Kontinyen devlop plis lanmour pour Zeova e pour lezot

 1. Ki ou ti aprann ler ou ti konmans etidye Labib?

ESKI ou rapel ler ou ti konmans etidye Labib? Petet ou ti sirprann pour aprann ki Bondye i annan en non. Petet ou ti osi kontan pour aprann ki Bondye pa pini dimoun dan lanfer. I tre probab ki ou ti kontan pour konnen ki ou pou revwar bann dimoun ki ou kontan ki’n mor e ou pou viv avek zot dan en paradi lo later.

 2. Apard ki aprann bann laverite ki dan Labib, ki lezot progre ou’n fer? (Efezyen 5:1, 2)

² Pli ou ti etidye Parol Bondye, pli ou ti kontan Zeova plis. Sa lanmour ti motiv ou pour aplik sa ki ou ti aprann. Sa ti fer ou fer bann pli bon desizyon ki baze lo bann prensip Labib. Ou ti aprann pour mazin e fer bann bon keksoz parski ou ti anvi fer plezir Bondye. Zis parey en zanfan i swiv legzanp son paran, ou ti pe swiv legzanp ou Papa ki dan lesyel.​—Lir Efezyen 5:1, 2.

 3. Ki kestyon nou kapab demann nou lekor?

³ Nou kapab demann nou lekor: ‘Eski la konmela mon kontan Zeova plis ki ler mon ti fek vin en Kretyen? Eski apre mon batenm, mon fason panse ek mon aksyon in vin pli parey pour Zeova sirtou ler mon demontre lanmour anver mon bann frer ek ser?’ Si “sa lanmour ki ou ti annan o konmansman” i nepli for parey avan, pa dekouraze. En keksoz en pe parey ti arive avek bann Kretyen dan premye syek. Kantmenm sa, Zezi pa ti rezet zot e i pa pou rezet nou. (Rev. 2:4, 7) I konnen ki nou kapab retrouv sa lanmour ki nou ti annan ler nou ti fek aprann laverite.

 4. Ki nou pou vwar dan sa lartik?

⁴ Dan sa lartik, nou pou vwar ki mannyer nou kapab kontinyen devlop plis lanmour pour Zeova e pour lezot. Apre nou pou vwar bann benediksyon ki nou pou gannyen ler nou fer sa.

5-6. Ki serten problenm zapot Pol ti fer fas avek pandan son minister e kwa ki ti motiv li pour kontinyen servi Zeova?

⁵ Zapot Pol ti kontan son servis pour Zeova me i pa ti toultan fasil pour li. Souvandfwa Pol ti vwayaz bann gran zistans e sa letan, i pa ti fasil pour vwayaze. Parfwa dan son bann vwayaz, i ti fer fas avek “danze kot bann larivyer” e “danze akoz voler.” I ti osi ganny bate avek bann ki ti opoz li. (2 Kor. 11:23-27) Osi, bann frer ek ser dan kongregasyon pa ti toultan demontre lapresyasyon pour bann keksoz ki i ti fer pour ed zot.​—2 Kor. 10:10; Fili. 4:15.

⁶ Kwa ki ti ed Pol pour kontinyen servi Zeova? Atraver Lekritir e atraver son prop leksperyans, Pol ti aprann en kantite konsernan personnalite Zeova e sa ti fer li asire ki Zeova i kontan li. (Rom. 8:38, 39; Efe. 2:4, 5) I ti aprann pour kontan Zeova en kantite. Pol ti montre ki i kontan Zeova “par servi e kontinyen servi bann sen.”​—Ebr. 6:10.

 7. Ki en fason ki nou kapab devlop plis lanmour pour Zeova?

⁷ Nou kapab devlop plis lanmour pour Bondye par etidye son Parol o profon. Anmezir ki ou lir Labib, esey vwar ki sak resi i montre lo Zeova. Demann ou lekor: ‘Ki mannyer sa resi i montre ki Zeova i kontan mwan? Ki mannyer sa resi i ed mwan pour kontan Zeova?’

 8. Ki mannyer lapriyer i kapab ed nou pour devlop plis lanmour pour Bondye?

⁸ En lot fason ki nou kapab devlop plis lanmour pour Zeova i par koz avek li dan lapriyer toulezour. (Ps. 25:4, 5) An retour, Zeova pou reponn nou lapriyer. (1 Zan 3:21, 22) En ser ki apel Khanh, ki reste Lazi, i dir: “O konmansman, mon ti kontan Zeova akoz sa ki mon ti’n aprann lo li. Me ler mon ti vwar ki i reponn mon bann lapriyer, sa ti fer mwan kontan li plis e mon ti anvi fer bann keksoz ki fer li plezir.”b

