Problenm ki donn lespwar

“Dan bann dernyen zour pou annan letan difisil.”​—2 TIMOTE 3:1.

ESKI ou’n deza tande oubyen vwar pour ou menm okenn sa bann levennman tris?

● En maladi i touy plizyer douzenn dimoun.

● En lafanmin i pran lavi plizyer santenn dimoun.

● En tranblemandter i touy plizyer mil dimoun e kit bokou plis san en lakaz.

Dan sa seri lartik, ou pou revwar serten levidans ki pou fer ou pans seryezman lo sityasyon sa lemonn. Ou pou osi vwar ki Labib ti predir ki sityasyon ti pou koumsa dan en peryod letan ki apel “bann dernyen zour.”a

Bi sa bann lartik se pa pou konvenk ou ki nou pe viv dan en lemonn ki ranpli avek problenm akoz tre probab ou pe vwar sa bann problenm devan ou lizye. O kontrer, zot in ganny ekrir pour donn ou lespwar. Zot pou montre ki lakonplisman sa sis profesi i vedir ki “sa bann dernyen zour” i pros pour fini. Sa seri lartik pou osi egzamin serten lobzeksyon ki dimoun i souvan souleve lo sa bann levidans e i pou donn ou bon rezon pour krwar ki i annan en keksoz pli meyer ki pou vini.

[Not anba lo paz]

1. Tranblemandter

“Pou annan gran tranblemandeter.”​—LIK 21:11.

● Winnie, en pti baba 16 mwan ti ganny anmase dan bann debri tranblemandter, Ayti. Bann dimoun ki ti pe fer raportaz lo sa dezas ti’n tann li pe plennyen dan lwen. I ti sirviv sa tranblemandter, me son paran ti mor.

KI LEVIDANS I MONTRE? In ganny estimen ki plis ki 300,000 dimoun ti ganny touye kan en tranblemandter ki mezir 7.0 magnitid ti tap Ayti, Zanvye 2010. I ti annan osi 1.3 milyon ki ti trouv zot san en lakaz en sel kou. Menm si lefe sa tranblemandter ki ti arive Ayti i enn ki ti ekstrenm, i pa sa sel landrwa ki’n pas atraver en tel leksperyans. In annan omwen 18 sa bann kalite tranblemandter ki’n arive dan lemonn antye ant Avril 2009 ek Avril 2010.

KI LOBZEKSYON KI SOUVAN GANNY SOULEVE? Lakantite tranblemandter ki pe arive pa’n ogmante, i zis ki konmela nou annan teknolozi modern ki donn nou plis lenformasyon lo zot konpare avek lepase.

ESKI SA LOBZEKSYON I VALID? Annou egzamin sa levidans: Labib pa’n met lanfaz lo lakantite tranblemandter ki pou arive pandan sa bann dernyen zour. Me par kont, i dir ki i pou annan bann “gran tranblemandeter” ki pou arive “dan plizyer landrwa” ki fer zot vin enn bann laspe remarkab dan sa peryod enportan dan listwar imen.​—Mark 13:8; Lik 21:11.

KI OU PANSE? Eski ou pe vwar bann gran tranblemandter arive, zis parey Labib in predir?

Petet ou kapab dir ki bann tranblemandter pa ase pour prouve ki nou pe viv dan bann dernyen zour. Anfet, zot zis enn parmi bann profesi ki pe ganny akonplir. Annou egzamin en dezyenm.

[Ekstre lo paz 4]

“Nou, [bann Zeolog] nou apel zot bann gran tranblemandter. Larestan dimoun i dekrir zot konman terib.”​—KEN HUDNUT, U.S. GEOLOGICAL SURVEY.

[Portre sorti kot lo paz 4]

© William Daniels/Panos Pictures

2. Lafanmin

“Pou annan lafamin.”​—MARK 13:8.

● En zonm i vin rod refiz dan vilaz Quaratadji, Nizer. Son bann kouzen, kouzin, frer ek ser in osi vin avek li pour esey sov lafanmin. Pourtan, sa zonm pe dormi lo en nat ater li tousel. Akoz i tousel? Sidi, sef vilaz i eksplike akoz: “I pa kapab donn manze [son fanmir] e i pa kapab kontinyen get zot dan figir.”

