Bondye ti apel li “Prenses”

SARA i aret fer louvraz e i get en kou ver lorizon. Son bann serviter osi ti byen okipe pe travay dan lazwa pour zot met ki li osi ti pe fer son par. Zis imazin Sara pe debout dan en gran mazinasyon pe masaz son lanmen pour tir en pe douler. Petet son lanmen ti fermal akoz i ti pe pyeste en trou dan sa latant ki zot ti pe reste ladan. Zot latant ki ti’n ganny fer avek pwal kabri e ki ti’n blansi apre tou sa lannen dan soley ek lapli, ti fer Sara mazin sa kantite lannen ki zot ti’n pase dan dezer konman bann vwayazer. Sa apremidi ti pas vit, soley ti pe kouse e sa ti fer lesyel vin en kouler lor. Sara ti’n vwar Abraama ale bomaten e i ti get ver sa menm direksyon pour gete si i pe vini. Anmezir ki i ti vwar son msye vini lo montanny, en sourir ti aparet lo son figir.

I fer di-z-an depi ki Abraam ek son gran fanmir ti travers Larivyer Efrat ziska Kanaan. Sara ti pare pou siport son msye dan sa gran vwayaz menm si i pa ti konnen kote i ti pe ale. I ti konnen ki Abraam ti annan en rol enportan dan plan Zeova vi ki Zeova ti’n promet pour donn li en desandans spesyal ek en nasyon. Me ki rol Sara ti pou annan dan tousala? Sara ti annan 75 an e i pa’n zanmen annan zanfan. Petet i ti pe demann son lekor, ‘Ki mannyer promes Zeova i kapab vin vre tan ki mon madanm Abraam?’ Nou kapab konpran si Sara ti en pe konsernen oubyen enpasyan.

Nou osi par ler nou kapab demande kan ki promes Zeova pou vin vre. I vre, i pa fasil pou demontre pasyans sirtou ler nou pe esper lakonplisman en promes. Ki nou kapab aprann avek lafwa sa madanm remarkab?

Sa fanmir ti’n fek retournen sorti Lezip. (Zenez 13:1-4) Zot ti pe kanpe dan montanny lo kote les Betel oubyen Louz, parey bann Kananeen ti apel sa landrwa. Lo sa oter kot Sara ti ete, i ti kapab vwar byen Later Promiz. I ti annan bann vilaz Kananeen ek semen ki bann vwayazer ti servi pour al dan lezot landrwa. Menm si i ti vreman zoli, i pa ti pli zoli ki sa landrwa kot Sara ti grandi. Sara ti grandi Our, en lavil Mezopotami ki ti en zistans 1,900 kilomet avek kot i ti ete. I ti’n kit bokou son bann fanmir Our, en lavil kot i ti annan en kantite komers, bazar ek son lakaz byen konfortab avek en twatir ek bann miray solid petet menm avek konneksyon delo dan lakaz. Me si nou krwar Sara ti dan lapenn pe mazin sa lavi konfortab ki i ti annan Our, alor nou pa konn sa madanm ki ti annan en gran respe pour Bondye.

Annou vwar sa ki zapot Pol ti ganny enspire pour ekrir 2,000 an pli tar ler i ti pe koz lo lafwa Sara ek Abraam. I ti dir: “Si zot ti’n kontinyen mazin sa landrwa ki zot ti’n kit deryer, zot ti pou’n kapab ganny en loportinite pour retourn laba.” (Ebre 11:8, 11, 15) Ni Sara ni Abraam pa ti montre ki zot ti mazin lepase. Si zot ti’n konsantre lo la, petet zot ti pou’n deside retourn kot zot. Si zot ti’n fer sa, zot ti pou’n mank sa gran privilez ki Zeova ti pe ofer zot e olye vin en legzanp lafwa ki tous leker bokou dimoun, zot pa ti pou dan nou memwar.

Sara pa ti mazin lepase me i ti plito mazin lavenir. Alor i ti kontinyen siport son msye. I ti ed li anmas e remont bann latant e osi deplas bann zannimo. I ti fer fas avek bokou plis defi ek sanzman. Zeova ti repet ankor sa promes ki i ti’n fer avek Abraam me ankor enn fwa i pa ti mansyonn Sara.​—Zenes 13:14-17; 15:5-7.

Finalman, Sara ti deside ki i ti’n ler pour koz avek Abraam lo en plan ki i ti pe fer dan son lespri. Imazin son figir ler i dir: “[Zeova] in anpes mwan fer zanfan.” Apre i ti demann son msye pour fer zanfan avek son servant Agar. Eski ou kapab imazin soufrans Sara ler i ti pe demann sa son msye? Sa ki Sara ti demann Abraam i kapab paret en keksoz drol pour nou ozordi me i pa ti drol sa letan pour en zonm annan en dezyenm madanm oubyen en servant ki i ti kapab annan relasyon seksyel avek pour li ganny en desandans.b Eski petet Sara ti pe mazinen ki dan sa fason Abraam ti pou kapab annan en nasyon atraver son desandans parey Bondye ti’n dir? An tou ka, i ti pare pour fer en sakrifis vreman difisil. Ki ti reaksyon Abraam? Labib i dir ki i “ti ekout sa ki [Sara] ti dir.”​—Zenez 16:1-3.

