IMIT ZOT LAFWA | ZOZEF

“Pa zis Bondye ki kapab enterpret bann rev?”

ZOZEF pe marse dan sa koridor sonm, transpirasyon pe koule lo li apre ki i’n travay dir dan sa lasaler. Deor sa soley Lezip pe sof sa prizon parey en four. Annandler i ti konmsi i ti konn tou sa bann blok ek tou bann fele dan miray sa prizon. Sa ti son lavi aprezan. I vre bann dimoun ki la ti respekte li. Me, kantmenm, i ti zis en prizonnyen.

Tanzantan, i ti’n bezwen mazin son lavi kot i ti reste dan bann montanny Ebronn, kot i ti okip troupo son papa. I ti annan apepre 17 an ler son papa Zakob ti anvoy li al get son bann frer plizyer kilomet avek son lakour. Aprezan, i nepli kapab mazin sa laliberte ki i ti annan. Zalouzi bann frer Zozef in fer zot vir kont li avek laenn e zot in vann li konman en lesklav. I ti ganny anmennen Lezip, kot i ti premyerman travay dan lakour Potifar en zofisye Ezipsyen. Potifar ti annan konfyans dan Zozef ziska ki son madanm ti fer fo lakizasyon konmkwa Zozef ti oule vyol li e akoz sa Zozef ti ganny mete sa dan prizon.a​—Zenez sapit 37, 39.

Aprezan Zozef ti annan 28 an e i ti’n pas apepre en dizenn lannen konman lesklav e konman prizonnyen. Malerezman, son lavi pa parey sa ki i ti ekspekte. Eski en zour i ti pou ganny son laliberte? Eski i ti pou vwar ankor son papa ek son frer Benzamen ki i ti kontan en kantite? Ki kantite letan ki i ti i pou pri dan sa trou?

Eski ou’n deza santi parey Zozef? Parfwa sa lavi ki ou pe viv i pa sa enn ki ou ti ekspekte ler ou ti ankor zenn. Byensir sa bann sityasyon penib i kapab pa arete e i kapab difisil pour trouv en solisyon oubyen andire. Annou vwar ki nou kapab aprann atraver lafwa Zozef.

“ZEOVA TI KONTINYEN AVEK ZOZEF”

Zozef ti konnen ki Zeova pa’n oubliy li e sa ti sirman ed li pour andire. Menm dan sa prizon Lezip, Zeova in trouv bann fason pour beni Zozef. Alor, nou lir: “Zeova ti kontinyen avek Zozef e i ti kontinyen demontre lanmour fidel anver li e fer li ganny faver dan lizye sa zofisye prizon.” (Zenez 39:21-23) Lefet ki Zozef ti toultan travay dir, sa ti en rezon pour Bondye kontinyen beni li. Pa i ti vreman rekonfortan pour Zozef konnen ki Zeova ti touzour avek li!

Eski Zeova ti annan lentansyon pour kit Zozef dan prizon son lavi antye? Zozef ti zis kapab mazin larepons sa kestyon e byensir i ti met sa sityasyon dan lanmen son Bondye atraver lapriyer. Parey i arive souvandfwa, sa kestyon ti ganny reponn dan en fason ki personn pa ti pou zanmen mazinen. En zour, ti annan en gran leksitasyon dan prizon ler de nouvo prizonnyen ti arive, sa ti bann zofisye bann serviter personnel Faraon. Enn ti sef boulanze lerwa e lot ti sef bann ki ti servi lerwa diven.​—Zenez 40:1-3.

