Ki ou kapab fer si ou konzwen i get pornografi?

• “Mon ti santi konmsi mon msye in komet adilter plizyer fwa.”

• “Mon ti santi ki mon’n ganny imilye, mon pa atiran e ki mon pa vo nanryen.”

• “Mon pa ti kapab koz avek personn konsernan sa sityasyon. Mon ti soufer e i ti napa personn pour rekonfort mwan.”

• “Mon ti santi ki Zeova pa ti enterese avek mwan.”

Sa bann parol i montre ki kantite en madanm i soufer ler son msye i get pornografi. Si sa msye ti pe get pornografi an sekre, petet pour plizyer mwan oubyen lannen, sa madanm i kapab santi ki i nepli kapab annan konfyans dan son msye. En madanm ti dir: “Mon ti santi ki mon pa konn mon msye ditou. Eski i annan lezot keksoz ki i pe kasyet mwan?”

Sa lartik in ganny prepare pour en madanm ki son msye pe get pornografi.a Nou pou vwar bann prensip dan Labib ki kapab rekonfort li, reasir li ki Zeova i kontan e i anvi ed li. Sa bann prensip pou osi ed li annan lape lespri e pour reste pros avek Zeova.b

Menm si ou pa kapab kontrol tou sa ki ou msye i fer, i annan serten keksoz ki ou kapab fer pour ou ganny lape lespri. Annou vwar serten keksoz ki ou kapab fer.

Pa blanm ou lekor. En madanm i kapab santi ki i son lafot ki son msye i get pornografi. Alicec ti santi ki i pa ti ase atiran pour son msye. I ti mazinen: “Akoz mon msye i pli kontan get lezot madanm?” Serten madanm i blanm zot lekor pour lafason ki zot reazir e zot mazinen ki zot pe fer sa sityasyon pli grav. Danielle i dir: “Mon ti vreman ankoler akoz mon msye ti pe kontinyen get pornografi e mon ti santi ki mon lakoler ti pe fer sa sityasyon vin pli grav.”

Si ou santi koumsa, ou kapab asire ki Zeova pa krwar ki ou responsab pour sa ki ou msye pe fer. Zak 1:14 i dir: “En dimoun i ganny teste ler i ganny atire e anbete par son prop dezir.” (Rom. 14:12; Fili. 2:12) Olye blanm ou, Zeova i kontan ki ou fidel avek li.​—2 Kron. 16:9.

I ti pou byen pour sa madanm konpran ki lefet ki son msye i get pornografi, sa pa vedir ki i annan en keksoz mal avek li konman en madanm. Bann eksper lo sa size i eksplike ki pornografi i fer en dimoun annan bann dezir seksyel ki en madanm pa kapab satisfer.

Pa trakas tro bokou. Catherine i dir ki i ti toultan pe mazin lefet ki son msye i get pornografi. Frances i dir: “Mon vreman enkyet ler mon pa konnen kote mon msye i ete e mon koumsa lazournen antye.” Lezot madanm i dir ki zot santi zot anbarase ler zot avek bann frer ek ser ki zot krwar i konnen ki zot msye pe get pornografi. I annan lezot ankor ki dir ki zot santi zot tousel parski zot krwar ki personn pa konpran zot sityasyon.

I normal pour santi koumsa. Me si ou kontinyen mazin lo sa bann keksoz, ou pou pli enkyet. O kontrer, esey konsantre lo ou lanmitye avek Zeova. Sa pou ed ou vin pli for.​—Ps. 62:2; Efe. 6:10.

Petet i ti pou byen ki ou lir e medit lo bann resi dan Labib konsernan bann madanm ki ti vreman enkyet e ki ti rod rekonfor par koz avek Zeova dan lapriyer. Zeova pa ti toultan sanz zot sityasyon me i ti donn zot lape lespri. Par egzanp, Ana ti “vreman sagren” konsernan son sityasyon. Me apre ki i ti’n “priy Zeova pour en bon pe letan,” i ti ganny lape lespri menm si i pa ti konnen ki pou arive dan lavenir.​—1 Sam. 1:10, 12, 18; 2 Kor. 1:3, 4.

Rod led avek bann ansyen dan kongregasyon. Zot kapab vin parey “en landrwa kasyet kont divan, parey en landrwa maske kont tanpet lapli.” (Iza. 32:2) Zot kapab menm dir ou konsernan en ser ki ou kapab koz avek an prive e ki kapab rekonfort ou.​—Prov. 17:17.

Eski ou pou kapab ed ou msye pour aret get pornografi? Petet. Labib i dir ki pour rezourd en problenm oubyen lager avek en lennmi vreman pwisan, “de dimoun i pli bon ki enn.” (Ekle. 4:9-12) Bann eksper i dir ki ler en koup i travay ansanm, souvan sa msye i kapab reisi aret get pornografi e son madanm i kapab aprann pour annan konfyans dan li ankor.

