Fer bann bon swa ler ou ankor zenn

“Zot zennonm ek bann zenn fiy . . . loue non Zeova.”​—PS. 148:12, 13.

ESKI OU KAPAB EKSPLIKE?

Ki bann zenn i kapab fer la konmela pour ganny bann bon loportinite dan servis Zeova pli tar?

Ki mannyer serten in servi zot zenn tan?

Ki prensip Labib ki kapab ed ou fer bann pli bon swa dan lavi?

 1. Ki bann loportinite merveye bokou zenn i annan?

NOU pe viv dan en letan eksitan. Plis ki zanmen oparavan dan listwar, plizyer milyon dimoun sorti dan tou nasyon pe vin ver vre ladorasyon. (Rev. 7:9, 10) Bokou zenn i ganny lazwa ler zot ed lezot pour konpran laverite dan Labib ki sov lavi. (Rev. 22:17) Serten zenn pe kondwir bann letid Labib pour ed lezot viv en meyer lavi. Lezot i devoue pour pres sa bon nouvel dan teritwar kot zot koz diferan langaz. (Ps. 110:3; Iza. 52:7) Ki ou kapab fer pour ganny plis satisfaksyon dan servis Zeova?

 2. Ki mannyer legzanp Timote i montre ki Zeova i pare pour donn bann zenn responsabilite? (Vwar portre anler.)

² Konman en zenn, ou kapab fer bann swa ki pli tar i kapab donn ou bann zoli loportinite dan servis Bondye. Par egzanp, Timote ki ti sorti Lis ti fer bann bon swa ki ti permet li ganny apwente konman en misyonner. Sa letan petet i ti dan son 19 an 20 an. (Akt 16:1-3) I paret ki zis detrwa mwan pli tar apre ki lopozisyon vyolan ti’n fors zapot Pol pour kit sa kongregasyon ki ti’n fek ganny formen Tesalonik, Pol ti konfye zenn Timote pour retourn Tesalonik pour ankouraz bann frer ek ser laba. (Akt 17:5-15; 1 Tesa. 3:1, 2, 6) Eski ou kapab mazinen ki mannyer Timote ti santi kan i ti ganny sa privilez?

OU SWA PLI ENPORTAN

 3. Ki swa pli enportan ou kapab fer dan lavi e kan ki ou kapab fer li?

³ Kan ou zenn, sa i letan pour fer bann swa enportan. Me i annan en swa ki pli enportan ki tou lezot, sa i ou desizyon pour servi Zeova. Ki sa pli bon moman pour fer sa swa? Zeova i dir: “Mazin ou Gran Kreater letan ou ankor zenn.” (Ekle. 12:1) Sel fason ki akseptab pour “mazin” Zeova se pour servi li plennman. (Det. 10:12) Ou desizyon pour servi Bondye avek tou ou leker i sa swa pli enportan ki ou kapab fer. I pou annan en lefe lo ou, diran tou ou lavi.​—Ps. 71:5.

 4. Apard deside pour servi Zeova, ki lezot swa enportan dan ou lavi ki pou annan en lefe lo lafason ou servi Bondye?

⁴ Byensir, ou swa pour servi Zeova i pa sa sel swa ki annan en lefe lo ou lavenir. Par egzanp, ou kapab mazinen si ou pou marye, avek lekel ou pou marye e ki mannyer ou pou siport ou lekor finansyerman. Sa i bann desizyon vreman enportan, me i pou saz pour deside avan tou si ou anvi servi Zeova o tan ki ou kapab. (Det. 30:19, 20) Akoz? Parski sa bann swa i annan en lyen avek kanmarad. Sa ki ou deside pour fer konsernan maryaz oubyen lanplwa pou annan en lefe lo lafason ki ou servi Bondye. (Konpar Lik 14:16-20.) Lekontrer osi i parey, ou dezir pour servi Bondye pou annan en lefe lo ou swa konsernan maryaz ek lanplwa. Alor desid sa ki pli enportan avan.​—Fili. 1:10, NW.

KI OU POU FER DAN OU ZENES?

5, 6. Donn en legzanp ki montre ki fer bann bon swa i kapab anmenn bann bon leksperyans pli tar. (Vwar osi sa lartik “Mon swa ler mon ti ankor zanfan” dan sa nimero Latour Veyer.)

