Leson atraver en lapriyer byen prepare

“Ki zot beni ou gran non.”​—NEE. 9:5.

ESKI OU KAPAB REPONN?

Ki bon keksoz bann Izraelit ti fer kan bann Levit ti rasanble zot?

Ki legzanp dan listwar ki montre ki Zeova in viv annakor avek sinifikasyon son non?

Ki leson nou aprann avek lapriyer bann Levit?

 1. Ki rasanbleman pep Bondye nou pou egzaminen e ki nou devret demann nou lekor?

“LEVE, beni Zeova zot Bondye depi en letan endefini ziska en letan endefini.” Sanmenm ki pep Bondye dan letan lontan ki ti’n rasanble ansanm ti dir dan en lapriyer ki form parti sa pli gran lapriyer ki’n ganny rikorde dan Labib. (Nee. 9:5) Sa rasanbleman ti ganny fer Zerizalenm, vennkatriyenm zour pandan Tisri, setyenm mwan, an 455 A.N.L., dapre kalandriye Zwif. Anmezir nou egzamin bann levennman ki ti arive avan sa zour spesyal, demann ou lekor: ‘Ki sa bon labitid ki ti ede pour ki sa lokazyon ti en sikse? Ki lezot leson mon kapab aprann avek sa lapriyer byen prepare?’​—Ps. 141:2.

EN MWAN SPESYAL

 2. Ki bon legzanp bann Izraelit in kite pour nou kan zot ti rasanble apre ki zot ti’n fini konstri miray Zerizalenm?

² En mwan avan ki sa rasanbleman ti ganny fer, bann Zwif ti’n fek fini rekonstri miray Zerizalenm. (Nee. 6:15) Pep Bondye ti fini sa travay dan zis 52 zour e zot ti konmans port en pli gran latansyon lo zot bann bezwen spirityel. Alor, premye zour mwan Tisri, zot ti rasanble ansanm kot laplas piblik pour ekout Ezra ek lezot Levit lir aotvwa e eksplik Lalwa Bondye. (Desen 1) Bann fanmir antye enkli “tou bann ki ti ase entelizan pour ekoute” ti debout e ekoute “depi bomaten ziska midi.” Pa sa i en bon legzanp pour bann parmi nou ozordi ki pe asiste renyon dan bann Lasal Rwayonm byen konfortab! Me, pandan sa bann moman, eski par ler ou santi ki ou lespri pe vagabonde ouswa ou pe konmans mazin bann keksoz ki pa enportan? Si wi, get ankor en kou legzanp bann Izraelit dan letan lontan ki pa ti zis ekoute, me ki ti pran aker sa ki zot ti pe tande, ziska en degre ki zot ti konmans plere akoz konman en nasyon zot pa ti pe arive obei Lalwa Bondye.​—Nee. 8:1-9.

 3. Ki lord bann Izraelit ti obeir?

³ Par kont, sa pa ti en letan pour konfes pese an piblik. Vi ki i ti en zour lafet, i ti devret en moman zwaye pour ador Zeova. (Desen 2) (Nom. 29:1) Alor, Neemya ti dir lepep: “Ale, manz bann keksoz gra e bwar bann keksoz dou e anvoy bann porsyon kot sa enn ki nanryen pa’n ganny prepare pour li, akoz sa zour i sen pour nou Senyer, e pa bezwen tris, akoz lazwa Zeova i zot latour for.” I byen pour note ki lepep ti obeir e sa zour zot ti dan “en gran lazwa.”​—Nee. 8:10-12.

 4. Ki bann sef fanmir Izraelit ti fer e ki zot ti dekouver ki ti en laspe vreman enportan sa Lafet bann Payot?

⁴ Lannmen, bann sef fanmir ti rasanble ansanm pour vwar ki mannyer sa nasyon ti pou kapab pli byen obeir Lalwa Bondye. (Desen 3) Dapre zot letid lo Lekritir, zot ti dekouver ki pandan setyenm mwan i ti sipoze annan Lafet bann Payot ensi ki lasanble solannel, depi kenzyenm zour ziska venndezyenm zour mwan Tisri, alor zot ti konmans fer bann preparasyon. (Desen 4) Sa Lafet bann Payot ti sa enn pli meyer depi lepok Zozye e akoz sa, lepep ti dan en “tre gran lazwa.” En laspe enportan sa lafet se ler Lalwa Bondye ti ganny lir an piblik “zour apre zour, depi premye zour ziska dernyen zour.”​—Nee. 8:13-18.