Eski sa resi i montre ki Zeova ki ti fer Sara demann Abraam pour fer zanfan avek son servant? Non. Plito, sa ki i ti demande i montre ki mannyer imen i panse. I ti blanm Bondye pour son problenm e i pa ti kapab imazinen ki Bondye ti annan en lot solisyon. Sa ki Sara ti demann Abraam pour fer ti pou anmenn problenm ek soufrans. Me kantmenm sa, sa ki Sara ti demande i montre ki i pa ti pe mazin zis son prop lekor. Dan en lemonn kot dimoun i souvan met zot prop lentere personnel avan, eski pa legzanp Sara i enpresyonan? Si nou met lavolonte Bondye avan nou prop lentere, nou pou imit lafwa Sara.

Pa bokou letan apre, Agar ti ansent pour Abraam. Petet i ti krwar ki akoz i ti ansent pour Abraam i ti pli enportan ki Sara alor i ti get Sara avek mepri. Sa ti vreman dezapwent Sara vi ki i pa ti kapab fer zanfan! Avek permisyon Abraam ek sipor Bondye, Sara ti koriz Agar. Agar ti donn nesans en garson ki ti apel Ismael e apre sa, plizyer lannen ti pase. (Zenez 16:4-9, 16) En lot fwa ki zot ti ganny en mesaz sorti kot Zeova ti ler Sara ti annan 89 an e son msye 99 an. Pa sa mesaz ki zot ti gannyen ti sirprann zot!

Ankor enn fwa, Zeova ti promet son zanmi Abraam ki I ti pou fer son desandans vin en kantite. Ziska sa letan, dimoun ti konn li konman Abram me Bondye ti sanz son non e apel li Abraam ki vedir “Papa en kantite nasyon.” Aprezan, pour premye fwa, Zeova ti montre ki ti rol Sara dan son plan. Zeova ti sanz sa non Sarai ki ti kapab vedir “Kontan argimante” pour vin Sara, sa non ki tou dimoun i konnen. Ki sa non Sara i vedir? I vedir “Prenses.” Zeova ti eksplike akoz i ti swazir sa non pour sa madanm byenneme: “Mon pou beni li, e mon pou osi donn ou en garson atraver li. Mon pou beni li, e i pou vin manman en bann nasyon. Bann lerwa bokou pep pou sorti parmi son desandans.”​—Zenez 17:5, 15, 16, not dan NWT.

Zeova ti promet ki i ti pou donn Abraam en desandans ki ti pou anmenn benediksyon pour bann nasyon. Sa promes ti pou ganny akonplir atraver garson Sara. Non ki Zeova ti’n swazir pour sa garson ti Izaak ki vedir “Riye.” Premye fwa ki Abraam ti konnen ki Zeova ti pou beni Sara e ki i ti pou ganny en zanfan, i “ti tonm lafas ater. I ti riye.” (Zenez 17:17) Abraam ti sirprann e i ti vreman kontan. (Romen 4:19, 20) Me ki mannyer Sara ti reakte?

Pa tro lontan apre, trwa zonm ki Abraam pa konnen, ti vin kot son latant. Kantmenm i ti vreman fer so, sa koup aze ti depese pour akeyir sa bann viziter. Abraam ti dir avek Sara: “Prepar vit detrwa gato avek trwa mezir lafarin meyer kalite.” Sa letan, demontre lospitalite ti enplik bokou keksoz. Me Abraam pa ti les son madanm fer tou travay, i ti depese li osi pour touy en pti bef e pour prepar plis manze ek bwar. (Zenez 18:1-8) Sa bann “zonm” ti bann lanz Zeova. I tre probab ki zapot Pol ti pe refer avek sa lensidan ler i ti dir: “Pa oubliye demontre lospitalite, parski san konnen, serten ti akey bann lanz kot zot.” (Ebre 13:2) Eski ou kapab imit legzanp Abraam ek Sara lo ki mannyer pour demontre lospitalite?

Letan enn sa bann lanz ti repet sa promes ki Bondye ti fer avek Abraam ki Sara ti pou donn nesans en garson, Sara ti lanmenm dan latant pe ekoute. Sa laz ki Sara ti’n arive, i ti vwar li vreman drol ki i ti pou kapab ganny zanfan. I ti riye e dir dan li menm: “Mon tro vye e ize; dayer, mon mari osi i vye, eski mon pou kapab ganny ankor plezir?” Sa lanz ti koriz Sara e demann li: “Eski i annan keksoz ki enposib pour [Zeova]?” Parey nenport ki imen, Sara ti per e deswit i ti reponn: “Mon pa’n riye.” Lanz ti reponn li: “Wi! Ou’n riye.”​—Zenez 18:9-15.

