Paran, ed ou zanfan pour kontan Zeova

1-2. Ki mannyer bann prensip Labib i vin pli enportan pour nou ler keksoz i sanze dan nou lavi? Eksplike.

LER en koup i marye, en ansyen i fer en diskour baze lo Labib konsernan maryaz. I pa premye fwa ki sa koup i tann sa bann prensip. Me depi sa zour, sa bann prensip i vin pli enportan pour zot. Akoz sa? Parski aprezan zot pou aplik sa bann prensip konman en koup ki’n marye.

² I parey ler en koup i vin paran. I kapab ki pandan bann lannen, zot in tann plizyer diskour konsernan fason pour elve zanfan. Me aprezan bann prensip dan sa bann diskour i vin pli enportan pour zot parski zot pou annan en zanfan pour zot elve e sa i en gro responsabilite. Alor i kler ki ler en keksoz i sanze dan nou lavi, serten prensip i vin pli enportan pour nou. I pour sa rezon ki bann serviter Zeova i fer parey bann lerwa Izrael. Zot lir Labib e medit lo la ‘tou zot lavi.’​—Det. 17:19.

 3. Ki nou pou vwar dan sa lartik?

³ Paran, ou annan enn parmi bann pli gran privilez ki en Kretyen i kapab annan. Sa i pour ansenny ou zanfan konsernan Zeova. Me ou pa zis bezwen ansenny zot konsernan nou Bondye, ou anvi ed ou zanfan pour kontan Zeova en kantite. Ki ou kapab fer pour ed ou zanfan pour kontan Zeova? Dan sa lartik, nou pou vwar kat prensip Labib ki kapab ed ou. (2 Tim. 3:16) Nou pou osi vwar ki byenfe serten paran in gannyen ler zot in aplik sa bann prensip.

 4. Ki en prensip ki kapab ed bann paran pour ed zot zanfan kontan Zeova? (Zak 1:5)

⁴ Prensip 1: Rod gidans Zeova. Demann Zeova sa lasazes ki ou bezwen pour ed ou zanfan pour kontan li. (Lir Zak 1:5.) Zeova i sa Enn ki pli byen kalifye pour donn ou konsey. I annan plizyer rezon akoz. Annou vwar de rezon. Premyerman, Zeova i sa paran ki annan plis leksperyans. (Ps. 36:9) Dezyenmman, bann konsey saz ki i donnen i toultan anmenn bann byenfe.​—Iza. 48:17.

 5. (a) Ki lorganizasyon Zeova i donn bann paran pour elve zot zanfan? (b) Dan sa video, ki ou aprann avek lafason ki Frer ek Ser Amorim ti elve zot zanfan?

⁵ Zeova i donn bann paran en kantite lenformasyon baze lo Labib ki kapab ed zot pour elve zot zanfan pour kontan li. I fer sa atraver son Parol Labib ek son lorganizasyon. (Mat. 24:45) Par egzanp, ou kapab vwar bann konsey pratik dan sa seri lartik “Help for the Family,” ki’n ganny pibliye pour plizyer lannen dan magazin Veye an Angle ki aprezan disponib lo nou sit Enternet. Serten sa bann lartik i osi disponib an Kreol. I osi annan en kantite video ki ganny pibliye lo jw.org ki kapab ed bann paran pour aplik konsey Zeova anmezir ki zot elve zot zanfan.b​—Prov. 2:4-6.

 6. Ki mannyer en papa i santi konsernan konsey ki li ek son madanm in gannyen atraver lorganizasyon Zeova?

⁶ En kantite paran in dir ki zot vreman rekonesan pour led ki Zeova in donn zot atraver son lorganizasyon. En papa ki apel Joe i dir: “I pa fasil pour elve trwa zanfan dan laverite. Nou de mon madanm, nou toultan demann Zeova pour ed nou. Souvandfwa, nou’n santi ki en lartik ouswa en video in vin dan sa bon moman pour ed nou fer fas avek en sityasyon. Nou’n toultan depan lo konsey Zeova.” Joe ek son madanm in vwar ki sa bann lartik ek video pe ed zot zanfan vin pros avek Zeova.

 7. Akoz i enportan ki bann paran i fer zot mye pour vin en bon legzanp? (Romen 2:21)

⁷ Prensip 2: Ansenny ou zanfan atraver ou legzanp. Zanfan i get zot paran byen e souvandfwa zot fer parey zot paran. Byensir, tou paran i fer fot. (Rom. 3:23) Me kantmenm sa, bann paran ki saz i fer zot mye pour vin en bon legzanp pour zot zanfan. (Lir Romen 2:21.) En papa ti dir: “Zanfan i parey leponz. Zot abzorb tou sa ki otour zot. Zot pou dir nou ler nou pa pe fer sa ki nou pe ansenny zot.” Alor si nou anvi ki nou zanfan i kontan Zeova, nou bezwen montre ki nou osi nou vreman kontan Zeova.

