Ki nou kapab aprann avek sa dernyen 40 zour ki Zezi ti lo later?

1-2. Ki ti arive avek de disip Zezi ler zot ti pe marse pour al Emais?

I LE 16 Nizan lannen 33. Bann disip Zezi i sagren e zot per. De parmi bann disip i kit Zerizalenm pour al Emais, ki en vilaz ki apepre 11 kilomet avek Zerizalenm. Sa bann zonm i dekouraze parski zot bann disip Zezi e Zezi fek ganny touye. Zot ti krwar ki sa Mesi ti pou fer bann bon keksoz pour bann Zwif e aprezan in mor e i paret ki sa pa pou arive. Me en keksoz ki zot pa ti pe ekspekte ti pe al arive.

² Pandan ki zot pe marse, en zonm i zwenn zot e konmans mars avek zot. Bann disip i rakont sa zonm konsernan bann move keksoz ki’n arive avek Zezi. Sa zonm i konmans koz avek zot konsernan bann keksoz ki zot pa pou zanmen oubliye. I ti servi sa ki’n ganny ekrir par “Moiz ek tou bann Profet” pour eksplik zot akoz Mesi ti bezwen soufer e mor. Ler sa trwa zonm i ariv Emais, sa de disip i realize ki sa zonm ki ti pe koz avek zot ti Zezi, ki Bondye ti’n resisite. I bezwen ki bann disip ti vreman zwaye pour konnen ki Mesi i vivan.—Lik 24:13-35.

3-4. Ki ti arive avek bann disip Zezi e ki nou pou vwar dan sa lartik? (Akt 1:3)

³ Pandan sa dernyen 40 zour ki Zezi ti lo later, Zezi ti aparet avek son bann disip plizyer fwa. (Lir Akt 1:3.) Pandan sa letan, Zezi ti ankouraz son bann disip parski zot ti sagren e per. Zot ti reganny zot lazwa e zot ti ganny sa kouraz pour anons e ansenny sa bon nouvel konsernan Rwayonm.a

⁴ Ler nou etidye konsernan sa ki Zezi ti fer pandan sa letan, nou kapab ganny bann byenfe. Dan sa lartik, nou pou vwar ki mannyer Zezi ti servi sa letan (1) pour ankouraz son bann disip, (2) pour ed zot konpran Lekritir e (3) pour form zot pour bann travay ki zot pou bezwen fer dan lavenir. Nou pou vwar ki mannyer nou kapab swiv legzanp Zezi dan sak sa bann domenn.

ANKOURAZ LEZOT

 5. Akoz bann disip Zezi ti bezwen lankourazman?

⁵ Bann disip Zezi ti bezwen lankourazman. Akoz? Serten ti’n kit zot lakour, fanmir ek biznes, pour zot kapab vin en disip Zezi. (Mat. 19:27) Lezot ti ganny trete dan en move fason parski zot ti’n vin bann disip Zezi. (Zan 9:22) Zot ti pare pour fer bann sanzman e pour soufer parski zot ti krwar ki Zezi ti sa Mesi. (Mat. 16:16) Me ler Zezi ti ganny touye, zot ti vreman sagren e dekouraze parski zot ti krwar ki sa ki zot ti pe espere pa ti pou arive.

 6. Ki Zezi ti fer apre ki i ti’n ganny resisite?

⁶ San dout, Zezi ti konpran akoz son bann disip ti sagren e ki i pa ti akoz zot ti napa ase lafwa me i akoz i ti’n mor. Alor sa menm zour ki i ti’n resisite, i ti konmans ankouraz son bann zanmi. Par egzanp, i ti aparet avek Mari Magdalenn ler Mari Magdalenn ti pe plere kot son latonm. (Zan 20:11, 16) I ti aparet avek sa de disip ki nou’n koz lo la o konmansman sa lartik. I ti osi aparet avek zapot Pyer. (Lik 24:34) Ki nou kapab aprann avek legzanp Zezi? Annou vwar sa ki ti arive ler Zezi ti aparet avek Mari Magdalenn.

