“Aprezan zot in vin pep Bondye”

1, 2. Ki sanzman ti arive zour Lapannkot lannen 33 N.L. e lekel ki ti vin manm nouvo pep Zeova? (Vwar portre anler.)

ZOUR Lapannkot, lannen 33 N.L. i ti annan en levennman enportan ki ti arive dan listwar pep Zeova lo later. I ti annan en gran sanzman. Sa zour, Zeova ti kree en nouvo nasyon ki apel “Izrael Bondye” oubyen Izrael spirityel par mwayen son lespri sen. (Gal. 6:16) I ti premye fwa depi lepok Abraam ki pep Bondye ti pou nepli bezwen ganny sirkonsi pour ganny rekonnet konman son pep. Konsernan sa nouvo nasyon, Pol ti ekrir ki zot in ‘sirkonsi dan zot leker’ atraver lespri sen.​—Rom. 2:29.

² Bann zapot ti premye pour form parti sa nouvo nasyon Bondye enkli plis ki en santenn lezot disip Kris ki ti’n zwenn ansanm dan en lasanm dan letaz Zerizalenm. (Akt 1:12-15) Bondye ti devers lespri sen lo zot e zot ti vin son bann garson spirityel. (Rom. 8:15, 16; 2 Kor. 1:21) Sa ti donn laprev ki Zeova ti’n aksepte sakrifis Zezi e ki sa nouvo lalyans ti an mars. (Lik 22:20; Lir Ebre 9:15.) Sa bann disip ti vin manm nouvo nasyon Zeova, setadir son nouvo pep. Lespri sen ti permet zot pres dan diferan langaz avek bann dimoun ki ti’n vin Zerizalenm. Zot ti kapab koz avek bann Zwif e osi bann ki ti’n konverti dan zot prop langaz. Sa bann dimoun ti sorti en pe partou dan Lanpir Romen pour vin selebre Lafet bann Semenn oubyen Lapannkot. Zot ti tann e konpran “bann mervey ki Bondye in fer” dan zot prop langaz par bann Kretyen ki ti’n ganny lespri sen.​—Akt 2:1-11.

3-5. (a) Ki Pyer ti dir bann Zwif zour Lapannkot? (b) Ki mannyer sa nouvo nasyon ti progrese diran son bann premye lannen ki i ti vin an egzistans?

³ Zeova ti servi zapot Pyer pour envit bann Zwif ek bann ki ti’n konverti pour form parti sa nouvo nasyon, setadir kongregasyon bann Kretyen swazir. Zour Lapannkot, avek kouraz Pyer ti dir bann Zwif ki zot bezwen aksepte Zezi, sa zonm ki zot ti’n “klout lo [poto]” parski “Bondye in fer [li] Senyer ek Mesi.” Ler lafoul ti demande ki zot devret fer, Pyer ti reponn: “Sanz zot lavi e ki sakenn ant zot i ganny batize o non Zezi-Kri pour ki zot ganny pardon zot bann pese. Alor zot a resevwar kado Bondye, Sent-Espri.” (Akt 2:22, 23, 36-38) Sa zour anviron 3,000 dimoun ti batize e ganny azoute avek sa group ki ti form parti sa nouvo nasyon Izrael spirityel. (Akt 2:41) Apre sa, zot ti kontinyen pres avek devouman e plis dimoun ti aksepte laverite. (Akt 6:7) Sa nouvo nasyon ti pe ogmante.

⁴ Pli tar, bann disip Zezi ti konmans pres avek bann Samariten. En kantite zot ti aksepte laverite e ganny batize par Filip sa evanzelizater, me zot pa ti resevwar lespri sen deswit. Konsey direkter Zerizalenm ti anvoy zapot Pyer ek Zan kot sa bann nouvo frer ek ser Samariten e zot “ti enpoz lanmen lo zot e zot ti resevwar Sent-Espri.” (Akt 8:5, 6, 14-17) Alor sa bann Samariten osi ti vin bann Kretyen swazir Izrael spirityel.