Zofisye prizon ti donn Zozef sa responsabilite pour okip sa de zonm, ki avan ti enportan.b En zour swar zot tou le de ti rev sakenn en rev realistik me difisil pour konpran. Ler Zozef ti vwar zot lannmen bomaten, i ti remarke ki ti annan en keksoz ki ti pe fatig zot. Alor i ti demande: “Akoz zot figir i tris ozordi?” (Zenez 40:3-7) Petet son labonte ti asir sa de zonm ki zot ti kapab rakont li zot bann traka. Zozef pa ti konnen ki sa konversasyon ti pou sanz son lavi antye. Eski sa konversasyon ti pou’n leve si Zozef pa ti enterese avek byennet sa de zonm? Son latitid i ankouraz nou pour demann nou lekor, ‘Eski mon demontre mon lafwa dan Bondye par montre en lentere senser dan lezot?’

Sa de zonm ti eksplike ki sa bann rev ki ti paret realistik, ti fatig zot latet e ti napa personn ki ti kapab enterpret sa bann rev. Bann Ezipsyen ti konsider bann rev konman en keksoz vreman enportan e zot ti depan bokou lo bann zonm ki swadizan dir ki zot kapab enterpret bann rev. Sa de zonm pa ti konnen ki zot rev ti sorti kot Bondye Zozef, Zeova. Me li Zozef ti konnen. I ti reasir zot: “Pa zis Bondye ki kapab enterpret bann rev? Rakont mwan [sa rev], silvouple.” (Zenez 40:8) Sa ki Zozef ti’n dir i ankor annan lenportans pour tou bann etidyan Labib ki senser ozordi. Pa ti a byen si zis tou dimoun ki krwar dan Bondye i pare pour demontre sa menm limilite! Nou bezwen pare pour met dekote latitid orgeye e depan lo Bondye anmezir ki nou rod sa vre enterpretasyon son Parol.​—1 Tesalonisyen 2:13; Zak 4:6.

Sa sef bann serviter ki ti servi diven ti koz premye. I ti dir Zozef ki son rev ti lo en plan rezen avek trwa tiz ki ti annan bann grap rezen lo la. Sa bann rezen ti’n mir e sa sef bann serviter ki ti servi diven ti pers son zi dan lakoup Faraon. Gras a led Zeova, deswit Zozef ti konn sinifikasyon sa rev. I ti dir sa sef serviter ki ti servi diven ki sa trwa tiz ti vedir trwa zour e pandan sa letan Faraon pou redonn li son plas konman son serviter. Anmezir ki figir sa serviter ti soulaze, Zozef ti fer sa demann: “Silvouple demontre lanmour fidel anver mwan e koz lo mwan avek Faraon.” Zozef ti eksplike ki i ti’n ganny kidnap dan son lakour e ganny kondannen inosaman.​—Zenez 40:9-15.

Sa bon nouvel ki sa sef bann serviter ki ti servi diven ti gannyen ti telman ankouraz sa sef boulanze, ki ti fer li demann Zozef pour eksplik li sinifikasyon son rev, kot i ti vwar trwa pannyen dipen ki ti lo son latet e bann zwazo ti pe manz dipen dan enn sa bann pannyen. Ankor enn fwa larepons sa rev ti ganny donnen avek Zozef. Me sa pa ti en bon nouvel pour sa sef boulanze. Zozef ti dir: “La son lenterpretasyon: Sa trwa pannyen i vedir trwa zour. Dan trwa zour Faraon pou fer koup ou latet, met ou anpandan lo en poto e bann zwazo pou vin manz ou laser.” (Zenez 40:16-19) Parey tou bann serviter fidel Bondye, Zozef ti anons bon nouvel ek mesaz lo zizman ki Bondye pour fer byento avek lardyes.​—Izai 61:2.

Trwa zour pli tar, sa bann keksoz ti ariv parey Zozef ti’n dir. Faraon ti fer en parti lanniverser, en pratik ki pep Bondye pa ti fer pandan sa letan, e pas zizman lo son de serviter. Sa sef boulanze ti ganny egzekite, zis parey Zozef ti’n predir, tandis ki sa sef serviter ki ti servi diven ti reganny son plas. Malerezman, sa zonm ki pa ti rekonesan ti oubliy net konsernan Zozef.​—Zenez 40:20-23.

