Rod vre lasazes

 1. Ki mannyer en kantite dimoun i reazir anver lasazes ki sorti dan Labib? (Proverb 1:20, 21)

DAN bokou pei, nou’n souvandfwa vwar nou bann frer ek ser an souriyan pe debout dan bann landrwa kot i annan en kantite dimoun e zot pe ofer bann dimoun bann piblikasyon. Petet ou osi ou’n deza fer sa. I kapab ki ou ti mazin sa verse dan Proverb ki dir ki lasazes pe kriye dan bann landrwa piblik pour ki dimoun i tann son konsey. (Lir Proverb 1:20, 21.) Nou kapab trouv “vre lasazes” setadir lasazes ki sorti kot Zeova dan Labib e dan nou bann piblikasyon. Bann dimoun i bezwen sa lasazes pour zot kapab ganny lavi eternel. Nou kontan ler en dimoun i aksepte enn nou bann piblikasyon. Me pa zot tou ki fer sa. Serten pa anvi konnen ki Labib i dir. Lezot i riy nou. Zot krwar ki Labib i en vye liv ki nepli itil. I annan lezot ankor ki kritik sa ki Labib i dir konsernan sa ki byen ek sa ki mal parski zot krwar ki bann ki swiv sa ki Labib i dir i krwar ki zot pli meyer ki lezot e ki zot bann dimoun ki dir. Kantmenm sa, avek lanmour, Zeova i kontinyen fer ki tou dimoun i kapab ganny son lasazes. Dan ki fason?

 2. Kote nou kapab trouv vre lasazes ozordi me ki laplipar dimoun i swazir pour fer?

² En fason ki Zeova i fer ki tou dimoun i kapab ganny son lasazes i atraver son Parol, Labib. Preski tou dimoun i kapab ganny Labib. Ki nou pou dir konsernan nou bann piblikasyon ki baze lo Labib? Avek benediksyon Zeova, nou bann piblikasyon i disponib dan plis ki 1,000 langaz. Bann ki ekout sa lasazes setadir ki lir e aplik sa ki zot aprann i ganny bann byenfe. Me laplipar dimoun in swazir pour pa ekout sa lasazes ki sorti kot Zeova. Ler zot annan bann desizyon pour fer, zot prefere depan lo zot prop lekor ouswa zot ekout lezot dimoun. Zot menm kapab mank respe pour nou parski nou swazir pour swiv sa ki Labib i dir. Dan sa lartik, nou pou vwar akoz dimoun i reazir dan sa fason. Me premyerman, annou vwar ki mannyer nou kapab ganny lasazes ki sorti kot Zeova.

 3. Ki nou bezwen fer pour montre ki nou annan vre lasazes?

³ En dimoun ki annan lasazes i kapab servi sa ki i konnen pour fer bann bon desizyon. Me annan vre lasazes i enplik plis ki sa. Labib i dir: “Gran respe pour Zeova i premye pa ver lasazes e konnesans sa Enn ki tre sen, sanmenm lentelizans.” (Prov. 9:10) Alor ler nou annan en desizyon enportan pour fer, nou devret rod “konnesans sa Enn ki tre sen” setadir rode ki Zeova i panse lo sa size. Nou kapab fer sa par etidye Labib ek nou bann piblikasyon ki baze lo Labib. Ler nou fer sa, nou montre ki nou annan vre lasazes.​—Prov. 2:5-7.

 4. Akoz zis Zeova ki kapab donn nou vre lasazes?

⁴ Zis Zeova ki kapab donn nou vre lasazes. (Rom. 16:27) Akoz nou dir ki Zeova i Sours lasazes? Premyerman, Zeova i Kreater e i konn tou keksoz konsernan sa ki i’n kree. (Ps. 104:24) Dezyenmman, tou sa ki Zeova i fer i montre ki i saz. (Rom. 11:33) Trwazyenmman, bann konsey saz ki Zeova i donnen, i toultan anmenn byenfe pour bann ki aplik li. (Prov. 2:10-12) Si nou anvi ganny vre lasazes, nou bezwen aksepte sa bann laverite de baz e les zot gid nou bann desizyon ek nou bann aksyon.

