Ki mannyer pour gard en pwennvi pozitif

“Si en zonm i viv bokou letan, i devret apresye sak sa bann lannen.”​—EKLE. 11:8.

KI OU POU REPONN?

Kwa ki kapab fer li difisil pour gard en pwennvi pozitif?

Ki mannyer nou kapab servi Labib pour gard en pwennvi pozitif?

Ki mannyer leksperyans sa pov vev, Eliya e sa ekriven Psonm 102 i ed nou pour devlop en pwennvi pozitif?

 1. Ki bann benediksyon sorti kot Zeova ki kapab ed nou trouv lazwa?

ZEOVA i anvi nou ere e i devers bokou benediksyon lo nou ki ed nou trouv lazwa. Enn parmi bann benediksyon se ki nou vivan. Alor, nou kapab servi nou lavi pour loue Bondye parski i’n atir nou ver vre ladorasyon. (Ps. 144:15; Zan 6:44) Zeova i asir nou ki i kontan nou e i ed nou pour andire dan son servis. (Zer. 31:3; 2 Kor. 4:16) Nou kontan ki nou dan en paradi spirityel, kot nou ganny bann nouritir spirityel annabondans e lanmour nou bann frer ek ser dan lemonn antye. An plis ki sa, nou annan en zoli lespwar pour en lavenir merveye.

 2. Kwa ki serten serviter fidel Bondye pe lit avek?

² Me, menm si nou annan bokou rezon pour nou zwaye, serten serviter fidel Bondye i lite kont bann panse negatif ki zot annan lo zot lekor. Zot panse ki zot menm e zot servis napa bokou valer dan lizye Zeova. Pour bann ki kontinyen annan sa bann santiman negatif, sa lide rezwir “sa bann lannen” i kapab zis en rev. Pour zot, sak zour, lavi i kapab paret zis bann moman difisil.​—Ekle. 11:8.

 3. Kwa ki kapab fer nou konmans annan bann santiman negatif?

³ Serten frer ek ser i konmans annan bann santiman negatif petet akoz bann dezapwentman, maladi oubyen zot dan laz e pa kapab fer bokou. (Ps. 71:9; Prov. 13:12; Ekle. 7:7) Deplis, tou Kretyen i bezwen konpran ki leker i tret e i kapab fer nou krwar ki nou pa vo nanryen menm si Bondye i pran plezir dan nou. (Zer. 17:9; 1 Zan 3:20) Dyab i fer fo lakizasyon lo bann serviter Bondye. Bann ki annan menm fason panse avek Satan i kapab fer nou krwar ki nou pa vo nanryen dan lizye Bondye parey Elifaz ti fer avek Zob. Sa ti en fo lakizasyon ki Satan ti fer lo Zob e i pe fer menm parey avek nou ozordi.​—Zob 4:18, 19.

 4. Ki nou pou vwar dan sa lartik?

⁴ Zeova ti fer kler dan Labib ki i pou avek bann ki “mars dan en vale fernwanr.” (Ps. 23:4) En fason ki i avek nou i par mwayen son Parol. Labib i “pisans Bondye e ki kapab detri bann kan lennmi” andotmo bann rezonnman ki’n anrasinen dan nou ki kapab enkli bann fo konsep ek panse negatif. (2 Kor. 10:4, 5) Alor annou vwar ki mannyer nou kapab servi Labib pour ed nou devlop e gard en pwennvi pozitif. Ou pou kapab personnelman benefisye e osi vwar bann fason pour ankouraz lezot.

SERVI LABIB POUR DEVLOP EN PWENNVI POZITIF

 5. Ki tes ki kapab ed nou pour annan en pwennvi pozitif?

⁵ Zapot Pol ti dekrir serten keksoz ki kapab ed nou devlop en pwennvi pozitif. I ti ankouraz kongregasyon Korent: “Kontinyen teste pour vwar si zot dan lafwa.” (2 Kor. 13:5) “Lafwa” i tou bann krwayans Kretyen ki sorti dan Labib. Si nou parol ek aksyon i annakor avek sa bann krwayans, alor nou’n reisi pas sa tes e nou montre ki nou “dan lafwa.” Byensir, nou devret viv nou lavi annakor avek tou lansennyman Kretyen. Nou pa kapab swazir ki lansennyman nou pou swiv, me nou devret obei zot tou.​—Zak 2:10, 11.

