“Fer sa an mon souvenir”

“Zezi ti pran dipen, e apre ki i ti’n remersi, i ti kase e dir: ‘Sa i mon lekor ki mon’n donnen pour zot. Fer sa an mon souvenir.’”​—1 KOR. 11:23, 24.

KI OU POU REPONN?

Ki mannyer dat Memoryal i ganny kalkile?

Ki sa dipen ek sa diven i reprezante dan Repa Senyer?

Nenport lespwar ki nou annan, akoz i enportan pour prezan zour Memoryal?

1, 2. Ki bann zapot ti kapab pe mazinen ler zot ti pe al Zerizalenm?

‘VI KI i nepli annan nyaz dan lesyel nou kapab vwar premye kartye lalin. Yer swar, bann gardyen Zerizalenm ti’n bezwen vwar premye kartye lalin. Dek ki Sannedren ti’n konn sa, zot ti anons konmansman en nouvo mwan, sa ti Nizan. Apre sa, en dife i ganny alimen oubyen bann mesaze i ganny anvoye pour fann sa nouvel partou kote, menm dimoun isi dan lavil Pere in tann sa nouvel. Sertennman, Zezi pou anvi al Zerizalenm pour ki i ariv avan Lapak.’

² Petet sa bann ki ti avek Zezi dan lavil Pere (lot kote Larivyer Zourden) ti pe mazin sa, ler Zezi ti pe al Zerizalenm pour dernyen fwa. (Mat. 19:1; 20:17, 29; Mark 10:1, 32, 46) Dek ki bann Zwif ti konnen kan ki premye zour Nizan ti tonbe, Lapak ti pou ganny fer 13 zour pli tar, apre soley kouse le 14 Nizan.

 3. Akoz bann Kretyen i annan rezon pour enterese avek dat Lapak?

³ Dat Repa Senyer ki koresponn avek dat Lapak pou tonm apre soley kouse le 14 Avril 2014. Sa pou en zour spesyal pour bann vre Kretyen ek bann ki enterese. Akoz? Parski sa ki nou lir dan 1 Korentyen 11:23-25: “Dan lannwit ki i ti ganny livre Senyer Zezi ti pran dipen, e apre ki i ti’n remersi, i ti kase e dir: ‘Sa i mon lekor ki mon’n donnen pour zot. Fer sa an mon souvenir.’ Demenm, apre repa, i ti pran lakoup.”

 4. (a) Ki kestyon nou kapab demande lo Memoryal? (b) Ki mannyer dat Memoryal i ganny kalkile tou le-z-an? (Vwar sa bwat “Memoryal pour lannen 2014.”)

⁴ San dout ou pou al sa sel levennman ki Zezi i demann son bann disip pour fer tou le-z-an. Byen davans demann ou lekor: ‘Ki mannyer mon devret prepar mwan pour sa zour swar? Ki bann keksoz ki pou ganny servi? Ki prosedir pou ganny swiv pandan sa levennman? Ki lenportans sa lokazyon ek sa bann keksoz ki pou ganny servi i devret annan pour mwan?’

BANN LANBLENM

 5. Ki preparasyon Zezi ti fer avek son bann zapot pour sa dernyen Lapak?

⁵ Kan Zezi ti dir son bann zapot met en lasanm pare pour repa Lapak, i pa ti mansyonn okenn dekorasyon, o kontrer i kapab ki i ti zis anvi en landrwa konvenab, prop avek ase lespas pour bann envite. (Lir Mark 14:12-16.) Zot ti pou bezwen met pare serten keksoz pour sa repa, sa i enkli dipen san lelven ek diven rouz. Apre ki zot ti’n fini repa Lapak, Zezi ti koz lo sa de lanblenm.

 6. (a) Apre repa Lapak, ki Zezi ti dir konsernan sa dipen? (b) Ki kalite dipen i ganny servi zour Memoryal?

⁶ Zapot Matye ki ti la ti ekrir pli tar: “Zezi ti pran dipen, ti beni, ti kase, e ti donn son bann disip an dizan, ‘Pran manze.’” (Mat. 26:26) Sa “dipen” ti san lelven parey sa enn ki ti ganny servi zour Lapak. (Egz. 12:8; Det. 16:3) Sa dipen ti ganny fer avek lafarin dible ek delo san okenn lelven oubyen asezonnen avek disel. Vi ki i ti san lelven i pa ti pou leve. I ti pou pir, sek, krokan, fasil pour kas an pti morso. Ozordi, avan Memoryal, bann ansyen dan kongregasyon i kapab demann en dimoun pour fer sa dipen avek lafarin dible ek delo e kwi li dan en pwalon apenn si i annan delwil. (Si napa lafarin dible i kapab ganny fer avek lafarin diri, lorz, mai oubyen lezot ki en pe parey.) Matzoth en dipen Zwif, enn ki napa malt, dizef oubyen zonnyon i osi kapab ganny servi.

