Eski ou per dimoun mor?

LAREPONS en kantite dimoun pour sa kestyon i senpleman, “Non. Akoz mon bezwen per dimoun mor?” Zot vreman krwar ki bann dimoun mor in vreman mor. Parkont, plizyer milyon dimoun i krwar ki bann dimoun mor i kontinyen viv konman bann lespri.

Dan Les Lafrik i annan en pei ki apel Benen kot en kantite dimoun i krwar ki bann mor i kapab retournen pour touy lezot manm zot prop fanmir. Bann dimoun i vann zot bann byen ouswa andet zot lekor pour kapab ofer bann sakrifis zannimo e fer bann seremoni pour pa ofans manm zot fanmir ki’n mor. Serten pratik demonyak, i enkli sa lide ki en lespri i kontinyen viv apre ki en dimoun in mor e ki i kapab koz avek bann dimoun ki vivan. Lezot in pas atraver bann leksperyans ki fer per e zot krwar ki sa ki’n arive i akoz lenfliyans lespri bann dimoun mor.

Agboola, en zonm ki viv pros avek lafrontyer Nizerya in pas atraver en leksperyans koumsa. I ti dir: “Pratik demonyak i komen dan nou rezyon. I annan en koutim kot nou fer en seremoni pour benny bann dimoun mor pour prepar zot avan ki zot al dan lemonn bann lespri. Souvan apre sa seremoni, mon ti anmas bann bout savon ki’n reste e melanz zot avek serten fey. Apre, anmezir ki mon ti pas sa melanz lo mon fizi lasas, mon ti dir aotvwa sa kalite zannimo ki mon ti anvi touye. Bann pratik koumsa i komen e i ti paret pe byen marse. Me, i annan serten laspe dan bann pratik demonyak ki ti fer per.”

“Ler de parmi mon bann garson ti mor dan en fason byen drol, mon ti prezimen ki en dimoun ti pe fer grigri avek mwan. Pour konnen si sa i vre, mon ti al vwar en vye msye ki byen renonmen pour fer grigri. I ti konfirm sa ki mon ti pe mazinen. Pli pir ankor, i ti eksplike ki mon de garson ti aprezan pe esper sa dimoun ki’n touy zot dan lemonn spirityel pour vin son serviter ler i mor. Sa vye msye ti osi azoute ki mon trwazyenm garson ti pou mor. Detrwa zour plitar, mon trwazyenm garson osi ti mor.”

Apre sa lensidan, Agboola ti zwenn John, en Temwen Zeova ki sorti Nizerya, en pei ki pa lwen avek Benen. John ti eksplik li kondisyon bann dimoun mor dapre Labib. Sa leksplikasyon ti anmenn en sanzman dan lavi Agboola. I osi kapab anmenn en sanzman dan ou lavi.

Ki arive avek en dimoun ler i mor?

Lekel ki kapab pli byen reponn sa kestyon? Napa okenn dimoun ki kapab reponn sa kestyon menm si i renonmen. Me Zeova, sa enn ki Kreater tou sa ki vivan “dan lesyel ek lo later, sa ki vizib ek sa ki envizib.” (Kolosyen 1:16) I ti kree bann lanz pour viv dan lesyel me bann zonm ek zannimo pour viv lo later. (Psonm 104:4, 23, 24) Partou, tou keksoz i depan lo Li pour viv. (Revelasyon 4:11) Aprezan, annou egzaminen ki Parol Bondye i ansennyen lo lanmor.

Zeova ti sa enn premye pour koz lo lanmor. I ti averti ki Adan ek Ev ti pou mor si zot dezobeir li. (Zenez 2:17) Ki sa ti vedir? Zeova ti dir: “Ou lapousyer e ou pou retourn dan lapousyer.” (Zenez 3:19) Ler en dimoun i mor son lekor i dekonpoze e i revin lapousyer. Napa okenn lavi dan li.