 7. Ki Zezi ti vwar Mari Magdalenn pe fer e ki i ti fer pour Mari Magdalenn? (Zan 20:11-16) (Vwar portre.)

⁷ Lir Zan 20:11-16. Granmaten le 16 Nizan, en group madanm ti al sa landrwa kot lekor Zezi ti’n ganny mete. (Lik 24:1, 10) Mari Magdalenn ti enn parmi sa bann madanm. Ler Mari Magdalenn ti ariv kot latonm, i pa ti vwar lekor Zezi. Alor i ti al dir Pyer ek Zan. Sa de zonm ti taye pour al kot latonm e Mari ti swiv zot. Apre ki sa bann zonm pa ti’n vwar lekor Zezi dan latonm, zot ti retourn kot zot. Me Mari ti reste kot latonm e i ti plere. I pa ti realize ki Zezi ti pe get li. Zezi ti vwar ki sa madanm ti sagren e Zezi ti anvi rekonfort li. Alor i ti aparet avek Mari e i ti fer en senp pti keksoz ki ti ankouraz Mari en kantite. I ti koz avek Mari e i ti donn li en keksoz enportan pour fer. I ti dir li al dir avek son bann frer ki Zezi i vivan.—Zan 20:17, 18.

 8. Ki mannyer nou kapab swiv legzanp Zezi?

⁸ Ki mannyer nou kapab swiv legzanp Zezi? Nou swiv legzanp Zezi ler nou ankouraz nou bann frer ek ser pour kontinyen servi Zeova. Parey Zezi, nou bezwen konnen ki problenm nou bann frer ek ser pe pas ladan, esey konpran lafason zot pe santi e rekonfort zot. Annou vwar leksperyans en ser ki apel Jocelyn ki son ser ti mor dan en aksidan. Jocelyn i dir: “Pandan plizyer mwan, mon ti toultan pe santi mwan vreman sagren.” Me en frer avek son madanm ti envit li kot zot e zot ti les li eksprim son santiman. Zot ti ekout li atantivman, demontre labonte anver li e zot ti dir li ki i presye pour Zeova. Jocelyn i dir: “Mon ti santi konmsi mon pe noye dan en lanmer ki move. Me Zeova in servi sa koup pour ed mwan e i konmsi zot in redi mwan e met mwan dan en bato sovtaz. Zot in ed mwan pour reganny sa dezir pour servi Zeova.” Nou osi nou kapab ankouraz lezot par les zot eksprim zot santiman e ekout sa ki zot dir. Sa pou fer ki nou pou kapab rekonfort zot e ed zot pour kontinyen servi Zeova.—Rom. 12:15.

ED LEZOT POUR KONPRAN PAROL BONDYE

 9. Ki problenm bann disip Zezi ti fer fas avek e ki mannyer Zezi ti ed zot?

⁹ Bann disip Zezi ti krwar dan Parol Bondye e zot ti fer en kantite zefor pour aplik Parol Bondye dan zot lavi. (Zan 17:6) Me zot pa ti konpran akoz Zezi ti ganny touye konman en kriminel. Menm si son bann disip ti annan bann dout, Zezi ti konnen ki zot annan lafwa e ki zot ti kontan Zeova. Me i ti realize ki zot ti bezwen konpran Lekritir pli byen. (Lik 9:44, 45; Zan 20:9) Alor i ti ed zot pour rezonn lo sa ki zot lir dan Lekritir. Annou vwar ki mannyer i ti fer sa ler i ti aparet avek sa de disip ki ti pe al Emais.

10. Ki mannyer Zezi ti ed son bann disip pour konpran ki i vreman sa Mesi? (Lik 24:18-27)

¹⁰ Lir Lik 24:18-27. Remarke ki Zezi pa ti dir sa bann zonm deswit lekel li. O kontrer i ti demann zot bann kestyon. Akoz? Petet i ti anvi zot dir li sa ki zot ti pe mazinen e lafason ki zot pe santi e i sanmenm sa ki zot ti fer. Zot ti dir li ki zot ti pe ekspekte ki Zezi i vin lerwa Izrael e diriz lo zot olye bann Romen. Apre ki zot ti’n eksprim zot santiman, Zezi ti servi Lekritir pour ed zot konpran sa ki ti’n arive.b Sa menm zour swar, Zezi ti pran letan pour eksplik bann lezot disip sa bann laverite. (Lik 24:33-48) Ki nou kapab aprann avek sa resi?