KI LEVIDANS I MONTRE? Dan lemonn antye i annan 1 dan 7 dimoun ki pa ganny ase manze sak zour. Sa sif i pli pir dan bann pei Lafrik ki par anba dezer Sahara kot i annan 1 dan 3 dimoun ki kontinyelman pa ganny ase manze. Pour kapab konpran ki sa i vreman vedir, mazin en fanmir ki annan en papa, en manman ek en pti baba. Si i annan ase manze pour zis de zot, lekel ki pou reste lafen? Sa papa? manman? oubyen sa pti baba? Sa i en desizyon ki bokou fanmir i bezwen fer toulezour.

KI LOBZEKSYON KI SOUVAN GANNY SOULEVE? Later i prodwir plis ki ase manze pour tou dimoun. Nou zis bezwen mannye resours later pli byen.

ESKI SA LOBZEKSYON I VALID? I vre, bann fermye i kapab prodwir e transport plis manze ki oparavan dan listwar imen. An realite, bann gouvernman imen i sipoze kapab mannye byen manze ki later i prodwir afen ki zot a kapab rezourd sa problenm mankman manze. Par kont, menm apre plizyer lannen ki zot in eseye, zot pa’n kapab arive fer li.

KI OU PANSE? Eski Mark 13:8 pe ganny akonplir? Malgre bann progre dan domenn teknolozi, pa mankman manze pe afekte imen partou lo later?

Souvandfwa tranblemandter ek lafanmin i kree en problenm ki form parti siny sa bann dernyen zour.

[Ekstre lo paz 5]

“Plis ki en tyer dan lakantite zanfan ki’n mor avek lemoni, ladyare ek lezot maladi ti pou’n kapab sirviv si zot ti’n ganny byen nouri.”​—ANN M. VENEMAN, ANSYEN DIREKTER EGZEKITIF UN CHILDREN’S FUND.

[Portre sorti kot lo paz 5]

© Paul Lowe/​Panos Pictures

3. Maladi

“Dimoun pou . . . soufer avek bann maladi terib.” ​—LIK 21:11, Contemporary English Version.

● Bonzali, en zofisye lasante dan sekter piblik dan en pei Lafrik ki’n ganny severman afekte avek lager sivil, i fer sa ptigin ki i kapab pour tret bann dimoun ki travay dan min ki pe mor avek viris Marburg.a I demann led avek bann zofisye dan en lavil ki pli gran, me i pa ganny okenn larepons. Finalman lasistans i arive kat mwan plitar me Bonzali in mor. I’n ganny Marburg avek sa bann travayer ki i ti pe esey sove.

KI LEVIDANS I MONTRE? Bann problenm respiratwar (parey lemoni), bann maladi ki koz ladyare, HIV/SIDA, tiberkiloz ek malarya i parmi sa bann maladi pli danzere ki fer dimoun soufer. In ganny estimen ki sa senk kategori maladi in touy apepre 10.7 milyon dimoun zis an 2004. Andotmo, sa bann maladi ti touy apepre en dimoun tou le trwa segonn pandan sa lannen.

KI LOBZEKSYON KI SOUVAN GANNY SOULEVE? Popilasyon lemonn i kontinyen agrandi, alor, byensir i pou annan plis ka maladi. I annan plis dimoun ki kapab ganny enfekte.

ESKI SA LOBZEKSYON I VALID? Popilasyon lemonn in agrandi en kantite. Me abilite zonm pour idantifye, kontrol e tret sa bann maladi in osi amelyore. Alor, pa i lozik pour panse ki lefe ki maladi i annan lo imen i devret diminyen? Pourtan nou vwar tou lekontrer.

KI OU PANSE? Eski dimoun pe soufer avek bann maladi terib zis parey Labib in predir?

Tranblemandter, lafanmin, maladi i bann keksoz ki devaste lavi plizyer milyon dimoun. I annan plizyer milyon dimoun osi ki soufer akoz lezot imen e parmi, i annan bokou ki ganny viktimize par bann ki sipoze pe protez zot. Remark sa ki profesi Labib i dir pou arive.

[Not anba lo paz]

[Ekstre lo paz 6]

“I terib pour ganny devore avek en lyon oubyen en lot zannimo. Me i osi terib pour ganny atake par anndan avek en maladi e pour vwar sa arive tout otour ou.”​—MICHAEL OSTERHOLM, EN EPIDEMIOLOGIST.

[Portre sorti kot lo paz 6]

© William Daniels/​Panos Pictures

4. Pou napa lafeksyon natirel

“Dimoun pou . . . napa sa lafeksyon normal pour zot fanmir.”​—2 TIMOTE 3:1-3, Labib God’s Word.

