Kiltiv En Leker Ki Zeova I Pran Plezir Ladan

“Kree dan mwan en leker pir, O Bondye, e met dan mwan en nouvo lespri, enn ki ferm.”—PSONM 51:10.

 1, 2. Akoz nou devret enterese avek nou leker?

I TI gran e i ti annan en laparans tre atiran. Kan profet Samyel ti vwar li, i ti sitan enpresyonnen ki i ti konklir ki se li, premye garson Zese, ki Bondye ti’n swazir pour vin lerwa apre Sail. Me Zeova ti dir: “Pa get son laparans ni son grander, parski mon’n rezet li. . . . En senp zonm i vwar sa ki aparet devan son lizye; me Zeova li, i vwar sa ki dan leker.” Zeova ti swazir dernyen garson Zese, David —“en zonm ki son leker i pran plezir ladan.”—1 Samyel 13:14; 16:7.

² Bondye i kapab lir dan leker imen, parey i ti fer vwar klerman plitar: “Mwan, Zeova, mon pe egzamin leker, egzamin ronnyon, pour donn sakenn dapre son semen, dapre fri son mannyer azir.” (Zeremi 17:10) Wi, “Zeova i sa enn ki egzamin leker.” (Proverb 17:3) Me ki sa leker dan imen ki Zeova i egzaminen? E ki nou kapab fer pour kiltiv en leker ki Zeova pran plezir ladan?

Sa ki nou ete anndan

 3, 4. Dan ki sans “leker” i ganny servi pli souvan dan Labib? Donn legzanp.

³ Sa mo “leker” i aparet apepre mil fwa dan Labib. Laplipar-di-tan i ganny servi dan en sans senbolik. Par egzanp, Zeova ti dir avek profet Moiz: “Koz avek bann garson Izrael, pour ki zot pran en kontribisyon pour mwan: Avek tou zonm ki son leker i ensit li zot bezwen pran mon kontribisyon.” E bann ki ti pe fer kontribisyon “ti vini, tou sa ki son leker ti pous li.” (Egzod 25:2; 35:21) I kler ki en laspe sa leker senbolik se motivasyon—sa lafors anndan nou ki pous nou pour fer en keksoz. Nou leker senbolik i osi reflekte nou lemosyon ek santiman, ensi ki nou dezir ek lafeksyon. En leker i kapab flanbe avek lakoler oubyen ranpli avek lafreyer, i kapab desire avek lapenn oubyen ranpli avek lazwa. (Psonm 27:3; 39:3; Zan 16:22; Romen 9:2) I kapab orgeye oubyen annan limilite, i kapab kontan oubyen annan laenn.—Proverb 16:5; Matye 11:29; 1 Pyer 1:22.

⁴ Se pour sa ki “leker” i souvan ganny asosye avek motivasyon ek santiman, tandis ki “lespri” i sirtou annan keksoz pour fer avek lentelizans. Se koumsa ki nou devret konpran sa de mo kan zot aparet dan menm konteks dan Labib. (Matye 22:37; Filipyen 4:7) Me leker ek lespri i kapab asosye avek kanmarad. Par egzanp, Moiz ti enplor bann Izraelit: “Ou bezwen mazinen dan ou leker [oubyen, “bezwen rapel ou lespri,” not anba lo paz] ki Zeova i sa vre Bondye.” (Deterononm 4:39) Zezi ti dir avek bann profeser Lalwa ki ti pe fer konplo kont li: “Akoz zot pe mazin tou sa bann move keksoz dan zot leker?” (Matye 9:4) “Lentelizans,” “konnesans,” ek ‘rezonnen’ i kapab osi ganny asosye avek leker. (1 Lerwa 3:12; Proverb 15:14; Mark 2:6, NW ) Alor, leker senbolik i osi kapab enplik nou lentelizans—nou panse oubyen nou konprenezon.

 5. Ki sa leker senbolik i reprezante?

⁵ Dapre en referans, leker senbolik i reprezant “parti santral an zeneral, sa ki anndan, e alor i sa zonm enteryer letan i manifeste li dan son diferan aktivite, dan son bann dezir, son santiman, son lemosyon, son pasyon, son bi, son panse, son persepsyon, son limazinasyon, son sazes, son konnesans, son kapasite, son krwayans, son rezonnman, son souvenir ek son lenpresyon.” I reprezant sa ki nou vreman ete anndan, sa dimoun “enteryer.” (1 Pyer 3:4) Se sa ki Zeova i vwar e egzaminen. Se pour sa ki David ti priye: “Kree dan mwan en leker pir, O Bondye, e met dan mwan en nouvo lespri, enn ki ferm.” (Psonm 51:10) Ki mannyer nou kapab ganny en leker pir?

