En Ladministrasyon pour akonpli Plan Bondye

‘Bondye i egzekit tou keksoz selon son volonte.’—EFEZYEN 1:11.

 1. Akoz tou kongregasyon Temwen Zeova pou rasanble le 12 Avril, 2006?

MERKREDI le 12 Avril, 2006, apepre 16 milyon dimoun pou rasanble pour obzerv Repa Senyer. Partou kot zot pou rasanble i pou annan lo en latab dipen san lelven, ki reprezant lekor Kris ek diven rouz ki reprezant son disan ki i’n verse. Ver lafen sa diskour ki pou eksplik sinifikasyon Memoryal lanmor Zezi, zot pou fer pase sa dipen e apre sa diven avek tou dimoun prezan sa zour. Dan ennde kongregasyon Temwen Zeova, detrwa dimoun prezan pou manz sa dipen e bwar sa diven. Me dan bokou kongregasyon, tou dimoun prezan pa pou pran sa dipen ek diven. Akoz selman detrwa Kretyen, bann ki annan lespwar pour al dan lesyel ki pran sa dipen ek diven, tandis ki lamazorite Kretyen ki zot lespwar i pour viv pour touzour lo later pa pran?

2, 3. (a) Ki Zeova ti fer pour fer son plan vin en realite? (b) Pour ki rezon Zeova ti kree later ek imen?

² Zeova i en Bondye ki annan en plan. Pour li akonpli son plan, i “egzekit tou keksoz selon son volonte.” (Efezyen 1:11) Premye i ti kree son Garson. (Zan 1:1, 14; Revelasyon 3:14) Apre, atraver son Garson, Zeova ti kree en gran fanmiy konpoze avek bann lanz e finalman i ti kree sa liniver ki nou vwar, ki enkli later ek imen.—Zob 38:4, 7; Psonm 103:19-21; Zan 1:2, 3; Kolosyen 1:15, 16.

³ Zeova pa ti kree later pour teste imen lo la pour vwar si zot kapab vin bann lanz dan lesyel, parey bokou larelizyon Kretyen i dir. Zeova ti kree later pour en serten rezon byen spesifik. I ti kree later pour zonm “reste lo la.” (Izai 45:18) Zeova ti kree later pour zonm e zonm pour later. (Psonm 115:16) Plannet later antye ti pou vin en paradi, ranpli avek bon dimoun ki ti pou kiltiv later e okip li byen. Zeova pa ti zanmen ofer sa premye koup imen sa lespwar pour al dan lesyel en zour.—Zenez 1:26-28; 2:7, 8, 15.

Plan Zeova ti ganny atake

 4. Ki mannyer byen boner dan listwar imen drwa Zeova pour dirize ti ganny atake?

⁴ Par mal servi son liberte ki Bondye ti donn li, en lanz ti rebel e i ti anvi kas plan Zeova. I ti deranz sa trankilite ki nou eksperyanse ler nou soumet avek lotorite Zeova. Satan ti reisi fer Adan ek Ev vin endepandan avek Bondye. (Zenez 3:1-6) Satan pa ti kestyonn lafors ki Zeova i annan, me plito i ti atak son lotorite ek Son drwa pour dirize. Alor, byen boner dan listwar imen, sa drwa ki Zeova i annan pour dirize ti ganny kestyonnen isi lo later.

 5. Ki sa lot kestyon ki ti ganny leve, e i met an kestyon fidelite lekel?

⁵ Dan letan Zob, Satan ti lev en lot kestyon ki relye en kantite avek sa enn premye konsernan drwa Zeova pour dirize. Satan ti kestyonn rezon ki imen ek lanz i soumet avek Zeova e servi Li. Dapre Satan, zot ti pe fer sa pour rezon egois, e si zot ganny teste zot pou rezet Bondye. (Zob 1:7-11; 2:4, 5) Menm si sa kestyon ti ganny leve an rapor avek en serviter Zeova lo later, i ti osi enplik bann lanz, menm Garson Bondye.

