Souvrennte Zeova Ek Rwayonm Bondye

“I pour ou, O Zeova, grander ek pwisans ek labote ek siperyorite ek dinite . . . Rwayonm i pour ou, O Zeova.”—1 KRONIK 29:11.

 1. Akoz Zeova i sa enn ki annan tou drwa konman Souvren liniver?

“ZEOVA li menm in etablir son tronn dan lesyel; e son rwayote i domin lo tou keksoz.” (Psonm 103:19) Avek sa bann parol, sa psalmis ti diriz latansyon lo laverite prensipal konsernan dominasyon Bondye. Konman Kreater, Zeova i sa enn ki annan tou drwa konman Souvren liniver.

 2. Ki mannyer Danyel ti dekrir kot Zeova ti ete dan lesyel?

² Byensir, pour en dirizan egzers son souvrennte fodre ki i annan bann sitwayen. Pour konmanse, Zeova ti egzers son lotorite lo bann kreatir spirityel ki i ti kree. Premyerman, lo son sel Garson ki i ti kree li tousel e apre lo tou lezot lanz. (Kolosyen 1:15-17) Bokou letan plitar profet Danyel ti ganny en vizyon dan lesyel kot Zeova pe dirize. I ti dir: “Mon ti kontinyen gete ziska ki bann tronn ti ganny mete e ki Ansyen bann Zour ti asize. . . . Ti annan mil fwa mil ki ti kontinyen servi li, e dis mil fwa dis mil ki ti kontinyen debout drwat devan li.” (Danyel 7:9, 10) Pour bokou bokou letan, Zeova “Ansyen bann Zour” ti diriz sa gran fanmir bann garson spirityel ki byen annord konman zot Souvren. Sa bann kreatir spirityel ti travay konman bann “minis” an fezan son lavolonte.—Psonm 103:20, 21.

 3. Ki mannyer Zeova ti agrandi son dominasyon lo liniver?

³ Avek letan, Zeova ti agrandi son dominasyon par anmenn an egzistans sa gran liniver enkli later. (Zob 38:4, 7) Pour en dimoun ki pe obzerve isi lo later, i pou vwar ki bann eleman dan lesyel i bouz dan en fason ki byen organize e avek en lord sitan presi ki ou ava krwar ki zot pa bezwen personn pour gid oubyen diriz zot. Pourtan sa psalmis ti dir: ‘[Zeova] li menm ti donn lord e zot ti ganny kree. E i gard zot dan zot plas pour touzour e pour en letan endefini. I’n etablir en lareg ki pa pou disparet.’ (Psonm 148:5, 6) Zeova in toultan egzers son souvrennte par diriz, etablir bann lalwa e osi par gouvern lo son bann kreatir spirityel ek liniver.—Neemya 9:6.

 4. Ki mannyer Zeova i egzers son souvrennte lo bann imen?

⁴ Kan i ti kree premye koup imen, Bondye ti egzers son souvrennte dan en lot fason. Apard ki donn bann imen tou sa ki zot ti bezwen pour viv en lavi satisfezan e ki annan en bi, Zeova ti donn zot lotorite lo tou lezot kreatir vivan lo later. (Zenez 1:26-28; 2:8, 9) Alors i kler ki dominasyon Bondye pa zis bon e anmenn benefis pour lezot, me i osi donn son bann sitwayen loner ek dinite. Osi lontan ki Adan ek Ev ti soumet avek souvrennte Zeova, zot ti annan sa posibilite pour viv pour touzour dan paradi lo later.—Zenez 2:15-17.

 5. Ki nou kapab dir lo lafason ki Zeova i egzers son souvrennte?

⁵ Ki nou kapab konklir lo tousala? Premyerman, Zeova in touzour egzers son souvrennte lo tou son bann kreasyon. Dezyenmman, dominasyon Bondye i zis e bon e i anmenn dinite lo son bann sitwayen. E finalman, si nou obeir e siport dominasyon Bondye nou pou ganny bann benediksyon eternel. I pa drol alors ki Lerwa David dan ansyen Izrael ti ganny pouse pour dir: “I pour ou, O Zeova, grander ek pwisans ek labote ek siperyorite ek dinite; akoz tou keksoz dan lesyel e lo later i pour ou. Rwayonm i pour ou, O Zeova, sa Enn ki osi elev son lekor konman sef lo tou.”—1 Kronik 29:11.

