Pep Zeova i kontan ladrwatir

 1. Ki sityasyon difisil Zozef ti fer fas avek e ki mannyer i ti reazir?

ZOZEF, garson Zakob, ti fer fas avek en sityasyon ki ti teste son fidelite. En madanm ti dir li: “Dormi avek mwan.” Sa madanm ti’n marye avek met Zozef ki apel Potifar. Zozef ti refize pour dormi avek li. En dimoun dan nou letan i kapab mazinen, ‘Akoz Zozef pa ti dormi avek sa madanm?’ Potifar pa ti la. An plis ki sa, Zozef ti en lesklav dan sa lakaz e sa madanm ti’n kapab fer son lavi difisil si i ti refize. Kantmenm sa, Zozef ti refize menm si sa madanm ti kontinyen met presyon lo li pour dormi avek li. Akoz Zozef ti refize? I ti dir: “Ki mannyer mon kapab fer en keksoz sitan mal e fer pese kont Bondye?”​—Zen. 39:7-12.

 2. Ki mannyer Zozef ti konnen ki adilter i en pese kont Bondye?

² Ki mannyer Zozef ti konnen ki Bondye ti pou vwar adilter konman “en keksoz sitan mal”? Dan Lalwa Moiz ki ti ganny donnen apepre desan z-an pli tar, i ti annan sa lord ki dir: “Ou pa devret komet adilter.” (Egz. 20:14) Kantmenm sa, Zozef ti konn Zeova ase byen pour li konnen ki mannyer Zeova ti pou santi konsernan adilter. Par egzanp, Zozef ti konnen ki Zeova in etabli maryaz e ki maryaz i en laranzman ant en msye ek en madanm. Sirman Zozef ti’n osi tande ki de fwa Zeova ti’n protez son granmer Sara pour li kapab reste fidel avek son msye ler i ti pros pour ganny vyole. Dan menm fason, Bondye ti protez Rebeka, madanm Izaak. (Zen. 2:24; 12:14-20; 20:2-7; 26:6-11) Ler Zozef ti reflesir lo bann sityasyon koumsa, i ti konpran kwa ki byen e kwa ki mal dan lizye Bondye. Vi ki Zozef ti kontan Bondye, i ti osi kontan bann standar Zeova ki drwat e i ti determinen pour swiv sa bann standar.

 3. Ki nou pou vwar dan sa lartik?

³ Eski ou kontan ladrwatir? San dout, ou kontan sa kalite. Me nou tou nou enparfe e si nou pa fer atansyon nou kapab ganny enfliyanse avek lafason ki dimoun dan lemonn i konsider ladrwatir. (Iza. 5:20; Rom. 12:2) Alor, dan sa lartik nou pou vwar kisisa ladrwatir e nou pou vwar ki byenfe nou gannyen ler nou kontan sa kalite. Apre nou pou vwar trwa keksoz ki nou kapab fer pour devlop plis lanmour pour bann standar Zeova.

 4. Ki move pwennvi en kantite dimoun i annan konsernan ladrwatir?

⁴ En kantite dimoun i mazinen ki en dimoun ki drwat i arogan, i kritik lezot ouswa i krwar ki i pli siperyer ki lezot. Me Bondye pa kontan sa bann kalite. Ler Zezi ti lo later, i ti dir bann sef relizye dan son letan ki zot ti pe mal fer parski zot ti met zot prop standar konsernan kwa ki byen e kwa ki mal. (Ekle. 7:16; Lik 16:15) En dimoun ki fer sa ki Zeova i dir i byen, pa zanmen krwar ki i pli siperyer ki lezot dimoun.