 6. Ki mannyer Zeova ti montre ki i fidel avek son plan ek son non?

⁶ Vi ki i fidel avek son plan e avek sa ki son non i vedir, Zeova ti vin en Profet ek en Sover.a I ti dir Satan: “Mon pou met en laenn ant ou ek sa fanm, ant ou desandans ek son desandans. I pou kraz ou latet e ou pou kraz son talon.” (Zenez 3:15) Par mwayen Desandans son “fanm,” setadir son lorganizasyon dan lesyel, Zeova ti pou reponn sa kestyon ki Satan in leve. I ti pou osi donn desandans Adan lespwar pour ganny delivre e lespwar lavi eternel.—Romen 5:21; Galat 4:26, 31.

‘Sen Sekre son Lavolonte’

 7. Ki plan Zeova ti revele atraver zapot Pol?

⁷ Dan son let pour bann Kretyen Efez, zapot Pol ti eksplik dan en zoli fason ki mannyer Zeova i administre keksoz pour akonpli son plan. Pol ti ekrir: “I ti fer nou konn sen sekre son lavolonte. Dapre sa ki i kontan, i ti deside etablir en ladministrasyon alafen letan fikse, setadir pour reini ankor tou keksoz dan Kris, keksoz dan lesyel ek keksoz lo later.” (Efezyen 1:9, 10, NW) La son zoli plan: Zeova i oule etablir en liniver kot i annan linite e kot bann imen ek lanz i kontan pour soumet avek son lotorite. (Revelasyon 4:11) Alor lakonplisman son plan pou glorifye Son non, i pou montre ki Satan i en manter, e lavolonte Bondye pou akonpli “lo later parey dan lesyel.”—Matye 6:10.

 8. Ki savedir sa mo ki ganny tradwir “ladministrasyon”?

⁸ ‘Sa ki Zeova i kontan,’ oubyen son plan, pou ganny akonpli par mwayen “en ladministrasyon.” Sa mo ki Pol ti servi i literalman vedir “diriz en lakour.” Sa mo pa refer avek en gouvernman, parey Rwayonm Bondye, me i refer avek en fason pour diriz keksoz.b Sa zoli fason ki Zeova pou administre keksoz pour akonpli son plan i enplik en ‘sen sekre,’ ki i pou revele ptit-a-pti avek letan.—Efezyen 1:10; 3:9, not anba lo paz dan Traduction du monde nouveau.

 9. Ki mannyer Zeova ti ptit-a-pti revel sen sekre son lavolonte?

⁹ Atraver plizyer lalyans ki Zeova ti fer, i ti revel ptit-a-pti ki mannyer son plan konsernan sa Desandans promiz dan Edenn pou ganny akonpli. Son lalyans avek Abraam ti revele ki sa Desandans pou sorti dan laliny Abraam e pou vin sa mwayen pour “tou nasyon lo later” ganny beni. Sa lalyans ti osi endike ki lezot ti pou asosye avek parti prensipal sa Desandans. (Zenez 22:17, 18) Lalyans lalwa ki Zeova ti fer avek nasyon Izrael ti devwal son plan pour annan “en rwayonm pret.” (Egzod 19:5, 6) Sa lalyans avek David ti montre ki sa Desandans pou vin Sef en Rwayonm pour en letan endefini. (2 Samyel 7:12, 13; Psonm 89:3, 4) Apre ki Lalyans lalwa ti reisi gid bann Zwif ver Mesi, Zeova ti revel lezot laspe lakonplisman son plan. (Galat 3:19, 24) Sa bann imen ki ti pou asosye avek parti prensipal sa desandans ti pou vin sa “rwayonm pret” ki ti ganny predir. Zeova ti pou osi fer en “nouvo lalyans” avek zot e zot ti pou vin sa nouvo “Izrael,” en Izrael spirityel.—Zeremi 31:31-34; Ebre 8:7-9.c

10, 11. (a) Ki mannyer Zeova ti revel lidantite sa Desandans? (b) Akoz Garson Bondye ti vin lo later?

¹⁰ Sa letan ti arive pour sa Desandans aparet lo later pour ki plan Bondye i ganny realize. Zeova ti anvoy lanz Gabriyel kot Mari pour dir li ki i pou donn nesans en garson ki ti pou apel Zezi. Sa lanz ti dir Mari: “I pou gran e i pou apel Garson Bondye Tre-o. Bondye pou donn li tronn son papa, David. I pou renny lo tou desandan Zakob pour touzour, e son renny pa pou zanmen fini.” (Lik 1:32, 33) Alor lidantite sa Desandans promiz ti vin kler.—Galat 3:16; 4:4.

