Ki mannyer pour montre bann nouvo pour prese?

 1. Ki mannyer ou ti santi ler ou ti al prese pour premye fwa?

¹ Eski ou rapel premye fwa ou ti konmans pres portanport? I tre probab ou ti per. Si ou ti pe travay avek sa enn ki etidye Labib avek ou oubyen en lot proklanmater, san dout ou ti kontan ki i ti la pour ed ou. Aprezan, vi ki ou’n ganny leksperyans konman en proklanmater, ou dan en pozisyon pour ede montre bann nouvo ki mannyer pour prese.

 2. Ki bann nouvo proklanmater i bezwen aprann?

² Bann nouvo proklanmater i bezwen aprann ki mannyer pour konmans en konversasyon avek en met lakour, servi Labib devan laport, fer retourn vizit, konmans e kondwir letid Labib. Zot devret osi aprann diferan fason prese, par egzanp temwannyaz lo semen e dan teritwar biznes. Ou kapab ed zot pour amelyore dan sa bann domenn par ou legzanp ek sizesyon.

 3. Ki mannyer nou kapab ed lezot par nou legzanp?

³ Ansenny par ou legzanp: Zezi ti montre son bann disip ki mannyer pour prese. (Lik 8:1; 1 Pyer 2:21) Kan ou fer laranzman pour pres avek en nouvo proklanmater, prepar en prezantasyon senp pour ki sa proklanmater i kapab imite. Petet ou kapab servi en sizesyon dan nou bann piblikasyon. Apre, ofer pour pres kot enn oubyen de premye lakaz pour ki sa proklanmater i kapab ekout sa ki ou dir. Apre sak lakaz, ou kapab demann sa proklanmater kwa ki i’n obzerve ki efikas dan ou prezantasyon. Sa pou ed li vwar valer travay avek lezot dan predikasyon e fer li aksepte nenport sizesyon ki ou donn li pli fasilman apre ki i’n fer son prezantasyon.

 4. Ki mannyer nou kapab ed en nouvo proklanmater apre ki nou’n ekout son prezantasyon?

⁴ Donn bann sizesyon: Zezi ti osi donn son bann disip lenstriksyon lo lafason pour prese. (Mat. 10:5-14) Ou osi ou kapab ed en nouvo proklanmater dan sa menm fason. Kan i son tour pour koze, ekout atantivman. Apre kan ou kit en lakour, pa ezite pour donn li bann felisitasyon spesifik e senser, menm si ou’n obzerv bann laspe ki demann amelyorasyon lo son par. Avan ki ou donn okenn sizesyon, ou kapab deside pour obzerve si i’n amelyore dan sa laspe kot en lot lakour. Petet i ti zis en pti pe per o konmansman. Pa bliye osi, ki tou proklanmater napa menm abilite e i touzour annan plis ki en fason pour fer en sel keksoz.—1 Kor. 12:4-7.

 5. Ki nou kapab dir kan nou pe pran linisyativ pour donn sizesyon?

⁵ Parfwa en nouvo proklanmater i kapab demann ou bann sizesyon. Me si i pa fer li, pran linisyativ pour ed li. Ki mannyer ou kapab servi bon zizman pour fer sa? Serten proklanmater eksperyanse i senpleman dir, “Eski mon kapab donn ou en sizesyon?” oubyen “Ki mannyer ou santi ou’n fer?” En lot opsyon i pour dir, “Kan mon ti’n fek vin en proklanmater, mon ti vwar li difisil pour . . . , me mon ti vwar ki . . . ti ed mwan.” Parfwa i byen si zot get liv Reasoning ansanm. Pour ou pa met en kantite presyon lo li, donn li sizesyon lo zis en laspe dan son prezantasyon.

 6. An rapor avek nou minister, ki mannyer “feray i fit feray”?

⁶ Feray i fit feray: Pol ti ankouraz Timote, en proklanmater avek bokou leksperyans, pour kontinyen ansennyen e fer progre. (1 Tim. 4:13, 15) Menm si i kapab ki i annan plizyer lannen depi ki ou’n konmans prese, ou pa devret zanmen aret esey amelyor ou abilite. Aprann avek lezot proklanmater ki ou pres avek, menm bann ki annan mwens leksperyans ki ou dan predikasyon e zantiman, rod loportinite pour ed lezot, espesyalman bann nouvo, pour ki zot kapab vin bann bon proklanmater sa bon nouvel.—Prov. 27:17.