 9. Ki mannyer Timote ti montre ki i ti pe devlop plis lanmour pour son bann frer ek ser?

⁹ Detrwa lannen apre ki Pol ti’n vin en Kretyen, i ti zwenn en zenn garson ki apel Timote. Timote ti kontan Zeova e i ti kontan lezot. Pol ti dir bann Filipyen: “Mon napa personn ankor ki annan en bon latitid parey Timote ki vreman enterese avek zot byennet.” (Fili. 2:20) Dan sa verse, Pol pa ti pe koz lo sa abilite ki Timote i annan pour organiz keksoz oubyen pour fer diskour. Me Pol ti vwar ki Timote ti kontan son bann frer ek ser en kantite. San dout, bann kongregasyon ki Timote ti vizite ti vreman kontan ler i ti vin vizit zot.​—1 Kor. 4:17.

10. Ki mannyer Anna ek son msye ti montre ki zot kontan zot bann frer ek ser?

¹⁰ Nou osi nou rod fason pour ed nou bann frer ek ser. (Ebr. 13:16) Annou vwar leksperyans Anna, ki’n ganny mansyonnen dan sa lartik avan. Apre ki i ti annan en gro tanpet, Anna ek son msye ti al vizit lakour en koup Temwen Zeova e zot ti dekouver ki sa tanpet ti’n detri twatir lakaz sa fanmir. Sa ti fer ki sa fanmir ti napa okenn lenz prop. Anna ti dir: “Nou ti pran zot lenz pour lave e apre ki nou ti’n drese e ploy zot lenz, nou ti rann zot zot lenz. Pour nou, sa pa ti en gran keksoz. Me sa ki nou ti fer, in fer nou ek sa fanmir, vin bann bon zanmi ziska aprezan.” Sa lanmour ki Anna ek son msye ti annan pour bann frer ek ser, ti motiv zot pour ed lezot.​—1 Zan 3:17, 18.

11. (a) Ki mannyer lezot i santi ler nou montre ki nou kontan zot? (b) Dapre Proverb 19:17, ki Zeova i fer ler nou demontre lanmour?

¹¹ Ler nou demontre labonte ek lanmour anver lezot, zot pou kapab vwar ki nou pe esey swiv legzanp Zeova. I kapab ki zot apresye sa labonte ki nou demontre anver zot plis ki nou realize. Khanh, ki’n ganny mansyonnen pli boner pa oubliy bann ki’n ed li. I dir: “Mon vreman rekonesan anver tou bann ser ki’n anmenn mwan avek zot dan predikasyon. Zot ti vin zwenn mwan kot mwan, envit mwan manze avek zot e apre zot ti retourn avek mwan kot mwan. Aprezan mon realize ki i ti demann en kantite zefor pour zot fer sa. Me zot ti fer sa parski zot ti kontan pour fer li.” Byensir pa tou dimoun ki pou remersye nou pour bann keksoz ki nou fer pour zot. Khanh ti dir sa konsernan bann ki ti ed li: “Mon ti pou kontan fer en keksoz pour montre sa bann ser ki mon vreman apresye tou sa ki zot in fer pour mwan. Me mon pa konnen kote zot reste. Me Zeova i konnen kote zot ete e mon priye ki i rekonpans zot pour mwan.” Khanh i annan rezon. Zeova i vwar tou bann bon keksoz ki nou fer pour lezot menm si sa ki nou fer i pa en gran keksoz. I vwar sa bann keksoz ki nou fer konman en sakrifis ki vreman presye e konman en det ki i pou peye.​—Lir Proverb 19:17.

12. Ki mannyer bann frer i kapab demontre lanmour pour bann frer ek ser dan kongregasyon? (Vwar portre.)

¹² Si ou en frer, ki mannyer ou kapab demontre ou lanmour pour lezot e fer plis pour lezot? En zenn frer ki apel Jordan ti demann en ansyen sizesyon lo ki mannyer i kapab fer plis pour ede dan kongregasyon. Sa ansyen ti felisit li pour bann progre ki i’n fer e i ti donn li serten konsey lo ki mannyer i kapab fer plis. Par egzanp, i ti sizere ki Jordan i ariv boner kot Lasal Rwayonm e akey lezot, ki i partisipe dan renyon, ki i regilyerman partisip dan predikasyon avek son group e i rod fason pour ed lezot. Ler Jordan ti aplik sa konsey, i pa ti zis aprann ki mannyer pour fer serten keksoz me i ti osi aprann pour devlop plis lanmour pour son bann frer ek ser. Jordan ti aprann ki en frer pa konmans ed lezot ler i vin en serviter kongregasyon. O kontrer, ler i vin en serviter kongregasyon i kontinyen ed lezot.​—1 Tim. 3:8-10, 13.

