Zedi le 28 Mars
Ou pou retourn dan lapousyer.—Zen. 3:19.
Nou pa anvi fer menm fot ki Adan ek Ev in fer. Pour nou pa fer parey zot, nou bezwen kontinyen aprann konsernan Zeova, apresye son bann kalite e esey konpran son fason panse. Anmezir nou fer sa, nou pou devlop plis lanmour pour Zeova. Annou vwar legzanp Abraam. Abraam ti vreman kontan Zeova. Menm si i ti vwar li difisil pour konpran bann desizyon Zeova, i pa ti rebel kont Zeova. O kontrer, i ti esey aprann konn Zeova pli byen. Par egzanp, ler Abraam ti konnen ki Zeova ti’n deside pour detri Sodonm ek Gomor, o konmansman i ti per ki “sa Ziz lo later antye” ti pou touy bann dimoun ki drwat ansanm avek bann ki move. Pour Abraam sa ti paret enposib, alor avek limilite, i ti demann Zeova plizyer kestyon. Avek pasyans, Zeova ti reponn li. Finalman, Abraam ti realize ki Zeova i egzamin leker sak dimoun e ki Zeova pa zanmen pini bann inosan ansanm avek bann ki koupab.—Zen. 18:20-32. w22.08 28 ¶9-10
Vandredi le 29 Mars
En dimoun diny konfyans i konn gard en sekre.—Prov. 11:13.
Apre ki Gouverner Neemya ti’n rekonstri miray Zerizalenm an 455 avan Kris, i ti rod bann zonm ki ti diny konfyans pour okip sa lavil. Parmi bann zonm ki Neemya ti swazir, i ti swazir Ananya, sef Landrwa proteksyon. Labib i dir ki Ananya “ti en zonm ki ti diny konfyans e i ti annan en gran respe pour sa vre Bondye plis ki en kantite lezot dimoun.” (Nee. 7:2) Ananya ti kontan Zeova e i pa ti anvi fer bann keksoz ki pa fer Zeova plezir. Sa ti fer Ananya pran o serye nenport responsabilite ki i ti gannyen. Sa lanmour ek gran respe ki nou annan pour Zeova pou ed nou vin en dimoun ki diny konfyans dan servis Zeova. Annou vwar legzanp Tisik, en frer ki zapot Pol ti annan konfyans ladan. Pol ti depan lo Tisik e i ti dir ki Tisik i en “serviter fidel.” (Efe. 6:21, 22) Pol ti fer Tisik anmenn let pour bann frer ek ser Efez ek Kolos e i ti osi fer li ankouraz e rekonfort sa bann frer ek ser. Tisik i fer nou rapel bann zonm fidel ozordi ki diny konfyans e ki ed nou pour annan en bon lanmitye avek Zeova.—Kol. 4:7-9. w22.09 9-10 ¶5-6
Sanmdi le 30 Mars
Lanmour i kouver en kantite pese.—1 Pyer 4:8.
Zozef ti fer fas avek bann gro problenm pour apepre 13 an. Zozef ti’n kapab mazinen ki Zeova pa kontan li e petet i ti’n kapab mazinen ki Zeova ti’n abandonn li ler i ti bezwen led. Me Zozef pa ti gard rankin. O kontrer, i ti reste kalm e sa ti ed li pour kontinyen rezonn byen. Ler i ti annan loportinite pour pran revanz lo son bann frer, i pa ti fer. O kontrer i ti demontre lanmour anver zot e pardonn zot. (Zen. 45:4, 5) Zozef ti azir dan sa fason parski i ti pe reflesir byen. Olye konsantre lo son bann problenm, Zozef ti vwar keksoz parey Zeova i vwar. (Zen. 50:19-21) Ki leson nou aprann? Si en frer oubyen en ser pa tret ou byen, pa bezwen ankoler avek Zeova oubyen mazinen ki i’n abandonn ou. O kontrer, medit lo lafason ki Zeova pe ed ou fer fas avek sa sityasyon. Osi ler lezot pa tret ou byen, pardonn zot e mazinen ki lanmour i kouver en kantite pese. w22.11 21 ¶4