⁵ Dan lannen 36 N.L., Pyer ti ganny servi ankor enn fwa pour envit lezot dimoun pour form parti sa nouvo nasyon Izrael spirityel. Sa ti arive ler i ti pres avek Korney en zofisye Romen, son fanmir ek zanmi. (Akt 10:22, 24, 34, 35) Labib i dir: “Pandan ki Pyer ti pe koze, Sent-Espri ti desann lo tou sa bann dimoun [non-Zwif] ki ti la pe ekout son diskour. Bann krwaryan Zwif ki ti’n vin akonpanny Pyer ti byen etonnen pour war ki Bondye ti’n devers son Sent-Espri lo bann non-Zwif osi.” (Akt 10:44, 45) Depi sa letan, bann dimoun ki pa ti Zwif ti ganny envite pour form parti sa nouvo nasyon Izrael spirityel.

6, 7. Dan ki fason bann manm sa nouvo nasyon ti bezwen azir konman “en pep pour . . . non [Zeova]” e ziska ki degre zot ti fer sa?

⁶ Dan en renyon ki ti ganny fer lannen 49 N.L. par konsey direkter, disip Zak ti dir: “Simon [Pyer] in rakont nou konman Bondye in pran swen depi okonmansman tou bann payen pour swazir parmi zot en pep pour son non.” (Akt 15:14) Sa nouvo pep ki port non Zeova ti pou enkli bann Zwif ek bann non-Zwif. (Rom. 11:25, 26a) Pli tar Pyer ti ekrir zot tou e dir: “Ti annan en letan ki zot pa ti son pep, me aprezan zot in vin pep Bondye.” Pyer ti fer resorti zot misyon par dir: “Me zot, zot en ras ki’n ganny swazir, en group pret rwayal, en nasyon sen, en pep ki pour Bondye, ki i’n swazir pour proklanm bann keksoz merveye konsernan sa enn ki’n apel zot pour sorti dan fernwanr pour vin dan son lalimyer merveye.” (1 Pyer 2:9, 10) Zot ti devret loue sa Enn ki zot ti reprezante e koz lo son non piblikman. Zot ti bezwen bann temwen ki kouraze pour Zeova ki Souvren Liniver.

⁷ Parey i ti leka pour nasyon Izrael, Zeova ti apel bann manm Izrael spirityel “sa pep ki mon’n formen pour mwan, pour ki zot koz lo mon louanz.” (Iza. 43:21) Bann Kretyen dan premye syek ti denons tou bann fo bondye sa letan e ti anons avek kouraz ki Zeova i sa vre Bondye. (1 Tesa. 1:9) Zot ti rann temwannyaz lo Zeova ek Zezi “dan Zerizalenm, dan tou rezyon Zide ek Samari e ziska tou bann landrwa pli elwannyen lo later.”​—Akt 1:8; Kol. 1:23.

 8. Ki lavertisman zapot Pol ti donn pep Bondye dan premye syek?

⁸ Pol ti en temwen vreman kouraze pour Zeova e i ti defann li konman sa sel vre Bondye, menm ler i ti pe koz avek bann filozof payen. Avek kouraz i ti defann souvrennte Zeova, “Bondye ki’n fer lemonn ek tou sa ki ladan, i Senyer lesyel ek later.” (Akt 17:18, 23-25) Ver lafen son trwazyenm vwayaz misyonner, Pol ti averti bann ki ti port non Bondye: “Mon konnen ki apre mon depar pou annan bann zonm parey loulou feros ki pou vin parmi zot e ki pa pou eparny personn dan troupo. Menm parmi zot pou annan dimoun ki pou leve pour ansenny bann mansonz pour fer bann krwaryan swiv zot.” (Akt 20:29, 30) A lafen premye syek sa lapostazi ki ti’n ganny predir ti evidan.​—1 Zan 2:18, 19.

