Eski ou pe ekout bann lavertisman?

 1. Ki Zezi pou fer byento?

NOU pe viv dan en letan kot i pou annan en kantite sanzman. Byento Zezi pou ziz tou dimoun ki lo later. Zezi in fer nou konnen ki i pros pour ziz bann dimoun. I’n donn son bann disip en “siny” ki montre ki i la konman en lerwa dan lesyel e ki “lafen sa lemonn i pros pour arive.” (Mat. 24:3) Sa profesi i dan Matye sapit 24 ek 25, dan Mark sapit 13 e dan Lik sapit 21.

 2. Ki nou pou vwar dan sa lartik e akoz sa pou ed nou?

² Zezi ti servi trwa legzanp pour ed son bann disip pour prepare. Sa bann legzanp i parey bann lavertisman. Sa i legzanp mouton ek kabri, legzanp bann vyerz pridan e bann vyerz bet ek legzanp bann talan. Sa bann legzanp i ed nou konpran ki Zezi pou ziz en dimoun dapre son bann aksyon. Dan sa lartik, nou pou diskit lo sa bann legzanp e nou pou vwar ki nou kapab aprann avek zot. Sa premye legzanp ki nou pou vwar i konsernan mouton ek kabri.

LEGZANP MOUTON EK KABRI

 3. Kan ki Zezi pou ziz bann dimoun?

³ Dan sa legzanp konsernan mouton ek kabri, Zezi ti dir ki i pou ziz dimoun ki’n annan sa loportinite pour tann sa bon nouvel e pour siport bann Kretyen swazir. (Mat. 25:31-46) I pou ziz sa bann dimoun pandan “gran ladetres” zis avan Armagedon. (Mat. 24:21) Zis parey en berze i separ bann mouton avek bann kabri, Zezi pou separ bann dimoun ki’n siport bann Kretyen swazir ek bann ki pa’n siport zot.

 4. Dapre Izai 11:3, 4, akoz nou asire ki Zezi pou ziz bann dimoun dan en fason ki zis? (Vwar portre.)

⁴ Labib i montre ki Zeova in apwent Zezi konman Ziz e ki ler Zezi pou ziz bann dimoun i pou toultan ziz zot dan en fason ki zis. (Lir Izai 11:3, 4.) I obzerv sa ki dimoun i fer, sa ki zot mazinen e sa ki zot dir, enkli lafason ki zot tret bann Kretyen swazir. (Mat. 12:36, 37; 25:40) Zezi pou konnen lekel ki’n siport bann Kretyen swazir ek sa travay ki zot in fer.a En fason enportan ki nou kapab siport bann Kretyen swazir i par partisip dan sa travay predikasyon ansanm avek zot. Bann ki siport bann Kretyen swazir dan sa fason pou ganny zize konman “bann ki fer sa ki byen” e zot pou ganny sa loportinite pour viv pour touzour lo later. (Mat. 25:46; Rev. 7:16, 17) Pa sa i en zoli rekonpans! Par reste fidel pandan gran ladetres e apre gran ladetres, zot pou kapab gard zot non dan “liv lavi.”—Rev. 20:15.

 5. Ki nou aprann avek sa legzanp konsernan mouton ek kabri e lekel ki devret port latansyon avek sa legzanp?

⁵ Montre ki ou annan lafwa e ki ou fidel. Legzanp Zezi konsernan mouton ek kabri i aplik prensipalman pour bann ki annan sa lespwar pour viv pour touzour lo later. Zot demontre zot lafwa ler zot ed bann Kretyen swazir dan sa travay predikasyon e ler zot swiv direksyon sa pti group Kretyen swazir ki Zezi in apwente pour diriz son lorganizasyon. (Mat. 24:45) Me bann ki annan lespwar pour viv pour touzour dan lesyel i osi bezwen ekout sa lavertisman ki dan sa legzanp konsernan mouton ek kabri. Akoz? Parski Zezi pe obzerv sa ki zot fer, sa ki zot mazinen e sa ki zot dir. Zot osi zot bezwen montre ki zot fidel. Anfet, Zezi ti donn de lezot legzanp ki ti annan bann lavertisman spesifik pour bann Kretyen swazir. Sa bann legzanp i dan Matye sapit 25. Aprezan, annou vwar legzanp sa bann vyerz ki ti pridan e sa bann vyerz ki ti bet.