Akoz nou bezwen Rwayonm Bondye?

 6. Ki relasyon i annan ant souvrennte Bondye ek son Rwayonm?

⁶ Zeova konman Souvren Iniversel, in touzour egzers son pouvwar ek son pwisans, alors akoz i annan en bezwen pour son Rwayonm? An zeneral en souvren i egzers son lotorite atraver en lorganizasyon ki i apwente pour ansarz son bann sitwayen. Alors, Rwayonm Bondye i en mwayen ki Zeova i servi pour egzers son Souvrennte Iniversel lo tou son bann kreatir.

 7. Akoz Zeova ti entrodwir en nouvo fason pour demontre son souvrennte?

⁷ Zeova in demontre son souvrennte dan diferan fason pandan diferan lepok. I ti met an plas en nouvo mwayen ki i ti pou servi pour demontre son souvrennte an rapor avek en nouvo devlopman. Sa ti arive kan sa lanz rebel Satan ti reisi enfliyans Adan ek Ev pour zot osi rebel kont dominasyon Zeova. Sa rebelyon ti en latak kont souvrennte Zeova. Dan ki sans? Par dir Ev ki i ‘pa pou mor’ si i manz sa fri ki Bondye ti’n defann zot manze, Satan ti pe dir ki Zeova ti pe koz manti e ki zot pa ti devret met zot konfyans dan li. Deplis Satan ti dir Ev: “Bondye i konnen, ki sa zour menm ki zot pou manz li, zot lizye pou sirman ouver e sirman zot pou vin parey Bondye, zot pou konn sa ki bon ek sa ki move.” Satan ti pe sizere ki Adan ek Ev ti pou viv pli byen si zot ti dezobeir komannman Bondye e vin endepandan. (Zenez 3:1-6) Sa ti en latak direk anver drwa Zeova pour dirize. Alors, ki Zeova ti pou fer?

8, 9. (a) Ki mannyer en dirizan imen ti pou tret sitiasyon si ti annan rebelyon dan son pei? (b) Ki mannyer Zeova ti reazir an rapor avek sa rebelyon dan zarden Edenn?

⁸ Ki nou ekspekte en dirizan fer si i annan rebelyon dan son pei? Pour bann ki familye avek listwar zot kapab rapel serten sa bann sitiasyon. Olye inyor sa rebelyon, normalman en nenport sef ki swa i bon oubyen move pou pronons zizman lo sa bann rebel e deklar zot koupab pour traizon. E apre sa, sa dirizan i kapab met o pouvwar en responsab ki pou met sa bann rebel anba kontrol e reetablir lape dan son pei. Pareyman, Zeova ti montre ki i ti annan kontrol total lo sa sitiasyon kan i ti pran aksyon imedyatman e pronons zizman lo sa bann rebel. I ti dir ki Adan ek Ev pa ti merit lavi eternel, e I ti retir zot dan zarden Edenn.—Zenez 3:16-19, 22-24.

⁹ Ler i ti pe pas son zizman lo Satan, Zeova ti revel en nouvo keksoz lo son souvrennte, en mwayen par ki i ti pou reetablir lape ek lord parmi son bann sitwayen. Bondye ti dir Satan: “Mon pou met en laenn ant ou ek sa madanm, ant ou desandans ek son desandans. I pou kraz ou latet e ou pou kraz son talon.” (Zenez 3:15) Par sa Zeova ti revele ki i ti dan son plan pour donn pouvwar en “desandans” ki ti pou kraz Satan ek son bann demon e prouv son drwa pour dirize.—Psonm 2:7-9; 110:1, 2.

10. (a) Lekel sa “desandans”? (b) Ki Pol ti dir konsernan lakonplisman sa premye profesi?

¹⁰ Zezi Kri ti sa “desandans” e avek li konman asosye pou annan en group ki’n ganny swazir ki pou vin bann dirizan. Ansanm zot form sa Rwayonm Bondye kot Kris pe dirize konman lerwa. (Danyel 7:13, 14, 27; Matye 19:28; Lik 12:32; 22:28-30) Toudmenm, tousala pa ti ganny revele deswit. Anfet sa premye profesi ti “reste sekre pandan lontan.” (Romen 16:25) Pour plizyer syek, bann zonm ki ti annan lafwa ti pe esper sa letan kan sa sen “sekre” ti pou ganny revele e kot premye profesi ti pou ganny akonplir e souvrennte Zeova ti pou ganny zistifye.—Romen 8:19-21.

