“Zot devret sen”

 1. Ki konsey zapot Pyer ti donn bann Kretyen e akoz i kapab paret enposib pour aplik sa konsey?

KI SWA nou annan lespwar pour viv pour touzour dan lesyel oubyen lo later, nou kapab ganny bann byenfe ler nou ekout sa konsey ki zapot Pyer ti donn bann Kretyen swazir dan premye syek. Pyer ti dir: “Parey sa Enn ki sen ki’n swazir zot, vin sen dan tou zot kondwit, parski i’n ganny ekrir: ‘Zot devret sen, parski mwan mon sen.’” (1 Pyer 1:15, 16) Atraver sa bann parol, nou aprann ki nou kapab swiv legzanp Zeova ki sen dan tou keksoz e ki sa pli bon legzanp pour nou. Nou kapab e nou devret vin sen dan tou sa ki nou fer. Sa i kapab paret enposib vi ki nou enparfe. Pyer ti fer plizyer fot me son legzanp i montre ki nou kapab “vin sen.”

 2. Ki bann kestyon nou pou reponn dan sa lartik?

² Dan sa lartik, nou pou diskit lo sa bann kestyon swivan: Ki savedir vin sen? Ki Labib i ansenny nou konsernan lafason ki Zeova i sen? Ki mannyer nou kapab vin sen dan nou kondwit? Ki nou lanmitye avek Zeova i annan pour fer avek vin sen?

 3. Ki bokou dimoun i krwar konsernan en dimoun ki sen e kote ki nou kapab konnen ki savedir vin sen?

³ En kantite dimoun i krwar ki en dimoun ki sen i pa zanmen sourir, i toultan serye e i met bann lenz spesyal. Me en dimoun ki sen, pa koumsa. Zeova i sen e i ganny dekrir konman “sa Bondye ere.” (1 Tim. 1:11) Labib i dir ki son bann serviter i “ere.” (Ps. 144:15, NWT) Zezi pa ti dakor avek bann ki met bann lenz spesyal e ki fer bann bon keksoz zis pour lezot vwar zot. (Mat. 6:1; Mark 12:38) Bann vre Kretyen i konnen ki savedir vin sen atraver sa ki zot in aprann dan Labib. Nou konnen ki Bondye i kontan nou e ki i pa pou zanmen dir nou fer en keksoz ki nou pa kapab fer. Alor, ler Zeova i dir nou: “Zot devret sen,” nou asire ki nou kapab fer li. Byensir, avan ki nou kapab vin sen dan nou kondwit, nou bezwen konpran ki savedir vin sen.

 4. Ki sa mo “sen” i vedir?

⁴ Ki savedir vin sen? Dan Labib, sa mo “sen” i vedir en keksoz ki prop moralman e en ladorasyon pir. Sa mo i kapab osi vedir ganny met apar pour servis Zeova. Andotmo, nou sen si nou prop moralman, si nou ador Zeova dan sa fason ki i oule e si nou annan en lanmitye pros avek li. Nou enpresyonnen ki menm si nou enparfe e Zeova i konpletman sen, i anvi vin nou zanmi pros.

 5. Ki nou kapab aprann lo Zeova atraver bann lanz fidel?

⁵ Zeova i konpletman sen. Sanmenm ki bann serafen, setadir bann lanz ki pros avek tronn Zeova ti dir. Serten parmi zot ti dir: “Zeova Sef larme i sen, sen, sen.” (Iza. 6:3, NWT) Vi ki Zeova i sen, sa bann lanz ti kapab annan en lanmitye pros avek li parski zot osi zot sen. I pour sa rezon ki bann landrwa lo later kot bann lanz ti anmenn mesaz Bondye ti kapab vin sen. Sanmenm ki ti arive avek sa landrwa kot Moiz ti vwar sa brousay ki pe pran dife.​—Egz. 3:2-5; Zoz. 5:15.

6-7. (a) Dapre Egzod 15:1, 11, ki mannyer Moiz ti fer pep Izrael konpran ki Zeova i sen? (b) Kwa ki ti fer bann Izraelit rapel ki Bondye i sen? (Vwar portre lo kouvertir.)

⁶ Apre ki Moiz ti’n ed bann Izraelit pour travers Lanmer Rouz, i ti fer zot konpran ki Zeova zot Bondye i sen. (Lir Egzod 15:1, 11, NWT.) Bann Ezipsyen ki ti ador bann fo bondye pa ti sen. Bann Kananeen ki ti ador bann fo bondye, zot osi zot pa ti sen. Zot ladorasyon ti enkli sakrifis zanfan ek bann pratik seksyel degoutan. (Lev. 18:3, 4, 21-24; Det. 18:9, 10) Me Zeova i diferan avek sa bann fo bondye. I pa pou zanmen demann son bann serviter pour fer okenn move keksoz. Zeova i konpletman sen. Pour fer bann Izraelit rapel sa, i ti annan en plak lor lo tirban granpret. Lo sa plak lor, i ti ganny grave: “Zeova i sen.”​—Egz. 28:36-38, NWT.

