Prepar ou pour persekisyon depi la konmela

 1. Akoz nou bezwen prepar nou pour persekisyon?

SA ZOUR swar avan nou Senyer Zezi ti ganny touye, i ti dir ki dimoun pou ay tou bann ki swazir pour vin son disip. (Zan 17:14) Depi sa letan, bann Kretyen fidel in ganny persekite par bann dimoun ki pa servi Zeova. (2 Tim. 3:12) Anmezir ki lafen sa lemonn i aprose, nou ekspekte ki nou bann lennmi pou opoz nou plis ankor.​—Mat. 24:9.

2-3. (a) Akoz lafreyer i en keksoz danzere? (b) Ki nou pou diskite dan sa lartik?

² Ki mannyer nou kapab prepar nou depi la konmela pour fer fas avek persekisyon? I pa neseser pour mazin lo tou bann move keksoz ki kapab arive. Si nou ti fer sa, nou ti pou vreman per e enkyet. Sa lafreyer ti kapab fer nou aret servi Zeova menm avan ki nou ganny problenm. (Prov. 12:25; 17:22) Lafreyer i enn parmi bann pli bon taktik ki nou “lennmi Dyab” i servi kont nou. (1 Pyer 5:8, 9) Alor, ki nou kapab fer?

³ Dan sa lartik, nou pou vwar ki mannyer nou kapab ranforsi nou lanmitye avek Zeova e akoz i enportan ki nou fer sa depi la konmela. Nou pou osi vwar ki nou kapab fer pour devlop plis kouraz. Finalman, nou pou vwar ki nou kapab fer ler dimoun i ay nou.

 4. Dapre Ebre 13:5, 6, ki nou bezwen annan konfyans ladan e akoz?

⁴ Annan konfyans ki Zeova i kontan ou e ki i pa pou zanmen abandonn ou. (Lir Ebre 13:5, 6.) Plizyer lannen pase, en Latour Veyer ti dir: “En dimoun ki vreman konn Bondye pou annan konfyans dan li ler i ganny persekite.” Pa sa i vre! Pour fer fas avek persekisyon, nou bezwen kontan Zeova avek tou nou leker, annan konfyans total dan li e pa zanmen doute ki i annan lafeksyon pour nou.​—Mat. 22:36-38; Zak 5:11, not.

 5. Kwa ki pou ed ou santi ki Zeova i kontan ou?

⁵ Lir Labib toulezour avek lobzektif pour vin pli pros avek Zeova. (Zak 4:8) Anmezir ki ou lir Labib, konsantre lo bann zoli kalite ki Zeova i annan. Ler ou pe lir lo sa ki Zeova in dir e fer, esey konpran ki kantite i kontan ou. (Egz. 34:6) Serten i kapab vwar li difisil pour krwar ki Bondye i kontan zot parski personn pa’n deza demontre lanmour anver zot. Si ou santi koumsa, esey fer en lalis sak zour lo bann diferan fason ki Zeova in demontre labonte ek konpasyon anver ou. (Ps. 78:38, 39; Rom. 8:32) Anmezir ki ou reflesi lo sa ki ou’n lir dan Labib e mazin lo tou sa ki ou’n pas atraver, i tre probab ki sa pou ed ou rapel tou sa ki Zeova in fer pour ou. Pli ou apresye bann keksoz ki Zeova in fer pour ou, pli ou lanmitye avek li pou vin pli for.​—Ps. 116:1, 2.

 6. Dapre Psonm 94:17-19, ki mannyer lapriyer i kapab ed ou?

⁶ Toultan priye. Imazin en pti garson dan lebra son papa ki kontan li. Sa garson i santi li sitan byen ki i pa per pour koz avek son papa lo tou sa ki’n ariv li pandan lazournen, ki swa i’n byen pase oubyen non. Ou kapab annan sa menm relasyon avek Zeova si ou koz avek li dan lapriyer toulezour. (Lir Psonm 94:17-19.) Anmezir ou priye, “vid ou leker devan [Zeova], parey delo” e dir ou Papa tou sa ki fatig ou e tou sa ki fer ou per. (Lam. 2:19) Ki pou arive si ou fer sa? Ou pou ganny “lape Bondye ki depas tou sa ki nou kapab konpran.” (Fili. 4:6, 7) Pli ou fer sa, pli ou pou santi ou pros avek Zeova.​—Rom. 8:38, 39.

