SAPIT 6

Akoz Nou Vin Vye e Mor?

 1. Kwa ki bann syantis pa’n kapab eksplike konsernan lavi imen?

BANN syantis pa konnen akoz bann imen i vin vye e mor. I sanble ki nou bann selil ti a devret pe kontinyelman renouvle e ki nou ti a devret pe viv pour touzour. En liv Zaponnen Hyojun Soshikigaku (baze lo letid bann selil) i raporte: “I en gran mister ki mannyer vyeyes nou bann selil i relye avek lavyeyes ek lanmor en endividi.” Plizyer syantis i krwar ki lavi i annan en limit “natirel e erediter.” Eski ou annan en menm pwenn-vi?

 2. Lefe ki lavi i sitan bref, ki serten in fer?

² Bann imen in touzour anvi viv pli lontan e zot in menm esey prokir limortalite. Depi katriyenm syek A.N.L., bann drog ki ti sipoze prokir limortalite in atrakte latansyon bann nob Sinwan. Serten lanperer Sinwan, ti esey sa bann swadizan latizann lavi—fabrike avek merkir—e zot ti mor! Partou dan lemonn, dimoun i krwar ki lanmor i pa lafen zot legzistans. Bann Boudis, Endou, Islanm ek lezot, zot tou zot annan en lespwar briyan pour lavi apre lanmor. Dan Lakretyente bokou i anvizaz en legzistans apre lanmor, dan en paradi osyel.

 3. (a) Akoz bann imen i annan sa dezir pour viv pour touzour? (b) Ki bann kestyon konsernan lanmor ki bezwen ganny reponn?

³ Bann konsep lo boner apre lanmor i reflekte en dezir pour viv eternelman. Konsernan lide leternite ki Bondye in enplant dan nou, Labib i dir: “Menm letan endefini i’n met dan zot leker.” (Eklezyast 3:11) I ti kree sa de premye imen avek perspektiv pour viv pour touzour lo later. (Zenez 2:16, 17) Alor, akoz ki imen i mor? Ki mannyer lanmor in antre dan lemonn? Sa konnesans ki Bondye i donnen, i eklersi sa bann kestyon.—Psonm 119:105.

EN KONPLO MALIS

 4. Ki mannyer Zezi ti idantifye sa kriminel ki responsab pour lanmor imen?

⁴ Abityelman en kriminel i esey kasyet bann levidans ki ti a kapab akiz li. Sa i osi leka pour sa enn ki responsab pour en krim ki’n anmenn lanmor plizyer milyon dimoun. I’n manipil keksoz pour fer ki lanmor i vin misterye. Zezi Kri ti idantifye sa kriminel ler I ti dir avek sa bann ki ti pe rod pour touy Li: “Zot, zot papa dyab, e se dezir zot papa ki zot oule realize. Depi okonmansman i en kriminel, i pa’n zanmen kontan laverite, akoz napa laverite dan li.”—Zan 8:31, 40, 44.

 5. (a) Ki lorizin sa enn ki ti vin Satan Dyab? (b) Ki sa bann mo “Satan” ek “Dyab” i vedir?

⁵ Dyab i vreman en “kriminel” mesan. Labib i revele ki i en personn reel, pa senpleman lemal dan leker en endividi. (Matye 4:1-11) Menm si i ti ganny kree konman en lanz zis, “i pa’n [tenir bon dan, NW] laverite.” Pa i apropriye ki i’n ganny apele Satan Dyab! (Revelasyon 12:9) I ganny apele “Satan” oubyen “opozan,” akoz i’n opoz e reziste Zeova. Sa kriminel i osi ganny apele “Dyab” ki vedir “kalonmnyen,” parski san okenn respe i’n mal reprezant Bondye.

 6. Akoz Satan ti rebel kont Bondye?

⁶ Kwa ki ti ensit Satan pour rebel kont Bondye? Vorasite. Son vorasite ti fer li anvi sa ladorasyon ki bann imen ti donn Zeova. Dyab pa ti rezet sa dezir pour resevwar en tel ladorasyon ki ti natirelman al zis pour nou Kreater. (Vwar Ezekyel 28:12-19.) Okontrer, sa lanz ki ti vin Satan, ti nouri sa dezir voras ziska ki i ti vin fertil e ti donn nesans pese.—Zak 1:14, 15.

 7. (a) Kwa ki koz lanmor imen? (b) Kisisa pese?

