Swiv legzanp Zeova e andire

1-2. Ki promes dan Izai 65:16, 17 ki ed nou pour pa abandonnen?

TENM pour lasanble rezyonal 2017 ti “Pa abandonnen.” Sa lasanble ti montre nou ki mannyer nou kapab andir nou bann problenm. Kat lannen in pase depi sa lasanble e nou ankor pe andire dan sa move lemonn.

² Ki problenm ou’n fer fas avek tou dernyenman? Eski en manm ou fanmir oubyen en zanmi pros in mor? Eski ou annan en maladi grav? Eski lavi i difisil pour ou parski laz pe monte? Eski ou’n fer fas avek dezas natirel, vyolans oubyen persekisyon? Oubyen eski ou pe soufer akoz pandemi COVID-19 ouswa en maladi parey? Nou enpasyan pour sa zour kot nou pou napa problenm, ler nou pou oubliy zot e zot pou nepli ariv ankor.​—Lir Izai 65:16, 17.

 3. Ki nou bezwen fer la konmela e akoz?

³ Lavi dan sa lemonn i difisil e i kapab ki a lavenir nou pou bezwen andir bann pli gro difikilte. (Mat. 24:21) Alor, nou bezwen kontinyen devlop plis landirans. Akoz? Zezi ti dir: “Si zot andire, zot pou sov zot lavi.” (Lik 21:19) Pour ed nou devlop plis landirans, nou kapab mazin lafason ki lezot pe andir bann difikilte ki parey sa ki pour nou.

 4. Akoz nou kapab dir ki Zeova i sa pli bon legzanp landirans?

⁴ Lekel sa pli bon legzanp landirans? Zeova. Petet ou sirprann me si ou reflesir lo la, ou pou konpran akoz. Dyab pe kontrol sa lemonn e sa i fer ki i annan en kantite problenm. Zeova i annan sa pouvwar pour met en lafen avek sa bann problenm nenport ler me i pe esper sa zour ki i’n deside pour li fer sa. (Rom. 9:22) Antretan, Zeova pe kontinyen andire ziska sa zour ler i detri sa move lemonn. Aprezan, nou pou vwar nef keksoz ki Zeova pe andire.

 5. Ki mannyer non Bondye in ganny sali e ki mannyer sa i fer ou santi?

⁵ Non Zeova in ganny sali. Zeova i kontan son non e i anvi ki tou dimoun i annan respe pour son non. (Iza. 42:8, NWT) Me pour sa dernyen sis mil lannen son non in ganny sali. (Ps. 74:10, 18, 23) Sa ti konmans dan zarden Edenn ler Dyab (ki vedir “Sa enn ki fer kalonmni”) ti akiz Bondye konmkwa Bondye pe priv Adan ek Ev en bon keksoz. (Zen. 3:1-5) Depi sa letan, Zeova in ganny akize konmkwa i pa pe donn bann imen sa ki zot vreman bezwen. Zezi pa ti kontan ki non son Papa ti pe ganny sali. I pour sa rezon ki i ti ansenny son bann disip pour priye: “Nou Papa ki dan lesyel, ki ou non i ganny sanktifye.”​—Mat. 6:9.

 6. Akoz Zeova in les bokou letan pase avan i prouve ki i annan sa drwa pour diriz lesyel ek later?

⁶ Bokou i opoz Bondye ek son drwa pour dirize. Zis Zeova ki annan sa drwa pour diriz lesyel ek later e son fason dirize i sa enn ki pli bon. (Rev. 4:11) Me Dyab in esey anbet bann lanz ek bann imen e fer zot krwar ki Bondye napa sa drwa. I pou pran letan pour prouve ki Zeova i annan sa drwa pour dirize e ki i sa pli bon dirizan. Alor Bondye in les bann imen dirize pour en kantite letan pour ki zot kapab vwar ki zot pa kapab diriz zot prop lekor san son led. Sa ti en desizyon saz. (Zer. 10:23, NWT) Bondye i annan pasyans. Byento, personn pa pou doute ki Bondye i annan sa drwa pour diriz lesyel ek later. Tou lanz ek imen pou konnen ki fason dirize Bondye i sa enn ki pli bon e ki zis son Rwayonm ki pou anmenn vre lape ek sekirite lo later.

 7. Lekel ki’n rebel kont Zeova e ki i pou fer avek zot?

⁷ Serten son bann zanfan ti rebele. Zeova ti kree bann zanfan parfe. Sa i enkli bann lanz ek bann imen. Me apre, en lanz ki ti vin Satan (ki vedir “Opozan”) ti rebel kont Zeova e konvenk Adan ek Ev ki ti bann imen parfe pour rebel kont Zeova zot osi. Lezot lanz ek imen ti osi rebele. (Zid 6) Pli tar, menm serten Izraelit ki ti pep swazir Bondye ti rezet li e konmans ador bann fo Bondye. (Iza. 63:8, 10, NWT) Zeova ti santi ki i ti’n ganny trai. Me I’n andire e i pou kontinyen andire ziska ki i detri tou bann rebel. Apre sa, Zeova ansanm avek bann ki’n fidel anver li pou kontan ki zot nepli bezwen andir bann move keksoz dan sa lemonn.