 7. Ki kalite diven Zezi ti koz lo la e ki kalite diven ki kapab ganny servi pour Memoryal?

⁷ Matye i kontinyen: “[Zezi] ti pran lakoup, apre ki i ti’n beni, i ti donn zot, an dizan, ‘Bwar zot tou.’” (Mat. 26:27, 28) Sa ki Zezi ti pran ti en lakoup diven rouz. (I pa ti kapab dyous rezen akoz rekolt rezen ti’n pase depi lontan.) I ti napa diven dan sa premye repa Lapak Lezip, me Zezi pa ti defann servi diven dan Lapak. I ti menm servi en pe dan Repa Senyer. Alor bann Kretyen i servi diven dan Memoryal. Vi ki ti napa nesesite pour ogmant valer disan Zezi, sa diven ki ganny servi napa okenn zepis oubyen brandy. Diven rouz pir i devret ganny servi, enn ki ganny fer dan lakour oubyen servi diven komers parey Beaujolais, Burgundy oubyen Chianti.

SINIFIKASYON BANN LANBLENM

 8. Akoz bann Kretyen i enterese pour konn sinifikasyon sa dipen ek sa diven?

⁸ Zapot Pol ti fer kler ki lezot Kretyen apard ki bann zapot ti devret kontinyen obzerv Repa Senyer. I ti ekrir bann disip Korent: “Lansennyman ki mon’n resevwar avek nou Senyer e ki mon’n transmet zot . . . Senyer Zezi ti pran dipen, e apre ki i ti’n remersi, i ti kase e dir: ‘Sa i [“reprezant,” NW] mon lekor ki mon’n donnen pour zot. Fer sa an mon souvenir.’” (1 Kor. 11:23, 24) Anliny avek sa parol, ziska ozordi bann Kretyen i ankor komemor sa levennman spesyal tou le-z-an pour konn sinifikasyon sa dipen ek sa diven.

 9. Ki move pwennvi serten i annan konsernan sa dipen ki Zezi ti servi?

⁹ Serten dimoun ki al legliz i fer resorti ki Zezi ti literalman dir: “Sa i mon lekor,” alor zot krwar ki sa dipen ti vin son lekor dan en fason mirakile. Par kont, sa i tou lekontrer avek laverite.a Tou le de, sa dipen san lelven ki zot ti pou manze ek Zezi ti la devan bann zapot fidel. Alor i kler ki Zezi ti pe koz dan en fason senbolik parey i ti fer souvandfwa.​—Zan 2:19-21; 4:13, 14; 10:7; 15:1.

10. Ki sa dipen dan Repa Senyer i reprezante?

¹⁰ Sa dipen ki son bann zapot ti kapab vwar e ki zot ti pe al manze byento ti reprezant lekor Zezi. Ki lekor? En letan, bann serviter Bondye ti krwar ki akoz Zezi ti kas sa dipen me son lezo pa ti ganny kase sa lekor ti reprezant “lekor Kris,” setadir kongregasyon bann Kretyen swazir. (Efe. 4:12; Rom. 12:4, 5; 1 Kor. 10:16, 17; 12:27) Me avek letan, konprenezon ek bann verse Labib ti montre ki sa dipen ti reprezant lekor Zezi ki ti’n ganny prepare pour li. Zezi “in soufer fizikman” e menm ganny kloute. Alor, dan Repa Senyer sa dipen i reprezant lekor fizik Zezi ki’n “anmenn nou pese.”​—1 Pyer 2:21-24; 4:1; Zan 19:33-36; Ebr. 10:5-7.

11, 12. (a) Ki Zezi ti dir konsernan sa diven? (b) Ki sa diven ki ti ganny servi zour Repa Senyer i reprezante?