Vi ki Adan ek Ev ti volonterman dezobeir, alor zot ti ganny kondannen amor. Me pa Adan ek Ev ki ti mor an premye, se zot garson Abel. Son gran frer Kaen ti touy li. (Zenez 4:8) Kaen pa ti per ki son frer ki ti’n mor i revanze. Kaen ti plito enkyet konsernan sa ki bann dimoun vivan ti kapab fer li.—Zenez 4:10-16.

Plizyer syek plitar, Lerwa Erod ti trakase ler bann astrolog ti enform li ki en “lerwa [pour] pep Zwif” ti’n ne dan son rwayonm. I ti determinen pour touy sa dimoun ki ti kapab pran son plas konman lerwa, alor i ti fer plan pour touy tou bann pti garson Betleenm ki ti annan de-z-an oubyen mwens. Me en lanz ti averti Zozef pour pran Zezi ek Mari e “sov Lezip.”—Matye 2:1-16.

Ler Erod ti mor lanz ti demann Zozef pour retourn Izrael “akoz sa bann ki ti pe esey touy sa [zanfan ti’n] mor.” (Matye 2:19, 20) Sa lanz, ki ti li menm en lespri, ti konnen ki Erod ti nepli kapab fer ditor Zezi. Zozef pa ti per Lerwa Erod ki ti’n mor. Parkont, Zozef ti per sa ki garson Erod Arkelais ki ti en dimoun kriyel ti kapab fer. Alor Zozef ek son fanmir ti etablir zot Galile, an deor sa lavil ki Arkelais ti ansarz.—Matye 2:22.

Sa bann resi i ed nou pour vwar ki bann dimoun mor pa kapab fer nanryen. Alor, ki mannyer nou kapab eksplik sa ki Agboola ek lezot in eksperyanse?

“Bann demon” oubyen bann move lespri

Ler i ti adilt, Zezi ti rankontre en kantite move lanz. Zot ti rekonnet li konman “Garson Bondye.” Zezi osi ti konnen lekel zot. Zot pa ti lespri bann dimoun ki’n mor. Zezi ti plito idantifye zot konman bann “demon,” oubyen bann move lespri.—Matye 8:29-31; 10:8; Mark 5:8.

Labib i koz konsernan bann lanz ki fidel avek Bondye ek bann ki ti rebel kont li. Liv Zenez i dir ki ler Zeova ti pous Adan ek Ev an deor zarden Edenn, i ti met bann seriben oubyen bann lanz dan les sa zarden pour anpes okenn dimoun antre. (Zenez 3:24) Aparaman, i ti fer premye fwa ki bann imen ti kapab vwar bann lanz.

En pe letan plitar, en serten kantite lanz ti vin lo later e pran lekor imen. Zeova pa ti’n demann zot pour desarz okenn responsabilite lo later. Anfet, zot “ti abandonn zot prop demer” dan lesyel. (Zid 6) Zot ti annan bann motivasyon egois. Zot ti annan relasyon avek bann madanm, ki ti donn nesans bann zanfan ki ti apel Nefilim. Bann Nefilim ek zot papa ki ti bann lanz rebel ti ranpli later avek vyolans ek lezot move keksoz. (Zenez 6:1-5) Zeova ti rektifye sa sityasyon par anmenn en deliz lo later antye dan letan Noe. Sa deliz ti detrir bann move dimoun enkli sa bann Nefilim. Ki ti arive avek sa bann lanz?

Akoz Deliz, zot ti oblize retourn dan lesyel. Me Zeova ti anpes zot reganny ‘pozisyon ki zot ti annan’ avan. (Zid 6) Labib i dir: “Bondye pa’n eparnye[n] bann lanz ki’n pese, me in zet zot dan labim fernwanr kot zot in ganny ansennen pour zour zizman.”—2 Pyer 2:4.

Labim fernwanr oubyen Tartar i pa en landrwa me i en kondisyon kot bann move lanz in ganny abese, i konmsi zot in ganny met dan en prizon kot zot bann aktivite i ganny limite. Sa bann demon i nepli kapab pran lekor imen, me zot ankor annan en gran pouvwar ek lenfliyans lo panse ek lavi bann dimoun. Imen ek zannimo i kapab ganny posede par sa bann demon. (Matye 12:43-45; Lik 8:27-33) Zot osi anbet bann imen par fer krwar ki zot, zot lespri bann dimoun mor. Akoz? Pour anpes dimoun ador Zeova dan sa fason ki fer li plezir e pour konfiz zot konsernan vre kondisyon bann dimoun mor.

