LESON 46
Akoz ou bezwen dedye ou lavi avek Zeova e batize?
Ou dedye ou lavi avek Zeova ler ou promet li dan en lapriyer ki ou pou ador zis li e met li premye dan ou lavi. (Psonm 40:8) Apre ou batize. Ler ou fer sa, ou montre lezot ki ou’n dedye ou lavi avek Bondye. Sa desizyon pour dedye ou lavi avek Zeova, i sa desizyon pli enportan ki ou pou fer dan ou lavi. Kwa ki pou pous ou pour fer sa desizyon sitan enportan ki pou sanz ou lavi?
1. Kwa ki pous en dimoun pour dedye son lavi avek Bondye?
Lanmour ki pous nou pour dedye nou lavi avek Zeova. (1 Zan 4:10, 19) Labib i ankouraz nou pour: “Kontan Zeova ou Bondye avek tou ou leker, avek tou ou nanm, avek tou ou lespri e avek tou ou lafors.” (Mark 12:30) Nou montre ki nou kontan Bondye pa zis par sa ki nou dir me osi par sa ki nou fer. Zis parey de dimoun ki kontan kanmarad i deside pour marye, nou osi nou lanmour pour Zeova i pous nou pour dedye nou lavi avek li e batize.
2. Ki benediksyon Zeova i donn son bann Temwen ki batize?
Ler ou batize, ou pou form parti fanmir ere Zeova. Apre ou pou santi son lanmour pour ou dan plizyer fason e ou pou vin pli pros avek li ankor. (Lir Malaki 3:16-18.) Apard ki annan Zeova konman ou Papa, ou pou osi annan bann frer ek ser spirityel partou dan lemonn ki kontan li e kontan ou. (Lir Mark 10:29, 30.) Byensir, ou bezwen fer serten keksoz avan ou batize. Ou bezwen aprann konn Zeova, kontan li e annan lafwa dan son Garson. Finalman, ou bezwen dedye ou lavi avek Zeova. Si ou fer sa bann keksoz e apre batize, ou pou lo sa semen pour viv pour touzour. Parol Bondye i dir: “Batenm . . . pe sov zot.”—1 Pyer 3:21.
AL PLI O PROFON
Vwar akoz i enportan pour dedye ou lavi avek Zeova e batize.
3. Nou tou nou bezwen swazir lekel ki nou pou servi
Serten Izraelit ti krwar ki zot kapab ador Zeova e an menm tan ador en fo Bondye ki apel Baal. Me Zeova ti anvoy son profet Eliya pour koriz sa move pwennvi ki zot ti annan. Lir 1 Lerwa 18:21 e apre reponn sa kestyon:
Ki swa bann Izraelit ti bezwen fer?
Nou osi, parey bann Izraelit nou bezwen swazir lekel ki nou pou ador. Lir Lik 16:13 e apre reponn sa bann kestyon:
Akoz nou pa kapab ador Zeova an menm tan ki nou ador en dimoun ouswa en lot keksoz?
Ki mannyer nou montre Zeova ki nou’n swazir pour ador li?
4. Reflesi lo sa lanmour ki Zeova i annan pour ou
Zeova in donn nou bokou kado presye. Ki nou kapab donn li? Zwe sa VIDEO.
Ki serten fason Zeova in montre ki i kontan ou? Lir Psonm 104:14, 15 ek 1 Zan 4:9, 10 e apre reponn sa bann kestyon:
Ki kado Zeova in donn ou ki ou vreman apresye?
Ki mannyer sa bann kado i fer ou santi anver li?
Ler nou ganny en kado ki nou vreman kontan, nou anvi montre lapresyasyon anver sa dimoun ki’n donn nou sa kado. Lir Deterononm 16:17 e apre reponn sa kestyon:
Ler ou mazin tou sa ki Zeova in fer pour ou, ki ou anvi donn li an retour?
5. Dedikasyon i anmenn bokou benediksyon
Bokou dimoun i krwar ki popilarite, en bon karyer oubyen larzan pou fer zot zwaye. Me eski sa i leka? Zwe sa VIDEO e apre reponn sa bann kestyon.
Kantmenm sa atlet dan sa video ti kontan zwe foutbol, akoz i ti deside pour kit sa karyer?
I ti deside pour dedye son lavi avek Zeova, pa avek foutbol. Ou krwar i ti fer sa bon desizyon? Akoz?
Avan zapot Pol ti vin en Kretyen, i ti annan en bon karyer. I ti’n etidye lalwa Zwif avek en ansenyan tre renonmen. Me i ti les tousala deryer pour li vin en Kretyen. Eski Pol ti annan okenn regre? Lir Filipyen 3:8 e apre reponn sa bann kestyon:
Akoz Pol i dir ki i konsider tou sa ki i ti fer avan i ti vin en Kretyen konman “salte”?
Ki i ti gannyen dan plas tousala?
Ki diferans i annan ant servi Zeova e servi ou lavi pour fer lezot keksoz?
Ler Pol ti vin en Kretyen i ti ganny plis ki sa ki i ti’n kit deryer
SERTEN DIMOUN I DIR: “I pa fer sans pour donn Bondye ou lavi.”
Akoz ou krwar i fer sans pour dedye ou lavi avek Zeova?
REZIMEN
Nou oule dedye nou lavi avek Zeova e batize akoz nou kontan li.
Revizyon
Akoz Zeova i merite ki nou kontan li e ador li avek tou nou leker?
Ki rekonpans Zeova i donn son bann Temwen ki’n batize?
Eski ou ti a kontan dedye ou lavi avek Zeova?
FER PLIS RESERS
Vwar akoz en santer ek en atlet ti swazir pour dedye zot lavi avek Zeova.
Bann zenn i demande—Ki mon pou fer avek mon lavi?—Zot leksperyans (6:54)
Vwar lezot rezon ki pous nou pour dedye nou lavi avek Zeova.
“Akfer dedye ou lavi avek Zeova?” (Latour Veyer 1 Zanvye 2010)
Dan sa video lanmizik, gete konman bann ki’n dedye zot lavi avek Zeova i vreman zwaye.
Dan sa zistwar “For Years I Wondered, ‘Why Are We Here?’” gete kwa ki ti pous en madanm pour reflesir lo kwa ki pli enportan pour li.
“The Bible Changes Lives” (Latour Veyer 1 Novanm 2012 an Angle)