Apresye sa kado lavi

 1. Ki mannyer Zeova i konsider nou lavi?

METON en zanmi i donn ou en vye tablo ki annan bokou valer. Sa lapentir lo sa tablo in pali, i annan tas lo la e in konmans dekoke. Me kantmenm sa, sa tablo i vo plizyer milyon dolar. Eski pa ou ti pou apresye e protez sa kado? Byensir. Pareyman, Zeova in donn nou en kado ki annan en gran valer. Sa i sa kado lavi. Anfet, Zeova i montre ki kantite presye nou lavi i ete pour li par donn son Garson konman en ranson pour nou.​—Zan 3:16.

 2. Dapre 2 Korentyen 7:1, ki Zeova i ekspekte nou fer?

² Zeova i Sours lavi. (Ps. 36:9) Zapot Pol ti krwar sa e i ti dir: “Gras a li ki nou vivan, ki nou mouvmante e egziste.” (Akt 17:25, 28) Alor nou kapab dir ki nou lavi i en kado sorti kot Bondye. I donn nou sa ki nou bezwen pour kontinyen viv. (Akt 14:15-17) Me konmela Zeova pa fer bann mirak pour gard nou vivan. O kontrer i ekspekte ki nou fer tou sa ki nou kapab pour reste an bonn sante e pour kontinyen servi li fidelman. (Lir 2 Korentyen 7:1.) Akoz nou devret fer nou mye pour reste an bonn sante e vivan e ki mannyer nou kapab fer sa?

 3. Akoz nou devret esey reste an bonn sante?

³ En rezon akoz ki nou devret esey reste an bonn sante, i pour nou kapab donn Zeova nou meyer. (Mark 12:30) Nou anvi “ofer [nou] lekor konman en sakrifis vivan, sen e akseptab pour Bondye,” alor nou evite fer bann keksoz ki nou konnen i kapab fer nou malad. (Rom. 12:1) I vre ki menm si nou pou fer en kantite keksoz pour nou reste an bonn sante, sa pa vedir ki nou pa pou malad. Me nou fer sa ki nou kapab parski nou anvi montre nou Papa ki dan lesyel ki nou apresye sa kado lavi.

 4. Ki Lerwa David ti anvi fer?

⁴ Lerwa David ti eksplike akoz i kontan sa kado lavi ler i ti dir: “Ki profi i pou annan si mon mor, si mon desann dan latonm? Eski lapousyer pou loue ou? Eski i pou koz lo ou fidelite?” (Ps. 30:9) I kapab ki David ti ekri sa bann parol ler i ti pros pour mor. Me i ti determinen pour reste vivan e an bonn sante pour li kapab kontinyen loue Zeova. San dout, nou tou nou annan sa menm determinasyon.

 5. Ki nou kapab fer menm si nou aze oubyen nou malad?

⁵ Si nou malad oubyen laz pe antre, petet nou pa pou kapab fer sa kantite ki nou ti abitye fer oparavan. Sa i kapab fer nou fristre e sagren. Me nou pa devret aret pran swen avek nou lekor. Akoz? Parski menm si nou aze oubyen nou malad, nou ankor kapab loue Zeova parey Lerwa David ti fer. I vreman rekonfortan pour konnen ki menm si nou malad oubyen nou aze, nou presye pour Zeova. (Mat. 10:29-31) Menm si i arive ki nou mor, Zeova pou vreman anvi resisit nou. (Zob 14:14, 15) Alor, tan ki nou ankor vivan, nou anvi fer tou sa ki nou kapab pour pran swen avek nou lasante e protez nou lavi.

 6. Ki Zeova i anvi nou fer konsernan sa ki nou manze e bwar?

⁶ Menm si Labib pa en liv ki koz lo ki mannyer pour pran swen avek nou lasante e i pa dir nou ki nou devret manze, Labib i ed nou konn pwennvi Zeova konsernan sa bann keksoz. Par egzanp, Zeova i demann nou pour “rezet sa ki koz ditor” pour ki nou pa fer dimal nou prop lekor. (Ekle. 11:10) Labib i dir ki nou pa devret manz tro bokou oubyen bwar tro bokou lalkol. Sa bann keksoz i kapab afekte nou lasante e menm touy nou. (Prov. 23:20) Zeova i ekspekte ki nou annan kontrol lo nou lekor ler nou pe deside ki nou pou manze e bwar e ki kantite nou pou manze e bwar.​—1 Kor. 6:12; 9:25.

