Kontinyen demontre lanmour fidel pour kanmarad

1-2. Ki bann bon rezon nou annan pour demontre lanmour fidel pour kanmarad?

LABIB i donn nou bann bon rezon pour demontre lanmour fidel pour kanmarad. Ki serten sa bann rezon? Bann proverb dan Labib i reponn sa kestyon: “Pa les lanmour fidel ek fidelite kit ou. . . . Alor ou pou ganny aprouve e ou pou ganny rekonnet konman en dimoun ki annan bon zizman par Bondye ek bann zonm.” “En dimoun ki annan lanmour fidel pou fer dibyen son prop lekor.” “Sa enn ki pe kontan ladrwatir ek lanmour fidel pou ganny lavi.”​—Prov. 3:3, 4, NWT; 11:17, not dan NWT; 21:21, NWT.

² Sa bann proverb i montre trwa rezon akoz nou devret demontre lanmour fidel. Premyerman, ler nou demontre lanmour fidel, sa i fer nou presye pour Bondye. Dezyenmman, ler nou demontre lanmour fidel, nou fer dibyen nou prop lekor. Par egzanp, nou devlop bann bon lanmitye avek lezot. Trwazyenmman, ler nou demontre lanmour fidel, nou pou ganny bann bon keksoz a lavenir parey lavi eternel. Byensir, nou annan bann bon rezon pour obei parol Zeova ki dir: “Pran pitye e demontre lanmour fidel pour kanmarad.”​—Zek. 7:9, NWT.

 3. Ki kestyon nou pou reponn dan sa lartik?

³ Dan sa lartik, nou pou vwar larepons sa kat kestyon: Anver lekel ki nou devret demontre lanmour fidel? Ki nou kapab aprann dan liv Rit konsernan demontre lanmour fidel? Ki mannyer nou kapab demontre lanmour fidel dan nou letan? Ki byenfe nou pou gannyen ler nou demontre lanmour fidel?

 4. Ki mannyer nou kapab demontre lanmour fidel parey Zeova? (Mark 10:29, 30)

⁴ Dan sa lartik avan, nou ti aprann ki Zeova i demontre lanmour fidel anver zis bann ki kontan li e ki servi li. (Dan. 9:4, NWT) Nou anvi vin “bann zanfan ki Bondye i kontan” e ki “swiv son legzanp.” (Efe. 5:1) Alor, nou anvi demontre lanmour fidel anver nou bann frer ek ser dan kongregasyon.​—Lir Mark 10:29, 30.

5-6. Kwa ki pou ed nou konpran pli byen kisisa lanmour fidel?

⁵ Ou pou dakor ki ler nou konpran pli byen kisisa lanmour fidel, nou pou pli kapab demontre li anver nou bann frer ek ser. Pour nou konpran pli byen kisisa lanmour fidel, annou vwar ki diferans i annan ant lanmour fidel ek fidelite. Annou vwar en legzanp.

⁶ Meton en dimoun in travay pour menm lakonpannyen pour plizyer lannen. Nou kapab dir ki i fidel anver sa lakonpannyen e i en bon travayer. Me kantmenm sa, i pa vedir ki i kontan bann direkter sa lakonpannyen. I pa bezwen zwenn sa bann direkter ouswa dakor avek zot bann desizyon ki zot pran. I zis kontan pour annan en travay pour li ganny son larzan. I pou kontinyen travay laba ziska ki i pran retret ouswa ziska ki i ganny en pli bon plas travay dan en lot landrwa.

7-8. (a) Kwa ki pli enportan ki demontre fidelite? (b) Akoz nou pou vwar serten verse dan liv Rit?

⁷ Fidelite i en bon kalite. Me sa ki pli enportan, i rezon akoz en dimoun i demontre fidelite. Dan Labib, kwa ki ti motiv bann serviter Bondye pour demontre fidelite? Zot ti demontre fidelite pa akoz zot ti oblize me akoz zot ti annan lanmour fidel. Annou vwar legzanp David. I ti kontan son bon zanmi Zonatan avek tou son leker menm si papa Zonatan ti anvi touy David. Plizyer lannen apre ki Zonatan ti’n mor, lanmour fidel ki David ti annan, ti motiv li pour kontinyen pran swen avek Mefiboset, ki ti garson Zonatan.​—1 Sam. 20:9, 14, 15, NWT; 2 Sam. 4:4; 8:15, NWT; 9:1, NWT, 6, 7, NWT.

