONDYE

12. Ki mannyer nou kapab fer parey Bondye?

¹² Si nou anvi reflekte laglwar Zeova, nou pou bezwen “fer tou [nou] zefor pour fer tou parey li.” (Efe. 5:1) En fason ki nou kapab fer parey Zeova se par aprann pour vwar keksoz parey li. Si nou fer keksoz dapre nou menm e pa dapre son fason, sa pou dezonor li e nou pou trouv nou dan problenm. Vi ki sa lemonn i ganny kontrole par Dyab, nou bezwen fer bokou zefor pour ay sa ki mal zis parey Zeova e kontan sa ki i kontan. (Ps. 97:10; 1 Zan 5:19) Nou bezwen vreman krwar ki sa sel fason ki nou kapab servi Zeova se par fer tou keksoz pour son laglwar.​—Lir 1 Korentyen 10:31.

13. Akoz nou devret ay pese e ki sa pou pous nou pour fer?

¹³ Nou devret ay pese akoz Zeova i ay pese. Anfet, nou devret reste lwen avek pese, pa ni menm esey vwar ki degre pros nou kapab arive avek en pese menm si nou pa fer li. Par egzanp, nou bezwen veye ki nou pa vin en aposta akoz apostazi i en pese ki anpes nou glorifye Bondye. (Det. 13:6-9) Annou evite asosye avek bann aposta oubyen okenn dimoun ki dir i en frer me ki pe fer bann keksoz ki anmenn dezoner lo Bondye. Nou devret fer sa, menm si sa dimoun i en manm nou fanmir. (1 Kor. 5:11) I pa vo lapenn pour esey prouve ki bann aposta ek bann ki kritik lorganizasyon Zeova i mal. Anfet, i pa bon e i menm danzere pour nou spirityalite pour lir zot lansennyman ki swa dan zot piblikasyon oubyen lo Internet.​—Lir Izai 5:20b; Matye 7:6.

14. Ki kalite ki devret evidan dan nou anmezir ki nou esey reflekte laglwar Bondye e akoz?

¹⁴ En fason ekselan ki nou kapab fer parey nou Papa ki dan lesyel se par demontre lanmour. (1 Zan 4:16-19) Anfet, se lanmour pour nou bann frer ek ser Kretyen ki idantifye nou konman bann disip Zezi e serviter Zeova. (Zan 13:34, 35) Nou devret kontinyen demontre lanmour menm si parfwa nou lenperfeksyon ki nou’n erite i fer li difisil. Si nou devlop lanmour ek lezot kalite ki Bondye i annan sa pou ed nou pour fer bann bon keksoz e pa fer pese.​—2 Pyer 1:5-7.

15. Ki mannyer lanmour i afekte relasyon ki nou annan avek lezot?

¹⁵ Lanmour pou fer nou anvi fer bann bon keksoz pour lezot. (Rom. 13:8-10) Par egzanp, nou lanmour pour nou konzwen pou anpes nou komet adilter. Lanmour pour bann ansyen ek respe pour zot travay pou ed nou pour obeir e soumet avek zot. Bann zanfan ki kontan zot paran pa pou dezobeir, mank respe e koz an mal lo zot. Si nou kontan bann dimoun otour nou, nou pa pou konsider zot enferyer, nou pou montre respe ler nou koz avek zot. (Zak 3:9) Lanmour pou pous bann ansyen pour tret troupo Bondye avek tandres.​—Akt 20:28, 29.

16. Ki mannyer lanmour pou ed nou dan predikasyon?

¹⁶ Nou osi bezwen demontre lanmour dan predikasyon. Akoz nou annan bokou lanmour pour Zeova, nou pou kontinyen pres sa bon nouvel menm si bann dimoun pa enterese avek nou mesaz oubyen azir dan en move fason anver nou. Lanmour pou pous nou pour prepar byen e fer bokou zefor pour vin efikas dan predikasyon. Si nou vreman kontan Bondye ek nou prosen, nou pa pou vwar predikasyon konman en fardo. O kontrer nou pou konsider predikasyon konman en gran privilez e nou pou fer li avek bokou lazwa.​—Mat. 10:7.

KONTINYEN GLORIFYE ZEOVA

17. Lefet ki nou konpran ki pese i anpes nou reflekte laglwar Bondye, ki nou bezwen fer?

¹⁷ Kontrerman avek nou, bann dimoun an zeneral pa realize ki pese i en keksoz vreman serye. Sa i fer nou realize ki nou bezwen lalit kont nou bann tandans pour fer pese. Si nou fer sa, sa pou ed nou pour antrenn nou konsyans pour ki i ed nou pour azir dan sa pli bon fason kan sa tandans pour fer pese i konmans devlope dan nou lespri ek leker. (Rom. 7:22, 23) I vre ki nou napa ase lafors pour konbat kont nou bann febles me Bondye pou donn nou lafors pour fer sa ki byen dan nenport ki sityasyon.​—2 Kor. 12:10.

18, 19. (a) Kwa ki pou ed nou reisi lalit kont Satan ek son bann demon? (b) Kwa ki nou devret determinen pour fer?

¹⁸ Si nou anvi glorifye Zeova, nou bezwen lalit kont Satan ek son bann demon. Nou servi bann lekipman batay ki Bondye in donn nou pour nou reisi dan sa lalit kont zot. (Efe. 6:11-13) Satan pe kontinyelman esey anpes Zeova ganny sa laglwar ki zis Li ki merite. Dyab pe osi fer bokou zefor pour esey gat nou relasyon avek Zeova. Pa i en kalot dan figir Satan kan nou enkli plizyer milyon zonm, madanm ek zanfan enparfe i reste fidel e glorifye Bondye! Alor, annou kontinyen loue Zeova zis parey bann lanz i fer an dizan: “Nou Senyer, nou Bondye, ou merite resevwar laglwar, loner ek pisans, parski ou’n kree tou keksoz, e se par ou lavolonte ki zot egziste e ki zot in ganny kree.”​—Rev. 4:11.

¹⁹ Annou determinen pour kontinyen glorifye Zeova dan nenport ki sityasyon ki nou ladan. I vreman kontan ki i annan en kantite dimoun ki pe fer zot mye pour fer parey li e reflekte son laglwar. (Prov. 27:11) Ki nou santiman i parey sa ki David ti dir dan sa sanson: “Mon loue ou, O Zeova mon Bondye, avek tou mon leker e mon pou glorifye ou non pour touzour, akoz ou annan en gran labonte leker anver mwan.” (Ps. 86:12) Pa nou pe vreman esper avek enpasyans sa zour kan nou pou kapab reflekte laglwar Zeova dan en fason parfe e rann li glwar pour touzour! Tou dimoun obeisan pou kapab fer sa zoli leksperyans. Eski ou pe reflekte laglwar Zeova e anvi glorifye li pour touzour?

[Not anba lo paz]

[Portre lo paz 31]

Eski ou pe reflekte laglwar Zeova dan sa bann fason?