Byensir sa pou depan lo si ou msye i pare pour fer zefor e si i anvi aret get pornografi. Eski i’n sipliy Zeova pour donn li lafors e eski i’n rod led avek bann ansyen? (2 Kor. 4:7; Zak 5:14, 15) Eski i’n fer en plan ki pou ed li evite get pornografi? Par egzanp, eski i’n met en limit lo lafason ki i servi bann lekipman elektronik e eski i evit bann sityasyon kot i pou ganny tante pour get pornografi? (Prov. 27:12) Eski i pare pour aksepte ou led e pour li pa kasyet nanryen avek ou? Si wi, petet ou kapab ed li.

Ki mannyer? Annou vwar en legzanp. Felicia in marye avek Ethan, ki ti’n vin adikt avek pornografi ler i ti ankor byen zenn. Felicia ti fer li fasil pour Ethan koz avek li sak fwa ki i ganny sa lanvi pour get pornografi. Ethan i dir: “Mon pa kasyet nanryen avek mon madanm. Avek lanmour, i ed mwan evit bann sityasyon kot mon pou ganny tante e tanzantan i gete ki mannyer mon ete. I osi ed mwan kontrol lakantite Enternet ki mon servi.” Felicia i sagren ki Ethan i get pornografi e i normal ki i santi koumsa. Felicia i dir: “Me mon lakoler ek sagrinasyon pa ed li pour evit sa move labitid. Apre ki nou’n diskit lo son problenm, i pare pour ed mwan fer fas avek mon prop santiman.”

Bann konversasyon koumsa i kapab ed en msye pour evite get pornografi e i osi kapab ed son madanm pour annan konfyans dan li ankor. Apre tou, ler en msye i pare pour koz avek son madanm konsernan son febles, kote i pe ale e ki i pe al fer, sa pou fer li pli fasil pour son madanm annan konfyans dan li parski i pe nepli kasyet keksoz avek son madanm.

Eski ou krwar ki ou kapab ed ou msye dan sa menm fason? Si wi, petet ou kapab lir e diskit lo sa lartik ansanm. Ou msye pou annan sa lobzektif pour aret get pornografi e pour donn ou en rezon pour annan konfyans dan li. Olye ankoler ki ou anvi koz lo son febles, i devret esey konpran ki lefe sa i annan lo ou. Ou bezwen ed li pour aret sa move labitid e donn li loportinite pour reganny ou konfyans. Zot tou le de zot bezwen rode kwa ki fer en dimoun anvi get pornografi e ki mannyer en dimoun i kapab aret sa move labitid.d

Si ou per ki ou ek ou konzwen pa pou kapab reste kalm ler zot pe koz lo sa size, petet ou kapab demann en ansyen ki zot tou le de zot konfortab avek, pour la avek zot pour en pe letan anmezir ki zot pe koz lo sa sityasyon. Gard antet ki menm apre ki ou msye in reisi aret get pornografi, i kapab pran en kantite letan pour ou annan konfyans dan li ankor. Pa perdi lespwar. Remark bann pti siny ki montre ki zot relasyon pe amelyore. Annan lespwar ki avek letan ek pasyans, ou maryaz pou vin for parey avan.​—Ekle. 7:8; 1 Kor. 13:4.

Me si ou msye i rekonmans get pornografi apre ki i ti’n arete pour en serten letan, eski sa i vedir ki i pa regrete pour son aksyon e ki i pa pou zanmen kapab aret sa move labitid? Pa neseserman. Si i adikt avek pornografi, i kapab ki i pou lalit avek sa move labitid tou son lavi. I kapab ki i get pornografi menm apre ki’n reisi evit sa move labitid pour plizyer lannen. Pour anpes sa arive, i pou bezwen met bann lareg pli strik pour son lekor. Petet i pou bezwen kontinyen strik menm apre ki i paret ki i’n aret sa move labitid. (Prov. 28:14; Mat. 5:29; 1 Kor. 10:12) I pou bezwen devlop en nouvo “fason panse” e aprann pour “ay sa ki mal.” (Efe. 4:23; Ps. 97:10; Rom. 12:9) Sa i enkli pornografi e osi lezot pratik sal parey mastirbasyon. Eski ou msye i pare pour fer zefor? Si wi, i kapab ki avek letan i pou reisi aret sa move labitid.e

Me ki ou pou fer si ou msye pa anvi aret sa move labitid? I normal ki ou kontinyen santi ou dezapwente, ankoler e ki i’n trai ou. Larg tou ou traka lo Zeova. Sa pou ed ou pour annan lape lespri. (1 Pyer 5:7) Kontinyen vin pros avek Zeova atraver lapriyer, letid personnel ek meditasyon. Anmezir ki ou fer sa, ou kapab asire ki Zeova osi pou vin pli pros avek ou. Parey i ganny dir dan Izai 57:15, Zeova i reste pros avek bann “ki’n ganny kraze e ki annan limilite” e i anvi ed zot reganny zot lazwa. Fer zefor pour vin sa pli bon Kretyen ki ou kapab. Rod led avek bann ansyen. Annan lespwar ki en zour, ou msye pou sanze e aret get pornografi.​—Rom. 2:4; 2 Pyer 3:9.