Ptitapti sa sen “sekre” ti ganny revele

11. Ki Zeova ti fer Abraam konnen?

¹¹ Pandan ki letan ti pase, Zeova ti ptitapti fer konn bann laspe sa sen “sekre Rwayonm Bondye.” (Mark 4:11) Parmi bann ki Zeova ti revel sa lenformasyon avek ti Abraam ki ti ganny apele “zanmi Bondye.” (Zak 2:23) Zeova ti promet Abraam ki I ti pou fer li vin papa en “gran nasyon.” Plitar, Bondye ti dir Abraam: “Bann lerwa pou sorti kot ou” e “atraver ou desandans tou nasyon lo later pou sirman ganny beni.”—Zenez 12:2, 3; 17:6; 22:17, 18.

12. Ki mannyer desandans Satan ti evidan apre Deliz?

¹² Depi lepok Abraam bokou ti’n deza esey diriz e domin lezot. Par egzanp Labib i dir sa konsernan aryer pti zanfan Noe ki ti apel Nimrod: “I ti sa premye zonm pwisan lo later. I ti montre ki i ti en saser pwisan ki ti opoz Zeova.” (Zenez 10:8, 9) I kler ki Nimrod ek bann lezot ki ti apwent zot lekor konman dirizan ti zis bann maryonnet dan lanmen Satan. Zot ek zot bann siporter ti form parti desandans Satan.—1 Zan 5:19.

13. Ki Zeova ti profetize konsernan Zakob?

¹³ Menm si Satan in fer en kantite zefor pour met an plas bann dirizan imen, Zeova i touzour annavan avek son plan. Atraver pti zanfan Abraam ki ti apel Zakob, Zeova ti revele ki: “Baton lerwa pa pou ekarte avek Zida, ni baton komandan ant son lipye, ziska ki Silo i vini; e tou bann pep pou obeir li.” (Zenez 49:10) Sa mo “Silo” i vedir “Sa Enn ki annan sa [baton lerwa].” Alors sa bann parol profetik ti endike ki ti pou annan enn ki annan drwa legal ki ti pou vini pour li resevwar sa “baton lerwa” oubyen souvrennte, ek “baton komandan” oubyen pouvwar pour domin lo “bann pep” oubyen limanite an antye. Lekel li sa Enn?

“Ziska ki Silo i vini”

14. Ki lalyans Zeova ti fer avek David?

¹⁴ Premye dimoun parmi desandans Zida ki Zeova ti swazir pour vin lerwa lo son pep ti en gardyen mouton ki ti apel David, garson Zese.a (1 Samyel 16:1-13) David ti trouv faver dan lizye Zeova akoz son lwayote pour souvrennte Zeova, menm si i ti fer fot ek pese. Zeova ti donn en pe plis leklersisman lo sa profesi dan zarden Edenn kan i ti fer en lalyans avek David an dizan: “Mon pou sirman etablir ou desandans apre ou, ki pou ne atraver ou; e mon pou sirman etablir son rwayonm solidman.” Sa ti pou enplik plis ki Salomon garson ek sikseser David akoz sa lalyans ti dir: “E mon pou sirman etablir tronn son rwayonm solidman pour en letan endefini.” Sa lalyans ki ti ganny fer avek David ti montre klerman ki promes konsernan “desandans” sa Rwayonm pou sorti dan laliny desandans David avek letan.—2 Samyel 7:12, 13.

15. Akoz rwayonm Zida ti ganny konsidere konman en avangou Rwayonm Bondye?

¹⁵ Premye dimoun ki son desandans apre li ti vin bann lerwa ti David, e zot ti ganny apwente kan delwil sen ti ganny vide lo zot latet par gran pret. Sa bann lerwa ti alor ganny apele bann ki’n ganny swazir ouswa bann mesi. (1 Samyel 16:13; 2 Samyel 2:4; 5:3; 1 Lerwa 1:39) Zot ti ganny demande pour asiz lo tronn Zeova e diriz konman lerwa pour Zeova an Zerizalenm. (2 Kronik 9:8) Dan sa sans, rwayonm Zida ti reprezant Rwayonm Bondye, en mwayen par ki souvrennte Zeova ti ganny demontre.