● Chris i travay avek en group ki ed bann viktim vyolans domestik North Wales. I ti dir: “Mon rapel en madanm ki ti vini, telman i ti’n ganny bate mon pa ti rekonnet si ti li ki mon ti’n deza vwar.” I ti azoute: “Lezot madanm i sitan ganny afekte emosyonnelman ki zot pa pou ni menm lev zot lizye pour get ou.”

KI LEVIDANS I MONTRE? Dan en pei Lafrik i annan apepre 1 dan 3 madanm ki’n ganny abize seksyelman kan zot ti ankor zanfan. En serve ki ti ganny fer dan sa menm pei i montre ki en tyer dan bann zonm i panse ki i normal pour bat zot madanm. Par kont, pa zis bann madanm ki fer fas avek vyolans domestik. I annan 3 dan 10 zonm Kanada ki ganny bate oubyen abize par zot konpanny.

KI LOBZEKSYON KI SOUVAN GANNY SOULEVE? Vyolans domestik in toultan egziste. I zis ki konmela sa size pe ganny plis latansyon.

ESKI SA LOBZEKSYON I VALID? Dan sa bann lannen ki’n pase, dimoun in met bokou plis latansyon lo vyolans domestik. Me eski lakantite ka in diminyen la ki i annan plis latansyon ki pe ganny mete lo sa size? Non, sa pa le ka. Mank lafeksyon natirel in menm vin pli komen.

KI OU PANSE? Eski 2 Timote 3:1-3 pe ganny akonplir? Eski dimoun i annan sa lafeksyon pour zot fanmir ki sipoze vin natirelman?

Sa senkyenm profesi ki ou pe vwar akonplir i enplik nou landrwa, later. Annou vwar sa ki Labib i dir lo sa size.

[Portre lo paz 7]

“Vyolans domestik i ganny rekonnet konman enn bann lofans dan lasosyete ki pli pa ganny raporte. En madanm i ganny atake avek son konpanny an mwayenn 35 fwa avan ki i kontakte lapolis.”​—EN PORTPAROL WALES DOMESTIC ABUSE HELPLINE.

5. Dimoun pou gat later

“[Bondye pou] detri bann ki detri later.” ​—REVELASYON 11:18.

● Msye Pirri i tir kalou konman son metye dan vilaz Kpor, Nizer. Son travay in ganny afekte avek sa delwil ki ti deverse dan Delta Nizer. I ti dir: “I touy nou pwason, i andomaz nou lapo, i gat nou larivyer.” I ti osi azoute: “Mon nepli annan okenn sours reveni.”

KI LEVIDANS I MONTRE? Serten eksper i dir ki 6.5 milyon tonn salte i antre dan losean tou le lannen. I’n ganny estimen ki 50 poursan sa bann salte i bann plastik ki pou drive pour plizyer santenn lannen avan ki i dekonpoze. Apard ki polye later, imen pe redwir son resours natirel a en degre tre alarman. Resers i montre ki later i bezwen enn an senk mwan pour li kapab renouvle sa ki imen i konsonmen dan enn an. En rapor dan Sydney Morning Herald, en zournal Ostralyen i dir: “Si popilasyon ek konsonmasyon i kontinyen dan sa menm fason, nou pou bezwen en ekivalan de Later an 2035.”

KI LOBZEKSYON KI SOUVAN GANNY SOULEVE? Imen i entelizan e nou kapab trouv solisyon pour bann problenm. Nou kapab ranvers sa bann problenm e sov later.

ESKI SA LOBZEKSYON I VALID? I annan bokou dimoun ek bann group ki’n travay dir pour fer dimoun konn bann problenm dan lanvironnman. Pourtan later i kontinyen ganny polye lo en gran lesel.

KI OU PANSE? Eski i annan sa nesesite pour Bondye entervenir e sov later pour ki imen pa detrir li zis parey i’n promet?

An plis ki sa senk profesi ki nou’n egzaminen, Labib i osi predir en devlopman pozitif pandan sa dernyen zour. Annou vwar en legzanp dan sa sizyenm profesi.

[Ekstre lo paz 8]

“Mon santi ki oparavan mon ti annan en paradi me la i parey en landrwa kot dimoun i zet bann salte toksik.”​—EN REZIDAN LAKOT GOLF LETA-Z-INI, KONSERNAN LEFE SA DELWIL KI TI DEVERSE DAN GOLF MEKSIKO.

[Bwat lo paz 8]

Eski Bondye ki responsab?

Vi ki Labib ki’n predir sa bann move keksoz ki nou pe vwar arive ozordi, eski Bondye ki responsab? Eski i fer nou soufer? Ou pou trouv bann larepons satisfezan pour sa bann kestyon dan sapit 11 sa liv Ki Labib i vreman dir? pibliye par Temwen Zeova.