Ki mannyer sirmont lafreyer pour dimoun mor

Agboola ti vwar leksplikasyon ki Labib i donnen lo lanmor ek bann demon rezonnab. I ti konpran ki i ti bezwen aprann plis. Agboola ek John ti konmans lir Labib ek bann piblikasyon baze lo Labib ansanm. Aprezan, vi ki Agboola ti konnen ki son bann garson ti pe dormi dan latonm e ki zot pa ti pe esper dan lesyel pour vin serviter sa dimoun ki’n touy zot, sa ti rekonfort li.—Zan 11:11-13.

Agboola ti osi realize ki i ti bezwen aret fer okenn keksoz ki annan pour fer avek bann pratik demonyak. I ti bril tou keksoz ki i ti annan ki ti relye avek grigri. (Akt 19:19) Serten dimoun dan sa kominote ti averti li ki bann move lespri pa pou kontan. Me Agboola pa ti per. I ti swiv sa konsey dan Efezyen 6:11, 12 ki dir: “Met lo zot tou bann lekipman batay ki Bondye i donnen . . . [p]arski nou pe lit . . . kont bann pouvwar move lespri.” Bann diferan parti sa lekipman batay i enkli laverite, ladrwatir, sa bon nouvel konsernan lape, lafwa ek lepe lespri oubyen Parol Bondye. Sa lekipman i sorti kot Bondye e i vreman pwisan!

Agboola ti ganny rezete par serten son bann zanmi ek fanmir ler i ti rezet bann koutim ki relye avek grigri. Me kot Lasal Temwen Zeova i ti trouv bann nouvo zanmi ki krwar dan sa ki Labib i ansennyen.

Aprezan Agboola i konnen ki Zeova pou byento retir mesanste lo later, met en lafen total avek aktivite bann demon e finalman detrir zot. (Revelasyon 20:1, 2, 10) Bondye pou resisit isi menm lo later “tou bann mor ki dan tonbo.” (Zan 5:28, 29) Parmi bann dimoun ki pou resisite, i annan Abel, sa bann zanfan inosan ki lerwa Erod ti touye e plizyer milyon lezot dimoun. Agboola i konvenki ki son trwa garson pou osi resisite. I kapab bann dimoun ki ou kontan ki’n mor pou parmi bann ki pou resisite. Tou bann dimoun ki pou resisite pou konfirmen ki depi zot lanmor ziska zot rezireksyon, zot pa ti konsyan nanryen setadir zot pa ti okouran okenn seremoni ki’n ganny fer pour zot.

Napa okenn rezon pour ou per dimoun mor. Parkont, ou kapab esper avek enpasyans sa moman kot ou pou rezwenn bann dimoun ki ou ti kontan ki’n mor. An atandan, akoz ou pa etidye Labib pour ranforsi ou lafwa? Zwenn avek bann ki krwar dan sa ki Labib i dir. Menm si ou panse ki mel zis en ptigin dan bann pratik demonyak pa sitan serye, fodre aret net la konmela menm. Protez ou kont bann demon par met lo ou “tou bann lekipman batay ki Bondye i donnen.” (Efezyen 6:11) Bann Temwen Zeova pou kontan pour ed ou. Zot ofer bann letid Labib gratwit par servi sa liv Ki Labib i vreman dir?a

Agboola i nepli per dimoun mor e i’n aprann ki mannyer pour reziste bann demon. I dir: “Mon pa konnen lekel ki ti touy mon trwa garson. Me depi ki mon pe servi Zeova, mon’n ganny set lezot zanfan. Napa okenn lespri ki’n deza fer zot ditor.”

[Footnote]

[Portre lo paz 28]

Agboola i nepli per dimoun mor e i’n aprann ki mannyer pour reziste bann demon

[Portre lo paz 27]

Kaen pa ti per ki son frer ki ti’n mor i revanze