16. Ki ti rezilta renny bann lerwa Zida?

¹⁶ Kan sa lerwa ek son pep ti soumet anver souvrennte Zeova, zot ti ganny son proteksyon ek benediksyon. Renny Salomon an partikilye ti en letan kot ti annan lape ek prosperite ki ti napa son parey. I ti donn en avangou konsernan sa promes profetik anba dominasyon Rwayonm Bondye kan lenfliyans Satan pou’n konpletman ganny retire e souvrennte Zeova pou ganny zistifye. (1 Lerwa 4:20, 25) Malerezman, laplipar bann lerwa dan laliny desandans David pa ti arive soumet avek bann standar Zeova e bann dimoun ti tonm dan idolatri ek imoralite. Finalman, Zeova ti les sa rwayonm ganny detrir par bann Babilonnyen an 607 A.N.L. I paret ki Satan ti’n reisi dan son lesey pour sali souvrennte Zeova.

17. Kwa ki montre ki Zeova ti ankor annan kontrol menm si rwayonm David ti ganny detrir?

¹⁷ Destriksyon rwayonm nor Izrael e plitar destriksyon rwayonm David i fourni laprev ki ti napa okenn defayans dan lafason ki Zeova i demontre son souvrennte, me plito i montre move konsekans ki lenfliyans Satan ek lendepandans zonm i anmennen. (Proverb 16:25; Zeremi 10:23) Pour montre ki i pou kontinyen demontre son souvrennte, Zeova ti dir atraver profet Ezekyel: “Tir sa tirban ek sa kouronn. . . . Mon pou fer li vin debri, debri, debri. Sa osi pa pou vin pour personn ziska sa enn ki annan drwa legal i vini, e mon a donn avek li.” (Ezekyel 21:26, 27) Sa bann parol i endike ki sa “desandans” ki ti’n ganny promet, sa Enn “ki annan sa [baton lerwa],” pa ti ankor vini.

18. Ki deklarasyon lanz Gabriyel ti fer avek Mari?

¹⁸ Annou avans pli devan ver lannen 2 A.N.L. Lanz Gabriyel ti ganny anvoye kot en fiy vyerz ki ti apel Mari e ki ti reste Nazaret en lavil Galile dan nor Palestin. I ti dir li: “Ou pou ansent, ou pou ganny en garson, e ou ava apel li Zezi. I pou gran e i pou apel Garson Bondye Tre-o. Bondye pou donn li tronn son papa, David. I pou renny lo tou desandans Zakob pour touzour, e son renny pa pou zanmen fini.”—Lik 1:31-33.

19. Letan ti pe aprose pour ki levennman eksitan?

¹⁹ A lafen de fen sa letan pour devwal sa sen “sekre” ti’n aprose. Sa Enn prensipal dan sa “desandans” ti pou byento aparet. (Galat 4:4; 1 Timote 3:16) Satan ti pou kraz li lo son talon. Me sa “desandans” an retour pou kraz latet Satan. Satan ek son bann asosye pou nepli an aksyon. I ti pou osi rann temwannyaz ki par mwayen Rwayonm Bondye, tou domaz ki’n ganny fer par Satan pou ganny repare e souvrennte Zeova pou ganny zistifye. (Ebre 2:14; 1 Zan 3:8) Ki mannyer Zezi pou akonplir sa? Ki legzanp i’n kite pour nou imite? Nou pou vwar son larepons dan sa lot lartik.

[Not anba lo paz]

Eski ou kapab eksplike?

• Kwa ki fer Zeova sa enn ki annan sa drwa konman Souvren liniver?

• Akoz Zeova ti entrodwir sa Rwayonm?

• Avek letan, ki mannyer Zeova ti fer konnen sa sen “sekre”?

• Kwa ki montre ki Zeova ti ankor annan kontrol menm si rwayonm David ti’n ganny detrir?

[Portre lo paz 5]

Ki Zeova ti fer konnen atraver Abraam?

[Portre lo paz 7]

Akoz destriksyon rwayonm David pa ti en laprev ki souvrennte Zeova pa ti reisi?