EN ZOUR KONFESYON

 5. Ki pep Bondye ti fer zis avan ki bann Levit ti reprezant zot dan lapriyer avek Zeova?

⁵ De zour pli tar, i ti’n ariv ler pour bann Izraelit konfes zot pese an piblik pour lapenn zot pa ti’n reisi obeir Lalwa Bondye. Sa zour pa ti en zour festen. Plito, pep Bondye ti zennen e met lenz goni konman en siny ki zot ti dan dey. Ankor enn fwa, Lalwa Bondye ti ganny lir avek lepep pour apepre trwa-z-erdtan bomaten. Apremidi, zot ti pe “konfese e prostern devan Zeova zot Bondye.” (Desen 5) Apre sa, bann Levit ti reprezant lepep atraver en lapriyer byen prepare. (Desen 6)​—Nee. 9:1-4.

 6. Kwa ki ti ede pour ki bann Levit i fer en lapriyer ki fer sans e ki leson nou aprann?

⁶ San okenn dout, lefet ki bann Levit ti abitye lir Lalwa Bondye, sa ti ed zot pour prepar sa lapriyer ki fer sans. Sa premye dis verse i santre zis lo bann kalite ek travay Zeova. Dan larestan sa lapriyer, “gran mizerikord” Bondye i ganny repete e i osi montre ki bann Izraelit ti admet ki zot pa ti merite ganny trete dan sa bon fason. (Nee. 9:19, 27, 28, 31) Si nou fer parey sa bann Levit, setadir, medit lo Parol Bondye tou le zour e les Zeova koz avek nou avan ki nou priy li, nou lapriyer osi pou byen prepare e fer sans.​—Ps. 1:1, 2.

 7. Ki bann Levit ti demann Bondye e ki nou aprann avek sa?

⁷ Dan sa lapriyer i annan zis en senp demann. I ganny trouve dan dezyenm parti verse 32 ki dir: “Aprezan, O nou Bondye, sa Bondye tre o, pwisan e efreyan, ki gard son lalyans ek labonte leker, pa les tou sa difikilte ki devan nou, nou bann lerwa, nou bann prens, nou bann pret, nou bann profet, nou bann zanset ek ou pep antye depi lepok lerwa Lasiri ziska sa zour, paret pti devan ou.” Dan sa fason, bann Levit in kit en bon legzanp pour loue e remersye Zeova premyerman avan fer okenn demann personnel dan nou lapriyer.

LOUE GRAN NON BONDYE

8, 9. (a) Dan ki fason ki demontre limilite bann Levit ti konmans zot lapriyer? (b) Ki sa de larme lesyel ki bann Levit ti pe refer avek?

⁸ Menm si zot lapriyer ti’n ganny byen prepare, sa bann Levit ti annan limilite e santi ki bann mo ki zot ti servi pa ti ase pour eksprim sa louanz ki Zeova ti vreman merite. Sanmenm ki sa lapriyer i konmans avek sa senp siplikasyon: “Ki zot beni ou gran non, ki ganny met par lao tou benediksyon ek louanz.”​—Nee. 9:5.

⁹ Sa lapriyer i kontinyen: “Zis ou ki Zeova, ou menm ou ki’n fer lesyel, menm lesyel bann lesyel ek tou zot larme, later ek tou sa ki lo la, lanmer ek tou sa ki ladan, e ou pe gard zot tou vivan, e larme bann lesyel pe salye ou.” (Nee. 9:6) Wi, Zeova in kre liniver antye, i’n kre en kantite galaksi ranpli avek zetwal. Dan menm fason, i’n kre tou keksoz lo nou zoli plannet, ensi ki sa abilite merveye ki i annan pour soutenir sa varyete keksoz vivan ki kontinyen reprodwir dapre zot lespes. Bann lanz sen Bondye ti vwar tou sa la ganny kree, e zot menm ganny dekrir konman “larme bann lesyel.” (1 Rwa. 22:19; Zob 38:4, 7) Deplis, bann lanz i fer lavolonte Bondye avek limilite par servi bann imen ki pou “ganny sove.” (Ebr. 1:14) Bann lanz in kit en zoli legzanp pour nou anmezir nou servi Zeova dan linite parey en larme byen formen, pa i vre!​—1 Kor. 14:33, 40.