 5. Dapre Labib, kisisa ladrwatir? Donn bann legzanp.

⁵ Ladrwatir i en zoli kalite. I vedir fer sa ki Zeova i dir i drwat. Dan Labib, sa bann mo ki ganny tradwir “ladrwatir” i donn sa nide ki en dimoun pe viv dapre sa pli o standar, setadir bann standar Zeova. Par egzanp, Zeova ti donn lord ki bann marsan i servi en “pwa ki . . . onnet.” (Det. 25:15) Sa mo Ebre ki ganny tradwir konman “onnet” i osi kapab ganny tradwir konman “drwat.” Alor, en Kretyen ki anvi fer sa ki drwat, pou onnet ler i fer biznes. En dimoun ki drwat i osi kontan lazistis, setadir i pa kontan vwar en dimoun ganny trete dan en fason enzis. En dimoun ki drwat i anvi “fer [Zeova] vreman plezir,” alor i reflesir lo lafason ki Zeova pou santi anver bann desizyon ki i fer.​—Kol. 1:10.

 6. Akoz nou kapab annan konfyans dan bann standar Zeova konsernan sa ki byen ek sa ki mal? (Izai 55:8, 9)

⁶ Labib i montre ki Zeova i Sours ladrwatir. I pour sa rezon ki Labib i dir ki Zeova i “sa enn ki drwat.” (Zer. 50:7) Zeova i Kreater alor zis li ki annan sa drwa pour deside kwa ki byen e kwa ki mal. Vi ki nou enparfe e nou fer pese, nou pa kapab konnen kwa ki byen e kwa ki mal. Zeova i parfe, i konn egzakteman kwa ki byen e kwa ki mal. (Prov. 14:12; lir Izai 55:8, 9.) Me nou’n ganny kree dan resanblans Bondye, alor nou kapab viv dapre son bann standar ki drwat. (Zen. 1:27) Nou kontan pour viv dapre son bann standar. Nou lanmour pour nou Papa i motiv nou pour fer nou mye pour swiv son legzanp.​—Efe. 5:1.

 7. Akoz nou bezwen bann standar ki’n ganny etablir e ki akseptab? Donn en legzanp.

⁷ Nou ganny bann byenfe ler nou swiv bann standar Zeova konsernan sa ki byen ek sa ki mal. Eski ou konnen akoz? Imazinen ki ti pou arive si sak konpannyen konstriksyon i swiv zot prop standar konsernan bann mezir. Sa ti pou anmenn en kantite dezord! Si bann dokter ek ners pa ti swiv bann standar spesifik ler zot pe tret bann pasyan, i kapab ki serten pasyan ti pou mor. Ler dimoun i swiv bann standar ki’n ganny etablir e ki akseptab, sa i en proteksyon pour zot. Pareyman, bann standar Bondye konsernan sa ki byen ek sa mal, i en proteksyon pour nou.

 8. Ki benediksyon bann ki kontan ladrwatir pou gannyen?

⁸ Zeova i beni bann ki esey viv dapre son bann standar. I promet: “Bann dimoun drwat pou ganny donnen later e zot pou viv lo la pour touzour.” (Ps. 37:29) Eski ou kapab imazinen ki mannyer imen pou ini, anpe e zwaye ler tou dimoun pe swiv bann standar Zeova? Zeova i anvi ki ou la pour viv sa kalite lavi. Sirman nou tou nou annan bann bon rezon pour kontan ladrwatir. Annou vwar trwa keksoz ki kapab ed nou pour kontan sa kalite plis.

 9. Kwa ki pou ed nou pour kontan ladrwatir?

⁹ Premye letap: Kontan sa Enn ki etabli bann standar. Pour nou kontan ladrwatir, nou bezwen devlop plis lanmour pour sa Enn ki etabli bann standar konsernan sa ki byen ek sa ki mal. Pli nou kontan Zeova, pli nou pou anvi viv dapre son bann standar. Par egzanp, si Adan ek Ev ti kontan Zeova, zot pa ti pou’n zanmen dezobei son lalwa ki zis.​—Zen. 3:1-6, 16-19.