 7. Akoz ou bezwen annan konfyans ki bann promes Bondye konsernan son Rwayonm pou vin vre?

⁷ Annan konfyans ki bann promes Bondye konsernan son Rwayonm pou vin vre. (Nom. 23:19) Si ou pa vreman krwar dan bann promes Bondye, i pou pli fasil pour Satan ek bann ki anba son kontrol pour fer ou per. (Prov. 24:10; Ebr. 2:15) Ki mannyer ou kapab ranforsi ou lafwa dan Rwayonm Bondye depi la konmela? Pran letan pour fer resers lo bann promes Bondye konsernan son Rwayonm e lo bann rezon akoz ou kapab asire ki zot pou vin vre. Ki mannyer sa pou ed ou? Annou vwar legzanp Stanley Jones, ki ti ganny anprizonnen pour set an akoz son krwayans.b Kwa ki ti ed li reste fidel? I ti dir: “Mon ti annan en lafwa for akoz mon ti konn konsernan Rwayonm Bondye e sa ki i pou akonpli. Mon pa ti zanmen dout sa, alor personn pa ti kapab fer mwan aret servi Zeova.” Si ou annan en lafwa for dan bann promes Bondye, ou pou vin pli pros avek Zeova e ou pa pou les lafreyer anpes ou servi li.​—Prov. 3:25, 26.

 8. Ki nou kapab aprann ler nou egzamin lafason ki nou vwar bann renyon? Eksplike.

⁸ Asiste renyon regilyerman. Bann renyon i ed nou vin pli pros avek Zeova. Lafason ki nou vwar renyon la konmela i montre ki mannyer nou pou fer fas avek persekisyon a lavenir. (Ebr. 10:24, 25) Dan ki sans? Si nou les bann pti keksoz anpes nou asiste renyon la konmela, ki pou arive a lavenir si nou bezwen riske nou lavi pour zwenn ansanm avek nou bann frer ek ser? De lot kote, si nou determinen pour asiste renyon, nou pa pou les bann ki persekit nou fer nou aret zwenn ansanm. La i sa moman pour aprann kontan nou bann renyon. Si nou kontan nou renyon, ler bann dimoun i persekit nou ouswa gouvernman i pas en lalwa pour anpes nou zwenn ansanm, sa pa pou fer nou aret asiste renyon. Nou pou toultan obei Bondye plito ki zonm.​—Akt 5:29.

 9. Akoz ler nou aprann bann verse Labib parker, sa i en bon fason pour prepare pour persekisyon?

⁹ Aprann ou bann verse Labib prefere parker. (Mat. 13:52) Kekfwa ou vwar li difisil pour fer sa akoz ou oubliy fasilman, me Zeova i kapab servi son lespri sen pour ed ou rapel sa bann verse. (Zan 14:26) Remarke ki en frer ki ti ganny anprizonnen li tousel dan en kaso Les Lalmanny ti dir: “Mon ti vreman kontan ki avan mon ganny met dan prizon, mon ti’n aprann plis ki 200 verse Labib parker! Menm si mon ti tousel, mon ti pas mon letan pe medit lo plizyer topik Labib.” Sa bann verse ti ed nou frer pour reste pros avek Zeova e pour andire fidelman.