10. Ki nou aprann avek lafason ki Bondye ti tret Abraam?

¹⁰ Apre sa, bann Levit ti konsantre lo lafason ki Bondye ti tret Abram, ki a laz 99 an i pa ti ankor ganny okenn garson avek son madanm Sarai ki ti steril. I ti dan sa menm letan ki Zeova ti sanz son non pour vin Abraam ki vedir “papa en kantite dimoun.” (Zen. 17:1-6, 15, 16) Bondye ti osi promet Abraam ki son desandans ti pou erit pei Kanaan. Bann imen i souvan oubliy sa ki zot promet, me Zeova li non. Lapriyer bann Levit i montre sa, i dir: “Ou menm Zeova sa vre Bondye ki ti swazir Abram e tir li Our bann Kaldeen e sanz son non pour vin Abraam. E ou ti trouve ki son leker ti fidel devan ou, alor ou ti fer en lalyans legal avek li konmkwa ou pou donn li pei bann Kananeen, . . . pour donn son desandans, e ou ti akonpli ou parol akoz ou drwat.” (Nee. 9:7, 8) Annou imit sa fason drwat Bondye par touzour fer bokou zefor pour fer sa ki nou dir nou pou fer.​—Mat. 5:37.

RAPEL SA KI ZEOVA IN FER

11, 12. Eksplik sinifikasyon non Zeova e ki mannyer i ti viv annakor avek son non dan lafason ki i ti tret desandans Abraam.

¹¹ Non Zeova i vedir “I fer arive,” e sa i montre ki Bondye i ptitapti akonplir son promes. Nou trouv sa byen klerman atraver lafason ki Bondye ti tret desandans Abraam kan zot ti lesklav bann Ezipsyen. Sa letan, i ti paret enposib ki sa nasyon antye ti pou kapab ganny libere e al reste dan Later Promiz. Par kont, atraver bann aksyon ki i ti pran progresivman, Bondye ti realiz son bann promes, e dan sa fason i ti prouve ki zis li tousel ki merit annan sa non Zeova.

¹² Sa lapriyer ki Neemya ti rikorde i dir sa lo Zeova: “Ou ti vwar labi lo nou bann granpye Lezip e ou ti tann zot leokri kot Lanmer Rouz. Alor ou ti fer bann siny ek mirak kont Faraon, kont tou son bann serviter ek tou bann dimoun dan son pei, akoz ou ti konnen ki zot in azir avek larogans kont zot e ou ou ti fer en non pour ou menm, parey sa zour. Ou ti separ lanmer devan zot pour ki zot travers dan milye lanmer lo later sek e sa bann ki ti pe tay deryer zot ou ti balans dan fon parey en ros dan delo ki koul for.” Sa lapriyer i kontinyen par dir lezot keksoz ki Zeova ti fer pour son pep: “Ou ti fer bann Kananeen, bann zabitan sa pei soumet avek zot. . . . Alor zot ti konkerir bann lavil fortifye avek en bon later, zot ti pran posesyon bann lakaz ki ti ranpli avek bann bon keksoz, bann pwi ki ti’n fini fouye, bann pye rezen ek bann plantasyon zoliv ek bann pye fri annabondans. Alor zot ti manze, zot ti rasazye e zot ti vin gra e zot ti viv byen gras a ou gran labonte.”​—Nee. 9:9-11, 24, 25.

13. Ki mannyer Zeova ti pran swen avek bezwen spirityel bann Izraelit, e ki mannyer zot ti reazir?

¹³ I ti annan plizyer aksyon ki Bondye ti pran ptitapti pour akonpli son plan. Par egzanp, pa tro lontan apre ki bann Izraelit ti kit Lezip, Zeova ti pran swen avek zot bann bezwen spirityel. Dan zot lapriyer pour Bondye, bann Levit ti dir: “Ou ti desann lo Montanny Sinai . . . ou ti koz avek zot dan lesyel e ou ti donn zot ou bann zizman drwat ek ou bann lalwa laverite, bann bon regilasyon ek komannman.” (Nee. 9:13) Zeova ti esey ansenny son pep pour ki zot diny pour port son non sen konman bann zeritye Later Promiz, me zot pa ti fer bann keksoz ki zot ti aprann.​—Lir Neemya 9:16-18.a

NESESITE POUR GANNY DISIPLINEN

14, 15. (a) Ki mannyer Zeova ti demontre mizerikord anver son pep dezobeisan? (b) Ki nou aprann avek lafason ki Bondye ti tret son pep swazir?