[Portre sorti kot lo paz 8]

Portre kos gard Leta-z-ini

6. Predikasyon​—En travay mondyal

“Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.”​—MATYE 24:14.

● Vaiatea i reste lo en zil izole dan Larsipel Tuamotu ki dan losean Pasifik. Menm si Tuamotu i annan apepre 80 pti zil ki kouver 802,900 kilomet kare ek zis 16,000 zabitan, Vaiatea ek son bann vwazen ti ganny kontakte par Temwen Zeova. Akoz? Parski bann Temwen i anvi partaz sa bon nouvel lo Rwayonm Bondye avek tou dimoun nenport ki landrwa ki zot reste.

KI LEVIDANS I MONTRE? Sa mesaz lo Rwayonm pe ganny anonse dan tou kwen lemonn. Zis an 2010, Temwen Zeova in pas plis ki 1.6 bilyon erdtan pour anons sa bon nouvel dan 236 pei. Sa i en mwayenn 30 minit sak zour par sak Temwen. Pandan sa dernyen di-z-an zot in prodwir e distribye plis ki 20 bilyon piblikasyon ki ansenny dimoun lo Labib.

KI LOBZEKSYON KI SOUVAN GANNY SOULEVE? Mesaz Labib in ganny prese pour plizyer mil lannen.

ESKI SA LOBZEKSYON I VALID? I vre, i annan bokou dimoun ki’n pres lo serten keksoz baze lo Labib. Par kont, lamazorite in fer sa travay pour zis en ptigin letan e dan zis enn de landrwa. Me kant a Temwen Zeova, zot pe pres avek plizyer santenn milyon dimoun atraver en travay predikasyon ki byen organize dan lemonn antye. Bann Temwen in persevere dan zot travay predikasyon menm si zot in ganny bokou lopozisyon sorti kot bann lorganizasyon pwisan e kriyel diran listwar imen.a (Mark 13:13) Deplis, Temwen Zeova pa ganny peye pour prese. O kontrer, zot ofer zot letan volonterman e zot ofer zot bann piblikasyon san fer peye. Zot travay i ganny siporte antyerman par bann kontribisyon volonter.

KI OU PANSE? Eski sa “Bonn Nouvel Rwayonm” pe ganny prese partou lo later? Eski i posib ki lakonplisman sa profesi i vedir ki pou annan bann bon keksoz ki pou arive tre byento?

[Not anba lo paz]

[Ekstre lo pa 9]

“Otan ki Zeova i permet, nou pou kontinyen pres sa bon nouvel lo Rwayonm avek devouman par servi tou mwayen posib pour zwenn bann dimoun.”​—2010 YEARBOOK OF JEHOVAH’S WITNESSES.

En meyer lavenir tre byento!

“Dan ankor en ptigin letan, move dimoun pou nepli la . . . Me bann dimoun ki annan limilite pou posed later, e zot pou sirman trouv bokou plezir dan labondans lape.”​—PSONM 37:10, 11.

ESKI ou ti pou kontan vwar sa profesi ki’n ganny site anler vin vre? San dout ou pou dir wi. I annan bann rezon valab pour krwar ki i pou vin vre tre byento.

Sa bann lartik presedan in egzamin zis serten profesi dan Labib ki montre klerman ki nou pe viv dan “bann dernyen zour.” (2 Timote 3:1-5) Bondye in enspir bann ekriven Labib pour predir sa bann levennman pour donn nou en lespwar. (Romen 15:4) Lakonplisman sa bann profesi i vedir ki sa bann problenm ki nou pe fer fas avek pou fini tre byento.

Ki pou arive apre sa bann dernyen zour? Rwayonm Bondye pour diriz later. (Matye 6:9) Vwar lafason ki Labib i dekrir kondisyon lo later kan sa pou arive:

● Pou nepli annan mankman manze. “Legren pou annabondans lo later. I pou annan en kantite anler lo latet montanny.”​—Psonm 72:16.

● Pou nepli annan maladi. “Okenn zabitan pa pou dir: ‘Mon malad.’”​—Izai 33:24.

● Later pou ganny renouvle. “Dezer ek rezyon ki napa delo pou rezwir, e laplenn dezerte pou dan lazwa e i pou fleri parey safran.”​—Izai 35:1.

Sa i zis enn de profesi Labib ankourazan ki pou ganny akonplir tre byento. Akoz ou pa demann en Temwen Zeova pour montre ou akoz nou vreman konfidan ki i pou annan en meyer lavenir tre byento?