 6. Akoz nou bezwen teste nou lekor pour vwar ‘si nou dan lafwa’? (Vwar portre lo paz 12.)

⁶ Petet serten i ezite fer sa tes, akoz zot santi ki zot pa pou reisi pas sa tes. Par kont, fason ki Zeova i vwar nou, i pli enportan ki fason ki nou vwar nou lekor e son fason panse i pli siperyer ki pour nou. (Iza. 55:8, 9) I egzamin son bann adorater, pa pour kondann zot, me pour vwar zot bon kalite e pour ed zot. Kan ou servi Parol Bondye pour teste ou lekor pour vwar ‘si ou dan lafwa,’ ou pou vwar ou lekor parey Bondye i vwar ou. Sa lasirans ki Labib i donn ou i kapab ranplas sa nide ki ou pa vo nanryen dan lizye Bondye e rasir ou ki ou presye dan lizye Zeova. Sa i parey ler ou ouver en rido pour les antre laklerte dan en lasanm fernwanr.

 7. Ki mannyer nou kapab benefisye avek legzanp bann dimoun fidel dan Labib?

⁷ Pli bon fason pour egzamin nou lekor i par medit lo legzanp bann dimoun fidel ki ganny mansyonnen dan Labib. Konpar zot sirkonstans oubyen santiman avek sa ki pour ou e vwar ki mannyer ou ti pou reakte dan zot sityasyon. Annou vwar trwa legzanp ki montre ki mannyer ou kapab servi Labib pour verifye si ou “dan lafwa” e ki pou fer ou devlop en pwennvi pozitif lo ou lekor.

SA POV VEV

8, 9. (a) Ki ti sityasyon sa pov vev? (b) Ki bann santiman negatif petet sa vev ti kapab annan?

⁸ Kot tanp Zerizalenm, Zezi ti obzerv en pov vev. Legzanp sa pov vev i kapab ed nou pour gard en pwennvi pozitif malgre nou bann limit. (Lir Lik 21:1-4.) Egzamin sirkonstans sa vev: I pa ti zis bezwen fer fas avek lanmor son msye me osi fer fas avek sa sityasyon kot bann sef relizye ti pe “eksplwat bann vev e pran posesyon zot byen” dan plas ed bann ki dan bezwen. (Lik 20:47) I ti sitan pov ki i ti kapab kontribye zis lakantite larzan ki en labourer i gannyen dan detrwa minit.

⁹ Esey mazinen ki mannyer sa vev ti santi anmezir ki i ti pe antre dan lakour tanp avek son de pti sou. Eski i ti pe mazin konsernan sa ptigin larzan ki i ti pe al kontribye konpare avek sa ki i ti pou kapab donnen si son msye ti ankor vivan? Eski i ti pou santi li anbarase ler i ti pou vwar lakantite larzan ki bann ki ti par devan li ti pe donnen, oubyen eski i ti vreman vo lapenn fer son lofrann? Menm si i ti annan sa bann santiman, toudmenm i ti fer sa ki i ti kapab pour vre ladorasyon.

10. Ki mannyer Zezi ti montre ki sa vev ti annan gran valer dan lizye Bondye?

¹⁰ Zezi ti montre ki tou le de, sa vev ek son kontribisyon ti annan valer dan lizye Zeova. I ti dir ki sa vev in “met plis ki tou lezot [bann dimoun ris].” Son kontribisyon ti pou melanz avek sa ki pour lezot, me Zezi ti sirtou atir latansyon lo devosyon sa vev. Bann ki ti kont larzan pli tar pa ti vreman konnen ki kantite presye sa de pti sou ti ete e sa enn ki ti’n fer sa kontribisyon ti presye dan lizye Zeova. Toudmenm, se pwennvi Bondye ki ti pli enportan, non pa sa ki lezot dimoun ti panse oubyen fason ki sa vev ti vwar son lekor. Eski ou kapab servi sa resi pour teste si ou dan lafwa?