8-9. Ki ou’n aprann avek sa ki Andrew ek Emma ti dir?

⁸ I annan en kantite fason ki bann paran i kapab ansenny zot zanfan. Remark sa ki en frer ki annan 17 an ki apel Andrew i dir: “Mon paran ti toultan ansenny mwan ki i enportan pour fer lapriyer. Tou le swar, mon papa ti fer lapriyer ansanm avek mwan. I ti fer sa menm si mon ti’n fer mon prop lapriyer. Mon paran ti toultan dir mwan ek mon ser: ‘Ou kapab koz avek Zeova lakantite fwa ki ou oule.’ Akoz sa, lapriyer in vin vreman enportan pour mwan. Aprezan, i fasil pour mwan fer lapriyer e pour santi ki Zeova i en Papa ki kontan mwan.” Paran, pa zanmen oubliye ki ou lanmour pour Zeova i kapab ed ou zanfan pour kontan li zot osi.

⁹ Annou osi vwar legzanp Emma. Ler son papa ti kit son fanmir, i ti kit son manman avek en kantite det. Emma i dir: “In annan en kantite fwa ki mon manman ti napa ase larzan. Me i ti toultan koz lo lafason ki Zeova i pran swen avek son bann serviter. Par lafason ki i ti viv, mon ti kapab vwar ki i ti vreman krwar sa. Manmi ti aplik sa ki i ti ansenny mwan.” Ki nou kapab aprann? Paran i kapab ansenny zot zanfan atraver zot legzanp menm ler zot pe pas dan bann sityasyon difisil.​—Gal. 6:9.

10. Kan ki bann paran Izraelit ti kapab koz avek zot zanfan konsernan Zeova? (Deterononm 6:6, 7)

¹⁰ Prensip 3: Koz avek ou zanfan toulezour. Zeova ti donn bann Izraelit lord pour ansenny zot zanfan konsernan li toulezour. (Lir Deterononm 6:6, 7.) Sa bann paran ti annan en kantite loportinite pandan lazournen, pour koz avek zot zanfan konsernan Zeova e pour ed zot kontan li. Par egzanp, en zenn garson i kapab pas plizyer erdtan avek son papa pe plante dan plantasyon ouswa pe anmas rekolt. I kapab ki son ser i pas preski lazournen antye avek son manman pe koud e pe fer lezot travay lakour. Ler bann paran ek zanfan i travay ansanm, zot kapab koz lo bann keksoz ki enportan. Par egzanp, zot kapab koz lo lafason ki Zeova i toultan fer sa ki byen e lafason ki i pe ed zot fanmir.

11. Kan ki bann paran i kapab koz avek zot zanfan?

¹¹ Ozordi lavi i nepli parey avan. Dan bokou pei, bann paran ek zanfan pa kapab pas bokou letan ansanm pandan lazournen. Sa i kapab parski bann paran pe travay e bann zanfan pe lekol. Alor, bann paran i bezwen esey rod loportinite pour koz avek zot zanfan. (Efe. 5:15, 16; Fili. 1:10) Zot kapab fer sa pandan ladorasyon fanmir. En zenn frer ki apel Alexander i dir: “Mon papa ti toultan fer laranzman pour nou fer ladorasyon fanmir. I pa ti les nanryen anpes nou pas sa letan ansanm. Apre ladorasyon fanmir, nou ti koz lo bann keksoz ki ti enportan pour nou.”

12. Ki en sef fanmir i devret esey fer pandan ladorasyon fanmir?

¹² Si ou en sef fanmir, ki ou kapab fer pour fer ladorasyon fanmir gou pour ou zanfan? Petet ou kapab etidye sa nouvo liv Viv ere pour touzour! avek ou zanfan. Sa liv pou fer li fasil pour annan bann bon konversasyon. Ou anvi ki ou zanfan i dir ou sa ki zot pe santi e sa ki pe fatig zot. Alor pa bezwen servi sa letan pour kritik oubyen dispit avek zot. Esey pa ankoler si parfwa zot dir bann keksoz ki pa annakor avek sa ki Labib i dir. O kontrer, kontan ki zot dir ou sa ki zot pe mazinen e fer li fasil pour zot kontinyen koz avek ou lo zot bann santiman. Ou kapab pli byen ed ou zanfan si ou konnen ki mannyer zot pe santi.

13. Ki lezot loportinite bann paran i annan pour ed zot zanfan vin pros avek Zeova?

¹³ Paran, rod loportinite pandan lazournen pour ed ou zanfan vin pros avek Zeova. Ou pa bezwen esper ou letid Labib avek ou zanfan pour ansenny zot konsernan nou Bondye ki kontan nou. Remark sa ki en manman ki apel Lisa i dir: “Nou ti servi bann keksoz otour nou pour ansenny nou zanfan konsernan Zeova. Par egzanp, ler nou lisyen ti fer en keksoz ki ti fer nou zanfan riye, nou ti dir zot ki sa i montre ki Zeova i en Bondye ere e i’n fer posib pour nou ere e apresye bann keksoz ki fer riye.”