¹¹ Sa i ed nou pour konpran sa ki Zezi ti dir konsernan sa diven. Nou lir: “Demenm, apre repa, i ti pran lakoup dizan, ‘Sa lakoup i [“reprezant,” NW] nouvo lalyans par mon disan.’” (1 Kor. 11:25) Bokou Labib i servi menm lekspresyon parey tradiksyon Nouvo Testaman ki dir: “Sa lakoup i nouvo lalyans par mon disan.” (Nou ki’n met an italik.) Eski sa lakoup ki ti dan lanmen Zezi ti sa nouvo lalyans? Non. Sa mo “lakoup” ti refer avek sa ki ti ladan, setadir sa diven. Ki Zezi ti dir sa diven i reprezante? Son disan ki ti ganny verse.

¹² Dan Levanzil Mark nou vwar sa parol ki Zezi ti dir: “Sa i mon disan, disan lalyans ki pou koule pour en kantite dimoun.” (Mark 14:24) Wi, disan Zezi ti pou “koule pour bokou, pour pardon pese.” (Mat. 26:28) Alor sa diven rouz i byen reprezant disan Zezi. Par son disan nou kapab ganny delivrans e “resevwar pardon nou pese.”​—Lir Efezyen 1:7.

KOMEMORASYON LANMOR KRIS

13. Dekrir ki mannyer Memoryal lanmor Kris ki ganny fer tou le lannen i ganny komemore.

¹³ Si ou pe asiste Memoryal avek Temwen Zeova pour premye fwa, ki ou kapab ekspekte? Sa landrwa kot i pou ganny fer pou senp, prop, annan plas pour ki tou dimoun i kapab santi zot konfortab e profit byen sa lokazyon. I kapab annan bann senp dekorasyon fler, me ou pa pou ganny distrer par bann paviyon diferan kouler oubyen lanbyans parti. En ansyen kalifye pou diskit dan en fason kler e respektab sa ki Labib i dir konsernan sa lokazyon. I pou ed tou dimoun apresye sa ki Kris in fer pour nou. I’n donn son lavi konman en ranson pour ki nou kapab viv. (Lir Romen 5:8-10.) Sa orater pou eksplik sa de diferan lespwar ki Labib i montre bann Kretyen i annan.

14. Ki sa de lespwar ki ganny koz lo la pandan Memoryal?

¹⁴ Premye lespwar, se pou renny dan lesyel avek Kris, zis en ptigin parmi bann disip Zezi ki annan sa lespwar, parey son bann zapot fidel. (Lik 12:32; 22:19, 20; Rev. 14:1) Dezyenm lespwar i sa ki laplipar Kretyen fidel ki pe servi Zeova ozordi i annan. Zot annan sa loportinite pour viv pour touzour lo later ki pou revin en paradi. Apre lavolonte Bondye pou ganny fer lo later parey dan lesyel, sa keksoz ki depi lontan bann Kretyen pe priy lo la. (Mat. 6:10) Labib i donn bann lendikasyon lo kondisyon merveye ki zot pou kapab eksperyanse pour touzour.​—Iza. 11:6-9; 35:5, 6; 65:21-23.

15, 16. Kwa ki ganny fer avek sa dipen pandan Repa Senyer?

¹⁵ Ver lafen sa diskour, sa orater pou endike ki letan in arive pour fer sa ki Zezi ti demann son bann zapot pour fer. Parey in ganny mansyonnen pli boner, de lanblenm pou ganny servi, dipen san lelven ek diven rouz. Sa i kapab lo en latab o bor sa orater. I pou refer avek en resi Labib ki dekrir sa ki Zezi ti dir e fer kan i ti entrodwir sa levennman. Par egzanp, dan resi Matye nou lir: “Zezi ti pran dipen, ti beni, ti kase, e ti donn son bann disip an dizan, ‘Pran manze, sa i mon lekor.’” (Mat. 26:26) Zezi ti kas sa dipen san lelven pour ki i kapab pas avek son bann zapot ki ti sak kote li. Ou pou vwar dan sa renyon le 14 Avril dipen san lelven ki’n deza fini ganny kase an pti morso lo bann lasyet.

¹⁶ I pou annan ase lasyet ki pou ganny servi pour ki zot kapab ganny pase avek tou dimoun dan en letan rezonnab. Sa pou ganny fer san okenn gran gran seremoni. En lapriyer senp pou ganny fer e apre sa bann lasyet pou ganny pase dan en fason annord dapre fason ki pli apropriye dan ou kongregasyon. Pa bokou (oubyen petet napa personn) ki pou manz sa dipen, parey ti leka dan laplipar kongregasyon kan sa dipen ti ganny pase dan sa lokazyon lannen 2013.