10. Ki Abraam ti fer pour li konpran fason panse Zeova pli byen?

¹⁰ Nou pa anvi fer menm fot ki Adan ek Ev in fer. Pour nou pa fer parey zot, nou bezwen kontinyen aprann konsernan Zeova, apresye son bann kalite e esey konpran son fason panse. Anmezir nou fer sa, nou pou devlop plis lanmour pour Zeova. Annou vwar legzanp Abraam. Abraam ti vreman kontan Zeova. Menm si i ti vwar li difisil pour konpran bann desizyon Zeova, i pa ti rebel kont Zeova. O kontrer, i ti esey aprann konn Zeova pli byen. Par egzanp, ler Abraam ti konnen ki Zeova ti’n deside pour detri Sodonm ek Gomor, o konmansman i ti per ki “sa Ziz lo later antye” ti pou touy bann dimoun ki drwat ansanm avek bann ki move. Pour Abraam sa ti paret enposib, alor avek limilite, i ti demann Zeova plizyer kestyon. Avek pasyans, Zeova ti reponn li. Finalman, Abraam ti realize ki Zeova i egzamin leker sak dimoun e ki Zeova pa zanmen pini bann inosan ansanm avek bann ki koupab.​—Zen. 18:20-32.

11. Ki mannyer Abraam ti montre ki i kontan Zeova e ki i annan konfyans dan Li?

¹¹ Sa konversasyon ki Abraam ti annan avek Zeova konsernan Sodonm ek Gomor ti annan en lefe lo Abraam. San dout, sa ti fer li kontan e annan plis respe pour son Papa. Me plizyer lannen pli tar, Abraam ti fer fas avek en sityasyon ki ti’n kapab fer li difisil pour li demontre konfyans dan Zeova. Zeova ti demann Abraam pour sakrifye Izaak, son garson ki i kontan. Me Abraam ti konn son Bondye pli byen e safwasi i pa ti demann kestyon. I ti pare pour fer sa ki Zeova ti’n demann li. Kantmenm sa, son leker ti bezwen fermal ler i ti pe prepare pour sakrifye son garson! I bezwen ki Abraam ti’n reflesir lo sa ki i ti’n aprann konsernan Zeova. I ti konnen ki Zeova pa ti pou zanmen azir dan en fason ki enzis oubyen fer en keksoz ki pa demontre lanmour. Zapot Pol ti dir ki Abraam ti rezonn dan li menm ki Bondye ti kapab resisit son garson Izaak. (Ebr. 11:17-19) Apre tou, Zeova ti’n promet ki Izaak ti pou vin papa en nasyon e sa letan Izaak ti napa zanfan. Abraam ti kontan Zeova alor i ti annan konfyans ki son Papa ti pou toultan fer sa ki drwat. Menm si i ti difisil, i ti obei akoz i ti annan lafwa.​—Zen. 22:1-12.

12. Ki mannyer nou kapab swiv legzanp Abraam? (Psonm 73:28)

¹² Ki mannyer nou kapab swiv legzanp Abraam? Parey Abraam, nou bezwen aprann konn Zeova. Anmezir nou fer sa, nou pou vin pli pros avek Zeova e nou pou kontan li plis. (Lir Psonm 73:28.) Nou pou antrenn nou konsyans pour ki i ganny enfliyanse par fason panse Zeova. (Ebr. 5:14) Sa pou fer ki ler en dimoun i esey fer nou fer en keksoz mal, nou pou refize. Nou pa ni pou mazin fer okenn keksoz ki pou fer nou Papa sagren e ki pou gat nou lanmitye avek li. Me ki lezot fason ki nou kapab montre ki nou kontan ladrwatir?