14. Akoz i enportan pour bann paran ed zot zanfan swazir bann bon zanmi? (Proverb 13:20)

¹⁴ Prensip 4: Ed ou zanfan pour swazir bann bon zanmi. Parol Bondye i montre ki nou bann zanmi i kapab annan en bon lenfliyans lo nou ouswa en move lenfliyans. (Lir Proverb 13:20.) Paran, eski ou konn bann zanmi ou zanfan? Eski ou’n deza rankontre zot e pas letan avek zot? Ki ou kapab fer pour ed ou zanfan fer zanmi avek bann ki kontan Zeova? (1 Kor. 15:33) Ou kapab ed ou zanfan fer bann bon zanmi par envit bann ki annan en bon lanmitye avek Zeova pour pas letan avek ou fanmir.​—Ps. 119:63.

15. Ki mannyer bann paran i kapab ed zot zanfan fer bann bon zanmi?

¹⁵ Annou vwar leksperyans en papa ki apel Tony. Tony i eksplike ki li ek son madanm ti fer pour ed zot zanfan fer bann bon zanmi. “Pour plizyer lannen, nou de mon madanm, nou ti envit bann frer ek ser diferan laz kot nou pour en repa ouswa pour ladorasyon fanmir. Sa i en bon fason pour konn bann ki kontan Zeova e ki servi li dan lazwa. Nou’n kapab envit bann sirveyan rezyonal, misyonner ek lezot serviter Zeova pour reste kot nou. Nou zanfan ti aprann en kantite avek zot leksperyans, sa devouman ki zot in demontre e lafason ki zot in travay dir dan servis Zeova. Tousala in ed nou zanfan pour vin pros avek Zeova.” Paran, fer tou sa ki ou kapab pour ed ou zanfan fer bann bon zanmi.

16. Ki ou pou fer si ou zanfan i dir ki i pa anvi servi Zeova?

¹⁶ Paran, ki ou pou fer si malgre tou ou zefor, enn ou zanfan i dir ki i pa anvi servi Zeova? Pa bezwen krwar ki ou pa’n fer ase konman en paran. Zeova in donn nou tou, enkli ou zanfan, sa liberte pour swazir si nou pou servi li oubyen non. Si ou zanfan in deside pour kit Zeova, annan lespwar ki en zour i kapab retournen. Mazin sa legzanp ki Zezi ti donnen konsernan garson perdi. (Lik 15:11-19, 22-24) Sa garson ti fer en kantite move keksoz me finalman i ti retournen. Serten i kapab dir ki sa ti zis en legzanp. Eski sa i kapab vreman arive? Wi, i kapab. Sanmenm sa ki ti arive avek en garson ki apel Elie.

17. Ki mannyer leksperyans Elie i ankouraz ou?

¹⁷ Annou vwar leksperyans Elie. Elie i dir sa konsernan son paran: “Zot ti fer zot mye pour ed mwan pour kontan Zeova ek son Parol, Labib. Me ler mon ti annan apepre 15 an, mon ti konmans rebel.” Elie ti konmans fer bann move keksoz an kasyet. Son paran ti esey ed li pour reste pros avek Zeova me i pa ti ekout zot. Apre ki Elie ti’n kit lakour son paran, i ti kontinyen fer bann move keksoz. Kantmenm sa, i ti koz avek enn son zanmi lo Labib tanzantan. Elie i dir: “Pli mon ti koz avek mon zanmi lo Zeova, pli mon ti mazin Zeova. Ptitapti, bann lagrenn laverite ki mon paran ti’n travay dir pour semen dan mon leker, ti konmans pouse.” Avek letan, Elie ti retourn kot Zeova.c Zis mazinen ki kantite son paran ti kontan ki zot ti’n ansenny li pour kontan Zeova depi ler i ti ankor pti.​—2 Tim. 3:14, 15.

18. Ki mannyer ou santi anver bann paran ki fer bokou zefor pour ansenny zot zanfan pour kontan Zeova?

¹⁸ Paran, ou annan en gran privilez pour ed ou zanfan, setadir sa nouvo zenerasyon, pour servi Zeova. (Ps. 78:4-6) I pa fasil pour fer sa me nou felisit ou pour sa kantite zefor ki ou pe fer pour ed ou zanfan. Si ou kontinyen fer ou mye pour ed ou zanfan pour kontan Zeova e pour elve li dapre disiplin ek gidans Zeova, ou kapab asire ki ou Papa ki dan lesyel pou vreman kontan.​—Efe. 6:4.