¹¹ Garson Zeova ti pou vin lo later e i ti pou ganny teste ziska lanmor. Larepons parfe pour sa kestyon ki Satan ti leve ti pou depan lo fason ki Zezi i anmenn son lavi. Eski i ti pou reste fidel avek son Papa? Sa ti en sen sekre. Plitar zapot Pol ti eksplik rol Zezi: “Personn pa kapab nye ki sekre nou lafwa i gran: I’n paret dan laform imen, zistifye par Lespri, Bann lanz in war li, I’n ganny anonse parmi bann nasyon, atraver lemonn zot in krwar dan li, e i’n ganny anleve dan laglwar.” (1 Timote 3:16) Wi, Zezi in reponn dan en fason konplet sa kestyon ki Satan in leve par reste fidel toudilon son lavi ziska lanmor. Me i ti annan lezot detay lo sa sen sekre ki pa ti ankor ganny revele.

“Sekre Rwayonm Bondye”

12, 13. (a) Nonm en laspe sa “sekre Rwayonm Bondye.” (b) Ki ti arive ler Zeova ti swazir en serten kantite imen pour al dan lesyel?

¹² En zour ler Zezi ti pe prese Galile, i ti endike ki sa sen sekre i annan keksoz pour fer avek son Rwayonm. I ti dir son bann disip: “Pour zot, sekre Rwayonm Bondye in ganny revele.” (Matye 13:11) En laspe sa sekre i annan pour fer avek ler Zeova ti konmans swazir en “pti troupo” 144,000 dimoun pour asosye avek son Garson. Zot ti pou form parti sa desandans, pour renny avek Zezi dan lesyel.—Lik 12:32; Revelasyon 14:1, 4.

¹³ Zeova ti kree imen pour viv lo later, alor i ti bezwen fer “en nouvo kreasyon” pour serten imen kapab al dan lesyel. (2 Korentyen 5:17) Zapot Pyer ki ti enn parmi sa bann ki annan sa lespwar spesyal pour al dan lesyel ti ekrir: “Ki Bondye e Papa nou Senyer Zezi-Kri i ganny beni! Dan son gran konpasyon i’n donn nou en nouvo lavi avek en lesperans vivan par rezireksyon Zezi-Kri, dan en leritaz ki i’n rezerve pour zot dan lesyel, ki pa kapab ni gate, ni sali, ni fletri.”—1 Pyer 1:3, 4.

14. (a) Ki mannyer bann dimoun ki pa ti Zwif ti enplike dan “sekre Rwayonm Bondye”? (b) Akoz nou arive konpran bann keksoz profon Bondye?

¹⁴ I annan ankor en lot laspe sa sen sakre ki annan pour fer avek sa fitir Rwayonm Bondye. Sa i lavolonte Bondye pour enkli dimoun ki pa Zwif parmi sa pti group imen ki pou ganny apele pour renny avek Kris dan lesyel. Pol ti eksplik sa laspe “ladministrasyon” Zeova oubyen fason pour diriz lakonplisman son plan: ‘Dan letan pase en tel sekre pa ti ganny kominike avek bann zonm, me Bondye par son Lespri in aprezan revel li avek son bann sen zapot ek son profet. Sa sekre se ki par mwayen levanzil bann non-Zwif i osi ganny en par avek bann Zwif dan leritaz ki Bondye in rezerve pour son pep; zot manm dan menm lekor e zot partisip zot osi dan menm promes ki Bondye in fer an Kris-Zezi.’ (Efezyen 3:5, 6) Zeova ti ed son “bann sen zapot” konpran sa laspe dan sa sen sekre. Ozordi osi i parey. Si pa ti led lespri sen, nou pa ti pou konpran bann keksoz profon Bondye.—1 Korentyen 2:10; 4:1; Kolosyen 1:26, 27.

15, 16. Akoz Zeova ti swazir bann asosye Kris lo later?