 9. Apre lanmor bann zapot, ki ti arive avek sa “pep pour . . . non [Zeova]”?

⁹ Apre lanmor bann zapot, lapostazi ti fleri e depi sa letan bann larelizyon swadizan Kretyen ti vin an egzistans. Dan plas montre ki zot ti “en pep pour . . . non [Zeova]” sa bann fo Kretyen in menm tir non Bondye dan en kantite tradiksyon Labib. Zot in swiv bann koutim payen e ansenny bann doktrin ki pa baze lo Labib. Zot in pran par dan bann swadizan lager sen e dir ki zot pe lager pour Bondye. Zot in sali zot lekor par bann aksyon imoral. Alor pour plizyer syek Zeova ti annan zis detrwa adorater fidel lo later me i ti napa en lorganizasyon oubyen “en pep pour son non.”

10, 11. (a) Ki Zezi ti predir dan son parabol konsernan dible ek move zerb? (b) Ki mannyer parabol Zezi ti ganny akonpli apre 1914 e avek ki rezilta?

¹⁰ Dan son parabol konsernan dible ek move zerb, Zezi ti predir ki sa lapostazi ti pou fer li difisil pour idantifye sa vre larelizyon. I ti dir ki “letan tou dimoun ti pe dormi” Dyab ti pou senm lagrenn move zerb dan sa plantasyon kot Garson zonm ti’n senm lagrenn dible. Tou le de ti pou pous ansanm ziska “konklizyon sa sistenm,” (NW). Zezi ti eksplike ki sa “bon lagrenn i reprezant pep Rwayonm” e ki “move zerb i reprezant pep ki pour dyab.” Pandan letan lafen, Garson zonm ti pou anvoy son “bann travayer,” setadir bann lanz ki ti pou separ sa dible senbolik avek move zerb. Pep Rwayonm ti pou ganny rasanble. (Mat. 13:24-30, 36-43) Ki mannyer sa ti arive e ki lefe sa i annan lo lorganizasyon Bondye lo later?

¹¹ “Konklizyon sa sistenm” ti konmans an 1914. Pandan sa lager ki ti arive sa menm lannen, sa detrwa mil Kretyen swazir oubyen “pep Rwayonm” ti dan lesklavaz Gran Babilonn dan en sans spirityel. An 1919, Zeova ti delivre zot e montre klerman sa gran diferans ant zot ek “move zerb” oubyen bann fo Kretyen. I ti rasanble “pep Rwayonm” pour form en pep organize pour akonpli profesi Izai ki dir: “Eski en pei i kapab ne dan en zour? Oubyen eski en nasyon i kapab ganny kree en sel kou? Me, deswit apre ki Siyon ti ganny douler lakousman i ti donn nesans son bann garson.” (Iza. 66:8) Siyon i reprezant bann lanz ki’n ganny organize dan lesyel. Siyon “ti donn nesans” ler bann Kretyen swazir lo later ti ganny formen konman en nasyon.

12. Ki mannyer bann Kretyen swazir in montre ki zot “en pep pour . . . non [Zeova]” ozordi?

¹² Parey bann Kretyen dan premye syek, bann Kretyen swazir oubyen “pep Rwayonm” ti pou vin bann temwen pour Zeova. (Lir Izai 43:1, 10, 11.a) Sa i fer ki zot ti pou diferan akoz zot kondwit Kretyen e akoz zot pres “sa Bonn Nouvel Rwayonm . . . pour tou dimoun konnen.” (Mat. 24:14; Fili. 2:15) Dan sa fason, zot in fer ki bokou, anfet plizyer milyon dimoun i annan en bon relasyon avek Zeova.​—Lir Danyel 12:3.b

13, 14. Ki bann ki pa form parti Izrael spirityel i bezwen fer pour ki zot ladorasyon i akseptab pour Zeova? Ki mannyer sa ti’n ganny predir dan Labib?