8-9. Ki bann mansonz ki’n ganny dir lo Zeova e ki nou kapab fer konsernan sa bann mansonz?

⁸ Bann mansonz Dyab. Satan ti akiz Zob ek tou lezot serviter fidel Zeova konmkwa ki zot ador Zeova pour bann rezon egois. (Zob 1:8-11; 2:3-5) Depi sa letan, Satan in kontinyen akiz bann imen. (Rev. 12:10) Nou kapab ede pour montre ki Satan i en manter ler nou andir nou bann difikilte e reste fidel anver Zeova parski nou kontan li. Zeova ti beni Zob e i pou fer parey avek nou si nou andire.​—Zak 5:11.

⁹ Satan i servi bann sef fo larelizyon pour dir ki Zeova i kriyel e i fer bann imen soufer. Serten i menm dir ki ler en zanfan i mor, Bondye ki’n pran li parski i bezwen plis lanz dan lesyel. Sa i vreman en mank respe pour Bondye. Me nou, nou konnen ki Zeova i en Papa ki kontan nou. Ler nou annan en maladi grav ouswa en dimoun ki nou kontan i mor, nou pa zanmen blanm Bondye. O kontrer, nou krwar ki en zour i pou geri bann malad e resisit bann mor. Nou kapab dir avek tou dimoun ki anvi ekoute, ki Zeova i en Bondye ki kontan nou. Sa pou fer ki Zeova i kapab reponn sa enn ki pe provok li.​—Prov. 27:11, NWT.

10. Ki Psonm 22:23, 24 i montre nou lo Zeova?

¹⁰ Soufrans son bann serviter. Zeova i en Bondye ki annan konpasyon. I vreman sagren ler i vwar nou pe soufer petet akoz nou pe ganny persekite, akoz nou malad oubyen akoz nou lenperfeksyon. (Lir Psonm 22:23, 24, NWT.)b Zeova i konpran nou soufrans. I anvi ki nou aret soufer e i pou tir sa ki pe fer nou soufer. (Egz. 3:7, 8; Iza. 63:9, NWT) Sa zour pou arive kot Zeova “pou eswiy tou larm dan [nou] lizye. Lanmor pou nepli egziste. Pou nepli annan ni dey, ni larm, ni soufrans.”​—Rev. 21:4.

11. Ki mannyer Zeova i santi konsernan son bann serviter fidel ki’n mor?

¹¹ Lanmor son bann zanmi. Ki mannyer Zeova i santi konsernan son bann serviter fidel ki’n mor? I vreman anvi vwar zot ankor! (Zob 14:15) Zis mazinen ki kantite Zeova i anvi vwar son zanmi Abraam ankor. (Zak 2:23) Oubyen Moiz ki i ti koz avek “fas a fas”! (Egz. 33:11) I enpasyan pour tann David ek lezot psalmis sant zot bann zoli kantik louanz! (Ps. 104:33) Menm si sa bann zanmi Bondye in mor, Zeova pa’n oubliy zot. (Iza. 49:15) I rapel ki kalite dimoun zot ti ete. Labib i dir ki “pour li zot tou zot vivan.” (Lik 20:38) En zour i pou resisit zot e i pou ekout zot lapriyer senser ankor e aksepte zot ladorasyon. Si en dimoun ki ou kontan in mor, sa bann parol i kapab rekonfort ou.

12. Ki pe arive dan sa move lemonn ki pe fer Zeova vreman sagren?

¹² Bann move dimoun i fer lezot soufer. Ler sa rebelyon dan zarden Edenn ti konmanse, Zeova ti konnen ki keksoz ti pou vin pli pir avan i amelyore. Zeova i ay bann move keksoz, lenzistis ek vyolans ki dan sa lemonn. I enterese avek bann dimoun ki fay e ki pa kapab protez zot lekor parey bann orfelen ek bann vev. (Zek. 7:9, 10) Zeova i vreman sagren ler i vwar son bann serviter fidel pe ganny persekite e ganny met dan prizon. Nou kapab asire ki Zeova i kontan tou bann ki pe andire parey li.

13. Ki keksoz degoutan Bondye i vwar bann dimoun pe fer e ki i pou fer?

¹³ Pli ale dimoun pe vin pli imoral. Imen in ganny kree dan resanblans Bondye me Satan i kontan fer zot fer bann move keksoz. Dan letan Noe ler Bondye ti vwar ki bann dimoun ti pe fer en kantite move keksoz, “Zeova ti regrete ki i’n fer zonm lo later, e sa ti fer son leker fermal.” (Zen. 6:5, 6, 11, NWT) Eski keksoz in amelyore? Definitivman non. Dyab i kontan ler i vwar ki i annan en kantite dimoun ki komet imoralite seksyel. Sa i enkli aksyon imoral ant dimoun ki pa’n marye e ant dimoun menm sèks. (Efe. 4:18, 19) Satan i vreman kontan ler bann dimoun ki ador Zeova i fer en pese grav. Dan sa moman apropriye, Zeova pou montre ki i ay bann pratik imoral par detri tou dimoun imoral ki refize sanze.

