Sa vev Tsarfat ti ganny rekonpanse pour son lafwa

EN POV vev i may son garson, son sel zanfan. I pa oule krwar sa ki’n arive. Zis en pti pe letan avan i ti pran lekor son garson dan son lebra. Aprezan sa madanm i get son garson ki’n ganny resisite e i kontan pour vwar son sourir. Sa envite ti dir: “Gete, ou garson i vivan.”

Sa rezireksyon eksitan ti arive preski 3,000 an pase. Ou kapab lir lo la dan 1 Lerwa sapit 17. Sa envite i profet Bondye Eliya. Lekel sa manman? I en vev ki nou pa konn son non ki ti reste dan lavil Tsarfat. Rezireksyon son garson ti enn sa levennman ki’n pli fortifye son lafwa. Anmezir nou aprann lo li, nou pou aprann bann leson enportan.

ELIYA I ZWENN EN VEV KI ANNAN LAFWA

Zeova ti’n deside pour anvoy en gran lasesres dan teritwar Aab, sa move lerwa Izrael. Apre ki Eliya ti’n anonse ki i ti pou annan en lasesres, Bondye ti kasyet li kont Aab e dan en fason mirakile i ti donn sa profet dipen ek lavyann ki ti ganny anmenn par bann korbo. Apre sa, Zeova ti dir Eliya: “Leve, al Tsarfat ki dan Sidon e reste laba. Gete! Mon pou fer en vev donn ou manze.”​—1 Rwa. 17:1-9.

Kan Eliya ti ariv Tsarfat, i ti vwar en pov vev pe anmas bann bout dibwa. Eski i kapab ki sa madanm ti sa enn ki ti pou donn sa profet manze? Ki mannyer i ti pou kapab fer sa, kan li menm i ti pov? Menm si Eliya ti dan dout, i ti konmans en konversasyon avek sa madanm. I ti dir: “Silvouple anmenn en pe delo dan en tas pour ki mon kapab bwar.” Kan i ti pe al sers delo pour li, Eliya ti azoute: “Silvouple anmenn en bout dipen pour mwan.” (1 Rwa. 17:10, 11) Pour donn sa etranze en pe delo pa ti en problenm pour sa vev, me pour donn li dipen, sa ti en problenm.

Sa vev ti reponn: “Osi lontan ki Zeova ou Bondye i vivan, mon napa dipen, mon annan zis sa ptigin lafarin dan en gran potis ek en ptigin delwil dan sa pti potis. La mon pe anmas detrwa bout dibwa e mon pe ale pour fer en keksoz pour mwan ek mon garson. Apre ki nou’n fini manze nou pou mor.” (1 Rwa. 17:12) Annou reflesir lo sa ki nou aprann atraver sa konversasyon.

Sa vev ti rekonnet Eliya konman en Izraelit ki ti annan lakrent pour Bondye. Nou vwar sa atraver sa parol ki i ti dir: “Osi lontan ki Zeova ou Bondye i vivan.” I paret ki menm si i ti annan serten konnesans lo Bondye bann Izraelit, i pa ti ziska en degre kot i ti servi sa lekspresyon “mon Bondye” kan i ti pe refer avek Zeova. I ti reste Tsarfat, en teritwar ki ti ‘pour Sidon, en lavil Fenisyen.’ I paret ki bann zabitan Tsarfat ti bann adorater Baal. Kantmenm sa, Zeova ti’n vwar en keksoz eksepsyonnel dan sa vev.

Menm si sa pov vev sorti Tsarfat ti reste parmi bann adorater zidol, i ti demontre lafwa. Zeova ti anvoy Eliya kot li pour benefisye zot tou le de. Atraver sa, nou kapab aprann en leson enportan.

Menm si bann zabitan Tsarfat ti ador Baal, pa zot tou ki ti move. Par anvoy Eliya kot sa vev, Zeova ti demontre ki I remark bon lentansyon bann dimoun ki pa ankor servi Li. Byensir, “dan nenport ki nasyon tou dimoun ki annan respe pour li e ki fer sa ki byen Bondye i kontan li.”​—Akt 10:35.

Ki kantite dimoun ki reste dan ou teritwar ki parey sa vev? Menm si zot antoure par bann ki swiv fo larelizyon, i kapab ki zot anvi en keksoz pli meyer. I kapab ki zot pa konn bokou ouswa nanryen lo Zeova e alor zot bezwen led si zot pou aksepte vre ladorasyon. Eski ou pe rod sa bann dimoun pour ed zot?

“PREMYERMAN FER EN PTI DIPEN RON POUR MWAN”

Egzamin o profon sa ki Eliya ti demann sa vev pour fer. I ti’n fek dir Eliya ki apre ki i fer son dernyen repa pour li ek son garson, zot ti pou manze, apre sa zot ti pou mor. Pourtan, ki Eliya ti dir? “Pa bezwen per. Ale, al fer sa ki ou’n dir. Me, premyerman fer en pti dipen ron pour mwan avek sa ki reste, e anmenn li pour mwan. Apre ou kapab fer en keksoz pour ou ek ou garson. Akoz la sa ki Zeova Bondye Izrael in dir, ‘Lafarin dan sa gran potis pa pou fini, e i pou toultan annan delwil dan sa pti potis ziska zour ki Zeova i fer lapli tonm lo later.’”​—1 Rwa. 17:11-14.

Serten ti’n kapab dir, ‘Donn nou dernyen repa? Ou serye ou?’ Me sa pa ti lafason ki sa vev ti reazir. Menm si i pa ti konn bokou lo Zeova, i ti krwar Eliya e i ti fer sa ki i ti’n demann li pour fer. Pa sa ti teste son lafwa e pa i ti fer sa bon desizyon!