⁷ Sa mesaz ki lo sa plak ti pou fer tou dimoun ki vwar li konpran ki Zeova i vreman sen. Me si en Izraelit pa ti kapab vwar sa plak parski i pa ti kapab al o bor granpret, eski i ti pou konnen ki Zeova i sen? Wi. Tou Izraelit, ki ti enkli bann zonm, madanm ek zanfan, ti tann sa mesaz ler Lalwa ti ganny lir devan sa pep. (Det. 31:9-12) Si ou ti parmi sa pep, ou ti pou’n tann sa bann parol swivan: “Mwan mon Zeova zot Bondye e zot devret . . . sen, parski mwan mon sen.” “Zot devret sen pour mwan, akoz mwan Zeova, mon sen.”​—Lev. 11:44, 45, NWT; 20:7, 26, NWT.

 8. Ki nou aprann dan Levitik 19:2 ek 1 Pyer 1:14-16?

⁸ Aprezan nou pou vwar en keksoz ki Zeova ti dir i devret ganny lir avek pep Izrael. Dan Levitik 19:2 (NWT), Zeova ti dir Moiz: “Koz avek pep Izrael e dir zot, ‘Zot devret sen parski mwan Zeova zot Bondye mon sen.’” I kapab ki Pyer ti pe refer avek sa verse ler i ti ankouraz bann Kretyen pour “vin sen.” (Lir 1 Pyer 1:14-16.) Byensir, ozordi nou pa anba Lalwa Moiz me sa ki Pyer ti ekri i annakor avek sa ki nou aprann dan Levitik 19:2 ki Zeova i sen e bann ki kontan li, i devret fer zefor pour vin sen. Ki swa nou annan lespwar pour viv pour touzour dan lesyel oubyen lo later, nou tou nou bezwen fer zefor pour vin sen.​—1 Pyer 1:4; 2 Pyer 3:13.

 9. Ki nou aprann dan Levitik sapit 19?

⁹ Vi ki nou anvi fer plezir nou Bondye ki sen, alor nou anvi aprann ki mannyer pour vin sen. Zeova i donn nou konsey lo ki mannyer pour fer sa dan Levitik sapit 19. En spesyalis Labib ki apel Marcus Kalisch i dir: “Sa i sapit pli enportan dan Levitik e parmi sa senk premye liv dan Labib.” Rapel ki Levitik sapit 19 i konmans avek sa parol: “Zot devret sen.” Aprezan, nou pou diskit lo serten verse dan sa sapit ki montre nou ki mannyer nou kapab vin sen.

10-11. Ki Levitik 19:3 i dir nou bezwen fer e akoz sa i enportan?

¹⁰ Apre ki Zeova ti’n dir bann Izraelit ki zot devret sen, i ti dir: “Zot tou zot devret annan respe pour zot manman ek zot papa . . . Mwan Zeova mon zot Bondye.”​—Lev. 19:2, 3, NWT.

¹¹ Sa verse i montre ki i enportan pour onor nou paran. Rapel sa ki Zezi ti dir ler en zonm ti demann li: “Ki bon keksoz ki mon devret fer pour ganny lavi eternel?” Dan larepons ki Zezi ti donn li, i ti osi dir ki sa zonm i bezwen onor son papa ek son manman. (Mat. 19:16-19) Zezi ti menm dir ki bann Farizyen ek bann profeser lalwa ti pe mal fer parski zot ti pe fer tou sa ki zot ti kapab pour pa pran swen avek zot paran. Sa in fer ki zot in “fer parol Bondye napa valer.” (Mat. 15:3-6) Sa “parol Bondye” ki Zezi ti pe koz lo la ti enkli sa senkyenm komannman dan sa Dis Komannman ki Zeova ti donn bann Izraelit e osi sa ki nou lir dan Levitik 19:3. (Egz. 20:12) Rapel ki Levitik 19:3 i dir ki en dimoun i bezwen annan respe pour son manman ek son papa e sa i vin apre sa parol dan Levitik 19:2 ki dir: “Zot devret sen parski mwan Zeova zot Bondye mon sen.”