“PA MWAN!”

De z-an ti’n pase. (Zenez 41:1) Zis mazinen ki mannyer Zozef ti’n bezwen fristre! Petet i ti’n ganny plis lespwar ler Zeova ti donn li konprenezon pour enterpret sa bann rev difisil sa sef serviter ki ti servi diven ek sa sef boulanze. Apre sa, anmezir ki sak zour ti pase, Zozef ti’n kapab leve avek lespwar ki ozordi ti pou sa zour ki i ti pou ganny large, me zis pour vwar ankor sa routin prizon ti kontinyen san okenn sanzman. Sa de z-an ti’n kapab sa letan pli difisil pour Zozef andire. Kantmenm sa, i pa ti zanmen perdi son konfyans ki i ti annan dan Zeova. Dan plas tonm dan en depresyon, i ti determinen pour andire. Finalman apre tou sa ki ti arive i ti vin pli for.​—Zak 1:4.

Dan sa bann letan difisil, lekel ki pa ti pou bezwen devlop son landirans? Pour arive sirmont bann leprev ki nou fer fas avek dan lavi, nou bezwen annan determinasyon, pasyans ek lape lespri ki zis Bondye ki kapab donn nou. Parey i ti fer avek Zozef, i kapab ed nou pour gard nou lespwar e pa tonm dan depresyon.​—Romen 12:12; 15:13.

Sa sef serviter ki servi diven ti’n kapab oubliy Zozef, me Zeova pa ti zanmen oubliy li. En zour swar i ti fer Faraon rev de rev inoubliyab. Dan sa premye rev, sa lerwa ti vwar set bef gra ek set bef meg dan Larivyer Nil. Sa bann ki ti meg ti manz sa bann ki ti gra. Pli tar, Faraon ti rev set zepi sereal plen e mir lo menm tiz. Me apre sa i ti vwar set zepi sereal ki ti’n fay e sek. Sa set zepi sereal sek ti manz sa set bon zepi sereal. Landmen bomaten, Faraon ti leve byen azite akoz son bann rev, alor i ti apel tou son bann zonm malen ek bann pret ki ti pratik mazik pour enterpret sa bann rev. Me zot pa ti kapab. (Zenez 41:1-8) Nou pa konnen si sa i vedir ki zot ti etonnen oubyen zot ti envant plizyer nide konfizan. An tou le ka, zot ti dezapwent Faraon e sa ti fer li pli anvi konnen ki son rev ti vedir.

Finalman, sa sef serviter ki ti servi diven ti rapel Zozef! Son konsyans ti fatig li, alor i ti rakont Faraon konsernan sa garson remarkab dan prizon, ki ti enterpret son rev ek rev sa sef boulanze de z-an pase. Toudswit, Faraon ti fer apel Zozef dan prizon.​—Zenez 41:9-13.

Zis mazinen ki mannyer Zozef ti santi ler i ti vwar bann mesaze Faraon vin sers li. I ti deswit sanz son lenz e raz li, probableman raz tou son seve lo son latet, parey ti leka dapre kiltir Ezipsyen. San dout i ti priy Zeova en kantite pour ganny son benediksyon dan sa konversasyon ki i ti pe al fer avek Faraon! Deswit apre sa i ti trouv li dan sa gran lakour dan pale rwayal pe debout devan sa dirizan. Nou lir: “Apre sa Faraon ti dir Zozef: ‘Mon’n rev en rev, me napa personn ki kapab enterpret li. Aprezan mon’n tande ki ou kapab ekout en rev e enterpret li.’” Ankor enn fwa, larepons Zozef ti montre son limilite ek lafwa ki i ti annan dan son Bondye: “Bondye i sa enn ki pou donn en lenterpretasyon ki bon avek Faraon, pa mwan!”​—Zenez 41:14-16.