17. Ki mannyer lenstriksyon Zezi konsernan diven i ganny swiv pandan Memoryal?

¹⁷ Apre sa, sa orater pou koz lo sa ki Matye ti dekrir: “[Zezi] ti pran lakoup, apre ki i ti’n beni, i ti donn zot, an dizan, ‘Bwar zot tou. Sa i mon disan, disan lalyans ki’n koule pour bokou, pour pardon pese.’” (Mat. 26:27, 28) Par swiv lenstriksyon Zezi i pou annan en lot lapriyer ki pou ganny fer, apre bann “lakoup” diven rouz pou ganny pase parmi bann ki la prezan.

18. Menm si pa bokou oubyen napa personn ki pou pran lanblenm, akoz i enportan pour prezan?

¹⁸ Laplipar dan lasistans pa pran sa bann lanblenm parski Zezi ti endike ki zis bann ki pou renny avek li dan son Rwayonm dan lesyel ki kapab pran sa bann lanblenm. (Lir Lik 22:28-30; 2 Tim. 4:18) Tou lezot pou obzerv sa levennman avek respe. Kantmenm sa, i enportan ki zot asiste Repa Senyer akoz sa i demontre ki kantite valer sakrifis Zezi i annan pour zot. Pandan Memoryal zot kapab reflesir lo bann benediksyon ki zot kapab gannyen gras a ranson Zezi. Zot annan sa lespwar pour form parti sa “gran lafoul” ki pou sirviv sa ‘gran ladetres.’ Sa, i sa bann adorater ki pou “lav zot rob e blansi li dan disan Lanyo.”​—Rev. 7:9, 14-17.

19. Ki ou kapab fer pour prepar ou e benefisye avek sa Repa Senyer?

¹⁹ Temwen Zeova dan lemonn antye i prepar zot pour sa renyon spesyal. Bann semenn davans nou pou partisipe pour envit kantite dimoun ki nou kapab pour asiste. An plis ki sa, anmezir zour Memoryal i aprose laplipar nou pou lir bann resi Labib lo sa ki Zezi ti fer e sa ki ti arive sa menm dat lannen 33 N.L. Nou pou fer nou bann laranzman personnel pour fer sir ki nou la prezan. I pou byen pour ariv avan kantik ek lapriyer pour ki nou kapab akey bann viziter e profit byen progranm antye. Nou tou, bann frer ek ser dan kongregasyon ek bann viziter pou vreman benefisye kan nou swiv ansanm dan Labib anmezir ki bann pwen i ganny diskite. Pli enportan ankor, nou prezans kot Memoryal pou montre nou gran lapresyasyon pour sakrifis Zezi e lobeisans anver son komannman ki dir: “Fer sa an mon souvenir.”​—1 Kor. 11:24.

[Not anba lo paz]

[Portre lo paz 22]

[Bwat lo paz 23]

MEMORYAL POUR LANNEN 2014

Lalin i fer letour later sak mwan. Dan sak sikl i annan en moman ki lalin i ant later ek soley. Sa term astronomik i apel “nouvellin.” Ler sa i arive, nou pa kapab vwar lalin pour omwen 18 a 30 erdtan pli tar.

Pandan lannen 2014, nouvellin pli pros avek Lekinok prentan pou le 30 Mars 8:45 diswar (20:45), ler Zerizalenm. Sa lot soley kouse Zerizalenm (le 31 Mars) pou apepre 21 erdtan pli tar. I pa tro sir ki nou pou kapab vwar premye kartye lalin sa swar. I paret sa premye soley kouse kan nou pou vwar premye kartye lalin an Zerizalenm pou tonm le 1 Avril. Par servi metod ki bann Zwif ti servi, sa pou sa zour ki sa premye mwan (1 Nizan) pou konmanse apre soley kouse.

Alor, kongregasyon bann Temwen Zeova dan lemonn antye i konnen ki le 14 Nizan pou konmans soley kouse Lendi le 14 Avril 2014. Sa pou tonm apepre plennlin.​—Pour plis detay konsernan kalkilasyon sa dat, vwar Latour Veyer le 15 Zen 1977 paz 383-384 an Angle.

[Portre lo paz 24]

Bann zapot ti bwar sa diven ki ti reprezant disan Zezi dan sa lalyans (Vwar paragraf 11, 12)