Not anba lo paz

c Neemya 13:15-21: “¹⁵ Dan sa letan, mon ti vwar pep Zida pe pyetinen dan bann preswar diven zour saba, pe anmenn en ta lagrenn e pe sarz zot lo bann bourik, i ti annan osi diven, rezen, fig e tou sort pake ki zot ti pe anmenn Zerizalenm zour saba; e mon ti temwanny kont zot sa zour ki zot ti pe vann sa bann provizyon. ¹⁶ E bann dimoun sorti Tir ti reste dan lavil, zot ti anmenn pwason e tou sort marsandiz pour vann zour saba avek bann garson Zida dan Zerizalenm. ¹⁷ Alor mon ti vwar fot avek bann dimoun enportan Zida e dir zot: ‘Ki sa move keksoz ki zot pe fer, menm mank respe pour zour saba? ¹⁸ Pa koumsanmenm ki zot zanset ti fer, ki’n fer nou Bondye anmenn tou sa bann maler lo nou, osi lo sa lavil? Me zot, zot in anmenn plis lakoler lo Izrael akoz zot in mank respe pour zour saba.’ ¹⁹ Aprezan la sa ki ti arive, dek ki baro Zerizalenm ti konmans vin sonm avan saba i konmanse, deswit mon ti donn lord e bann laport ti ganny fermen. Deplis, mon ti dir pa ouver zot ziska apre saba; e mon ti met serten mon bann asistan vey kot baro pour ki napa okenn marsandiz ki antre dan Zerizalenm zour saba. ²⁰ Alor bann komersan ek bann vander tou sort kalite marsandiz ti pas lannwit an deor Zerizalenm, en fwa apre en dezyenm fwa. ²¹ Apre mon ti konmans temwanny kont zot an dizan: ‘Akoz zot in pas lannwit devan sa miray? Si zot fer sa ankor, mon pou aret zot.’ Depi sa zot pa ti vin ankor zour saba.”