Akoz Temwen Zeova pa servi lakrwa?

Bokou dimoun i krwar ki lakrwa i reprezant bann Kretyen. Nou Temwen Zeova, nou pa servi lakrwa, menm si nou Kretyen. Akoz?

En rezon i akoz Labib i montre ki Zezi ti mor lo en poto, non pa en lakrwa. Deplis, Labib i demann bann Kretyen pour “sov lwen avek ladorasyon zidol.” Savedir zot pa devret servi lakrwa pour ador Bondye akoz si non i pou vin parey en zidol.​—1 Korentyen 10:14; 1 Zan 5:21.

I enteresan sa ki Zezi ti dir: “Par sa, tou dimoun pou konnen ki zot mon disip, si zot annan lanmour antre zot.” (Zan 13:34, 35) Zezi ti pe montre ki se lanmour senser ki pou idantifye bann vre Kretyen, pa lakrwa oubyen en lot lobze.