¹⁴ Dan zot lapriyer, bann Levit ti refer avek de pese ki bann Izraelit ti komet en pti pe letan apre ki zot ti’n promet pour obei Lalwa Bondye kot Montanny Sinai. Zot ti merit lanmor pour sa ki zot ti fer. Me sa lapriyer ki loue Zeova i dir: “Akoz ou gran mizerikord ou pa ti kit zot dan dezer. . . . Pour karant an ou ti donn zot manze. . . . Zot pa ti mank nanryen. Zot lenz pa ti ize, e menm zot lipye pa ti anfle.” (Nee. 9:19, 21) Ozordi, Zeova i osi donn nou tou sa ki nou bezwen pour servi li fidelman. Annou pa zanmen vin parey sa plizyer milye Izraelit ki ti mor dan dezer akoz zot dezobeisans ek mank lafwa. Anfet, tou sa la “in ganny ekri konman en lavertisman pour nou, ki’n ariv dan letan lafen.”​—1 Kor. 10:1-11.

¹⁵ Malerezman, apre ki zot ti’n antre dan Later Promiz, bann Izraelit ti konmans ador bann bondye Kananeen. Sa ladorasyon ti enn ki ti kriyel e ranpli avek limoralite seksyel. Alor, Zeova ti les lezot nasyon dan zalantour oprim son pep swazir. Kan zot ti repantir, avek mizerikord Zeova ti pardonn zot e delivre zot dan lanmen zot lennmi. Sa ti arive “plizyer fwa.” (Lir Neemya 9:26-28, 31.b) Bann Levit ti konfese: “Me pandan tou sa bann lannen ou pa’n azir dan en fason dir avek zot e ou ti kontinyen temwanny kont zot par mwayen ou lespri par servi ou bann profet, e zot pa ti ekoute. Finalman ou ti les zot tonm dan lanmen bann nasyon.”​—Nee. 9:30.

16, 17. (a) Apre legzil, ki mannyer sityasyon bann Izraelit ti diferan avek ler zot zanset ti antre dan Later Promiz pour premye fwa? (b) Ki bann Izraelit ti dir e ki promes zot ti fer?

¹⁶ Menm apre ki zot ti’n retournen sorti an egzil, bann Izraelit ti kontinyen dezobeir. Ki diferans i ti annan? Bann Levit ti kontinyen priye: “Gete! Ozordi nou bann lesklav, e tandis ki sa pei ki ou ti donn nou zanset pour manz son fri ek son bann bon keksoz, gete! nou lesklav dan sa pei, e sa ki i prodwir annabondans i pour bann lerwa ki ou’n etablir lo nou akoz nou bann pese, e . . . nou dan en gran ladetres.”​—Nee. 9:36, 37.

¹⁷ Eski bann Levit ti pe esey dir ki Bondye ti enzis lefet ki i ti les sa maler arive? Sirman non. Zot ti dir: “Ou drwat an rapor avek tou sa ki’n ariv nou, akoz ou’n azir avek fidelite, me nou ki’n azir dan en move fason.” (Nee. 9:33) Apre sa, zot ti termin sa lapriyer avek en promes ki sa nasyon ti pou obei Lalwa Bondye depi sa zour. (Lir Neemya 9:38;c 10:29.) Lefet ki zot ti fer sa promes, en dokiman ti ganny sinyen e sele par 84 sef Zwif.​—Nee. 10:1-27.

18, 19. (a) Ki nou bezwen annan pour ki nou arive sirviv ziska nouvo lemonn? (b) Ki nou pa devret aret priy lo la e akoz?

¹⁸ Nou bezwen ganny disiplinen avek Zeova pour ki nou reisi sirviv ziska dan son nouvo lemonn drwat. Zapot Pol ti demande: “Lekel sa garson ki son papa pa koriz li?” (Ebr. 12:7) Nou montre ki nou aksepte gidans Bondye dan nou lavi kan nou andire avek fidelite dan nou servis e nou les lespri sen rafin nou. Si nou fer en pese grav, nou kapab asire ki Zeova pou pardonn nou si nou vreman repantir e aksepte disiplin avek limilite.

¹⁹ Byento, Zeova pou fer en pli gran non pour son lekor konpare avek ler i ti delivre bann Izraelit Lezip. (Ezek. 38:23) Zis parey son pep dan lepase ti erit Later Promiz, tou bann Kretyen ki andire konman bann serviter fidel Zeova pou erit lavi dan en nouvo lemonn kot i pou annan ladrwatir. (2 Pyer 3:13) Vi ki i annan sa lavenir merveye devan nou, annou pa zanmen aret priye pour ki gran non Bondye i ganny sanktifye. Lot lartik pou koz lo en lot lapriyer ki nou devret azir an armoni avek pour ki nou ganny benediksyon Bondye la konmela e pour touzour.

[Not anba lo paz]

[Portre lo paz 21]

[Portre lo paz 22]

1

[Portre lo paz 22]

2

[Portre lo paz 22]

3

[Portre lo paz 23]

4

[Portre lo paz 23]

5

[Portre lo paz 23]

6