Eski Sara ti riye akoz i ti napa ase lafwa? Pa ditou. Labib i dir: “Akoz son lafwa, Sara osi ti tonm ansent gras a pwisans Bondye, menm si i ti’n desot laz annan zanfan. Anfet i ti konsider sa Enn ki ti’n fer sa promes, fidel.” (Ebre 11:11) Sara ti konn Zeova e i ti konnen ki Zeova ti kapab fer tou sa ki i ti’n promet. Lekel parmi nou ki pa bezwen plis sa kalite lafwa? Pour nou kapab fer sa, nou bezwen aprann konn pli byen sa Bondye ki dan Labib. Anmezir ki nou fer sa, nou pou vwar ki Sara ti annan rezon pour annan sa kalite lafwa. Zeova i vreman fidel e i fer tou sa ki i promet pour fer. Parfwa, i menm kapab fer li dan en fason ki sirprann nou e ki kapab fer nou riye.

Finalman, a laz 90 an, Sara ti kapab rezouir sa keksoz ki i ti vreman anvi depi lontan. I ti ganny en garson pour son msye byenneme ki ti annan san-t-an. Abraam ti apel son garson Izaak, ki vedir “Riye” parey Bondye ti’n demann li. Nou kapab imazin Sara byen fatige me avek en zoli sourir anmezir ki i ti dir: “Bondye in fer mwan riye avek lazwa. Tou dimoun ki antann sa, pou riy avek mwan.” (Zenez 21:6) Sa kado ekstraordiner sorti kot Bondye, ti sirman fer Sara ere ziska son lanmor. Par kont, sa kado ti osi vin avek bann gro responsabilite.

Ler Izaak ti annan senk an, lafanmir ti fer en lafet pour selebre lefet ki Izaak ti’n aret tete. Me pa tou keksoz ki ti al byen. Labib i dir ki Sara “ti vwar” en keksoz ki ti fatig li. Ismael, piti Agar ki ti annan 19 an sa letan, ti pe kontinyen monk Izaak. Sa pa ti zis en pti zwe. Zapot Pol ti pli tar ganny enspire pour dir ki Ismael ti pe persekit Izaak. Sara ti remarke ki sa kalite latitid ti pou en danze pour byennet son garson. Sara ti konnen ki Izaak ti plis ki zis son garson akoz Izaak ti annan en rol enportan dan plan Zeova. Alor, i ti pran kouraz e i ti koz fran avek Abraam. I ti demann li pour fer Agar ek Ismael ale.​—Zenez 21:8-10, NWT; Galat 4:22, 23, 29.

Ki mannyer Abraam ti reakte? Labib i dir: “Sa pa ti fer plezir Abraam ditou an sa ki konsern son garson.” Vi ki i ti kontan Ismael en kantite, i pa ti kapab vwar rezon akoz Sara ti pe dir li fer Ismael ale. Par kont, Zeova ti vwar byen sa ki ti pe arive, alor i ti entervenir. Labib i dir: “Bondye ti dir Abraam, ‘Pa bezwen les sa zafer konsernan ou garson ek ou servant fatig ou. Ekout tou sa ki Sara pou dir ou, akoz ou vre desandans pou vin par Izaak.’” Zeova ti asir Abraam ki i ti pou osi pran swen avek Agar ek son garson. Abraam, sa zonm fidel ti obei.​—Zenez 21:11-14, NWT.

Sara ti en bon madanm e i ti en bon led pour Abraam. I pa ti dir son msye zis sa ki i ti anvi tande. Ler Sara ti vwar ki i ti annan en problenm ki konsern son fanmir ek zot lavenir, i ti koz fran avek son msye. Me sa pa ti vedir ki i ti mank respe pour son msye. Anfet, zapot Pyer, ki ti en zonm marye, ti pli tar dir ki Sara ti en bon legzanp pour bann madanm akoz i ti annan en gran respe pour son msye. (1 Korentyen 9:5; 1 Pyer 3; 5, 6) Annefe, si Sara pa ti’n koz lo sa problenm, i pa ti pou’n demontre respe pour Abraam parski sa ti’n kapab fer Abraam ek son fanmir perdi tou privilez ki Bondye ti’n promet zot. Avek lanmour, Sara ti dir sa ki ti neseser.

Bokou madanm i vreman apresye legzanp Sara. Atraver son legzanp, zot aprann pour koz avek zot msye dan en fason fran me avek respe. Serten madanm i kapab parfwa anvi ki Zeova i entervenir e ed zot parey i ti fer pour Sara. Kantmenm sa, zot kapab aprann avek lafwa, lanmour ek pasyans remarkab ki Sara ti annan.

Menm si Zeova ti apel sa madanm byenneme “Sara,” i pa ti ekspekte ganny trete parey en larenn. I pa drol ki ler Sara ti mor a laz 127 an, Abraam ti “pler lanmor son fanm, Sara.”c (Zenez 23: 1, 2) I ti vreman mank son “Prenses” byenneme. San dout, Zeova osi i mank sa madanm fidel e i pou resisit li dan paradi lo later. Sara, ansanm avek tou bann ki imit son lafwa pou ganny en lavenir merveye ki pou dire pour touzour.​—Zan 5:28, 29.