13. Ki mannyer lanmour ti motiv Christian pour fer zefor pour kalifye pour revin en ansyen?

¹³ Ki ou pou fer si dan lepase ou ti deza en serviter kongregasyon oubyen en ansyen? Zeova i rapel bann travay ki ou ti fer pour li dan lepase e sa lanmour ki ti motiv ou pour fer sa travay. (1 Kor. 15:58) Zeova i osi vwar sa lanmour ki ou pe kontinyen demontre. En frer ki apel Christian ti dezapwente ler i ti ganny tire konman en ansyen. Christian i dir: “Mon ti deside ki mon ti pou fer tou sa ki mon kapab pour servi Zeova ki swa mon en ansyen oubyen non.” Pli tar, i ti reganny apwente konman en ansyen. Christian i dir: “Mon ti en pti pe per pour revin en ansyen. Me mon ti deside ki si Zeova i anvi ki mon servi konman en ansyen ankor, mon pou fer li parski mon kontan Zeova e mon kontan mon bann frer ek ser.”

14. Ki ou aprann avek sa ki en ser ki sorti Georgia ti dir?

¹⁴ Bann serviter Zeova i osi demontre lanmour pour zot prosen. (Mat. 22:37-39) Par egzanp, en ser ki apel Elena, ki sorti dan pei Georgia, i dir: “O konmansman, sa sel keksoz ki ti motiv mwan pour fer predikasyon ti mon lanmour pour Zeova. Anmezir mon ti devlop plis lanmour pour mon Papa ki dan lesyel, mon ti osi devlop plis lanmour pour bann dimoun. Mon ti reflesir lo ki kalite problenm zot ti pe fer fas avek e ki zot ti ava kontan koz lo la. Pli mon ti fer sa, pli mon ti anvi ed zot.”​—Rom. 10:13-15.

15-16. Parey nou vwar dan portre, ki byenfe nou gannyen ler nou demontre lanmour anver lezot?

¹⁵ Ler nou demontre lanmour anver nou bann frer ek ser, pa zis zot ki ganny bann byenfe. Apre ki pandemi COVID-19 ti konmanse, en frer ki apel Paolo ek son madanm ti montre en kantite ser aze ki mannyer pour servi zot lekipman elektronik pour fer predikasyon. En ser ki ti vwar li difisil pour servi son lekipman elektronik ti finalman reisi servi son lekipman elektronik. Sa ti fer ki i ti kapab envit son bann fanmir pour asiste Memoryal. Swasant parmi zot ti asiste Memoryal atraver video konferans. Sa ki Paolo ek son madanm ti’n fer ti anmenn byenfe pour sa ser ek son bann fanmir. Pli tar, sa ser ti ekri Paolo e dir: “Mersi pour ed bann aze. Mon pa pou zanmen oubliye ki kantite Zeova i enterese avek nou e ki kantite zefor ou’n fer pour ed nou.”

¹⁶ Bann leksperyans koumsa in ed Paolo pour aprann en leson enportan. Sa leksperyans in fer Paolo rapel ki lanmour i pli enportan ki konnesans oubyen abilite. Paolo i dir: “Oparavan, mon ti en sirveyan rezyonal. Ozordi, mon realize ki menm si bann frer ek ser i oubliy mon bann diskour, zot ankor mazin bann keksoz ki mon ti fer pour ed zot.”

17. Lekel ankor ki ganny bann byenfe ler nou demontre lanmour?

¹⁷ Ler nou demontre lanmour anver lezot, nou osi nou ganny bann byenfe ki nou pa ti pe ekspekte. En frer ki apel Jonathan, ki reste Nouvel Zelann, in eksperyans sa. En Sanmdi apremidi byen so, i ti vwar en frer ki ti en pionye pe fer predikasyon li tousel. Jonathan ti deside pour al predikasyon avek sa frer dan Sanmdi apremidi. Sa letan, i pa ti realize ki kantite byenfe i ti pou gannyen avek sa ki i ti pe fer. Jonathan i dir: “Sa letan mon pa ti kontan predikasyon. Me ler mon ti ekout lafason ki sa pionye ti ansennyen e mon ti vwar bann bon rezilta ki i ti gannyen dan predikasyon, mon ti konmans kontan predikasyon mwan osi. Sa frer ti osi vin mon bon zanmi. I ti ed mwan pour progrese, pour kontan predikasyon e pour vin pli pros avek Zeova.”

18. Ki Zeova i anvi nou fer?

¹⁸ Zeova i anvi ki nou tou nou devlop plis lanmour pour li e pour lezot. Parey nou’n aprann, nou kapab devlop plis lanmour pour Zeova par lir e medit lo son Parol e par koz avek li dan lapriyer regilyerman. Nou kapab devlop plis lanmour pour nou bann frer ek ser par rod bann fason pour ed zot. Anmezir ki nou devlop plis lanmour, nou pou vin pli pros avek Zeova e avek nou bann frer ek ser e nou pou kapab reste zanmi avek zot pour touzour!