 5. Ki i arive ler dimoun pa oule aksepte ki Zeova i Sours vre lasazes?

⁵ En kantite dimoun ki nou zwenn dan predikasyon i admet ki bann keksoz dan lanatir in ganny fer dan en fason merveye. Me kantmenm sa, zot dir ki i napa en Kreater. Lezot dimoun i dir ki zot krwar dan Bondye me zot krwar ki bann standar Labib pa aplik pour nou letan e zot swazir pour viv mannyer zot anvi. Ki sa in anmennen? Eski lefet ki dimoun i depan lo zot prop lasazes olye lo lasazes Bondye, sa in fer lemonn vin pli meyer? Eski zot vreman ere ouswa eski zot vreman annan lespwar pour lavenir? Sa ki nou vwar otour nou i konvenk nou ki sa ki Labib i dir i vre. I dir: “Napa lasazes, ni disernman, ni bon konsey ki annakor avek lasazes Zeova.” (Prov. 21:30) Sa i motiv nou pour kontinyen demann Zeova sa vre lasazes. Malerezman, pa bokou dimoun ki fer sa. Akoz?

 6. Dapre Proverb 1:22-25, lekel ki pa aksepte lasazes ki sorti kot Bondye?

⁶ En kantite dimoun pa aksepte sa vre lasazes. Labib i dir ki i annan trwa group dimoun ki fer sa. Sa i bann ki “pa konn nanryen,” “bann moker” ek “bann dimoun bet.” (Lir Proverb 1:22-25.) Annou vwar akoz sa bann dimoun i rezet lasazes ki sorti kot Bondye e ki mannyer nou kapab evite vin parey zot.

 7. Akoz serten dimoun i swazir pour pa konn nanryen?

⁷ Bann dimoun ki “pa konn nanryen” i krwar tou sa ki zot tande e zot fasilman ganny anbete. (Prov. 14:15) Nou souvandfwa zwenn bann dimoun koumsa dan predikasyon. Par egzanp, mazin sa plizyer milyon dimoun ki pe ganny anbete par bann sef relizye oubyen bann sef politik. Serten i soke ler zot realize ki sa bann sef relizye ouswa sef politik in koz manti avek zot. Me sa group dimoun ki Proverb 1:22 i apel bann ki pa konn nanryen i swazir pour pa konn nanryen parski zot kontan pour koumsa. (Zer. 5:31) Zot kontan pour fer sa ki zot oule e zot pa oule aprann sa ki Labib i dir ouswa aplik bann standar ki dan Labib. En kantite dimoun i santi parey en madanm ki reste Kanada, ki vreman relizye. Sa madanm ti dir avek en Temwen Zeova: “Si nou pret in anbet nou, sa i son lafot pa pour nou!” Nou pa anvi vin parey sa bann dimoun ki swazir pour pa konn nanryen.​—Prov. 1:32; 27:12.

 8. Kwa ki pou fer nou vin en dimoun ki saz?

⁸ Labib i annan bon rezon pour ankouraz nou pour “rezonn parey bann adilt” olye pour reste en dimoun ki pa konn nanryen. (1 Kor. 14:20) Nou ganny lasazes ler nou aplik bann prensip Labib. Ptitapti, nou aprann pour nou menm ki mannyer sa bann prensip i ed nou evit problenm e fer bann desizyon saz. I ti pou byen si nou reflesir lo bann desizyon ki nou’n fer. Par egzanp, si ou pe etidye Labib e ou pe asiste bann renyon, ou kapab demann ou lekor akoz ou pa ankor dedye ou lavi avek Zeova e batize. Si ou’n batize, eski ou pe fer progre pour ou amelyor lafason ki ou anons e ansenny sa bon nouvel? Eski bann desizyon ki ou fer i montre ki ou pe aplik bann prensip Labib? Eski ou tret lezot parey Zezi ti pou tret zot? Si nou bezwen fer bann sanzman, nou bezwen reflesir byen lo bann rapel ki Zeova i donn nou parski sa bann rapel i ‘fer sa bann ki napa leksperyans vin saz.’​—Ps. 19:7.

 9. Ki mannyer “bann moker” i montre ki zot rezet lasazes ki sorti kot Zeova?

⁹ Sa dezyenm group dimoun ki pa aksepte vre lasazes i “bann moker.” Parfwa nou zwenn bann dimoun koumsa dan predikasyon. Zot kontan monk lezot. (Ps. 123:4) Labib ti averti ki dan bann dernyen zour, i pou annan en kantite moker. (2 Pyer 3:3, 4) Zis parey bann zann Lot, serten dimoun ozordi pa ekout bann lavertisman ki Zeova i donnen. (Zen. 19:14) En kantite dimoun i riy bann ki aplik bann prensip Labib. Bann moker i kontan pour “swiv zot prop dezir pour fer bann move keksoz.” (Zid 7, 17, 18) Latitid bann aposta ek lezot ki’n rezet Zeova i menm parey avek lafason ki Labib i dekrir latitid bann moker.