14. Ki imen pe fer avek later ek bann zannimo?

¹⁴ Imen pe detri sa ki Bondye in kree. Zonm pa pe zis “domin lo son kanmarad” pour fer ditor kanmarad me zot pa pe pran swen avek later ek bann zannimo parey Zeova ti anvi. (Ekle. 8:9; Zen. 1:28) Serten syantis i dir ki dan detrwa lannen en milyon lespes plant ek zannimo pou nepli egziste akoz sa ki bann imen pe fer. Alor, nou kapab konpran akoz dimoun i enkyet konsernan lanvironnman. Erezman, Zeova in promet “pour detri bann ki pe detri later” e pour fer later vin en paradi.​—Rev. 11:18; Iza. 35:1, NWT.

15-16. Kwa ki devret motiv nou pour andire ansanm avek Zeova? Donn en legzanp.

¹⁵ Mazin lo tou sa bann problenm ki nou Papa dan lesyel pe andire pour plizyer milye lannen. (Vwar bwat “Ki Zeova pe andire?”) Nenport ler Zeova i kapab met en lafen avek sa move lemonn. Me vi ki i annan pasyans, sa in ed nou en kantite. Annou pran en legzanp. Meton en zonm ek son madanm i ganny dir ki zot pou ganny en zanfan ki annan en dezabilite grav e ki apre ki sa zanfan in ne, son lavi pou difisil e i pou mor byen zenn. Kantmenm sa, sa paran i kontan ler sa zanfan i ne menm si i pou vreman difisil pour zot pran swen avek sa zanfan. Vi ki zot kontan zot zanfan, zot pare pour andir nenport difikilte pour donn li sa pli bon swen posib.

¹⁶ Pareyman, tou desandans Adan ek Ev i ne enparfe. Kantmenm sa, Zeova i kontan zot e i enterese avek zot. (1 Zan 4:19) Zeova i diferan avek sa paran dan nou legzanp parski Zeova i kapab met en lafen avek soufrans son bann zanfan. (Mat. 24:36) I’n swazir en ler pour li met en lafen avek soufrans bann imen. Sa lanmour ki Zeova i annan pour nou i devret motiv nou, pour nou osi andire tan ki i neseser pour nou fer li.

17. Akoz sa ki ganny dir dan Ebre 12:2, 3 lo Zezi i ankouraz nou pour kontinyen andire?

¹⁷ Zeova i sa pli bon legzanp landirans. Zezi ti andire parey son Papa. Ler Zezi ti lo later, i ti fer fas avek en kantite keksoz tel parey koze kontrer e osi sa laont pour mor lo en poto martir pour nou. (Lir Ebre 12:2, 3.) San dout legzanp landirans Zeova ti donn Zezi sa lafors pour andire. I kapab donn nou osi sa lafors.

18. Ki 2 Pyer 3:9 i ed nou konpran konsernan pasyans Zeova?

¹⁸ Lir 2 Pyer 3:9. Zeova i konn sa pli bon letan pour li met en lafen avek sa move lemonn. Vi ki Zeova in annan pasyans, en kantite imen in reisi aprann konn li e aprezan en gran lafoul plizyer milyon dimoun pe ador li. Zot tou zot kontan ki Zeova in andire pour sa kantite letan parski sa in permet zot pour ne, pour aprann kontan li e pour dedye zot lavi avek li. Lefet ki i pou annan plizyer milyon dimoun ki pou andire ziska lafen, sa pou montre ki Zeova ti fer sa bon desizyon ler i ti deside pour annan pasyans.

19. Ki nou devret determinen pour fer e ki rekonpans nou pou gannyen?

¹⁹ Zeova i montre nou ki mannyer pour andire avek lazwa. Menm si Satan in fer Zeova sagren, Zeova i reste “sa Bondye ere.” (1 Tim. 1:11) Nou osi nou kapab ere anmezir nou pe esper avek pasyans pour Zeova sanktifye son non, zistifye son souvrennte e met en lafen avek tou move keksoz ek bann problenm ki nou fer fas avek. Annou determinen pour andire e ganny rekonforte parski nou konnen ki nou Papa ki dan lesyel pe andire li osi. Si nou fer sa, sa bann parol pou vin vre pour sakenn parmi nou: “En dimoun ki kontinyen andir bann leprev i ere, parski ler i ganny aprouve par Bondye, i pou resevwar kouronn lavi ki Zeova in promet bann ki kontinyen kontan Li.”​—Zak 1:12.