“Aplik ou Leker” dan Parol Bondye

 6. Ki lankourazman Moiz ti donn Izrael letan zot ti pe kanpe lo Laplenn Moab?

⁶ Kan Moiz ti pe donn lavertisman bann garson Izrael ki ti’n rasanble lo Laplenn Moab avan ki zot ti antre dan Later Promiz, i ti dir: “Aplik zot leker dan tou sa parol ki mon pe dir pour averti zot ozordi, pour ki zot ordonn zot garson pour fer sir ki zot pratik tou parol dan sa lalwa.” (Deterononm 32:46) Bann Izraelit ti bezwen “byen atantif.” (Knox) Sel fason ki zot ti pou kapab enkilke bann komannman Bondye dan zot zanfan se par konn sa bann komannman byen.—Deterononm 6:6-8.

 7. Kwa ki enplike dan ‘aplik nou leker’ dan Parol Bondye?

⁷ Pour arive ganny en leker pir, i tre enportan pour annan konnesans egzakt lo lavolonte Bondye ek son plan. Sa konnesans i annan zis en sours, Parol enspire Bondye. (2 Timote 3:16, 17) Me zis konnesans li menm, pa pou ed nou pour ganny en leker ki Zeova i pran plezir ladan. Pour sa konnesans afekte sa ki nou ete anndan, nou bezwen ‘aplik nou leker’ ladan, oubyen “pran aker,” sa ki nou pe aprann. (Deterononm 32:46, An American Translation) Ki mannyer nou kapab fer sa? Psalmis David i eksplike: “Mon rapel lepase; mon’n medit lo tou ou aktivite; mon’n volonterman kontinyen enterese avek travay ou prop lanmen.”—Psonm 143:5.

 8. Ki bann kestyon ki nou kapab reflesir lo la kan nou pe etidye?

⁸ Nou osi nou devret medit lo aktivite Zeova avek rekonesans. Kan nou lir Labib oubyen bann piblikasyon ki baze lo Labib, nou bezwen reflesir lo serten kestyon parey: ‘Ki sa i ansenny mwan lo Zeova? Ki kalite Zeova ki evidan la? Ki sa resi i ansenny mwan konsernan sa ki Zeova i kontan oubyen sa ki i pa kontan? Ki konsekans letan nou fer sa ki Zeova i kontan konpare avek letan nou fer sa ki i pa kontan? Konman ki sa lenformasyon i relye avek sa ki mon deza konnen?’

 9. Ki lenportans letid personnel ek meditasyon?

⁹ Lisa, aze 32 an,a i eksplike konman i ti konmans apresye valer letid serye ek meditasyon: “Apre mon batenm an 1994, mon ti byen aktif dan laverite pour apepre 2 an. Mon ti asiste tou renyon Kretyen, dedye 30 a 40 er-d-tan tou le mwan dan predikasyon, e frekant bann konpanyon Kretyen. Apre sa, mon ti konmans elwannyen. Mon ti’n telman feb spirityelman ki mon ti menm kas lalwa Bondye. Me mon ti pran konsyans mon sitiasyon e deside pour aranz mon lavi. Pa mon kontan ki Zeova in aksepte mon repantans e aksepte mwan ankor! Souvan mon demann mon lekor: ‘Akoz mon ti elwannyen koumsa?’ Larepons ki’n touzour vin dan mon lespri i ki mon ti negliz letid serye ek meditasyon. I zis ki laverite Biblik pa ti’n tous mon leker. Depi ozordi, letid personnel ek meditasyon pou touzour annan en par enportan dan mon lavi.” Pli nou konnesans i grandi lo Zeova, son Garson, ek son Parol, i vreman enportan ki nou rod letan pour fer refleksyon serye.

10. Akoz i irzan ki nou rod letan pour fer letid personnel ek meditasyon?

¹⁰ Dan sa monn kot nou tou nou vreman okipe, i pa fasil pour trouv letan pour letid ek meditasyon. Toudmenm, ozordi bann Kretyen pe debout devan larantre en Later Promiz manifik—nouvo monn drwat Bondye. (2 Pyer 3:13) Bann levennman sirprenan, tel konman destriksyon “Gran Babilonn” ek latak fer par “Gog sorti dan pei Magog” lo pep Zeova i lanmenm dan kontour. (Revelasyon 17:1, 2, 5, 15-17; Ezekyel 38:1-4, 14-16; 39:2) Sa ki pou arive byento i kapab teste nou lanmour pour Zeova. Alor, i vreman neseser ki nou rod letan la konmela menm e aplik nou leker dan Parol Bondye!—Efezyen 5:15, 16.