10. Dapre Psonm 1:1, ki mannyer nou kapab evite vin parey bann moker?

¹⁰ Ki mannyer nou kapab fer sir ki nou pa vin parey sa bann moker? En fason nou kapab fer sa i pour evite frekant bann ki kontan konplent. (Lir Psonm 1:1.) Sa i vedir ki nou pa lir ouswa ekout nanryen ki sorti kot bann aposta. Nou realize ki si nou pa fer atansyon nou kapab devlop sa latitid pour konplent konsernan tou keksoz e konmans annan dout dan fason fer Zeova e dan bann lenstriksyon ki nou gannyen atraver son lorganizasyon. Pour nou pa vin en dimoun koumsa, nou devret demann nou lekor: ‘Eski mon annan labitid konplent sak fwa nou ganny nouvo lenstriksyon ouswa leksplikasyon? Eski mon tant pour rod defo bann ki pe dirize dan kongregasyon?’ Ler nou pa tarde pour aret fer sa bann keksoz, sa pou fer Zeova plezir.​—Prov. 3:34, 35.

11. Ki mannyer “bann dimoun bet” i vwar bann standar Zeova konsernan sa ki byen ek sa ki mal?

¹¹ Labib i apel sa trwazyenm group dimoun ki rezet lasazes sorti kot Bondye, “bann dimoun bet.” Zot bet parski zot refize viv dapre bann lalwa Bondye konsernan sa ki byen ek sa ki mal. Zot fer sa ki zot krwar i byen. (Prov. 12:15) Bann dimoun koumsa i rezet Zeova, ki Sours lasazes. (Ps. 53:1) Ler nou zwenn bann dimoun koumsa dan predikasyon, zot souvandfwa kritik nou parski nou viv dapre bann standar ki dan Labib. Me zot pa kapab donn nou en pli bon lavi. Labib i dir: “En dimoun bet pa kapab vin saz, i napa nanryen pour dir kot baro lavil.” (Prov. 24:7) Bann dimoun bet pa kapab donn nou konsey saz. I pour sa rezon ki Zeova i dir nou “reste lwen avek en dimoun bet.”​—Prov. 14:7.

12. Kwa ki pou ed nou pour pa vin parey bann dimoun bet?

¹² Nou pa parey bann dimoun ki ay konsey Bondye. O kontrer nou aprann pour kontan fason panse Zeova enkli son bann standar konsernan sa ki byen ek sa ki mal. Ler nou konpar sa ki arive ler nou obei e sa ki arive ler nou pa obei, sa i kapab fer nou pli kontan bann standar Zeova. Remark bann problenm ki dimoun i gannyen parski zot in rezet bann konsey saz ki sorti kot Zeova. Apre remarke ki mannyer ou lavi i bokou pli meyer akoz ou obei Bondye.​—Ps. 32:8, 10.

13. Eski Zeova i fors nou pour obei son bann konsey saz?

¹³ Zeova i donn son lasazes avek nou tou. I pa fors personn pour aksepte sa lasazes. Me i dir nou ki i arive avek bann ki pa ekout son konsey saz. (Prov. 1:29-32) Bann ki swazir pour pa obei Zeova pou “bezwen pey konsekans zot aksyon.” Avek letan, zot pou soufer akoz fason ki zot pe viv zot lavi e pli tar, Zeova pou detrir zot. De lot kote, bann ki ekout konsey saz ki Zeova i donnen e ki aplik sa bann konsey, Labib i dir sa konsernan zot: “Sa enn ki ekout mwan pou an sekirite e i pa pou per maler.”​—Prov. 1:33.

14-15. Ki nou aprann avek Proverb 4:23?

¹⁴ Nou toultan ganny bann byenfe ler nou aplik lasazes sorti kot Bondye. Parey nou’n vwar, Zeova i fer li fasil pour nou trouv son bann konsey saz. Par egzanp, dan liv Proverb, Zeova in donn nou bann konsey ki pou amelyor nou lavi si nou aplik li. Annou vwar zis kat sa bann konsey.