¹³ Nou ti vwar dan sa lartik avan ki bann etranze ki ti al viv Izrael ti kapab ador Zeova dan en fason ki i aprouve, me sa bann etranze ti bezwen asosye avek sa pep ki Zeova ti’n fer en lalyans avek. (1 Rwa. 8:41-43) Pareyman ozordi, bann ki pa form parti Izrael spirityel i bezwen asosye avek “pep Rwayonm,” setadir bann Kretyen swazir.

¹⁴ Dan lepase de profet ti predir ki bokou dimoun ti pou zwenn avek pep Zeova pour ador li dan sa bann dernyen zour. Izai ti predir: “Bokou dimoun pou ale e dir: ‘Vini, annou mont lo montanny Zeova, kot lakaz Bondye Zakob. I pou enstri nou konsernan son semen e nou pou mars dan son santye.’ Parski lalwa pou sorti Siyon e parol Zeova pou sorti Zerizalenm.” (Iza. 2:2, 3) Pareyman, profet Zekarya ti predir ki “bokou dimoun e bann nasyon pwisan pou vin Zerizalenm pour rod Zeova bann larme e sipliy Zeova pour son laprouvasyon.” I ti dekrir zot konman “dis zonm sorti dan tou langaz bann nasyon” ki ti pou tyonbo rob Izrael spirityel dan en sans senbolik an dizan: “Nou anvi al avek zot, akoz nou’n antann ki Bondye i avek zot.”​—Zeka. 8:20-23.

15. Dan ki sans “lezot mouton” i “al avek” bann Izraelit spirityel?

¹⁵ “Lezot mouton” (NW) i “al avek” bann Izraelit spirityel pour anons sa bon nouvel Rwayonm. (Mark 13:10) Zot osi zot form parti pep Bondye, alor ansanm avek bann Kretyen swazir zot vin “en sel troupo” ki ganny gide par Zezi Kri zot “bon berze.”​—Lir Zan 10:14-16.

16. Ki Zeova pou fer ki pou anmenn dernyen parti “gran ladetres”?

¹⁶ Apre ki Gran Babilonn i ganny detri, pep Zeova pou ganny atake. Pour sirviv, pep Zeova pou bezwen son proteksyon. Vi ki sa pou anmenn dernyen parti sa “gran ladetres,” diran sa moman ki Zeova i swazir, i pou gid bann levennman lo later e an rezilta sa, son pep pou ganny atake. (Mat. 24:21, NW; Ezek. 38:2-4) A sa moman Gog pou atak “en pep ki’n rezwenn ansanm sorti dan tou nasyon.” (Ezek. 38:10-12) Ler sa i arive, Zeova pou pas zizman lo Gog ek son larme. Zeova pou fer konn grander son souvrennte e sanktifye son non, parski i dir: “Sirman mon pou . . . fer bokou nasyon konnen lekel mwan e zot pou bezwen konnen ki mwan mon Zeova.”​—Ezek. 38:18-23.

17, 18. (a) Ler Gog i atak pep Zeova, ki lenstriksyon zot pou gannyen? (b) Si nou anvi ki Zeova i protez nou, ki nou bezwen fer?

¹⁷ Ler Gog i konmans son latak, Zeova pou dir son bann serviter: “Ale, mon pep, antre dan ou bann lasanm anndan e ferm laport deryer ou. Kasyet ou pour en pti moman ziska ki mon lakoler in pase.” (Iza. 26:20) A sa moman enportan Zeova pou dir nou ki nou bezwen fer pour ganny proteze. I kapab ki sa “bann lasanm anndan” i annan pour fer avek nou kongregasyon.

¹⁸ Alor si nou anvi ki Zeova i protez nou pandan gran ladetres, nou bezwen rekonnet ki Zeova i annan en pep lo later ki’n ganny organize konman bann kongregasyon. Nou bezwen kontinyen siport pep Zeova, asosye e reste pros avek nou kongregasyon. Annou fer parey sa psalmis e anons avek tou nou leker ki: “Delivrans i pour Zeova. Ou benediksyon i lo ou pep.”​—Ps. 3:8.