⁵ Apre ki ou’n deside pour servi Bondye, ou kapab mazinen kwa ki i anvi ou fer e deside ki mannyer ou pou servi li. En frer Zaponnen i ekrir: “Kan mon ti annan 14 an, mon ti pe prese avek en ansyen ki ti remarke ki mon pa ti vreman kontan predikasyon. Zantiman i ti dir mwan: ‘Al kot ou Yuichiro. Asize e reflesir seryezman lo sa ki Zeova in fer pour ou.’ Sanmenm ki mon ti fer. Anfet, pandan plizyer zour mon ti kontinyen reflesir e priye. Ptitapti, mon latitid ti sanze. Pa tro lontan apre, mon ti remarke ki mon ti kontan pour servi Zeova. Mon ti kontan lir lo bann misyonner e mon ti konmans mazin lo ki mannyer mon kapab servi Zeova pli plennman.”

⁶ Yuichiro i azoute: “Mon ti deside pour konmans fer bann swa ki ti pou ed mwan servi Zeova en zour aletranze. Par egzanp, mon ti deside pour etidye Angle. Kan mon ti kit lekol, pour mon kapab fer pionye, mon ti deside ansenny Angle amitan. A laz 20 an, mon ti konmans aprann langaz Mongolian e mon ti ganny sans vizit en group proklanmater ki koz Mongolian. De-z-an pli tar, an 2007, mon ti vizit Mongolia. Kan mon ti al predikasyon avek serten pionye e remarke ki bokou dimoun ti pe rod laverite, mon ti anvi al reste laba pour ede. Mon ti retourn Zapon avek bi pour retourn Mongolia. Depi Avril 2008 mon pe fer pionye Mongolia. Lavi isi pa fasil. Me dimoun pe aksepte sa bon nouvel e mon kapab ed zot pour vin pros avek Zeova. Mon santi ki sa swa ki mon’n fer i sa pli meyer swa dan lavi.”

 7. Ki swa nou bezwen fer pour nou menm e ki legzanp Moiz in kite pour nou?

⁷ Sak dimoun i devret fer son prop swa lo ki mannyer i pou viv son lavi konman en Temwen Zeova. (Zoz. 24:15) Nou pa kapab dir ou si ou devret marye, avek lekel ou devret marye oubyen ki travay ou devret fer. Eski ou pou swazir en louvraz ki pa demann bokou formasyon? Serten parmi zot, zenn Kretyen, i viv dan bann vilaz pov e lezot dan bann gran gran lavil. Nenport ki landrwa ki zot reste dan lemonn, zot tou zot annan diferan personnalite, abilite, leksperyans, lentere ek lafwa. I tre probab ki ou diferan, zis parey bann zenn Ebre ki ti Lezip ti diferan avek Moiz. Moiz ti annan en kantite loportinite dan lakour rwayal tandis ki lezot Ebre ti lesklav. (Egz. 1:13, 14; Akt 7:21, 22) Parey ou, zot ti viv dan bann letan eksitan. (Egz. 19:4-6) Sakenn ti bezwen deside ki i ti pou fer avek son lavi. Moiz ti fer sa bon swa.​—Lir Ebre 11:24-27.

 8. Ki led i annan pour bann zenn ki pe mazin zot bann swa dan lavi?

⁸ Zeova i ed ou pour fer bann bon swa kan ou ankor zenn. I donn konsey atraver bann prensip ki ou kapab aplike zis dan ou sityasyon. (Ps. 32:8) An plis, ou paran Kretyen ek bann ansyen dan kongregasyon i kapab ed ou pour reflesir lo ki mannyer pour aplik sa bann prensip. (Prov. 1:8, 9) Annou vwar trwa prensip Labib ki kapab ed ou fer bann bon swa ki pou annan en bon lefe lo ou lavenir.

TRWA PRENSIP LABIB POUR GID OU

 9. (a) Ki mannyer Zeova i onor nou par donn nou liberte pour swazir? (b) Ki loportinite nou gannyen ler nou ‘rod plito Rwayonm Bondye’?

⁹ Rod plito Rwayonm Bondye ek son lazistis. (Lir Matye 6:19-21, 24-26, 31-34.) Zeova i onor nou par donn nou liberte pour swazir. I pa dir ki kantite ou zenes ou devret donnen dan predikasyon pour koz lo Rwayonm. Me Zezi ti donn en prensip ki kapab ed nou pour rod plito Rwayonm Bondye. Lafason ki ou aplik sa ki i ti dir pou donn ou bann loportinite pour eksprim ou lanmour pour Bondye, lentere pour ou prosen e lapresyasyon pour sa lespwar lavi eternel. Anmezir ou mazin maryaz ek lanplwa, egzaminen si ou swa pou fer ou enkyet pour bann keksoz materyel oubyen si i pou demontre ou devouman pour Rwayonm Bondye ek son lazistis.