¹⁵ Protez ou leker, setadir sa dimoun ki ou ete anndan. Labib i dir: “Plis ki tou lezot keksoz ki ou devret proteze, protez ou leker, parski lavi i depan lo sa ki dan ou leker.” (Prov. 4:23) Reflesir lo sa ki nou bezwen fer pour protez nou leker fizik. Nou bezwen manz bann keksoz ki an bonn sante, fer legzersis e evit bann move labitid. Nou fer en keksoz en pe parey pour protez sa dimoun ki nou ete anndan. Nou lir Parol Bondye toulezour. Nou prepare, asiste e partisipe dan renyon. Nou regilyerman partisip dan predikasyon. Nou evite devlop bann move labitid par evit okenn keksoz ki kapab sali nou lespri parey bann divertisman imoral ek move frekantasyon.

16. Ki mannyer Proverb 23:4, 5 i kapab ed nou ozordi?

¹⁶ Kontant ou avek sa ki ou annan. Labib i dir: “Pa rente pour ganny larises. . . . Ler ou get larises, i pou disparet, akoz vreman i pou ganny lezel parey en leg e i pou anvole dan lesyel.” (Prov. 23:4, 5) Dimoun i kapab fasilman perdi zot larzan ek bann keksoz materyel ki zot annan. Me kantmenm sa, bann dimoun ris konman pov i konsantre lo zis fer larzan. Sa i fer ki zot in gat zot repitasyon, gat zot lanmitye avek lezot e menm afekte zot prop lasante. (Prov. 28:20; 1 Tim. 6:9, 10) De lot kote, lasazes i ed nou pour annan en bon pwennvi lo larzan. Sa i fer nou pa vin voras, nou kontant nou avek sa ki nou annan e nou zwaye.​—Ekle. 7:12.

17. Dapre Proverb 12:18, ki mannyer nou kapab koz parey en dimoun saz?

¹⁷ Reflesir avan ou koze. Si nou pa fer atansyon, sa ki nou dir i kapab fer en kantite ditor. Labib i dir: “Bann parol san reflesir i parey bann kou lepe, me lalang en dimoun saz i en gerizon.” (Prov. 12:18) Nou ede gard lape ler nou evite koz lo defo lezot. (Prov. 20:19) Si nou anvi ki nou parol i rekonfort lezot olye bles zot, nou devret lir e medit lo Parol Bondye toulezour. (Lik 6:45) Ler nou medit lo sa ki Labib i dir, nou parol i kapab vin parey en “sours lasazes” ki kapab ankouraz lezot.​—Prov. 18:4.

18. Ki mannyer ler nou aplik Proverb 24:6, sa i kapab ed nou dan predikasyon?

¹⁸ Swiv lenstriksyon ki lorganizasyon Zeova i donnen. Labib i donn nou sa konsey: “En bon gidans i enportan pour ganny lager e kot i annan bokou konseye, laviktwar i asire.” (Prov. 24:6) Annou vwar ki mannyer ler nou aplik sa prensip sa i kapab ed nou dan sa travay pour anons e ansenny sa bon nouvel. Olye fer predikasyon dan nou prop fason, nou esey swiv bann sizesyon ki nou gannyen. Nou ganny bann lenstriksyon saz dan renyon, kot nou kapab aprann avek bann frer ek ser eksperyanse lo ki mannyer pour ansenny sa ki Labib i dir. An plis, lorganizasyon Zeova i donn nou bann piblikasyon ek video ki kapab ed dimoun pour konpran sa ki Labib i dir. Eski ou pe aprann ki mannyer pour servi sa bann piblikasyon ek video pli byen?

19. Ki mannyer ou santi konsernan lasazes ki sorti kot Zeova? (Proverb 3:13-18)

¹⁹ Lir Proverb 3:13-18. Nou rekonesan pour bann bon konsey ki nou gannyen dan Parol Bondye. Kote nou ti pou ete si nou ti napa sa bann bon konsey? Dan sa lartik, nou’n vwar serten bon konsey ki nou kapab trouve dan liv Proverb. Byensir, dan Labib antye i annan bann bon konsey sorti kot Zeova. Nou devret aplik son bann konsey dan nou lavi. Laplipar dimoun dan lemonn pa apresye lasazes ki sorti kot Bondye me nou asire ki “bann ki reste atase avek [lasazes] pou ere.”​—Prov. 3:13-18.