Zeova i kontan bann dimoun ki annan limilite ek fidelite alor san dout I ti donn Zozef larepons sa rev ki bann zonm malen ek bann pret pa ti reisi konnen. Zozef ti eksplik Faraon ki sa de rev ti annan menm sinifikasyon. Par repet sa mesaz, Zeova ti montre ki sa sityasyon “in fini ganny deside” savedir ki sirman i pou ganny akonplir. Sa bann bef gra ek sa bann bon zepi sereal i vedir ki pour set-an manze pou annabondans Lezip, tandis ki sa bann bef meg ek sa bann zepi sereal sek i vedir ki pour sa set-an ki pou swiv apre pou annan lafanmin. Sa lafanmin pou anvair tou landrwa.​—Zenez 41:25-32.

Faraon ti konnen ki Zozef ti konn larepons sa bann rev. Me kwa ki ti kapab ganny fer? Zozef ti sizer en plandaksyon. Faraon ti bezwen rod en zonm “pridan e saz” pour ansarz anmas manze ki ti an plis e met dan bann stor pandan sa set bon lannen, apre sa pour distribye sa ki’n ganny anmase avek bann ki ti dan bezwen pandan lafanmin. (Zenez 41:33-36) Leksperyans e abilite ki Zozef ti annan ti fer li pli kalifye pour sa travay, me i pa ti vant son lekor. Son limilite ek son lafwa ki i ti annan pa ti permet li annan bann panse koumsa. Si nou vreman annan lafwa dan Zeova, nou pa bezwen annan lanbisyon oubyen vant nou lekor. Nou kapab annan lape lespri ler nou met nou bann problenm dan Son lanmen for!

“ESKI I ANNAN EN ZONM PAREY SA ENN?”

Faraon ek son bann serviter ti vwar sa lasazes dan plan Zozef. Sa lerwa ti osi dakor ki Bondye Zozef ki ti sa vre lafors par deryer bann parol saz Zozef. I ti dir avek son serviter ki ti la dan lakour rwayal: “Eski i annan en lot zonm parey sa enn, ki annan lespri Bondye dan li?” I ti dir avek Zozef: “Vi ki Bondye ti fer ou konn tousala, napa okenn dimoun ki pridan e saz parey ou. Ou ki pou ansarz mon lakaz e tou mon pep pou obei ou dan tou sa ki ou dir. Zis mwan konman lerwa ki pou pli gran ki ou.”​—Zenez 41:38-41.

Faraon ti gard son promes. Deswit apre Zozef ti ganny lenz ki’n ganny fer avek bann bon linenn. Faraon ti donn li en sennon lor, enn son bag (signet ring), en saret rwayal e permisyon pour al partou pour met son plan an aksyon. (Zenez 41:42-44) Dan lespas zis en zour, Zozef ti sorti dan prizon pour al reste dan pale. I ti leve konman en dernyen prizonnyen e tonm dormi konman dezyenm dirizan apre Faraon. Pa i kler alor ki lafwa Zozef dan Zeova ti’n ganny zistifye! Zeova ti’n vwar tou sa bann lenzistis ki son serviter ti fer fas avek pandan sa bann lannen. I ti azir zis dan sa bon moman e dan sa bon fason. Zeova pa ti zis anvi koriz bann lemal ki ti’n ariv Zozef me I ti osi anvi protez lavenir nasyon Izrael. Nou pou vwar ki mannyer sa ti leka dan en lot lartik dan sa seri.

Si ou rankontre en sityasyon difisil ki kapab dire pour bokou letan, petet en lenzistis ki kapab dire pour plizyer lannen san arete, pa bezwen dezespere. Mazin Zozef. Akoz i pa ti zanmen perdi son labonte, son limilite, son landirans ek son lafwa, i ti donn Zeova tou rezon pour rekonpans li a lafen.

[Not anba lo paz]

[Portre lo paz 13]

Zozef ti tret lezot prizonnyen avek labonte ek dinyite

[Portre lo paz 15]

Avek limilite Zozef ti dir Faraon: “Pa mwan!”