 7. Ki mannyer sa konsey dan Proverb 2:11 i ed nou pour fer bann bon desizyon konsernan nou lasante?

⁷ Ler nou servi nou abilite pour reflesir, nou kapab fer bann desizyon ki montre ki nou apresye ki Bondye in donn nou lavi. (Ps. 119:99, 100; lir Proverb 2:11.) Par egzanp, nou fer bann bon desizyon konsernan sa ki nou manze. Si en manze ki nou kontan i fer nou malad, nou pa pou manz sa manze. Nou osi montre ki nou saz ler nou fer sir ki nou annan ase letan pour dormi, ler nou fer legzersis regilyerman e ler nou gard nou lekor ek nou lakour prop.

 8. Ki mannyer Labib i montre ki Zeova i anvi ki nou evit bann aksidan?

⁸ Zeova ti donn bann Izraelit lalwa konsernan ki mannyer zot kapab evit bann aksidan grav kot lakour e ler zot dan travay. (Egz. 21:28, 29; Det. 22:8) Si en dimoun ti touy en dimoun par aksidan, i ti pou annan bann konsekans grav. (Det. 19:4, 5) Lalwa ti dir ki en dimoun ki fer dimal en pti baba ki pa ankor ne, i devret ganny pini menm si i pa’n fer par ekspre. (Egz. 21:22, 23) Labib i montre ki Zeova i anvi ki nou fer nou mye pour evit bann aksidan.

 9. Ki nou kapab fer pour esey evit aksidan? (Vwar portre.)

⁹ Nou montre ki nou apresye sa lavi ki Bondye in donn nou par evit bann aksidan kot lakour e dan travay. Par egzanp, si nou bezwen zet bann keksoz ki kapab bles nou, bann kemikal anpwazonnen oubyen latizann, nou zet li dan en fason ki i pa pou fer ditor lezot. Nou osi fer sir ki zanfan pa ganny akse avek sa bann keksoz. Nou fer atansyon ler nou alim dife, bwi delo e ler nou servi zouti. Nou bezwen fer atansyon pour pa ale e kit sa bann keksoz ler nou pe servi. Nou pa dray si nou pe pran latizann ki fer li danzere pour nou dray. Nou pa dray si nou anba lenfliyans lalkol oubyen nou pa’n dormi ase. Nou osi pa dray avek telefonn dan nou lanmen.

10. Ki nou kapab fer avan e pandan en dezas?

¹⁰ Parfwa nou pa kapab anpes bann sityasyon danzere arive. Par egzanp, nou pa kapab anpes dezas natirel, lepidemi ek bann konfli arive. Me ler sa bann keksoz i arive, nou kapab reste sen e sof e protez nou lavi par obei lord ki lotorite i donnen pour kit sa landrwa e obei lezot lord ki nou gannyen. (Rom. 13:1, 5-7) I posib pour prepar nou pour serten problenm. Alor nou devret ekout bann lenstriksyon ki bann lotorite i donnen pour ed nou prepare. Par egzanp, petet i ti pou en bon nide pour fer sir ki nou annan en pe delo ek manze ki pa pou gate e osi serten keksoz pour premye swen.

11. Ki nou devret fer si i annan en maladi kontazye ki pe propaze dan sa landrwa kot nou reste?

¹¹ Ki nou devret fer si i annan en maladi kontazye ki pe propaze dan sa landrwa kot nou reste? Nou devret obei bann lenstriksyon ki gouvernman i donnen konsernan lav nou lanmen, gard zistans avek kanmarad, met en mask e reste an karantenn. Ler nou fer sa, nou montre ki nou vreman apresye sa lavi ki Bondye in donn nou.

12. Ki mannyer Proverb 14:15 i ed nou deside ki lenformasyon nou pou ekoute ler i annan en dezas?

¹² Pandan bann moman dirzans, parfwa nou kapab tann bann lenformasyon ki pa vre avek nou bann zanmi, vwazen oubyen lo medya. Olye krwar “tou parol” ki nou tande, nou devret ekout bann lenformasyon egzakt sorti kot gouvernman ek bann dokter. (Lir Proverb 14:15.) Konsey Direkter ek bann biro brans i fer sir ki zot annan bann lenformasyon egzakt avan ki zot donn lenstriksyon konsernan bann renyon ek predikasyon. (Ebr. 13:17) Ler nou swiv bann lenstriksyon, nou protez nou lekor e nou protez lezot. I kapab ki nou osi ed lezot pour mazin an byen lo Temwen Zeova.​—1 Pyer 2:12.