10. Kwa ki ti fer Zezi ere e ki swa ki pou fer ou ere?

¹⁰ Trouv lazwa par servi lezot. (Lir Akt 20:20, 21, 24, 35.) Zezi ti ansenny nou sa prensip esansyel dan lavi. I ti en dimoun ki ti dan lazwa akoz i ti fer lavolonte son Papa dan plas son prop lavolonte. Zezi ti kontan pour vwar bann dimoun ki annan limilite aksepte sa bon nouvel. (Lik 10:21; Zan 4:34) Petet ou’n deza eksperyans sa lazwa ki nou gannyen ler nou ed lezot. Si ou bann swa pli enportan dan lavi i baze lo bann prensip ki Zezi in ansennyen, sirman sa pou fer ou ek Zeova ere.​—Prov. 27:11.

11. Akoz Barouk ti perdi son lazwa e ki konsey Zeova ti donn li?

¹¹ Nou ganny plis lazwa ler nou servi Zeova. (Prov. 16:20) Aparaman Barouk, sekreter Zeremi ti’n oubliy sa laverite. En serten moman dan son lavi, i ti nepli pe trouv lazwa dan servis Zeova. Zeova ti dir li: “Ou pe rod bann gran keksoz pour ou menm. Aret rod sa bann keksoz. . . . Parski mon pe al anmenn en maler lo tou dimoun e mon pou sov ou lavi, partou kot ou ale.” (Zer. 45:3, 5) Ki ou panse? Kwa ki ti fer Barouk ere? Eski lefet ki i ti rod bann gran keksoz oubyen sirviv destriksyon Zerizalenm konman en serviter fidel Bondye?​—Zak 1:12.

12. Ki swa ki ti fer Ramiro trouv lazwa dan lavi?

¹² En frer ki apel Ramiro ti trouv lazwa pour servi lezot. I dir: “Mon sorti dan en fanmir pov ki reste dan en vilaz lo Montanny Andes. Alor, ler mon gran frer ti ofer pour peye pour mwan al liniversite, sa ti en gran loportinite. Me mon ti’n fek batize konman en Temwen Zeova e mon ti’n ganny ofer en lot loportinite, en pionye ti’n demann mwan pour pres avek li dan en pti lavil. Mon ti al laba, mon ti aprann koup seve e mon ti fer travay barbye pour siport mon lekor finansyerman. Ler nou ti ofer dimoun pour ansenny zot Labib, bokou ti aksepte. Pli tar, mon ti zwenn en kongregasyon ki ti’n fek formen e ki ti koz en dyalek lokal, sa ti mon langaz natal. I fer di-z-an depi ki mon’n fer servis a plen tan. Napa okenn lezot travay ki ti pou kapab donn mwan sitan lazwa parey mon’n eksperyanse ler mon’n ed bann dimoun pour etidye Labib dan zot langaz natal.”

13. Akoz ler ou zenn sa i sa bon moman pour ou servi Zeova plennman?

¹³ Kontan pour servi Zeova letan ou ankor zenn. (Lir Eklezyast 12:1.a) Ou pa devret krwar ki ou devret trouv en bon travay avan e pli tar ou ava servi Zeova. Ler ou ankor zenn, la i sa bon moman pour konmans servi Zeova plennman. En kantite zenn napa bokou responsabilite fanmir e zot annan en bon lasante ek lafors pour desarz bann responsabilite difisil. Ki ou ti pou kontan fer pour Zeova la ki ou ankor zenn? Petet ou annan sa lobzektif pour vin en pionye. I kapab ou anvi travay dan en teritwar ki koz en lot langaz. Oubyen ou’n trouv lezot fason pour servi pli plennman dan ou kongregasyon. Nenport ki lobzektif ou annan dan servis Bondye, ou pou bezwen travay pour siport ou finansyerman. Ki kantite formasyon ou pou bezwen? Ki swa ou pou fer?