LEGZANP BANN VYERZ KI TI PRIDAN E BANN KI TI BET

 6. Ki mannyer senk parmi sa dis vyerz ti montre ki zot pridan? (Matye 25:6-10)

⁶ Dan sa legzanp konsernan bann vyerz, Zezi ti koz lo dis vyerz ki ti al zwenn en nouvo marye. (Mat. 25:1-4) Zot tou zot ti anvi al avek sa nouvo marye kot son resepsyon maryaz. Zezi ti dir ki senk parmi sa bann vyerz ti “pridan” e senk ti “bet.” Sa bann vyerz ki ti pridan ti’n prepare e zot ti alert. Zot ti pare pour esper sa nouvo marye nenport kantite letan ki neseser, menm si i ti ariv tar dan lannwit. Alor zot ti anmenn zot lalanp pour kler zot dan fernwanr. Zot ti menm anmenn delwil an plis an ka sa nouvo marye ti ganny retar. Zot ti’n prepare e sa ti fer ki zot ti kapab gard zot lalanp alimen. (Lir Matye 25:6-10.) Ler nouvo marye ti arive, sa bann vyerz ki ti pridan ti al avek li kot resepsyon maryaz. Dan menm fason, bann Kretyen swazir ki montre ki zot in pare par reste eveye e fidel ziska Kris i vini, pou ganny zot rekonpans setadir zot pou kapab zwenn Zezi ki sa nouvo marye dan son Rwayonm dan lesyel.b (Rev. 7:1-3) Me ki ti arive avek sa senk vyerz bet?

 7. Ki ti arive avek sa senk vyerz ki ti bet e akoz?

⁷ Bann vyerz bet pa ti fer parey bann vyerz pridan e zot pa ti pare ler nouvo marye ti arive. Zot lalanp ti pros pour tennyen e zot pa ti’n anmenn delwil an plis avek zot. Ler zot ti tande ki sa nouvo marye ti pros pour arive, zot ti bezwen al aste delwil e zot pa ti ankor retournen ler nouvo marye ti arive. Ler nouvo marye ti arive, “bann vyerz ki ti pare ti al avek li kot resepsyon maryaz e laport ti ganny fermen.” (Mat. 25:10) Pli tar ler zot ti retournen e zot ti anvi antre dan resepsyon maryaz, sa nouvo marye ti dir zot: “Mon pa konn zot.” (Mat. 25:11, 12) Sa bann vyerz pa ti’n prepare pour esper nouvo marye nenport ki kantite letan. Ki bann Kretyen swazir i aprann avek sa legzanp?

8-9. Ki bann Kretyen swazir i kapab aprann avek sa legzanp konsernan bann vyerz? (Vwar portre.)

⁸ Montre ki ou’n pare e ki ou alert. Zezi pa ti pe dir ki i ti pou annan de group Kretyen swazir, setadir enn ki ti pou pare pour espere ziska lafen sa lemonn e lot ki pa ti pou pare. O kontrer, i ti pe eksplike ki i ti kapab arive avek bann Kretyen swazir si zot pa ti pare pour reste fidel ziska lafen. Si zot pa pare, zot pa pou ganny zot rekonpans. (Zan 14:3, 4) Sa i en keksoz vreman serye! Ki swa nou annan lespwar pour viv pour touzour dan lesyel oubyen lo later, nou tou nou devret pran aker sa lavertisman ki dan sa legzanp konsernan bann vyerz. Nou tou nou bezwen kontinyen veye e prepare pour nou kapab andire ziska lafen.—Mat. 24:13.

⁹ Apre ki Zezi ti’n servi sa legzanp konsernan bann vyerz pour montre ki kantite i enportan pour prepare e pour reste eveye, i ti koz lo sa legzanp konsernan bann talan. Sa legzanp i montre ki i enportan pour travay dir.