11-12. (a) Ki nou kapab aprann avek lafason ki Zezi ti ansenny bann laverite ki dan Labib? (Vwar portre.) (b) Ki mannyer sa frer ki ti fer letid Labib avek Nortey ti ed li?

¹¹ Ki mannyer nou kapab swiv legzanp Zezi? Premyerman, ler ou pe fer letid Labib avek en dimoun, demann bann kestyon ki pou ed sa dimoun pour eksprim son santiman. (Prov. 20:5) Enn fwa ki ou’n konpran lafason ki i pe santi, montre li bann verse Labib ki kapab ed li. Pa dir li ki i pou fer. O kontrer demann li kestyon lo bann verse Labib. Ankouraz li pour reflesir lo sa ki i pe lir e lo ki mannyer i kapab aplik bann prensip Labib dan son lavi. Annou vwar leksperyans en frer ki apel Nortey ki reste Gana.

¹² Nortey ti konmans etidye Labib ler i ti annan 16 an. Me pa bokou letan apre, son fanmir ti konmans opoz li. Kwa ki ti ed li pour kontinyen etidye Labib? Sa frer ki ti etidye Labib avek li ti’n deza servi Matye sapit 10 pour eksplik Nortey ki bann vre Kretyen ti pou ganny persekite. Nortey i dir: “Alor ler mon ti konmans ganny persekite, sa ti fer mwan asire ki mon ti’n trouv laverite.” Sa frer ti osi montre li Matye 10:16 ki dir ki nou bezwen pridan. Apre zot ti koz lo ki mannyer sa verse i kapab ed Nortey pour demontre respe ler i pe koz avek son fanmir lo son krwayans. Apre son batenm, Nortey ti anvi vin en pionye me son papa ti ekspekte ki i al liniversite. Olye dir Nortey ki pour fer, sa frer ti demann li bann kestyon pour ed li reflesir lo bann verse Labib e pour fer sa bon desizyon. Ki ti arive apre? Nortey ti deside pour konmans fer pionye. Son papa ti pous li e i ti bezwen kit lakour. Ki mannyer Nortey i santi konsernan sa ki ti arive avek li? I dir: “Mon konvenki ki mon’n fer sa bon desizyon.” Ler nou osi nou pran letan pour ed nou bann etidyan Labib pour medit lo Lekritir, nou ed zot pour devlop plis lafwa e pour kontinyen servi Zeova.—Efe. 3:16-19.

ED BANN FRER POUR PROGRESE

13. Ki Zezi ti fer pour fer sir ki sa travay ki son Papa ti’n donn li pour fer ti kontinyen ganny fer? (Efezyen 4:8)

¹³ Ler Zezi ti lo later, i ti fer egzakteman sa ki son papa ti’n demann li pour fer. (Zan 17:4) Me Zezi pa ti mazinen ki zis li ki ti kapab fer sa ki Zeova i anvi. Pandan sa trwa-z-an edmi ki i ti anons sa bon nouvel lo later, i ti osi form lezot pour fer sa travay. Zezi ti annan konfyans dan son bann disip. Avan i ti al dan lesyel, i ti donn zot sa responsabilite pour anons e ansenny sa bon nouvel e pour pran swen avek pep Zeova. I tre probab ki serten son bann disip ki ti desarz sa bann responsabilite, ti annan mwens ki 30 an. Sa bann zonm ti’n travay dir ansanm avek Zezi e zot ti fidel avek li. (Lir Efezyen 4:8.) Me avan Zezi ti al dan lesyel, i ti donn zot plis formasyon pour ki zot kalifye pour vin “bann zonm konman kado.” Ki mannyer i ti form zot?

14. Ki mannyer Zezi ti ed son bann disip pour progrese spirityelman pandan sa dernyen 40 zour ki i ti lo later? (Vwar portre.)