⁸ Nou kapab aprann en kantite konsernan lanmour fidel ler nou lir serten verse dan liv Rit. Ki nou kapab aprann konsernan lanmour fidel avek bann dimoun dan sa liv? Ki mannyer nou kapab aplik sa ki nou aprann dan kongregasyon?b

 9. Akoz Naomi ti krwar ki Zeova pe opoz li?

⁹ Dan liv Rit, i annan zistwar Naomi, son belfiy ki apel Rit e en zonm ki apel Boaz. Boaz ti kontan Bondye e i ti fanmir avek msye Naomi. Naomi, son msye ek son de garson ti al reste Moab parski i ti annan en lafanmin an Izrael. Pandan ki zot ti Moab, msye Naomi ti mor. Son de garson ti marye me pli tar zot osi zot ti mor. (Rit 1:3-5; 2:1) Sa ti fer Naomi deplizanpli dekouraze. I ti sitan dekouraze ki i ti krwar ki Zeova pe opoz li. Remarke ki Naomi ti dir konsernan Bondye: “Zeova in vir kont mwan.” “Bondye Tou Pwisan in fer mon lavi vreman difisil.” I ti osi dir: “Zeova in opoz mwan e Bondye Tou Pwisan in anmenn maler lo mwan.”​—Rit 1:13, 20, 21, NWT.

10. Ki mannyer Zeova ti reazir anver sa ki Naomi ti dir?

¹⁰ Ki mannyer Zeova ti reazir anver sa ki Naomi ti dir? I pa ti abandonn Naomi. O kontrer, Zeova ti demontre konpasyon anver Naomi. Zeova i konpran ki “presyon i kapab fer en dimoun saz azir parey en fou.” (Ekle. 7:7, NWT) Naomi ti bezwen led pour vwar ki Zeova pa ti’n abandonn li. Ki mannyer Zeova ti ed li? (1 Sam. 2:8) Zeova ti fer Rit demontre lanmour fidel pour Naomi. Rit ti montre Naomi ki i kontan li. I ti osi ed Naomi pour pa tro dekouraze e pour konnen ki Zeova i ankor kontan li. Ki nou aprann avek sa ki Rit ti fer?

11. Akoz bann frer ek ser i ed bann ki sagren ouswa ki dekouraze?

¹¹ Lanmour fidel i motiv nou pour ed bann ki sagren ouswa ki dekouraze. Zis parey Rit ti reste avek Naomi, en kantite frer ek ser ozordi i kontinyen ed bann dan kongregasyon ki sagren ouswa ki dekouraze. Zot kontan zot bann frer ek ser e zot anvi fer sa ki zot kapab pour ed sa bann ki sagren ouswa ki dekouraze. (Prov. 12:25; 24:10) Zapot Pol ti ankouraz nou pour fer sanmenm, ler i ti dir: “Koz dan en fason ki pou konsol bann ki dan depresyon, siport bann ki feb, annan pasyans anver tou dimoun.”​—1 Tesa. 5:14.

12. Parfwa, ki sa pli bon fason pour ed en frer ouswa en ser ki dekouraze?

¹² Parfwa, sa pli bon fason pour ed en frer ouswa en ser ki dekouraze i par ekout li e fer li konnen ki ou kontan li. Zeova i rekonesan pour sa ki ou pe fer pour ed son bann serviter ki presye pour li. (Ps. 41:1, NWT) Proverb 19:17, (NWT) i dir: “Sa enn ki demontre labonte anver bann dernyen dimoun pe pret avek Zeova e I pou rekonpans li pour sa ki i’n fer.”

13. Ki mannyer desizyon Rit ti diferan avek desizyon Orpa e ki mannyer Rit ti demontre lanmour fidel? (Vwar portre lo kouvertir.)