LEGZANP KONSERNAN BANN TALAN

10. Ki mannyer de lesklav ti montre ki zot fidel? (Matye 25:19-23)

¹⁰ Dan sa legzanp konsernan bann talan, Zezi ti koz lo de lesklav ki ti fidel avek zot met e enn ki pa ti fidel. (Mat. 25:14-18) Sa de lesklav ti montre ki zot fidel par travay dir pour fer plis larzan pour zot met. Avan ki zot met ti al aletranze, i ti konfye son bann lesklav avek bann talan, setadir en gro sonm larzan. Sa de lesklav fidel ti travay dir e zot ti servi sa larzan byen. Ki ti arive? Ler zot met ti retournen, zot ti’n double sa larzan ki i ti’n donn zot. Zot met ti felisit zot e zot ti ‘selebre avek zot met.’ (Lir Matye 25:19-23.) Me ki ti arive avek sa trwazyenm lesklav? Ki i ti fer avek sa larzan ki son met ti’n donn li?

11. Ki i ti arive avek sa lesklav “pares” e akoz?

¹¹ Sa trwazyenm lesklav ti ganny en talan me i ti “pares.” Son met ti ekspekte ki i servi sa talan byen. O kontrer i ti fouy en trou e anter sa larzan. Ler son met ti retournen, sa lesklav ti napa nanryen an plis pour donn li. Sa lesklav ti napa en bon latitid. Olye demann leskiz pour lefet ki i pa’n fer plis larzan pour son met, sa lesklav ti dir ki son met i “en dimoun ki ekspekte bokou.” Sa lesklav pa ti ganny laprouvasyon son met. An plis ki sa, son met ti aras li sa talan e i ti ganny mete an deor lakour son met.—Mat. 25:24, 26-30.

12. Sa de lesklav fidel pe reprezant lekel ozordi?

¹² Sa de lesklav fidel i reprezant bann Kretyen swazir ki fidel. Zezi, zot met, i envit zot pour “vin selebre avek [li].” Zot ganny zot rekonpans ler zot al dan lesyel, ki sa premye rezireksyon. (Mat. 25:21, 23; Rev. 20:5b) De lot kote, move legzanp sa lesklav pares i en lavertisman pour bann Kretyen swazir. Ki mannyer sa?

13-14. Ki bann Kretyen swazir i aprann dan sa legzanp konsernan bann talan? (Vwar portre.)

¹³ Montre ki ou travay dir. Parey sa legzanp konsernan bann vyerz, dan sa legzanp konsernan bann talan, Zezi pa ti pe dir ki bann Kretyen swazir ti pou vin pares. O kontrer i ti pe eksplike ki i ti pou arive si zot ti nepli devoue dan zot servis. Zot pa ti pou kapab “gard zot privilez konman sa bann ki’n ganny apele e swazir” e zot pa ti pou kapab antre dan Rwayonm lesyel.—2 Pyer 1:10.

¹⁴ Legzanp Zezi konsernan bann vyerz e konsernan bann talan i montre ki tou Kretyen swazir i bezwen prepare, reste eveye e osi travay dir. Me eski Zezi ti dir okenn lezot keksoz ki ti en lavertisman pour bann Kretyen swazir? Wi, nou vwar sa lavertisman dan sa ki i ti dir dan Matye 24:40, 41.

LEKEL KI POU “GANNY PRAN”?

15-16. Ki mannyer Matye 24:40, 41 i montre ki bann Kretyen swazir i bezwen kontinyen veye?

¹⁵ Avan ki Zezi ti koz lo sa trwa legzanp, i ti koz lo sa dernyen zizman ki pou arive avek bann Kretyen swazir ki pou montre lekel ki’n ganny aprouve. I ti koz lo de zonm ki pou pe travay dan plantasyon ek de madanm ki pou pe kraz dible lo moulen. I paret ki sa de zonm ti pe fer menm travay e ki sa de madanm ti pe fer menm travay. Me Zezi ti dir ki “enn pou ganny pran e lot pou ganny kit deryer.” (Lir Matye 24:40, 41.) Apre Zezi ti dir son bann disip: “Alor, kontinyen veye akoz zot pa konnen ki zour zot Senyer pe vini.” (Mat. 24:42) Zezi ti dir en keksoz en pe parey apre ki i ti’n koz lo sa legzanp konsernan bann vyerz. (Mat. 25:13) Sa ki Zezi ti dir dan sa de verse i relye avek kanmarad. Zis bann Kretyen ki’n vreman ganny swazir par lespri sen e ki fidel, ki pou “ganny pran” e ganny resevwar par Zezi dan Rwayonm lesyel.—Zan 14:3.