¹⁴ Zezi ti donn son bann disip bann konsey fran me i ti fer li avek lanmour. Par egzanp, i ti remarke ki serten parmi son bann disip pa ti vreman krwar ki i ti’n mor e resisite. Alor i ti donn zot konsey. (Lik 24:25-27; Zan 20:27) I ti osi dir zot ki zot bezwen konsantre plis lo pran swen avek pep Zeova olye lo zot karyer oubyen lo zot biznes. (Zan 21:15) I ti fer zot rapel ki zot pa devret konpar sa ki zot pe fer dan servis Zeova avek sa ki lezot pe fer. (Zan 21:20-22) I ti ed zot pour rezet bann move nide ki zot ti annan konsernan Rwayonm e ed zot pour konsantre lo anons sa bon nouvel. (Akt 1:6-8) Ki bann ansyen i kapab aprann avek legzanp Zezi?

15-16. (a) Ki mannyer bann ansyen i kapab swiv legzanp Zezi? Eksplike. (b) Ki byenfe Patrick ti gannyen ler en ansyen ti donn li konsey?

¹⁵ Ki mannyer bann ansyen i kapab swiv legzanp Zezi? Zot bezwen form e ed bann frer pour kalifye e desarz plis responsabilite dan kongregasyon e sa i enkli bann ki zenn.c Bann ansyen i konpran ki sa bann frer i bezwen aprann en kantite keksoz e ki zot pa parfe. Zot devret donn sa bann frer konsey avek lanmour pour ki sa bann frer i kapab aprann pour annan limilite, pour fidel e pour pare pour ed lezot.—1 Tim. 3:1; 2 Tim. 2:2; 1 Pyer 5:5.

¹⁶ Annou vwar byenfe ki en frer ki apel Patrick ti gannyen ler i ti ganny konsey. Ler i ti ankor pli zenn, i ti annan sa labitid pour koz dan en fason brit e i pa ti demontre labonte menm anver bann ser. En ansyen ti remarke ki Patrick ti bezwen fer bann sanzman. I ti donn li bann konsey fran me i ti fer li avek labonte. Patrick i dir: “Mon kontan ki sa ansyen ti fer sa. Mon ti abitye dekouraze ler mon ti vwar lezot frer pe ganny bann responsabilite ki mon ti anvi. Me konsey sa ansyen ti ed mwan pour vwar ki mon ti bezwen demontre limilite e demontre lanmour pour mon bann frer ek ser olye konsantre lo ganny responsabilite dan kongregasyon.” Sa ti fer ki Patrick ti ganny apwente konman en ansyen ler i ti annan 23 an.—Prov. 27:9.

17. Ki mannyer Zezi ti montre ki i ti annan konfyans dan son bann disip?

¹⁷ Zezi ti donn son bann disip sa responsabilite pour anons sa bon nouvel e osi pour ansenny dimoun. (Vwar not letid “teaching them” dan nwtsty-E dan Matye 28:20.) I kapab ki bann disip ti santi ki zot pa kalifye pour fer sa travay ki Zezi ti’n donn zot pour fer. Me Zezi ti asire ki zot ti pou kapab fer sa travay. I ti sitan asire ki i ti dir: “Parey mon Papa in anvoy mwan, mwan osi mon pe anvoy zot.”—Zan 20:21.

18. Ki mannyer bann ansyen i kapab swiv legzanp Zezi?

¹⁸ Ki mannyer bann ansyen i kapab swiv legzanp Zezi? Bann ansyen ki saz i form lezot par donn zot serten responsabilite. (Fili. 2:19-22) Par egzanp, bann ansyen i kapab demann bann zenn pour ede netway e mentenir Lasal Rwayonm. Apre ki bann ansyen in donn en frer en travay pour fer, zot kapab form sa frer e annan konfyans ki sa frer pour fer en bon travay. En frer ki apel Matthew, ki fek ganny apwente konman en ansyen, i dir ki i vreman apresye ki bann ansyen eksperyanse in form li pour fer diferan travay dan kongregasyon e ki zot in annan konfyans ki i pou fer son travay byen. I dir: “Ler mon ti fer fot, zot ti ed mwan vwar ki sa bann fot ti form parti mon formasyon e ki mon kapab amelyore laprosenn fwa.”d

19. Ki nou devret determinen pour fer?

¹⁹ Zezi ti servi sa dernyen 40 zour ki i ti lo later pour ankouraz, ansenny e form lezot. Annou determinen pour toultan swiv legzanp Zezi. (1 Pyer 2:21) Zezi pou ed nou pour fer sa. Apre tou i promet: “Mon avek zot tou le zour ziska lafen sa lemonn.”—Mat. 28:20.