‘Prepar ou Leker pour konsilte Parol Bondye’

11. Ki mannyer nou leker i kapab ganny konpare avek later?

¹¹ Leker senbolik i kapab ganny konpare avek later kot lagrenn laverite i kapab ganny plante. (Matye 13:18-23) Normalman, later i ganny kiltive ase souvan pour ki i donn bann bon prodwi. Pareyman, nou leker i bezwen ganny byen prepare afen ki i pli ouver pour resevwar Parol Bondye. Ezra ki ti en pret, ti “prepar son leker pour konsilte lalwa Zeova e pour fer li.” (Ezra 7:10) Ki mannyer nou kapab prepar nou leker?

12. Kwa ki kapab ed nou prepar nou leker pour letid?

¹² Priy ofon nou leker i en fason ekselan pour nou prepar nou leker kan nou pe konsilte Parol Bondye. Renyon bann vre Kretyen i konmans e konklir avek en lapriyer. Pa i byen apropriye alor pour nou konmans sak letid personnel avek en lapriyer senser e apre mentenir en latitid serye toudilon nou letid!

13. Ki nou bezwen fer pour kiltiv en leker ki Zeova i pran plezir ladan?

¹³ Nou leker senbolik i bezwen pare pour rezet bann pwenn-vi ki nou’n fini formen dan lespri. Bann sef relizye dan letan Zezi pa ti pare pour fer sa. (Matye 13:15) Parkont, manman Zezi, Mari, ti fer konklizyon “dan son leker” baze lo bann fe ki i ti’n tande. (Lik 2:19, 51) I ti vin en disip fidel Zezi. Lidi ki ti sorti an Tyatir ti ekout Pol, e Zeova ti ‘ouver son leker pour li ekout byen.’ Li osi i ti vin en krwayan. (Akt 16:14, 15) Annou pa zanmen reste atase avek nou pwenn-vi personnel oubyen avek serten doktrin ki nou kontan. Plito, annou pare pour les ‘Bondye ganny trouve konman laverite, menm si tou dimoun i manter.’—Romen 3:4.

14. Ki mannyer nou kapab prepar nou leker pour ekoute dan bann renyon?

¹⁴ I sirtou enportan pour nou prepar nou leker pour ekoute dan bann renyon Kretyen. Serten distraksyon i kapab anpes nou ekout sa ki pe ganny dir. Si nou pe preokip nou avek sa ki ti arive pandan lazournen oubyen sa ki nou pe al fer demen, petet sa ki pe ganny dir pa pou fer okenn lefe lo nou. Nou bezwen vreman determinen pour ekoute e aprann si nou anvi benefisye avek sa ki pe ganny dir. Ki kantite benefis nou kapab gannyen si nou determinen pour konpran bann pasaz Labib ki pe ganny trete e eksplike!—Neemya 8:5-8, 12.

15. Konman ki ler nou annan limilite i fer li pli fasil pour nou pran lenstriksyon?

¹⁵ Zis parey later i pli prodiktif letan nou azout bann langre apropriye ladan, nou kapab anrisir nou leker senbolik ler nou kiltiv limilite, en dezir pour bann keksoz spirityel, konfyans, lakrent ek lanmour pour Bondye. Limilite i fer nou leker vin pli mou e sa i fer li pli fasil pour nou ganny enstri. Zeova ti dir avek Lerwa Zide, Yosiya: “Parski ou leker ti mou ki fer ki ou ti imilye ou akoz Zeova, kan ou ti tann sa ki mon ti’n dir . . . e konmans plere devan mwan, mwan osi, mon’n tande.” (2 Lerwa 22:19) Yosiya ti annan en leker ranpli avek limilite e pare pour ekoute. Limilite ti ed bann disip Zezi, ki ti “bann zonm senp san gran ledikasyon,” pour konpran e aplik laverite spirityel ki “bann malen ek bann entelizan” pa ti konpran. (Akt 4:13; Lik 10:21) Annou “imilye nou devan nou Bondye” anmenmtan ki nou pe esey kiltiv en leker ki Zeova i pran plezir ladan.—Ezra 8:21.

16. Akoz nou bezwen fer zefor pour kiltiv en lapeti pour nouritir spirityel?

¹⁶ Zezi ti dir: “Ere bann ki konsyan zot bezwen spirityel.” (Matye 5:3, NW ) Kantmenm nou’n ganny sa kapasite pour annan en lavi spirityel, presyon dan sa monn mesan oubyen bann defo tel konman lapares i kapab fer nou pa konsyan nou bezwen. (Matye 4:4) Nou bezwen devlop en bon lapeti pour nouritir spirityel. Menm si okonmansman nou pa trouv plezir dan lektir Labib ek letid personnel, si nou persiste nou pou vwar ki konnesans pou ‘vin agreab pour nou nanm,’ ki fer ki nou pou vreman enpasyan pour bann moman letid.—Proverb 2:10, 11.