¹⁵ Zapot Zan ti vwar “144,000 dimoun” pe debout avek “Lanyo” lo montanny Siyon dan lesyel. E i ti dir ki zot in ganny ‘swazir lo later,’ ‘swazir parmi bann zonm pour ganny ofer konman bann premye fri devan Bondye e devan Lanyo,’ Zezi Kri. (Revelasyon 14:1-4) Zeova ti swazir son premye garson spirityel pour vin parti prensipal sa desandans ki i ti promet dan zarden Edenn. Me akoz i ti swazir bann imen pour vin bann asosye Kris? Zapot Pol i eksplike ki sa pti gin dimoun in ganny ‘swazir dapre plan Zeova,’ “selon son bonn volonte.”—Romen 8:17, 28-30; Efezyen 1:5, 11; 2 Timote 1:9.

¹⁶ Zeova i oule ki son gran non sen i ganny glorifye e osi son drwa pour diriz liniver i ganny zistifye. Sa i son plan. Par son “ladministrasyon” oubyen son fason pour diriz keksoz, ki telman saz, Zeova ti anvoy son Garson lo later e i ti ganny teste ziska lanmor. Deplis, Zeova ti deside fer en serten kantite imen form parti Rwayonm son Garson. Zot osi zot in siport Son lotorite ziska lanmor.—Efezyen 1:8-12; Revelasyon 2:10, 11.

17. Akoz nou kontan ki Kris ek bann ki pou dirize avek li in deza viv lo later?

¹⁷ Zeova ti montre son gran lanmour pour desandans Adan par anvoy son Garson lo later e par swazir serten dimoun pour vin zeritye ansanm avek son Garson dan Rwayonm. Ki mannyer lezot dimoun ki’n fidel avek Zeova depi letan Abel an montan i kapab benefisye avek sa laranzman? Lefe ki tou dimoun in ne dan lesklavaz pese ek lanmor, alor imen enparfe pou bezwen en gerizon spirityel e fizik ziska zot vin parfe, an armoni avek plan orizinal Zeova pour limanite. (Romen 5:12) Bann ki annan lespwar pour viv pour touzour lo later i santi zot byen ler zot konnen ki zot Lerwa pou kontan zot e konpran zot zis parey i ti fer avek son bann disip ler i ti lo later! (Matye 11:28, 29; Ebre 2:17, 18; 4:15; 7:25, 26) Deplis, i rekonfortan ler zot mazinen ki bann lerwa ek pret ansanm avek Kris dan lesyel ti bann zonm ek fanm fidel ki’n lalit avek zot prop febles e eksperyans difikilte lavi, zis parey nou!—Romen 7:21-25.

Plan Zeova pou reisi

18, 19. Akoz parol Pol dan Efezyen 1:8-11 i pli kler pour nou aprezan, e ki nou pou egzaminen dan lartik swivan?

¹⁸ Aprezan nou kapab pli byen konpran sinifikasyon parol Pol pour bann Kretyen swazir, ki trouve dan Efezyen 1:8-11. I ti dir ki Zeova in fer zot konn “sen sekre son lavolonte,” ki zot ti ganny ‘swazir konman zeritye’ avek Kris e zot ti ganny “swazir davans dapre plan e desizyon sa enn ki egzekit tou keksoz selon son volonte.” Nou realize ki sa i adapte byen dan fason merveye Zeova pour diriz keksoz pour lakonplisman son plan. Sa i osi ed nou konpran akoz zis detrwa Kretyen ki pran dipen ek diven zour Memoryal lanmor Kris.

¹⁹ Dan lartik swivan nou pou egzaminen ki Memoryal lanmor Kris i vedir pour bann Kretyen ki annan lespwar pour al dan lesyel. Nou pou osi vwar akoz bann ki annan lespwar pour viv pour touzour lo later i devret byen enterese avek sa ki Memoryal i reprezante.

[Not anba lo paz]

Revizyon

• Akoz Zeova ti kree later e met zonm lo la?

• Akoz i ti neseser pour Garson Bondye ganny teste lo later?

• Akoz Zeova ti swazir bann imen pour dirize ansanm avek Kris?