12. Ki mannyer nou kapab aplik sa ki i dir dan Levitik 19:3?

¹² Ler nou mazin lo sa konsey ki Zeova in donn nou pour onor nou paran, nou kapab demann nou lekor, ‘Eski mon onor mon paran?’ Si ou santi ki dan lepase ou pa’n fer ase, ou kapab swazir la konmela pour fer plis pour zot. Ou pa kapab sanz sa ki’n arive dan lepase me ou kapab fer ou mye aprezan pour pas plis letan avek ou paran e ed zot plis. Petet ou kapab ed zot pour aste bann keksoz ki zot bezwen oubyen pour reste pros avek Zeova e kontinyen servi li. Ouswa ou kapab ankouraz e rekonfort zot plis. Si ou fer sa, ou pou pe aplik sa ki i dir dan Levitik 19:3.

13. (a) Ki en lot konsey nou trouve dan Levitik 19:3? (b) Ki mannyer nou kapab swiv legzanp Zezi ki dan Lik 4:16-18?

¹³ Dan Levitik 19:3, nou aprann en lot keksoz konsernan vin sen. Sa verse i osi koz konsernan obei lalwa Saba. Bann Kretyen pa anba Lalwa Moiz, alor nou pa bezwen obei lalwa Saba ki ti ganny fer sak semenn. Kantmenm sa, nou kapab aprann en kantite keksoz konsernan lafason ki bann Izraelit ti obei lalwa Saba e bann byenfe ki zot ti gannyen ler zot ti fer sa. Pandan Saba, bann Izraelit pa ti travay, zot ti repoze e ador Bondye.b I pour sa rezon ki zour Saba, Zezi ti al dan sinagog pour lir Parol Bondye. (Egz. 31:12-15; lir Lik 4:16-18.) Sa lord ki Zeova ti’n donn bann Izraelit dan Levitik 19:3 pour “obei lalwa konsernan [son] bann saba,” i devret motiv nou pour fer letan sak zour pour ador Bondye. Eski ou santi ki ou devret fer plis zefor pour obei sa lord? Si ou fer letan pour ador Zeova regilyerman, ou pou devlop en lanmitye pros avek Zeova e sa i vreman enportan pour ou kapab vin sen.

14. Ki laverite enportan ki Levitik sapit 19 i koz lo la plizyer fwa?

¹⁴ Levitik sapit 19 i koz plizyer fwa lo en laverite enportan ki kapab ed nou pour reste sen. Levitik 19:4 i fini avek sa parol: “Mwan mon Zeova zot Bondye.” Sa nide i ganny mansyonnen 16 fwa dan sa sapit. Sa i fer nou rapel sa premye komannman: “Mwan, mon Zeova ou Bondye . . . Ou pa devret annan lezot bondye apard ki mwan.” (Egz. 20:2, 3, NWT) Tou Kretyen ki anvi vin sen, i devret fer sir ki personn oubyen okenn keksoz pa vin pli enportan ki zot lanmitye avek Bondye. Vi ki nou Temwen Zeova, nou determinen pour pa fer okenn keksoz ki kapab sali oubyen anmenn laont lo non Zeova ki sen.​—Lev. 19:12; Iza. 57:15.

15. Ki sa bann verse dan Levitik sapit 19 ki koz konsernan bann sakrifis, i devret motiv nou pour fer?

¹⁵ Bann Izraelit ti montre ki zot aksepte Zeova konman zot Bondye par obei son bann lalwa. Levitik 18:4 (NWT) i dir: “Zot devret obei mon bann lalwa, swiv mon bann lareg e viv an armoni avek zot. Mwan mon Zeova zot Bondye.” Dan Levitik sapit 19 i annan serten sa “bann lareg” ki Zeova ti donn bann Izraelit. Par egzanp, verse 5-8, 21, 22 i koz lo bann sakrifis zannimo. Bann Izraelit ti bezwen fer sa bann sakrifis dan en fason ki pa ti pou “mank respe pour en keksoz sen ki pour Zeova.” Sa bann verse i devret motiv nou pour anvi fer Zeova plezir e pour ofer li bann sakrifis avek nou labous parey Ebre 13:15 i ankouraz nou pour fer.

16. Ki prensip dan Levitik sapit 19 ki pou ed nou rapel ki i annan en diferans ant bann ki servi Bondye ek bann ki pa servi li?