17. (a) Akoz Zeova i merit ganny nou konfyans total? (b) Ki mannyer nou kapab kiltiv konfyans dan Bondye?

¹⁷ Lerwa Salomon in averti nou: “Met ou konfyans dan Zeova avek tou ou leker e pa apiy lo ou prop lentelizans.” (Proverb 3:5) En leker ki annan konfyans dan Zeova i konnen ki nenport kwa ki I demande oubyen dir atraver son Parol i touzour bon. (Izai 48:17) Sirman, Zeova i merit ganny nou konfyans total. I kapab akonpli tou sa ki i’n plàn. (Izai 40:26, 29) Zis son non li menm, ki vedir “I fer arive,” i donn nou konfyans ki i annan abilite pour realiz sa ki i’n promet! I “drwat dan tou son semen e fidel dan tou son travay.” (Psonm 145:17) Byensir, pour nou kiltiv konfyans dan li, nou bezwen “goute e vwar ki Zeova i bon” par met an pratik sa ki nou’n aprann dan Labib e par reflesir lo bann byenfe ki sa i aporte.—Psonm 34:8.

18. Ki mannyer lakrent pour Bondye i kapab ed nou pour pli pare pour resevwar gidans Bondye?

¹⁸ Kan i ti pe refer avek en lot kalite ki fer nou leker pli pare pour aksepte gidans divin, Salomon ti dir: “Annan lakrent pour Zeova e detourn kont lemal.” (Proverb 3:7) Zeova ti dir konsernan ansyen Izrael: “Si selman zot devlop zot leker pour annan lakrent pour mwan e pour touzour gard mon bann komannman, afen ki tou i ava al byen pour zot e pour zot garson pour letan endefini!” (Deterononm 5:29) Wi, bann ki annan lakrent pour Bondye i obeir li. Zeova i annan sa abilite pour “montre son lafors an faver bann ki annan en leker konplet pour li” e pour pini bann ki dezobei li. (2 Kronik 16:9) Annou les lakrent pour depler Bondye gid tou nou aksyon, panse, ek santiman.

‘Kontan Zeova avek tou ou Leker’

19. Ki rol lanmour i zwe pour fer nou leker pli sansib anver lenstriksyon Zeova?

¹⁹ Lanmour, plis ki okenn lezot kalite, i vreman fer nou leker sansib anver lenstriksyon ki Zeova i donn nou. En dimoun ki son leker i ranpli avek lanmour pour Bondye i fer li vreman anvi aprann sa ki fer plezir Bondye e sa ki depler li. (1 Zan 5:3) Zezi ti dir: “Kontan Senyer ou Bondye avek tou ou leker, avek tou ou lam, e avek tou ou lespri.” (Matye 22:37) Annou agrandi nou lanmour pour Bondye par fer li en labitid pour medit lo son bonte, par regilyerman koz avek li parey en zanmi pros, e par koz avek lantouzyasm lo li avek lezot.

20. Ki mannyer nou kapab kiltiv en leker ki Zeova i pran plezir ladan?

²⁰ Konman en rezimen, kiltiv en leker ki Zeova i pran plezir ladan i enplik les Parol Bondye enfliyans sa ki nou ete anndan, sa dimoun enteryer. Letid Labib personnel ek meditasyon pour eksprim nou rekonesans i en nesesite. Pli bon fason pour fer sa se par prepar nou leker—en leker ki napa okenn pwenn-vi ki’n fini ganny formen, enn ki ranpli avek bann kalite ki fer li pli fasil pour nou ganny enstri! Wi, avek led Zeova, nou kapab kiltiv en leker ki i pran plezir ladan. Me ki bann mezir nou kapab pran pour protez nou leker?

[Not anba lo paz]

Ki ou pou reponn?

• Ki sa leker senbolik ki Zeova i egzaminen?

• Ki mannyer nou kapab ‘aplik nou leker’ dan Parol Bondye?

• Ki mannyer nou devret prepar nou leker pour konsilte Parol Bondye?

• Apre ki ou’n egzamin sa lartik, ki ou motive pour fer?

[Portre lo paz 12]

Avek rekonesans, David ti medit lo bann keksoz spirityel. Eski ou osi ou fer li?

[Portre lo paz 16]

Prepar ou leker avan ou etidye Parol Bondye