⁷ Nou’n idantifye sa enn ki koupab pour sa akt kriminel ki’n antrenn lanmor bann imen. Me pour ki rezon presi bann imen i mor? Labib i dir: “Sa dart ki prodwir lanmor, se pese.” (1 Korentyen 15:56, NW) Me kisisa pese? Pour konpran sa term, annou konsider son sinifikasyon ki i ti annan, dan lalang orizinal Labib. Bann verb Ebre ek Grek ki ti zeneralman ganny tradwir “fer pese,” i vedir “manke” setadir mank en target oubyen pa atenn en bi. Me ki sa target ki nou tou nou manke? Sa target se en lobeisans parfe anver Bondye. Toudmenm, ki mannyer, pese in ganny entrodwir dan lemonn?

KI MANNYER SA KONPLO TI GANNY REALIZE

 8. Ki Satan ti fer pour esey ganny ladorasyon bann imen?

⁸ Satan ti aranz, avek prekosyon, en konplo ki i ti krwar pour donn li lotorite lo tou bann imen e ensi ganny zot ladorasyon. I ti deside pour ensit sa premye koup imen, Adan ek Ev, pour fer pese kont Bondye. Zeova ti’n donn nou premye paran en konnesans ki ti pou’n anmenn zot ver lavi eternel. Zot ti konnen ki zot Kreater ti bon akoz i ti’n plas zot dan en zarden manifik an Edenn. Adan ti sirtou resanti bonte son Papa seles kan Bondye ti donn li en tre zoli madanm pour ed li. (Zenez 1:26, 29; 2:7-9, 18-23) Lavi eternel pour sa premye koup imen ti depan lo zot lobeisans anver Bondye.

 9. Ki lord Bondye ti donn sa premye imen, e akoz sa lord ti rezonnab?

⁹ Bondye ti donn sa lord Adan: “[Fri] dan tou pye dibwa sa zarden, ou kapab manz ziska satisfaksyon. Me kanta sa pye konnesans bon e move, ou pa devret manze, parski sa zour ki ou manz [son fri], asireman ou pou mor.” (Zenez 2:16, 17) Etan Kreater, Zeova Bondye ti annan sa drwa pour etabli bann standar moral e pour determinen kwa ki ti bon e kwa ki ti move pour son bann kreatir. Son komannman ti rezonnab akoz Adan ek Ev ti lib pour manz fri sorti dan tou lezot pye dibwa dan sa zarden. Zot ti kapab montre zot lapresyasyon pour dominasyon lezitim Zeova an obeisan sa lalwa olye etabli, avek lorgey, zot prop standar moral.

10. (a) Ki mannyer Satan ti apros sa de premye imen pour atrakte zot dan son kote? (b) Ki bann motif ki Satan ti servi pour blanm Zeova? (c) Ki ou panse lo latak Satan kont Zeova?

¹⁰ Dyab ti plàn pour elwanny sa de premye imen avek Bondye. Pour atrakte zot dan son kote, Satan ti koz manti. An servan en serpan, lafason ki en vantrilok i servi en maryonnet, Dyab ti demann Ev: “Eski i vre ki Bondye in dir ki zot pa devret manz [fri sorti] dan tou pye dibwa sa zarden?” Kan Ev ti sit sa komannman divin, Satan ti deklare: “Sirman zot pa pou mor.” Apre i ti fer krwar ki Zeova ti annan bann move motif, an dizan: “Bondye i konnen, ki sa zour menm ki zot pou manz li, zot lizye pou sertennman ouver e sertennman zot pou vin parey Li, pour konn sa ki bon ek sa ki move.” (Zenez 3:1-5) Dyab ti alor, sizere ki Bondye ti pe priv zot en bon keksoz. Eski sa pa ti en lensilt ofansiv kont nou Papa seles Zeova, en Bondye lanmour ek laverite!

11. Ki mannyer Adan ek Ev ti vin bann konplis Satan?

¹¹ Ev ti regard sa pye dibwa ankor e son fri ti alor paret pli dezirab. Alor i ti pran sa fri e manz li. Plitar, son msye ti volonterman zwenn li dan sa pese pour dezobei Bondye. (Zenez 3:6) Kantmenm Ev ti ganny tronpe, zot de Adan, zot ti tou le de siport konplo Satan pour domin ras imen. An realite, zot ti vin son bann konplis.—Romen 6:16; 1 Timote 2:14.