¹⁶ Pour vin sen, nou bezwen pare pour montre dimoun ki nou diferan avek bann ki pa ador Bondye. Sa i kapab difisil. Parfwa nou bann kanmarad lekol, koleg travay, bann manm fanmir ki pa Temwen Zeova ek lezot, i kapab met presyon lo nou pour fer bann keksoz ki pou anpes nou ador Zeova dan sa fason ki Zeova i anvi. Ler zot fer sa, nou bezwen fer en desizyon enportan. Kwa ki kapab ed nou pour fer sa bon desizyon? Annou vwar en prensip enteresan ki dan Levitik 19:19 (NWT). En parti sa verse i dir: “Ou pa devret met en lenz ki’n ganny fer avek de kalite difil ki’n melanz ansanm.” Sa lalwa ti ed lezot vwar ki nasyon Izrael ti diferan avek bann nasyon otour li. Ozordi nou pa anba Lalwa Moiz, alor i pa mal pour en Kretyen met en lenz ki’n ganny fer avek de latwal diferan, parey koton ek polyester oubyen lezot latwal. Me kantmenm sa, nou pa anvi parey bann dimoun ki zot krwayans ek bann keksoz ki zot fer, pa annakor avek bann lansennyman ki dan Labib. Nou refize fer parey zot menm si zot nou bann kanmarad lekol, koleg travay oubyen bann manm fanmir. Byensir, nou kontan nou bann manm fanmir e nou demontre lanmour anver lezot dimoun me bann desizyon ki nou fer, i montre ki nou pou obei Zeova menm si sa i fer nou diferan avek bann dimoun ki otour nou. Sa i vreman enportan parski si nou anvi vin sen, nou bezwen ganny met apar pour Bondye.​—2 Kor. 6:14-16; 1 Pyer 4:3, 4.

17-18. Ki leson enportan nou kapab aprann dan Levitik 19:23-25?

¹⁷ Sa fraz “Mwan mon Zeova zot Bondye” ti’n devret fer bann Izraelit rapel ki zot lanmitye avek Zeova ti sa keksoz pli enportan dan zot lavi. Ki mannyer zot ti pou fer sa? Levitik 19:23-25 (NWT) i montre en fason ki zot ti pou fer sa. (Lir.) Mazin ki sa bann parol ti pou vedir pour bann Izraelit apre ki zot ti pou’n antre dan Later Promiz. Si en zonm ti plant bann pye fri, i pa ti devret manz sa bann fri pour trwa-z-an. Dan katriyenm lannen, sa bann fri ti pou ganny met apar pour servis Bondye. Sa dimoun ti pou kapab manz fri sa bann pye dibwa dan senkyenm lannen. Sa lalwa ti’n devret ed bann Izraelit pour konpran ki zot pa ti devret met zot prop lentere avan. Zeova ti anvi ki zot met son ladorasyon premye dan zot lavi e annan konfyans ki i ti pou pran swen avek zot. I ti pou fer sir ki zot annan ase pour manze. Bondye ti ankouraz zot pour donn bann kado kot Tabernak, ki ti sa landrwa kot zot ti ador li.

¹⁸ Sa lalwa ki dan Levitik 19:23-25 i fer nou rapel bann parol ki Zezi ti dir dan Sermon lo Montanny. Zezi ti dir: “Aret trakase konsernan sa ki zot pou manze oubyen bwar.” I ti osi dir: “Zot Papa dan lesyel i konnen ki zot bezwen tou sa bann keksoz.” Bondye pou donn nou sa ki nou bezwen, zis parey i donn bann zwazo sa ki zot bezwen. (Mat. 6:25, 26, 32) Nou annan konfyans ki Zeova pou pran swen avek nou. Nou ed bann ki dan bezwen e nou osi kontan pour kontribye pour bann depans kongregasyon. Zeova i vwar ler nou demontre zenerozite dan sa fason e i pou rekonpans nou. (Mat. 6:2-4) Ler nou fer sa, nou montre ki nou konpran bann leson ki dan Levitik 19:23-25.

19. Ki byenfe ou’n gannyen ler ou’n etidye sa bann verse dan Levitik sapit 19?

¹⁹ Dan sa lartik, nou’n diskit lo detrwa verse dan Levitik sapit 19 e sa bann verse in ed nou pour konpran ki mannyer nou kapab vin sen parey nou Bondye i sen. Ler nou swiv legzanp Zeova, sa i montre ki nou pe fer nou mye pour ‘vin sen dan tou nou kondwit.’ (1 Pyer 1:15) En kantite dimoun ki pa servi Zeova in vwar nou bon kondwit e sa in motiv serten parmi zot pour glorifye Bondye. (1 Pyer 2:12) Me i annan ankor en kantite keksoz nou kapab aprann dan Levitik sapit 19. Dan sa lartik ki swiv, nou pou vwar lezot verse dan sa sapit ki pou ed nou konpran lezot fason ki nou kapab “vin sen” parey zapot Pyer ti ankouraz nou pour fer.