13. Ki mannyer nou montre ki nou apresye sa lavi ki Bondye in donn nou ler nou obei lalwa Zeova konsernan disan?

¹³ En kantite dimoun i konnen ki Temwen Zeova i krwar ki disan i sakre. Nou obei lalwa Zeova konsernan disan par refize aksepte transfizyon disan menm ler nou bezwen swen medikal irzan. (Akt 15:28, 29) Me sa pa vedir ki nou anvi mor. O kontrer, nou kontan sa lavi ki Bondye in donn nou. Nou rod led avek bann dokter ki pare pour donn bann bon swen medikal ki pa enkli transfizyon disan.

14. Ki mannyer nou kapab redwir risk pour fer loperasyon ek bann tretman medikal ki serye?

¹⁴ Si nou pran swen avek nou lasante par fer sa bann keksoz ki nou’n vwar dan sa lartik, i kapab ki nou pa pou bezwen fer loperasyon oubyen swiv bann tretman medikal ki serye. Si nou pran swen avek nou lasante, nou pou pran pli ptigin letan pour rekipere apre en loperasyon. Nou osi kapab redwir risk pour fer en loperasyon irzan par pran bann prekosyon pour anpese ki i annan en aksidan kot nou lakour ek nou landrwa travay e par obei bann lalwa trafik.

15. (a) Akoz i enportan pour nou annan nou kart disan avek nou? (Vwar portre.) (b) Dapre sa video, ki mannyer ou kapab fer bann bon desizyon konsernan disan?

¹⁵ Vi ki nou apresye sa kado lavi, nou ranpli en kart disan (advance health-care directive) e nou anmenn avek nou partou kot nou ale.b Atraver sa dokiman, nou fer konn nou desizyon konsernan transfizyon disan ek serten tretman medikal. Eski ou kart disan i azour? Si ou pa ankor ranpli enn oubyen sa ki ou annan i pa azour, fer li deswit. Ler nou ranpli sa kart disan, sa pou ed nou pour ganny tretman ki nou bezwen vitman parski nou pa pou perdi letan pe diskit avek dokter konsernan nou lopinyon lo disan. Nou pou osi fer sir ki nou pa ganny okenn tretman oubyen latizann ki kapab fer nou dimal.c

16. Ki nou kapab fer si nou pa asire ki mannyer pour ranpli en kart disan?

¹⁶ Ki swa nou zenn oubyen nou an bonn sante, nou tou nou kapab tonm malad oubyen ganny en aksidan. (Ekle. 9:11) Alor i ti pou saz pour ou ranpli en kart disan. Si ou pa asire ki mannyer pour ranpli sa dokiman, demann bann ansyen dan ou kongregasyon pour ed ou parski zot konnen ki mannyer pour ranpli sa dokiman. Kantmenm sa zot pa pou fer desizyon pour ou. Sa i ou responsabilite. (Gal. 6:4, 5) Zot ed ou konpran ki bann opsyon ki ou annan e zot ed ou ler ou pe ranpli sa kart.

17. Ki mannyer nou kapab montre ki nou rezonnab konsernan bann keksoz ki annan pour fer avek lasante?

¹⁷ Bann desizyon ki nou fer konsernan nou lasante ek bann tretman medikal ki nou pou pran i baze lo sa ki nou’n aprann dan Labib. (Akt 24:16; 1 Tim. 3:9) Ler nou fer bann desizyon e koz avek lezot lo sa ki nou’n deside, nou bezwen rapel sa ki Filipyen 4:5 i dir: “Montre zot rezonnab avek tou dimoun.” Ler nou rezonnab, nou pa toultan enkyet konsernan nou lasante e nou pa esey enpoz nou lopinyon konsernan lasante lo lezot. Nou kontan nou bann frer ek ser e nou annan respe pour zot menm si bann desizyon ki zot fer i diferan avek sa ki pour nou.​—Rom. 14:10-12.

18. Ki mannyer nou kapab montre ki nou apresye lavi ki en kado sorti kot Bondye?

¹⁸ Nou demontre nou lapresyasyon anver Zeova ki Sours lavi ler nou protez nou lavi e ler nou donn li nou meyer. (Rev. 4:11) Pour lemoman, nou bezwen fer fas avek bann maladi ek bann dezas. Me sa i pa sa fason ki nou Kreater ti anvi nou viv. Byento i pou donn nou lavi eternel. Nou pou napa okenn douler e nou pa pou mor. (Rev. 21:4) Antretan, nou kontan ki nou vivan e ki nou pe servi Zeova, nou Papa ki kontan nou!