Bondye pa ti abandonn sa pov vev. Zis parey Eliya ti’n promet, Zeova ti fer ki sa ptigin provizyon pa ti fini e sa ti soutenir Eliya, sa vev ek son garson ziska lasesres ti terminen. Byensir, “lafarin dan sa gran potis pa ti fini, e i ti toultan annan delwil dan sa pti potis, dapre parol ki Zeova ti’n dir atraver Eliya.” (1 Rwa. 17:16; 18:1) Si sa madanm ti’n reazir dan en diferan fason, sa dipen ki i ti’n fer avek son ptigin lafarin ek delwil ti pou son dernyen repa. Me, i ti reazir avek lafwa, i ti met konfyans dan Zeova e donn Eliya manze avan.

En leson ki nou kapab aprann atraver sa leksperyans se ki Bondye i beni bann ki demontre lafwa dan li. Kan ou fer fas avek en sityasyon ki teste ou lentegrite e ou demontre lafwa, Zeova pou ed ou. I pou sa Enn ki pou fourni ou bann bezwen, sa Enn ki pou protez ou e en Zanmi ki pou ed ou fer fas avek ou bann leprev.​—Egz. 3:13-15.

An 1898, Zion’s Watch Tower ti fer resorti sa leson atraver zistwar sa vev: “Si sa madanm ti annan ase lafwa pour obeir, alor i ti merite ganny led Senyer atraver sa profet, si i pa ti demontre lafwa, petet i ti pou annan en lot vev ki ti pou fer sa. Pareyman, dan diferan moman nou lavi, Senyer i met nou dan bann sityasyon kot i teste nou lafwa. Si nou demontre lafwa nou pou ganny benediksyon Bondye, si non, nou pou perdi li.”

Kan nou fer fas avek bann leprev spesifik, nou bezwen rod gidans Bondye dan Labib e dan nou bann piblikasyon baze lo Labib. Apre nou devret azir an armoni avek direksyon Zeova menm si i kapab difisil pour aksepte. Byensir nou pou ganny beni si nou azir an armoni avek sa proverb saz: “Met ou konfyans dan Zeova avek tou ou leker e pa depan lo ou prop konprenezon. Dan tou ou semen pran li kont e i pou fer ou bann santye drwat.”​—Prov. 3:5, 6.

‘ESKI OU’N VIN MET AMOR MON GARSON?’

Lafwa sa vev ti pe al ganny teste dan en lot fason. Labib i dir: “Apre tou sa ki ti’n arive, garson sa madanm ki ti met lakaz ti tonm malad e son maladi ti telman grav ki i ti aret respire.” Pour rod en rezon pour sa ki’n arive, sa manman ki ti an dey ti dir Eliya: “Ki ou annan kont mwan, O zonm sa vre Bondye? Eski ou’n vini pour fer mwan mazin mon fot e met amor mon garson?” (1 Rwa. 17:17, 18) Ki sa bann parol blesan i vedir?

Eski sa madanm ti’n mazin en pese ki ti pe fatig son konsyans? Eski i ti krwar ki lanmor son garson ti pinisyon sorti kot Bondye e ki Eliya ki ti mesaze Bondye pour anons lanmor son garson? Labib pa dir nou, me sa ki kler se ki sa vev pa ti akiz Bondye pour okenn lemal.

Eliya ti’n bezwen soke kan garson sa vev ti mor e osi kan sa vev ti blanm li an dizan ki i responsab pour son sagrinasyon. Apre ki i ti’n anmenn lekor sa garson dan lasanm anler, Eliya ti kriye: “O Zeova mon Bondye, eski ou pe osi fer ditor sa vev kot mon pe reste par met son garson amor?” Sa profet pa ti oule aksepte ki Bondye ti pou ganny blanmen si I ti les sa bon madanm ki ti’n demontre lospitalite soufer plis ankor. Alor Eliya ti sipliye: “O Zeova mon Bondye, silvouple fer ki sa zanfan i reganny son lavi.”​—1 Rwa. 17:20, 21.

“GETE, OU GARSON I VIVAN”

Zeova ti pe ekoute. Sa vev ti pran swen avek profet Bondye e i ti’n demontre lafwa. Aparaman, Bondye ti’n les sa garson mor akoz i ti konnen ki ti pou annan en rezireksyon, sa enn premye pour ganny rikorde dan Labib e sa ti pou donn lespwar bann zenerasyon dan lavenir. Kan Eliya ti enplor Li, Zeova ti redonn sa garson lavi. Zis mazin lazwa sa vev kan Eliya ti dir: “Gete, ou garson i vivan”! Apre sa vev ti dir avek Eliya: “La mon konnen ki vreman ou en zonm Bondye e ki parol Zeova ki dan ou labous i vre.”​—1 Rwa. 17:22-24.

Sa resi dan 1 Lerwa sapit 17 pa dir nanryen ankor lo sa madanm. Lefe ki Zezi ti koz an byen lo li, i kapab ki i ti vin en serviter fidel Zeova pour larestan son lavi. (Lik 4:25, 26) Son zistwar i ansenny nou ki Bondye i beni bann ki fer dibyen son bann serviter. (Mat. 25:34-40) Sa i prouve ki Bondye i pran swen avek son bann serviter fidel, menm dan bann sityasyon difisil. (Mat. 6:25-34) Sa resi i osi montre nou ki Zeova i anvi e i osi annan sa abilite pour resisit bann ki’n mor. (Akt 24:15) Sirman sa i bann bon rezon pour mazin sa vev ki ti reste Tsarfat.

[Portre lo paz 14]

Lafwa sa vev dan Bondye Eliya, Zeova, ti gard li ek son garson vivan