11. Ki nou kapab aprann atraver resi sa vev?

¹¹ Ou bann sirkonstans i relye direkteman avek sa ki ou kapab ofer Zeova. Bann dimoun ki a laz oubyen enfirm pa kapab pas sa kantite letan ki zot ti a voudre dan predikasyon. Eski zot ti pou annan rezon demande si i vo lapenn pour met en rapor? Menm si ou pa sitan limite, ou kapab santi ki sa ki ou pe fer i en ptigin konpare avek sa kantite ki pep Bondye i fer sak lannen. Toudmenm, atraver sa resi lo sa pov vev nou aprann ki Zeova i remark e apresye tou sa ki nou fer pour li, espesyalman kan nou pas dan bann sityasyon difisil. Mazin lo sa ki ou’n fer lannen pase dan ladorasyon Zeova. Eski enn sa bann erdtan ki ou ti donn Zeova ti demann sakrifis lo ou par? Si wi, ou kapab asire ki Zeova i apresye tou sa ki ou’n fer pandan sa bann erdtan. Alor, parey sa pov vev, ou pe fer tou sa ki ou kapab dan servis Zeova e ou annan tou rezon pour krwar ki ou “dan lafwa.”

“PRAN MON LAVI”

12-14. (a) Ki lefe bann pwennvi negatif ti annan lo Eliya? (b) Akoz Eliya ti kapab santi koumsa?

¹² Profet Eliya ti fidel avek Zeova e i ti annan en lafwa for. Par kont, en fwa i ti santi li sitan dekouraze ki i ti demann Zeova pour touy li par dir: “Mon’n ganny ase! Aprezan, Zeova pran mon lavi.” (1 Rwa. 19:4) Bann ki pa’n deza eksperyans dezespwar parey Eliya i kapab dir ki lapriyer Eliya i konmsi i ti pe “koz san reflesir.” (Zob 6:3) Selman, son parol ti reflekte sa ki ti vreman resanti. Me remarke, olye reprimann Eliya akoz i ti anvi mor, Zeova ti ed li.

¹³ Ki mannyer Eliya ti’n arive santi koumsa? Pa bokou letan avan sa lensidan, i ti’n fer en tes devan bann Izraelit pour prouve ki Zeova i sa vre Bondye e an rezilta sa 450 profet Baal ti ganny touye. (1 Rwa. 18:37-40) Probableman, Eliya ti panse ki pep Bondye ti pou retourn ver vre ladorasyon, me sa pa ti arive. Move larenn Zezabel ti anvoy en mesaz pour Eliya konmkwa i ti pe fer plan pour touy li. Vi ki i pa ti anvi perdi son lavi, Eliya ti sov dan sid, travers Zida e i ti ariv dan dezer.​—1 Rwa. 19:2-4.

¹⁴ Ler i ti tousel, Eliya ti konmans reflesir, e aparaman i ti vwar son travay konman profet initil. I ti dir Zeova: “Mon pa pli byen ki mon bann zanset.” I ti santi li initil zis parey lapousyer ek lezo son bann zanset. Annefe, i ti teste son lekor dapre son prop standar e i ti’n fini krwar ki i pa ti vo nanryen dan lizye Zeova e osi devan lezot.

15. Ki mannyer Bondye ti asir Eliya ki i ti ankor annan valer pour li?

¹⁵ Me Bondye Tou Pwisan ti annan en pwennvi diferan lo Eliya. Eliya ti toultan annan valer dan lizye Zeova e Zeova ti pran bann mezir neseser pour fer li konn sa. Bondye ti anvoy en lanz pour ankouraz Eliya. Zeova ti osi donn li manze ek delo ki ti pou soutenir li pandan sa 40 zour ki i ti pou marse ziska Montanny Oreb. An plis ki sa, Bondye ti koriz fason panse Eliya konmkwa i ti napa okenn Izraelit ki ti’n reste fidel avek Zeova. Pli enportan ankor, Bondye ti donn Eliya bann nouvo responsabilite, ki i ti aksepte. Eliya ti benefisye avek led Zeova e i ti retourn dan son travay konman en profet byen devoue.​—1 Rwa. 19:5-8, 15-19.

16. Ki serten fason petet Bondye in soutenir ou?

¹⁶ Legzanp Eliya i kapab ed ou pour konnen ki ou ankor dan lafwa e fer ou annan en pwennvi pozitif. Premyerman, mazin lo bann fason ki Zeova in soutenir ou. Eski enn son bann serviter, petet en ansyen oubyen en Kretyen matir, in ed ou kan ou ti dan bezwen? (Gal. 6:2) Eski ou’n nouri ou spirityelman par lir Labib, nou bann piblikasyon oubyen asiste bann renyon kongregasyon? La prosenn fwa ki ou benefisye avek enn sa bann fason, mazin sa vre Sours ou led e ofer en lapriyer remersiman avek Li.​—Ps. 121:1, 2.