¹³ Ler nou mazin sa ki ti arive avek Naomi apre ki son msye ek son de garson ti mor, nou konpran pli byen kisisa lanmour fidel. Ler Naomi ti tande ki “Zeova ti’n beni son pep par donn zot bann bon rekolt,” i ti deside pour retourn dan son pei. (Rit 1:6, NWT) O konmansman, son de belfiy ti pe retourn avek li dan son pei. Me dan semen, trwa fwa Naomi ti demann zot pour retourn Moab. Ki i ti arive? Labib i dir: “Orpa ti anbras son belmer e i ti ale. Me Rit ti ensiste pour reste avek Naomi.” (Rit 1:7-14, NWT) Orpa ti fer sa ki Naomi ti’n demann li pour fer e i ti retourn Moab. Me Rit ti fer plis ki sa ki Naomi ti’n demann li pour fer. I ti’n kapab retourn dan son pei li osi, me i ti deside pour reste e ed Naomi. (Rit 1:16, 17) Rit ti fer sa, pa akoz i ti oblize me akoz i ti anvi. Rit ti demontre lanmour fidel. Ki nou aprann avek sa ki Rit ti fer?

14. (a) Ki mannyer en kantite frer ek ser in swiv legzanp Rit? (b) Dapre Ebre 13:16, ki mannyer nou kapab fer Zeova kontan?

¹⁴ Lanmour fidel i motiv nou pour fer plis zefor pour ed lezot. Parey dan lepase, en kantite frer ek ser ozordi in demontre lanmour fidel anver lezot frer ek ser, menm anver bann ki zot pa konnen. Par egzanp, ler zot konnen ki en dezas natirel in arive, deswit zot anvi ede. Ler en dimoun dan kongregasyon i annan problenm larzan, deswit zot rode ki sa dimoun i bezwen e zot ed li. Parey bann Kretyen dan premye syek ki ti reste Masedwann, bann frer ek ser i fer plis zefor pour ed lezot. Zot donn “plis ki zot mwayen [i] permet” pour ed bann frer ek bann ser ki dan bezwen. (2 Kor. 8:3) Zeova i vreman kontan ler i vwar bann frer ek ser pe demontre lanmour fidel.​—Lir Ebre 13:16.

15-16. Ki mannyer Rit ti montre ki i pa pou abandonnen?

¹⁵ Nou kapab aprann serten leson par egzamin zistwar Rit ek Naomi. Annou vwar ki nou kapab aprann.

¹⁶ Pa abandonnen. Ler Rit ti demande pour retourn avek Naomi Zida, Naomi pa ti oule. Me Rit pa ti abandonnen. Ki ti arive? “Ler Naomi ti vwar ki Rit ti pe ensiste pour al avek li, i ti aret demann li pour retourn kot li.”​—Rit 1:15-18, NWT.

17. Kwa ki pou ed nou pour pa vitman abandonnen?

¹⁷ Leson pour nou. Nou bezwen annan pasyans pour nou kapab ed bann ki dekouraze. Me nou pa abandonn zot. En ser ki bezwen led i kapab o konmansman refiz nou led.c Kantmenm sa, lanmour fidel pou motiv nou pour kontinyen esey ed li. (Gal. 6:2) Nou fer sa parski nou swete ki avek letan, i pou les nou ed li e rekonfort li.

18. Kwa ki ti’n kapab fer Rit vreman sagren?

¹⁸ Pa ofanse. Ler Naomi ek Rit ti ariv Betleenm, Naomi ti vwar son bann vwazen. I ti dir zot: “Mon pa ti mank nanryen ler mon ti ale, me Zeova in fer mwan retourn lanmen vid.” (Rit 1:21, NWT) Mazinen ki mannyer Rit ti’n kapab santi ler i ti tann sa ki Naomi ti dir! Rit ti’n fer tou sa ki i kapab pour ed Naomi. Rit ti’n plere ansanm avek Naomi, i ti’n rekonfort li e pour plizyer zour, i ti’n mars avek Naomi. Malgre tousala, Naomi ti dir: “Zeova in fer mwan retourn lanmen vid.” Menm si Rit ti pe debout o bor Naomi, sa ki Naomi ti dir ti donn lenpresyon ki i pa apresye lafason ki Rit ti’n ed li. I tre probab ki sa ti fer Rit vreman sagren. Kantmenm sa, i ti reste avek Naomi.

19. Kwa ki pou ed nou pour kontinyen esey ed en dimoun ki dekouraze?

¹⁹ Leson pour nou. En ser ki dekouraze i kapab dir nou en keksoz ki ofans nou malgre tou sa ki nou’n fer pour ed li. Me nou esey pa pran sa personnel. Nou kontinyen esey ed nou ser ki dan bezwen e nou demann Zeova pour ed nou vwar en fason pour rekonfort li.​—Prov. 17:17.