10. Akoz nou devret aprann bann kantik ek sanson parker?

¹⁰ Sant bann kantik ek sanson ki lo nou sit Enternet e aprann zot parker. Ler Pol ek Silas ti dan prizon dan lavil Filip, zot ti sant bann kantik ki zot ti konn parker. (Akt 16:25) Sanmenm sa ki nou bann frer ek ser sorti ansyen Linyon Sovyetik ti fer pour gard zot lafwa for ler zot ti ganny egzile Siberi. Ser Mariya Fedun ti dir: “Nou ti sant tou bann kantik ki nou ti’n aprann sorti dan nou liv kantik.” I ti dir ki sa bann kantik ti ankouraz zot tou e ki sa ti ed zot santi zot pli pros avek Zeova. Ki mannyer ou santi ler ou sant bann kantik ek sanson ki ou pli kontan? Pa ou ganny ankouraze! Alor, aprann sa bann kantik parker depi la konmela!​—Vwar sa bwat “Donn mwan kouraz.”

11-12. (a) Dapre 1 Samyel 17:37, 45-47, akoz David ti kouraze? (b) Ki leson enportan nou aprann avek legzanp David?

¹¹ Pour nou kapab fer fas avek persekisyon, nou bezwen annan kouraz. Ki ou kapab fer si ou santi ki ou pa en dimoun kouraze? Rapel ki vre kouraz pa depan lo ou groser, lafors oubyen abilite. Annou vwar legzanp David ki ti al lager avek Golyat ler i ti ankor zenn. Golyat ti en zean, me David ti pli fay, i ti napa zarm lager e an plis ki sa, i ti bokou pli pti ki Golyat. David ti napa ni menm en lepe. Me kantmenm sa, i ti vreman kouraze. Alor, David ti taye pour al lager avek sa zean arogan.

¹² Akoz David ti sitan kouraze? I ti annan konfyans ki Zeova ti avek li. (Lir 1 Samyel 17:37, 45-47.) David pa ti konsantre lo lefet ki Golyat ti bokou pli gran ki li. O kontrer, i ti konsantre lo lefet ki Golyat ti bokou pli pti ki Zeova. Ki nou aprann avek sa resi? Nou kapab kouraze si nou annan konfyans ki Zeova i avek nou e si nou asire ki bann ki persekit nou i bokou pli pti ki nou Bondye Tou Pwisan. (2 Kron. 20:15; Ps. 16:8) Ki nou kapab fer pour devlop plis kouraz depi la konmela, avan ki nou ganny persekite?

13. Ki mannyer nou kapab devlop plis kouraz? Eksplike.

¹³ Nou kapab devlop plis kouraz depi la konmela ler nou anons sa bon nouvel Rwayonm an piblik. Ki mannyer sa? Ler nou prese, nou aprann pour met konfyans dan Zeova e sirmont lafreyer pour zonm. (Prov. 29:25) Zis parey nou bann misk i vin pli for ler nou fer legzersis, nou devlop plis kouraz ler nou anons sa bon nouvel kazankaz, dan landrwa piblik, dan teritwar biznes e ler nou fer temwannyaz enformel. Si nou annan kouraz pour anons sa bon nouvel depi la konmela, nou pou pare pour kontinyen prese menm si nou travay i ganny enterdi.​—1 Tesa. 2:1, 2.

14-15. Ki nou aprann avek legzanp Nancy Yuen ek Valentina Garnovskaya?

¹⁴ Nou kapab aprann bokou avek legzanp de ser fidel ki ti vreman kouraze. Nancy Yuen ti en pti madanm kourt ki ti mezir 1.5 met, me i pa ti fasil pour fer li per.c I ti refize aret anons sa bon nouvel konsernan Rwayonm Bondye. Akoz sa, i ti ganny met dan prizon Lasin, pour plis ki 20 an. Bann zofisye ki ti kestyonn li ti dir ki i ti “sa dimoun pli antete” dan zot pei!

¹⁵ Pareyman, Valentina Garnovskaya ti ganny met dan prizon trwa fwa dan ansyen Linyon Sovyetik. An tou, i ti pas apepre 21 an dan prizon.d Pour ki rezon? I ti sitan determinen pour kontinyen prese ki bann zofisye ti dir ki i “en kriminel vreman danzere.” Kwa ki ti fer sa de ser fidel sitan kouraze? Zot ti annan konfyans ki Zeova i avek zot.

