Bann leson ki nou kapab aprann dan liv Levitik

1-2. Akoz bann Kretyen ozordi i devret enterese avek liv Levitik?

ZAPOT Pol ti fer son zanmi Timote rapel ki “tou Lekritir i enspire par Bondye e itil.” (2 Tim. 3:16) Sa i enkli liv Levitik. Ki ou panse lo sa liv Labib? Serten dimoun i krwar ki liv Levitik i zis en liv ki annan bokou lareg ki pa itil pour nou ozordi. Me bann vre Kretyen i annan en diferan pwennvi.

² Liv Levitik ti ganny ekrir apepre 3,500 an pase, kantmenm sa Zeova in prezerv li “pour ansenny nou.” (Rom. 15:4) Vi ki sa liv i ed nou konpran ki mannyer Zeova i panse e santi konsernan serten keksoz, alor nou devret enterese pour etidye li. Anfet, i annan plizyer leson nou kapab aprann dan sa liv enspire. Annou vwar kat leson.

 3. Akoz bann sakrifis ti ganny ofer tou le lannen Zour Rekonsilyasyon?

³ Premye leson: Nou bezwen annan laprouvasyon Zeova pour nou sakrifis ganny aksepte. Tou le lannen, Zour Rekonsilyasyon, nasyon Izrael ti zwenn ansanm e granpret ti ofer bann sakrifis zannimo. Sa bann sakrifis ti ed bann Izraelit pour rapel ki zot pese ti bezwen ganny pardonnen. Me avan ki granpret ti anmenn okenn disan sakrifis dan Tre Sen sa zour, i ti bezwen fer en lot keksoz, enn ki pli enportan ki pardon pese sa nasyon.

 4. Parey in ganny dir dan Levitik 16:12, 13, ki granpret i fer ler i antre dan Tre Sen pour premye fwa Zour Rekonsilyasyon? (Vwar portre lo kouvertir.)

⁴ Lir Levitik 16:12, 13. Imazin sa ki arive Zour Rekonsilyasyon. Granpret i antre dan tabernak. Sa i pou premye fwa dan sa trwa fwa ki granpret i bezwen antre dan Tre Sen sa zour. Dan en lanmen i annan en resipyan ki ranpli avek lansan e dan lot lanmen i annan en lansanswar annor ranpli avek labrez sarbon. I aret en pti moman devan rido ki bar larantre Tre Sen. Avek bokou respe, i antre dan Tre Sen e i debout devan lars lalyans. Dan en sans senbolik, i pe debout devan Zeova! Aprezan, granpret i vid lansan lo labrez sarbon e en bon loder i ranpli sa lasanm.b Pli tar, i pou antre ankor dan Tre Sen avek disan sakrifis pour pardon pese. Remarke ki granpret i bril lansan avan ki i ofer disan sakrifis pour pardon pese.

 5. Ki nou kapab aprann avek lafason ki lansan ti ganny servi Zour Rekonsilyasyon?

⁵ Ki nou kapab aprann avek lafason ki lansan ti ganny servi Zour Rekonsilyasyon? Labib i montre ki lapriyer bann serviter fidel Zeova i parey lansan. (Ps. 141:2; Rev. 5:8) Gard antet ki i ti avek bokou respe ki granpret ti anmenn lansan devan Zeova. Pareyman, ler nou apros avek Zeova dan lapriyer, nou bezwen fer li avek bokou respe. Nou vreman apresye ki Kreater liniver i permet nou vin pros avek li, parey en zanfan avek son papa. (Zak 4:8) I aksepte nou konman son zanmi! (Ps. 25:14, NWT) Nou sitan apresye sa privilez ki nou pou toultan fer keksoz ki fer li plezir.

 6. Ki nou kapab aprann konsernan Zezi avek lefet ki granpret ti bril lansan avan ki i ofer bann sakrifis?

⁶ Rapel ki granpret ti bezwen bril lansan avan ki i ofer bann sakrifis. Dan sa fason, i fer sir ki Bondye i pran plezir dan li ler i ofer bann sakrifis. Ki nou kapab aprann avek sa? Ler Zezi ti lo later, i ti bezwen fer en keksoz enportan avan ki i ti ofer son lavi konman en sakrifis. Sa keksoz ti pli enportan ki sov limanite. Ki sa keksoz? I ti bezwen obei Zeova fidelman tou dilon son lavi lo later pour ki Zeova i aksepte son sakrifis. Dan sa fason, Zezi ti prouve ki fer bann keksoz dapre bann standar Zeova i sa pli bon fason pour viv. Zezi ti pou prouve ki fason dirize Zeova i byen e zis.