¹⁶ Montre ki ou pe kontinyen veye. Bann Kretyen swazir ki pa kontinyen veye pa pou ganny rasanble ansanm avek “bann ki’n ganny swazir.” (Mat. 24:31) Osi, tou bann ki annan en lespwar pour viv pour touzour lo later, i devret ekout lavertisman Zezi, setadir zot devret kontinyen veye e kontinyen reste fidel.

17. Akoz nou pa devret enkyet si dan nou letan Zeova i deside pour swazir ankor dimoun pour al viv dan lesyel?

¹⁷ Nou’n aprann konn Zeova byen, alor nou annan konfyans ki tou sa ki i fer i byen. Nou pa enkyet si dan nou letan Zeova i ankor pe swazir bann Kretyen fidel pour al viv dan lesyel.c Nou mazin sa ki Zezi ti dir dan sa legzanp lo plantasyon rezen konsernan bann travayer ki ti vin travay dan dernyen moman. (Mat. 20:1-16) Bann ki ti vin travay dan plantasyon rezen pli tar dan lazournen, ti ganny menm lapey avek bann ki ti konmans travay pli boner. Dan menm fason, nenport letan ki en Kretyen i ganny swazir pour al viv dan lesyel, sa Kretyen pou ganny son rekonpans si i reste fidel.

EKOUT BANN LAVERTISMAN

18-19. Ki nou’n aprann dan sa bann legzanp?

¹⁸ Ki nou’n vwar dan sa lartik? Pour bann ki annan lespwar pour viv pour touzour lo later, sa legzanp konsernan mouton ek kabri i montre ki i enportan pour zot reste fidel avek Zeova la konmela e pandan sa gran ladetres ki pe vini. Sa letan, Zezi pou ziz bann ki fidel konman bann ki pou “ganny lavi eternel.”—Mat. 25:46.

¹⁹ Nou ti osi vwar de legzanp ki bann lavertisman pour bann Kretyen swazir. Dan legzanp Zezi konsernan bann vyerz pridan e bet, senk parmi sa bann vyerz ti montre ki zot saz. Zot ti’n prepare e zot ti alert. Zot ti pare pour esper sa nouvo marye nenport kantite letan ki neseser. Me sa bann vyerz bet pa ti’n prepare. Alor sa nouvo marye pa ti les zot antre dan son resepsyon maryaz. Nenport ki kantite letan i pran, nou tou nou bezwen pare pour espere ziska ki Zezi i met en lafen avek sa move lemonn. Dan legzanp Zezi konsernan bann talan, nou ti vwar ki de lesklav fidel ti travay dir pour zot met e sa ti fer ki zot ti ganny son laprouvasyon. Tandis ki sa lesklav pares ti ganny rezete. Ki nou aprann? Nou bezwen kontinyen reste okipe dan servis Zeova ziska lafen. Finalman nou ti vwar ki bann Kretyen swazir i bezwen kontinyen veye pour zot kapab ganny zot rekonpans, setadir pour zot “ganny pran” par Zezi e ganny anmennen dan lesyel. Sa bann Kretyen i vreman anvi “ganny rasanble” pour ki zot avek Zezi dan lesyel. Apre lager Armagedon, zot pou vin nouvel marye dan maryaz sa Pti Mouton.—2 Tesa. 2:1; Rev. 19:9.

20. Ki Zeova pou fer pour bann ki ekout son bann lavertisman?

²⁰ Byento Zezi pou ziz bann imen. Me nou napa okenn rezon pour per. Si nou reste fidel, nou Papa ki dan lesyel ki kontan nou, pou donn nou sa lafors “ki pli pwisan ki nou prop lafors” pour nou kapab “debout devan Garson zonm.” (2 Kor. 4:7; Lik 21:36) Ki swa nou annan lespwar pour viv pour touzour dan lesyel oubyen lo later, si nou ekout bann lavertisman ki dan bann legzanp Zezi, nou pou kapab fer nou Papa plezir. Gras a labonte ekstraordiner Zeova, nou non pou “ganny ekrir dan sa liv” lavi.—Dan. 12:1; Rev. 3:5.