16. Ki nou bezwen fer pour devlop vre kouraz?

¹⁶ Parey nou’n vwar dan sa lartik, pour devlop plis kouraz, fodre pa ki nou konsantre lo nou prop lafors ek abilite. O kontrer, nou bezwen annan konfyans ki Zeova i avek nou e ki i pe lager pour nou. (Det. 1:29, 30; Zeka. 4:6) Sanmenm sa ki nou bezwen fer pour devlop vre kouraz.

17-18. Dapre Zan 15:18-21, ki lavertisman Zezi ti donn nou? Eksplike.

¹⁷ I vre ki nou kontan ler dimoun i annan respe pour nou, me nou pa devret krwar ki nou napa okenn valer si lezot pa kontan nou. Zezi ti dir: “Ere kan dimoun i ay zot, rezet zot, ensilte zot oubyen gat zot repitasyon akoz Garson zonm.” (Lik 6:22) Ki Zezi ti pe esey dir?

¹⁸ Zezi pa ti pe dir ki bann Kretyen ti pou kontan ler dimoun i ay zot. O kontrer, i ti pe averti nou ki sa pou arive avek nou. Nou pa form parti sa lemonn. Nou aplik bann lansennyman Zezi e nou anons sa mesaz ki i ti anonse. Akoz sa, dimoun dan sa lemonn i ay nou. (Lir Zan 15:18-21.) Nou anvi fer plezir Zeova. Si dimoun i ay nou akoz nou kontan nou Papa, sa i zot problenm.

19. Ki mannyer nou kapab swiv legzanp bann zapot?

¹⁹ Pa zanmen les okenn keksoz ki bann senp imen i dir oubyen fer, fer ou onte ki ou en Temwen Zeova. (Mik. 4:5) Nou kapab fer fas avek lafreyer pour zonm par reflesi lo ki bann zapot Zerizalenm ti fer pa bokou letan apre ki Zezi ti mor. Zot ti konnen ki bann sef relizye Zwif ti ay zot. (Akt 5:17, 18, 27, 28) Kantmenm sa, toulezour zot ti kontinyen al dan tanp pour anons sa bon nouvel e sa ti montre ki zot ti bann disip Zezi. (Akt 5:42) Zot pa ti les lafreyer anpes zot anons sa bon nouvel. Nou osi nou kapab sirmont nou prop lafreyer pour zonm si nou fer dimoun konnen ki nou en Temwen Zeova dan travay, kot lekol e dan nou vwazinaz.​—Akt 4:29; Rom. 1:16.

20. Akoz bann zapot ti ere menm ler dimoun ti ay zot?

²⁰ Akoz bann zapot ti ere? Zot ti konnen akoz dimoun ti ay zot e zot ti vwar li konman en loner pour ganny maltrete akoz zot ti pe fer lavolonte Zeova. (Lik 6:23; Akt 5:41) Pli tar zapot Pyer ti ekri: “Zot ere, menm si zot bezwen soufer akoz ladrwatir.” (1 Pyer 2:19-21; 3:14) Ler nou konpran ki dimoun i ay nou akoz nou pe fer sa ki byen, nou pa pou zanmen aret servi Zeova zis akoz dimoun i ay nou.

21-22. (a) Ki ou’n deside pour fer pour prepar ou pour persekisyon? (b) Ki nou pou diskite dan sa lot lartik?

²¹ Nou pa zanmen konnen kan ki dimoun pou persekit nou oubyen kan gouvernman pou enterdi nou travay. Par kont, nou konnen ki nou kapab prepare depi la konmela. Nou fer sa ler nou ranforsi nou lanmitye avek Zeova, devlop plis kouraz e aprann ki nou kapab fer ler dimoun i ay nou. Lafason ki nou prepar nou depi la konmela pou ed nou kontinyen servi Zeova a lavenir.

²² Me ki nou pou fer si nou travay i ganny enterdi? Dan sa lot lartik, nou pou diskit lo bann prensip Labib ki pou ed nou kontinyen servi Zeova menm ler nou ganny enterdi.