 7. Akoz tou dilon son lavi lo later Zezi ti fer plezir son Papa?

⁷ Tou dilon lavi Zezi lo later, i ti obei Zeova parfetman. Menm si Zezi ti bezwen fer fas avek tantasyon, difikilte e i ti konnen ki i ti pou soufer avan i mor, i ti determinen pour prouve ki fason dirize son Papa i sa pli bon fason. (Fili. 2:8) Ler Zezi ti ganny teste, i ti priye “avek gran leokri ek larm.” (Ebr. 5:7) Son lapriyer senser ti montre ki i ti fidel avek Zeova e i ti pli determinen pour obei Zeova. Pour Zeova, lapriyer Zezi ti parey sa bon loder lansan. Tou dilon lavi Zezi, i ti fer plezir son Papa e zistifye drwa Zeova pour dirize.

 8. Ki mannyer nou kapab imit Zezi?

⁸ Nou kapab imit Zezi par fer nou mye pour obei Zeova e reste fidel avek li. Ler nou ganny teste, nou priy senserman pour ganny led Zeova akoz nou anvi fer li plezir. Dan sa fason, nou montre ki nou siport fason dirize Zeova. Nou bezwen realize ki Zeova pa pou aksepte nou lapriyer si nou pe fer bann keksoz ki i deteste. Par kont, si nou fer sa ki Zeova i kontan, nou kapab asire ki nou lapriyer senser pou parey sa bon loder lansan pour Zeova. Nou osi kapab asire ki si nou obei Zeova, nou fidel e san defo, sa pou fer plezir nou Papa ki dan lesyel.​—Prov. 27:11.

 9. Akoz bann Izraelit ti ofer lofrann lape?

⁹ Dezyenm leson: Nou servi Zeova akoz nou rekonesan anver li. Nou pou aprann plis konsernan rekonesans ler nou egzamin bann lofrann lape ki bann Izraelit ti fer.c Dan liv Levitik, nou aprann ki en Izraelit ti kapab ofer lofrann lape pour demontre son rekonesans. (Lev. 7:11-13, NWT, 16-18) I ti fer sa sakrifis, pa akoz i ti bezwen, me akoz i ti anvi. I ti pare pour fer sa sakrifis akoz i ti kontan Zeova. Sa dimoun ti kapab manz lavyann sa zannimo ki i ti’n sakrifye ansanm avek son fanmir ek bann pret. Me, serten parti sa zannimo ti ganny ofer zis avek Zeova. Ki parti ki ti ganny rezerve zis pour Zeova?

10. Dapre Levitik 3:6, 12, 14-16, ki mannyer lofrann lape i parey avek sa ki Zezi ti fer pour Zeova?

¹⁰ Trwazyenm leson: Nou donn Zeova nou meyer akoz nou kontan li. Zeova ti vwar lagres konman sa pli bon porsyon dan en zannimo. I ti osi dir ki serten parti sa zannimo ti annan en gran valer. Sa ti enkli ronnyon sa zannimo. (Lir Levitik 3:6, 12, 14-16.) Alor, Zeova ti vreman kontan ler en Izraelit ti ofer li sa bann parti zannimo ek son lagres. Sa Izraelit ki ti ofer sa sakrifis ti montre ki i ti anvi donn Bondye son meyer. Pareyman, Zezi ti volonterman donn Zeova son meyer par fer tou sa ki i ti kapab pour servi Zeova akoz i kontan Li. (Zan 14:31) Zezi ti kontan pour fer lavolonte Bondye e i ti annan en gran lanmour pour lalwa Bondye. (Ps. 40:8) Zeova ti vreman kontan ler i ti vwar Zezi pe servi li volonterman.

11. Ki mannyer nou servis pour Zeova i parey bann lofrann lape e ki mannyer sa i rekonfort nou?

¹¹ Nou servis pour Zeova i parey bann lofrann lape, parski sa i montre ki mannyer nou santi anver li. Nou donn Zeova nou meyer akoz nou kontan li avek tou nou leker. Zeova i bezwen vreman kontan ler i vwar sa plizyer milyon adorater pe servi li volonterman akoz zot kontan li ek son fason fer keksoz! Zeova pa zis vwar e apresye bann keksoz ki nou fer me i osi vwar e apresye rezon akoz nou fer keksoz. Sa i vreman rekonfortan pour nou. Par egzanp, si ou en dimoun aze ki nepli kapab fer otan ki ou ti a kontan, ou kapab asire ki Zeova i konpran ou sityasyon. Petet ou santi ki ou pa kapab fer bokou pour Zeova, me Zeova i vwar ki ou vreman kontan li e ki ou lanmour i pous ou pour fer sa ki ou kapab. I kontan pour aksepte ou meyer.

12. Ki mannyer Zeova ti santi konsernan bann lofrann lape e ki mannyer sa i ankouraz nou?

¹² Ki nou kapab aprann avek bann lofrann lape? Anmezir ki bann pli bon parti sa zannimo ti ganny brile, lafimen ti mont anler e sa ti fer Zeova plezir. Alor, ou kapab asire ki Zeova i kontan ler ou osi ou volonterman fer ou mye pour servi li. (Kol. 3:23) Ki swa ou fer en kantite oubyen en ptigin dan servis Zeova, i apresye tou sa ki ou fer e i pa pou zanmen oubliye.​—Mat. 6:20; Ebr. 6:10.