SERVI PRENSIP LABIB POUR FER BANN BON SWA

14. Ki nou bezwen veye ler nou pe plàn nou lavenir?

¹⁴ Sa trwa prensip Labib ki nou’n egzaminen i kapab ed ou pour deside ki lanplwa ou pou swazir. San dout ou bann counselor kot lekol i konnen ki kalite travay i annan dan ou rezyon. Si non, petet i annan bann lazans dan gouvernman ki kapab dir ou ki travay ki annan plis demann la kot ou reste oubyen sa landrwa kot ou ti a kontan al servi. Sa bann lenformasyon i kapab ede me kantmenm sa, fer atansyon. Dimoun ki pa kontan Zeova i kapab esey fer ou kontan sa lemonn. (1 Zan 2:15-17) Kan ou vwar sa ki lemonn i ofer, ou leker i kapab fasilman ganny anbete.​—Lir Proverb 14:15b; Zer. 17:9.

15, 16. Lekel ki kapab donn ou sa pli bon direksyon konsernan lanplwa?

¹⁵ Enn fwa ki ou’n konpran ki bann swa ou annan konsernan travay, ou bezwen bann bon konsey. (Prov. 1:5) Lekel ki kapab ed ou pour fer ou swa konsernan travay par servi bann prensip Labib? Ekout bann dimoun ki kontan Zeova, kontan ou e ki konn ou ek ou sirkonstans byen. Zot pou ed ou pour konn ou bann abilite ek motivasyon. Petet sa ki zot dir pou ed ou pour reegzamin ou bann lobzektif. Pa i en benediksyon pour ou si ou paran i kontan Zeova! Bann ansyen osi dan ou kongregasyon i bann zonm kalifye spirityelman ki kapab gid ou. An plis, koz avek bann pionye ek bann sirveyan. Akoz zot ti fer sa swa pour fer servis a plenn tan Bondye plennman? Ki mannyer zot ti konmans fer servis pionye e ki mannyer zot siport zot lekor finansyerman? Ki satisfaksyon zot gannyen dan zot minister?​—Prov. 15:22.

¹⁶ Bann dimoun ki vreman konn ou byen i kapab donn ou bann konsey avek disernman. Meton ou anvi aret lekol segonder e konmans fer pionye zis akoz ou pa kontan sa travay dir ki ou ekspekte fer lekol. En dimoun ki kontan ou i kapab rekonnet ou motivasyon e fer ou realize ki lekol i kapab ed ou pour devlop landirans e pa abandonn fasilman, sa i en kalite ki neseser si ou anvi servi Zeova plennman.​—Ps. 141:5; Prov. 6:6-10.

17. Ki desizyon nou devret evite?

¹⁷ Tou dimoun ki servi Zeova pou fer fas avek bann danze spirityel, setadir bann lenfliyans ki kapab fer zot elwannyen avek Zeova. (1 Kor. 15:33; Kol. 2:8) Me serten lanplwa i kapab annan plis danze pour ou spirityalite. Eski ou konn serten ki’n “perdi lafwa” apre ki zot in swazir en kalite louvraz? (1 Tim. 1:19) Sirman i pou saz pour ou evit bann desizyon ki kapab en danze pour ou relasyon avek Bondye.​—Prov. 22:3.

ZENN KRETYEN PROFIT BYEN OU ZENES

18, 19. Si en dimoun pa ankor ganny sa lanvi pour servi Zeova, ki i devret fer?

¹⁸ Si dan ou leker ou’n devlop en dezir pour servi Zeova, profit sa bann loportinite ki ou annan konman en zenn serviter Bondye. Fer bann swa ki pou permet ou servi Zeova dan sa bann moman eksitan.​—Ps. 148:12, 13.

¹⁹ De lot kote, ki ou devret fer si ou pa ankor ganny sa lanvi pour servi Zeova? Pa bes lebra, kontinyen ranforsi ou lafwa. Apre ki zapot Pol ti dekrir zefor ki i ti fer pour viv en lavi ki Bondye ti pou beni, i ti ekri: “Si i annan ki war lotreman, Bondye i ava kler zot lo sa size. Nenport konman, annou tenir ferm la kot nou’n arive.” (Fili. 3:15, 16) Zenn, pa oubliye ki Zeova i kontan ou. Zis li tousel ki kapab donn ou sa pli bon gidans. Alor, les li ed ou pour fer sa pli bon desizyon, la konmela kan ou ankor zenn.

[Not anba lo paz]

[Portre lo paz 20]

Ramiro in trouv lazwa pour servi Zeova depi son zenn tan (Vwar paragraf 12)