Ki mannyer Bondye i apele?

Ler ou anvi konn en dimoun, premye keksoz ou pou demann li i, “Ki mannyer ou apele?” Si ou ti demann Bondye sa kestyon, ki i ti pou reponn?

“Mwan, mon Zeova. Sa i mon non.”​—Izai 42:8, NWT.

Eski premye fwa ou tann sa non? Si wi, sa i kapab akoz serten tradikter Labib pa met non Bondye dan Labib tandis ki lezot i met li zis serten landrwa. Souvan, zot ranplas son non avek sa tit “SENYER.” Pourtan, non Bondye i aparet plis ki 7,000 fwa dan langaz orizinal ki Labib ti ganny ekri. An Ebre, non Bondye ti ganny ekri avek kat let ki vin YHWH oubyen JHVH e in ganny tradwir konman “Zeova” an Kreol.a

Non Bondye i aparet dan Lekritir Ebre e dan bokou tradiksyon dan lezot langaz

Sa non i enportan pour Bondye. Napa personn ki’n donn Bondye son non, Bondye in swazir son non li menm. Zeova i dir: “Sa i ava mon non pour touzour, mon non ki bann zenerasyon fitir ava envoke [oubyen mazinen].” (Egzod 3:15) Dan Labib, non Bondye in ganny ekrir plis ki okenn tit ki Bondye i annan, parey Tou Pwisan, Papa, Senyer oubyen Bondye. Non Bondye i osi aparet plis ki okenn lezot non, parey Abraam, Moiz, David oubyen Zezi. Deplis, Zeova i anvi ki dimoun i konn son non. Labib i dir: “Dimoun i devret konnen ki ou, ki apel Zeova, zis ou tousel ki Tre O lo later antye.”​—Psonm 83:18, NWT.b

Sa non i enportan pour Zezi. Dan lapriyer Notreper ki bokou dimoun i konnen, Zezi ti montre son bann disip ki mannyer pour priy Bondye. Dan sa lapriyer i ti dir: “Ki ou non i ganny sanktifye.” (Matye 6:9) Zezi ti osi priy Bondye e dir: “Papa glorifye ou non.” (Zan 12:28) I ti fer li son priyorite pour glorifye non Bondye e sanmenm rezon i ti kapab dir dan lapriyer: “Mon’n fer zot konn ou non e mon pou kontinyen fer li.”​—Zan 17:26.

Sa non i enportan pour bann ki konn Bondye. Bann serviter Bondye dan lepase ti konnen ki non Bondye ti vreman enportan pour zot kapab ganny sove e ganny son proteksyon. “Non [Zeova] i en tour solid; i en proteksyon pour sa enn ki zis.” (Proverb 18:10) “Tou sa ki kriy non Zeova pou ganny sove.” (Akt 2:21) Labib i dir ki non Bondye ti pou montre lekel ki pe servi li. ‘Sak nasyon pe obei son bondye, nou, nou pou ador e obei [Zeova], nou Bondye pour touzour e touzour.’​—Mika 4:5; Akt 15:14.

Sa non i montre lekel Bondye. Bokou spesyalis Labib i dir ki non Zeova i vedir “I fer arive.” Zeova ti fer konnen ki son non i vedir ler i ti koz avek Moiz e dir: “Mon pou vin sa ki mon swazir pour vini.” (Egzod 3:14, NWT) Alor, non Bondye i montre ki Bondye pa zis sa Kreater ki’n kree tou keksoz me i annan sa abilite pour fer li ek son kreasyon vin nenport kwa ki i bezwen pour akonplir son plan. Menm si bann tit i montre lotorite ki Bondye i annan ensi ki son pozisyon ek pouvwar, son non i montre tou sa ki Bondye i ete e tou sa ki i kapab vini.

Sa non i montre ki Bondye i enterese avek nou. Non Bondye i montre ki i vreman kontan son kreasyon e sa i enkli nou osi. Deplis, lefet ki Bondye in fer nou konn son non, i montre ki i anvi nou konn li. Apre tou, i ti pran linisyativ pour fer nou konn son non menm avan ki nou ti mazinen pour demann li. I kler ki Bondye pa anvi nou vwar li konman en Bondye ki pa vreman enterese avek nou me konman en Personnaz reel ki nou kapab vin pros avek.​—Psonm 73:28.

Ler nou servi non Bondye sa i montre ki nou anvi konn li. Par egzanp, si ou anvi vin zanmi avek en dimoun, pa ou pou anvi i kriy ou par ou non? Me ki mannyer ou pou santi si sa dimoun i kontinyen refize fer sa? Petet avek letan ou pou demann ou lekor si sa dimoun i vreman anvi vin ou zanmi. I menm parey avek Bondye. Zeova in dir nou son non e i ankouraz nou pour servi sa non. Ler nou fer sa, nou montre Zeova ki nou anvi vin pros avek li akoz i vwar “bann ki medit lo son non.”​—Malaki 3:16, NWT.

Ler nou konn non Bondye, sa i premye pa pour nou aprann konn li. Me nou pa devret aret lanmenm. Nou bezwen aprann konn sa Bondye ki annan sa non. Nou bezwen konnen ki mannyer i ete.