13. Dapre Levitik 9:23, 24, ki mannyer Zeova ti demontre son laprouvasyon pour bann pret?

¹³ Katriyenm leson: Zeova pe beni sa parti son lorganizasyon ki lo later. Annou vwar sa ki ti arive an 1512 avan Kris, ler tabernak ti ganny asanble kot Montanny Sinai. (Egz. 40:17) Moiz ti fer en seremoni pour apwent Aaron ek son bann garson konman pret. Nasyon Izrael ti zwenn ansanm pour get bann pret kot zot ofer zot premye sakrifis zannimo. (Lev. 9:1-5) Ki mannyer Zeova ti demontre son laprouvasyon pour sa bann pret ki ti fek ganny apwente? Anmezir ki Aaron ek Moiz ti beni lepep, Zeova ti fer dife sorti dan lesyel bril tou sa sakrifis ki ti lo lotel.​—Lir Levitik 9:23, 24.

14. Ki bann pret ki ti sorti dan fanmir Aaron i reprezante ozordi?

¹⁴ Ki sa dife sorti dan lesyel ti montre? Sa dife ti montre ki Zeova i aprouv e siport Aaron ek son bann garson ki i ti’n apwente konman bann pret. Ler bann Izraelit ti vwar ki Zeova ti siport sa bann pret, zot osi zot ti annan bon rezon pour donn tou zot sipor sa bann pret. Eski laprouvasyon Zeova pour sa bann pret i enportan pour nou ozordi? Wi! Sa group pret ti reprezant en group pret ki ti pou pli meyer e pli enportan. Kris i sa Granpret ki pli siperyer e i annan 144,000 pret ek lerwa ki pou servi ansanm avek li dan lesyel.​—Ebr. 4:14; 8:3-5; 10:1.

15-16. Ki mannyer Zeova in montre ki i’n donn son laprouvasyon sa “lesklav fidel e pridan”?

¹⁵ An 1919, Zezi ti apwent en pti group kretyen swazir konman “lesklav fidel e pridan.” Sa lesklav i diriz sa travay predikasyon e i donn bann disip Kris “manze dan sa moman apropriye.” (Mat. 24:45) Eski i annan levidans kler ki montre ki Bondye in donn son laprouvasyon sa lesklav fidel e pridan?

¹⁶ Satan ek bann ki siport li pe esey aret sa travay ki sa lesklav pe fer. Si sa lesklav ti napa led Zeova, i ti pou enposib pour zot fer sa travay. Menm si i’n annan de lager mondyal, problenm ekonomik partou dan lemonn e pep Bondye in ganny persekite e trete dan en fason enzis, sa lesklav in kontinyen donn manze spirityel bann disip Kris lo later. Zis mazin sa kantite manze spirityel ki disponib e gratwit dan plis ki 900 langaz ozordi! Sa i levidans kler ki Bondye pe siport sa lesklav. Sa travay predikasyon i osi laprev ki Zeova pe beni sa lesklav. Vreman, sa bon nouvel pe ganny anonse “partou lo later.” (Mat. 24:14) San okenn dout, Zeova pe diriz e beni son lorganizasyon ozordi.

17. Ki mannyer nou kapab donn nou sipor sa lorganizasyon ki Zeova pe servi?

¹⁷ I ti pou byen si nou demann nou lekor, ‘Eski mon rekonesan ki mon form parti sa parti lorganizasyon Zeova ki lo later?’ Dan letan Moiz, Zeova ti fer dife desann sorti dan lesyel pour montre ki i donn son laprouvasyon bann ki i’n apwente. Pareyman, Zeova in donn nou levidans kler ki i pe servi son lorganizasyon ozordi. Nou vreman annan bon rezon pour nou remersi Bondye. (1 Tesa. 5:18, 19) Ki mannyer nou kapab donn nou sipor sa lorganizasyon ki Zeova pe servi? Nou fer sa ler nou aplik sa ki nou aprann dan Labib, dan nou bann piblikasyon, dan renyon ek lasanble. Deplis, nou donn nou sipor par partisip plennman dan sa travay predikasyon ek lansennyman.​—1 Kor. 15:58.

18. Ki nou determinen pour fer?

¹⁸ Annou determinen pour aplik sa bann leson ki nou’n aprann dan liv Levitik. Nou anvi ki Zeova i aksepte nou sakrifis. Nou servi Zeova parski nou rekonesan anver li. Nou kontinyen donn Zeova nou meyer akoz nou kontan li avek tou nou leker. Nou fer tou sa ki nou kapab pour siport sa lorganizasyon ki i pe servi ozordi. Ler nou fer sa bann keksoz, nou montre Zeova ki nou apresye sa privilez ki nou annan pour servi li konman son bann Temwen!