20. Kwa ki ti donn Rit sa lafors ki i ti bezwen pour kontinyen ed Naomi?

²⁰ Ankouraz en dimoun ki ou vwar i bezwen ganny ankouraze. Rit ti’n demontre lanmour fidel pour Naomi me Rit ti bezwen ganny ankouraze. Alor, Zeova ti motiv Boaz pour ankouraz Rit. Boaz ti dir: “Ki Zeova i beni ou pour tou sa ki ou’n fer. Ki Zeova, Bondye Izrael i rekonpans ou plennman, parski ou’n vin rod refiz anba son lezel.” Sa bann zoli parol ti’n bezwen rekonfort Rit. Rit ti dir: “Ou’n rekonfort mwan e sa ki ou’n dir in konsol ou servant.” (Rit 2:12, 13, NWT) Boaz ti ankouraz Rit ler i ti bezwen ganny ankouraze e sa ti donn Rit sa lafors ki i ti bezwen pour kontinyen ed Naomi.

21. Dapre Izai 32:1, 2, ki bann ansyen pou donn nou?

²¹ Leson pour nou. Parfwa, bann frer ek ser ki demontre lanmour fidel pour lezot, i bezwen ganny ankouraze zot osi. Boaz ti felisit Rit ler i ti vwar lafason ki Rit ti bon anver Naomi. Ozordi, ler bann ansyen i vwar lafason ki bann frer ek ser dan kongregasyon i ed lezot, bann ansyen i felisit zot. Sa pou donn sa bann frer ek ser lafors ki zot bezwen pour kontinyen ede.​—Lir Izai 32:1, 2, NWT.

22-23. Ki mannyer lafason ki Naomi ti santi ti sanze e akoz sa ti arive? (Psonm 136:23, 26)

²² Apre ki en pe letan ti’n pase, Boaz ti donn Rit ek Naomi en pe manze. (Rit 2:14-18) Ki mannyer Naomi ti reazir anver zenerozite ki Boaz ti demontre? Naomi ti dir: “Ki sa msye i ganny beni par Zeova ki pa’n zanmen aret demontre lanmour fidel anver bann vivan ek bann mor.” (Rit 2:20, NWT) Fason panse Naomi ti’n sanz en kantite! Pli boner, avek larm i ti dir: “Zeova in opoz mwan” me aprezan i dir: “Zeova . . . pa’n zanmen aret demontre lanmour fidel.” Akoz lafason ki Naomi ti santi ti’n sanze?

²³ Naomi ti konpran ki Zeova pa ti’n zanmen abandonn li. Zeova ti fer Rit ed Naomi ler Naomi ti pe retourn Zida. (Rit 1:16) Naomi ti osi konpran ki Zeova ti fer Boaz ed zot de Rit. (Rit 2:19, 20, NWT) I kapab ki Naomi ti dir dan li menm: ‘La mon konpran ki Zeova pa ti’n zanmen kit mwan. Tou sa letan, I ti avek mwan!’ (Lir Psonm 136:23, 26, NWT.) Naomi ti vreman rekonesan ki Rit ek Boaz pa ti’n abandonn li. Zot tou zot ti vreman kontan ki Naomi ti’n reganny son lazwa ek son lafors pour kontinyen servi Zeova.

24. Akoz nou anvi kontinyen demontre lanmour fidel pour nou bann frer ek ser?

²⁴ Ki nou’n aprann dan liv Rit konsernan lanmour fidel? Lanmour fidel i motiv nou pour pa vitman abandonn nou bann frer ek ser ki dan bezwen. I osi motiv nou pour fer plis zefor pour ed zot. Bann ansyen i bezwen ankouraz e felisit bann frer ek ser ki demontre lanmour fidel pour lezot, ler sa bann frer ek ser i bezwen ganny ankouraze e felisite. Ler bann ki ti bezwen led i reganny zot lazwa ek zot lafors pour kontinyen servi Zeova, sa i fer nou annan plis lazwa. (Akt 20:35) Me ki sa rezon pli enportan pour nou kontinyen demontre lanmour fidel? Nou anvi swiv legzanp Zeova e nou anvi fer Zeova, sa enn ki “annan en kantite lanmour fidel” kontan.​—Egz. 34:6, NWT; Ps. 33:22, NWT.