13. Ki mannyer nou kapab fer sa ki drwat? (Proverb 15:9)

¹³ Dezyenm letap: Toulezour fer zefor pour devlop plis lanmour pour ladrwatir. Si nou anvi fer nou misk vin for, nou bezwen fer zefor pour fer legzersis toulezour. Pareyman, nou bezwen fer zefor pour devlop plis lanmour pour bann standar Zeova. I pa difisil pour nou fer sa toulezour. Zeova i rezonnab e i pa zanmen ekspekte ki nou fer plis ki sa ki nou kapab. (Ps. 103:14) I asir nou ki “i kontan sa enn ki fer sa ki drwat.” (Lir Proverb 15:9.) Si nou anvi atenn en lobzektif dan servis Zeova, nou bezwen kontinyen fer zefor. Nou bezwen fer parey si nou anvi fer sa ki drwat. Zeova pou ed nou fer progre e avek letan nou pou amelyore.​—Ps. 84:5, 7.

14. Ki sa “proteksyon pour [nou] pwatrin” i reprezante e akoz nou bezwen met li?

¹⁴ Zeova i fer nou rapel ki i pa en fardo pour nou fer sa ki drwat. (1 Zan 5:3) O kontrer, ler nou fer sa ki drwat, sa i protez nou e nou bezwen sa proteksyon toulezour. Mazin sa bann lekipman batay ki zapot Pol i koz lo la. (Efe. 6:14-18) Kwa ki ti protez leker sa solda? Sa solda ti met “ladrwatir konman en proteksyon pour [son] pwatrin,” sa ti pe reprezant bann standar Zeova ki drwat. Zis parey sa proteksyon pour pwatrin i protez leker, bann standar Zeova i kapab protez sa dimoun ki nou ete anndan. I pour sa rezon ki i enportan ki nou met tou nou lekipman batay, sa i enkli ki nou met ladrwatir konman en proteksyon pour nou pwatrin.​—Prov. 4:23.

15. Ki mannyer ou kapab met ladrwatir konman en proteksyon pour ou pwatrin?

¹⁵ Ki mannyer ou kapab met ladrwatir konman en proteksyon pour ou pwatrin? Ou kapab fer sa ler ou pran kont bann standar Bondye toulezour ler ou fer ou bann desizyon. Ler ou pe deside ki ou pou koz lo la, ki lanmizik ou pou ekoute, ki film ou pou gete oubyen ki liv ou pou lir, premyerman demann ou lekor: ‘Ki mon pe met dan mon leker? Eski sa bann keksoz i fer Zeova plezir? Oubyen eski i promot imoralite seksyel, vyolans, vorasite, en latitid egois, setadir bann keksoz ki Zeova i dir i mal?’ (Fili. 4:8) Si bann desizyon ki ou fer i an armoni avek lavolonte Zeova, sa i vedir ki ou pe les bann standar Zeova protez ou leker.

16-17. Ki mannyer Izai 48:18 i asir nou ki nou kapab viv dapre bann standar Zeova pour touzour?

¹⁶ Eski ou enkyet konsernan si ou pou kapab kontinyen viv dapre bann standar Zeova, zour apre zour e lannen apre lannen? Annou vwar en legzanp ki Zeova ti servi dan Izai 48:18. (Lir.) Zeova i promet ki nou ‘ladrwatir i kapab parey bann laroul dan lanmer.’ Imazin ou pe debout lo lans e pe get laroul kot pe kraze lo lans, enn apre lot. Eski dan sa moman, ou pou enkyet ki en zour i pou nepli annan laroul dan lanmer? Non. Ou konnen ki pour plizyer milye lannen, laroul in kraze lo lans e i pou kontinyen kraze lo lans.

¹⁷ Ou ladrwatir i kapab parey bann laroul dan lanmer. Ki mannyer sa? Ler ou pe fer en desizyon, premyerman rode ki Zeova i anvi ou fer e apre fer li. Ki swa sa desizyon i difisil oubyen non, ou Papa ki kontan ou pou toultan la pour ed ou toulezour pour kontinyen viv dapre Son bann standar.​—Iza. 40:29-31.