12. Ki bann konsekans ki rebelyon bann imen kont Bondye, in anmennen?

¹² Adan ek Ev ti bezwen fer fas avek bann konsekans zot aksyon. Zot pa ti vin parey Bondye, avek en konnesans spesyal. Okontrer zot ti onte e zot ti al kasyet zot. Zeova ti demann Adan en leksplikasyon e i ti pronons sa santans: “Dan lasyer ou vizaz ou pou manz dipen ziska ou retourn dan sirfas later, parski se ladan ki ou ti ganny pran. Parski ou lapousyer e ou pou retourn an pousyer.” (Zenez 3:19) “Sa zour” ki nou premye paran ti manz fri sa pye konnesans bon e move, Bondye ti kondann zot e pour li, zot ti mor. Apre, zot ti ganny met an deor paradi e zot ti konmans sa prosesis ver lanmor fizik.

KONMAN PESE EK LANMOR IN PROPAZE

13. Konman ki pese in propaz dan tou laras imen?

¹³ Satan ti’n aparaman reisi dan son plan pour ganny ladorasyon bann imen. Pourtan, i pa ti kapab kit son bann adorater vivan. Kan pese ti konmans egzers son aksyon lo sa premye koup imen, zot ti nepli kapab transmet perfeksyon avek zot desandans. Parey en enskripsyon grave lo en ros, pese ti’n grave oprofon sistenm erediter nou premye paran. Alor, zot ti selman kapab prodwir en desandans enparfe. Vi ki tou zot zanfan ti ganny konsevwar apre ki Adan ek Ev ti fer pese, tou zot desandans in erit pese ek lanmor.—Psonm 51:5; Romen 5:12.

14. (a) Avek ki nou ti a kapab konpar bann ki refize pour admet zot leta peser? (b) Konman bann Izraelit ti pran konsyans zot kondisyon peser?

¹⁴ Ozordi, toutfwa, bokou dimoun pa krwar ki zot peser. Dan serten parti lemonn, sa lide pese erediter i zeneralman enkoni. Me sa pa laprev ki pese pa egziste. En pti garson avek en figir sal pou petet ensiste ki i prop, e i pa pou ganny konvenki otreman amwen ki i get son figir dan laglas. Bann Izraelit dan letan lontan, ti resanble sa pti garson kan zot ti resevwar lalwa Bondye atraver Son profet, Moiz. Lalwa ti fer kler ki pese ti egziste. “Par lalwa mon’n konnen kisisa pese,” lapot Pol i eksplike. (Romen 7:7-12) Parey sa pti garson ki get dan laglas, se an servan Lalwa pour egzamin zot, ki bann Izraelit ti pou kapab vwar ki zot ti enpir dan lizye Zeova.

15. Kwa ki ganny revele ler nou get dan laglas Parol Bondye?

¹⁵ An regardan dan laglas Parol Bondye, e an obzervan son bann standar, nou kapab vwar ki nou enparfe. (Zak 1:23-25) Par egzanp, konsider sa ki Zezi Kri ti dir son bann disip konsernan lanmour pour Bondye e pour zot prosen, rikorde dan Matye 22:37-40. Ki kantite fwa bann imen pe mank target dan sa domenn! Bokou bann ki pa manifeste lanmour pour Bondye oubyen zot prosen, pa ni menm santi okenn pti remor dan zot konsyans.—Lik 10:29-37.

FER ATANSYON BANN RIZ SATAN!

16. Ki nou kapab fer pour nou evite vin en viktim riz Satan, e akoz sa i difisil?

¹⁶ Satan pe esey fer nou pratik pese volonterman. (1 Zan 3:8) Eski i annan okenn mwayen pour nou evite vin en viktim son bann taktik? Wi, me pour sa nou bezwen konbat kont nou bann enklinasyon pour fer pese volonterman. Sa pa fasil, vi ki nou tandans natirel pour fer pese, i tre for. (Efezyen 2:3) Pol ti bezwen anmenn en vre konba. Akoz? Parski pese ti reste dan li. Si nou oule laprouvasyon Bondye, nou osi nou bezwen konbat kont nou bann tandans pese ki dan nou.—Romen 7:14-24; 2 Korentyen 5:10.