17. Ki bann kalite ki annan valer pour Zeova?

¹⁷ Dezyenmman, aksepte ki ou kapab ganny anbete par en pwennvi negatif. Se lafason ki Bondye i vwar nou ki enportan. (Lir Romen 14:4.) Nou devosyon ek fidelite i annan plis valer ki nou bann lakonplisman dan lizye Zeova. I kapab ki parey Eliya, ou’n fer bokou pour Zeova san ki ou realize. I kapab ki ou’n ankouraz serten dan kongregasyon oubyen ou’n fer serten dan teritwar konn laverite atraver ou bann zefor.

18. Ler Zeova i donn nou en responsabilite, ki sa i prouve?

¹⁸ Finalman, vwar sak responsabilite ki Zeova i donn ou konman en laprev ki i avek ou. (Zer. 20:11) Parey Eliya, ou kapab santi ou dekouraze akoz ou servis pa prodiktif oubyen akoz i paret enposib pour ou atenn serten lobzektif spirityel. Kantmenm sa, ou annan sa pli gran privilez e sa i pres sa bon nouvel e port non Bondye. Si ou reste fidel, dan en sans, sa bann parol dan enn parmi bann parabol Zezi i kapab aplik pour ou: “Vin partaz mon lazwa!”​—Mat. 25:23.

LAPRIYER SA ENN KI DEKOURAZE

19. Ki sityasyon sa ekriven Psonm 102 ti fer fas avek?

¹⁹ Sa ekriven Psonm 102 ti dan dezespwar. I ti deprimen, dekouraze, pe soufer avek douler fizik e emosyonnel e i ti nepli ase lafors pour fer fas avek son bann problenm. (Ps. 102, lentrodiksyon) Son parol i endike ki i ti preokipe avek son douler, lasolitid e son bann santiman personnel. (Ps. 102:3, 4, 6, 11) I ti krwar ki Zeova ti anvi rezet li.​—Ps. 102:10.

20. Ki mannyer lapriyer i kapab ed en dimoun sirmont bann panse negatif?

²⁰ Pourtan, sa psalmis ti ankor kapab servi son lavi pour loue Zeova. (Lir Psonm 102:19-21.a) Parey nou vwar dan Psonm 102, menm bann ki dan lafwa i kapab pe soufer e pe lite pour pa konsantre lo zot problenm. Sa psalmis ti santi “parey en zwazo ki li tousel lo en twa,” konmsi i ti annan zis son bann problenm dan son kote. (Ps. 102:7) Si zanmen ou santi parey, devid ou leker avek Zeova parey sa psalmis ti fer. Si ou fer lapriyer sa enn ki dekouraze vin ou lapriyer, sa pou kapab ed ou fer fas avek ou bann panse negatif. Zeova i promet ki “i pou port latansyon lo lapriyer bann ki pov, i pa pou mepriz zot lapriyer.” (Ps. 102:17) Annan konfyans dan sa promes.

21. Ki mannyer pwennvi bann ki pe lite kont zot bann santiman negatif i kapab vin pli pozitif?

²¹ Psonm 102 i osi montre ki mannyer ou kapab annan en pwennvi pli pozitif. Sa psalmis ti fer sa par konsantre plis lo son relasyon avek Zeova. (Ps. 102:12, 27) I ti trouv rekonfor lefet ki i ti konnen ki Zeova pou toultan la pour soutenir son pep kan zot pe fer fas avek bann leprev. Si ou bann santiman negatif i anpes ou fer ou maksimonm dan servis Bondye, met tou keksoz dan lapriyer. Demann Bondye pour ekout ou lapriyer pa zis pour soulaz ou dan ou bann difikilte me pour osi fer “ki non Zeova i ganny anonse.”​—Ps. 102:20, 21.

22. Ki mannyer sakenn de nou i kapab fer plezir Zeova?

²² Wi, nou kapab servi Labib pour prouv avek nou lekor ki nou ankor dan lafwa e annan valer dan lizye Zeova. I vre ki dan sa lemonn nou pa kapab elimin tou bann santiman negatif oubyen dekourazman. Me, sakenn de nou i kapab fer plezir Zeova e ganny delivrans par fidelman reste dan son servis.​—Mat. 24:13.

[Not anba lo paz]

[Portre lo paz 14]

Ki leson ou aprann par legzanp sa pov vev? (Vwar paragraf 8-10)