18. Akoz nou pa devret ziz lezot dapre nou prop standar?

¹⁸ Trwazyenm letap: Les Zeova zize. Menm si nou fer zefor pour viv dapre bann standar Zeova, nou pa devret ziz lezot e krwar ki nou pli siperyer ki zot. Nou napa sa drwa pour deside si lezot pe fer sa ki Zeova i anvi zot fer. Nou devret gard antet ki Zeova i “sa Ziz lo later antye.” (Zen. 18:25) Zeova pa’n donn nou sa drwa pour ziz lezot. Anfet Zezi i donn nou sa lord: “Aret zize pour ki zot pa ganny zize.”​—Mat. 7:1.b

19. Ki mannyer Zozef ti montre ki i annan konfyans dan fason ki Zeova i zize?

¹⁹ Annou vwar ankor enn fwa legzanp Zozef, ki ti en zonm drwat. Menm si i ti ganny trete dan en move fason, i pa ti ziz lezot. Son bann frer ti atak li, vann li konman en lesklav e konvenk zot papa ki Zozef ti’n mor. Plizyer lannen pli tar, Zozef ti zwenn son fanmir ankor. Zozef ti’n vin en dirizan pwisan. I ti’n kapab ziz son bann frer dan en fason dir e pran revanz lo zot. Bann frer Zozef ti per ki Zozef ti pou pran revanz lo zot, menm si zot ti regrete pour sa ki zot ti’n fer. Me Zozef ti asir zot: “Pa bezwen per. Eski mon Bondye mwan?” (Zen. 37:18-20, 27, 28, 31-35; 50:15-21) Zozef ti annan limilite. I ti realize ki zis Zeova ki annan sa drwa pour ziz son bann frer.

20-21. Ki mannyer nou kapab evite krwar ki nou pli siperyer ki lezot?

²⁰ Parey Zozef, nou les Zeova zize. Par egzanp, nou pa devret krwar ki nou konnen kwa ki motiv nou bann frer ek ser. Nou pa konnen ki i annan dan leker lezot me zis ‘Zeova ki egzamin nou motivasyon.’ (Prov. 16:2) Zeova i kontan tou sort kalite dimoun, nenport fason ki zot in grandi e dan nenport kiltir ki zot sorti. Zeova i ankouraz nou pour “ouver gran [nou] leker.” (2 Kor. 6:13) Nou pa ziz nou bann frer ek ser me nou anvi kontan zot.

²¹ Sa i osi vedir ki nou pa devret ziz bann ki pa form parti kongregasyon. (1 Tim. 2:3, 4) Eski ou ti pou ziz en manm ou fanmir ki pa Temwen Zeova e dir, “Sa dimoun pa pou zanmen vin dan laverite?” Non. Si ou ti fer sa, ou ti pou pe fer en keksoz ki ou napa drwa fer e ou krwar ki ou pli siperyer ki lezot. Zeova i ankor pe donn “tou dimoun partou kote” sa loportinite pour repantir. (Akt 17:30) Toultan gard antet ki Zeova i vwar en dimoun ki krwar i pli siperyer ki lezot konman dimoun ki enzis.

22. Akoz ou determinen pour kontan ladrwatir?

²² Nou lanmour pour bann standar Zeova ki drwat pou fer nou zwaye e pou ed nou vin en bon legzanp pour lezot, pour ki zot kontinyen devlop plis lanmour pour nou e pour Bondye. Annou pa zanmen aret “lafen e swaf ladrwatir.” (Mat. 5:6) Nou kapab asire ki Zeova i vwar nou bann zefor ki nou pe fer e i toultan fer li plezir pour vwar ou pe fer ou mye pour fer sa ki byen. Menm si dimoun dan lemonn pe vin deplizanpli pli enzis, nou kapab trouv rekonfor. Toultan gard antet ki “Zeova i kontan bann dimoun ki drwat.”​—Ps. 146:8.