17. Kwa ki fer nou lalit kont nou bann tandans pour fer pese, pli difisil?

¹⁷ Vi ki Satan pe konstaman rod bann loportinite pour ensit nou pour kas lalwa Bondye, alors nou lalit kont pese pa fasil. (1 Pyer 5:8) An montran son konsern pour son bann frer Kretyen, Pol ti dir: “Mon per ki parey Eve ti ganny tronpe par riz serpan, zot les zot lentelizans ganny egare lwen avek senplisite ek lapirte Kris.” (2 Korentyen 11:3) Satan i servi bann riz parey ozordi. I esey senm dout konsernan bonte Zeova e bann byenfe ki nou gannyen kan nou obei son bann komannman. Dyab i esey servi nou tandans natirel pour fer pese, e i ensit nou pour anmenn en lavi dominen par lorgey, vorasite, laenn ek prezidis.

18. Konman ki Satan i servi lemonn pour promot pese?

¹⁸ Enn bann zouti ki Dyab i servi dan son konba kont nou, se lemonn ki anba son pouvwar. (1 Zan 5:19) Si nou pa fer atansyon, bann dimoun koronpi e malonnet dan sa monn otour nou, pou pous nou dan en move semen ki vyol bann standar moral Bondye. (1 Pyer 4:3-5) Bokou i inyor bann lalwa divin e zot menm refize pour ekout zot konsyans, ki fer li vin ensansib avek letan. (Romen 2:14, 15; 1 Timote 4:1, 2) Serten i gradyelman adopte en semen ki menm zot konsyans enparfe pa ti permet zot pran oparavan.—Romen 1:24-32; Efezyen 4:17-19.

19. Akoz i pa zis sifi pour anmenn en lavi ki moralman pir?

¹⁹ Dan sa monn aktyel, anmenn en lavi ki moralman pir i en gran lakonplisman. Selman pour fer plezir nou Kreater, sa i pa sifi. Nou devret osi annan lafwa dan Bondye e rekonnet nou responsabilite anver li. (Ebre 11:6) Disip Zak ti ekrir: “Tou dimoun ki konn sa ki byen ki i devre fer e ki pa fer li, i koupab, i konmet en pese.” (Zak 4:17) Wi, volonterman inyor Bondye ek son bann komannman i en form pese dan li menm.

20. Konman ki Satan ti a kapab esey anpes ou fer sa ki zis, me kwa ki pou ed ou pour reziste sa bann presyon?

²⁰ I tre probab ki Satan pou ensit lopozisyon pour anpes ou resers konnesans Bondye par mwayen ou letid Labib. I vreman swetab ki ou pa pou les sa bann presyon anpes ou pratik sa ki zis. (Zan 16:2) Menm si bokou sef ti annan lafwa dan Zezi diran son minister, zot pa ti admet akoz zot ti per ki zot a ganny rezete par zot kominote. (Zan 12:42, 43) San pitye, Satan pe esey fer per nenport ki, ki pe resers konnesans Bondye. Kantmenm sa, ou devret touzour rapel e montre ou rekonesan pour bann keksoz merveye ki Zeova in fer. Petet menm, ou kapab ed bann opozan pour resanti sa menm rekonesans.

21. Ki mannyer nou kapab ranport laviktwar lo lemonn e lo nou bann tandans pour fer pese?

²¹ Tan ki nou enparfe, nou pou komet pese. (1 Zan 1:8) Malgre sa, nou pa tousel dan sa batay. Wi, i posib pour sorti viktorye dan nou lalit kont sa enn mesan, Satan Dyab. (Romen 5:21) Alafen son minister lo later, Zezi ti ankouraz son bann disip avek sa bann mo swivan: “Dan lemonn zot bezwen soufer. Me pran kouraz, mon’n ranport laviktwar lo lemonn.” (Zan 16:33) Menm pour bann imen enparfe, i posib pour ranport laviktwar lo lemonn avek led Bondye. Satan napa kontrol lo bann ki opoz li e ki ‘soumet zot avek Bondye.’ (Zak 4:7; 1 Zan 5:18) Parey nou pou vwar, Bondye in prevwar en mwayen pour nou sorti anba lesklavaz pese ek lanmor.

TESTE OU KONNESANS

Ki sennla Satan Dyab?

Akoz nou vin vye e nou mor?

Kisisa pese?

Konman Satan i atir bann dimoun pour fer zot pese volonterman kont Bondye?

[Portre lo paz 54]