En Leritaz ki ou kapab depan lo la

“SI OU ganny en let sorti kot en dimoun ki dir i annan en leritaz pour ou, fer atansyon. I kapab ki ou’n vin target en dimoun triser.”

Sa i en lavertisman ki Servis Lapos an Letazini ti mete lo zot sit internet. Akoz zot ti bezwen averti dimoun? Parski plizyer milye dimoun ti’n ganny en let ki dir, ‘Enn ou fanmiy in mor e i’n kit en leritaz pour ou.’ An rezilta sa, bokou dimoun ti anvoy 30 dolar Ameriken oubyen plis pour en rapor ki swadizan pou eksplik zot kote sa leritaz i ete e ki mannyer zot kapab ganny li. Zot ti vreman dezapwente. Tou sa ki ti reponn ti ganny menm rapor e zot ti napa okenn posibilite pour ganny okenn keksoz.

Sa kalite trik i atrakte dimoun, parski i zwe lo dezir natirel ki imen i annan pour ganny en leritaz. Me Labib pa koz an mal lo bann ki kit en leritaz. I dir: “En dimoun ki bon pou kit en leritaz pour zanfan son bann zanfan.” (Proverb 13:22) Deplis, Zezi li menm ti dir sa parol byen renonmen e ki ganny apresye dan son Sermon lo montanny: “Byennere bann ki dou, akoz zot pou posed later.”—Matye 5:5.

Parol Zezi i fer nou mazin sa ki Lerwa David dan ansyen Izrael ti ganny enspire pour ekrir plizyer santenn lannen avan: “Bann ki annan limilite pou erit later; e zot pou rezwir dan labondans lape.”—Psonm 37:11, King James Version.

“Erit later”—pa sa i en lespwar eksitan! Me ki mannyer nou kapab asire ki sa pa zis en lot trik parey sa enn ki nou ti mansyonnen pli boner? Wi, nou kapab asire. Vi ki later i form parti kreasyon merveye Zeova, alor li konman Kreater ek Met i annan sa drwa legal pour donn sa later avek nenport dimoun ki i anvi. Atraver Lerwa David, Zeova ti fer sa promes profetik avek son Garson byenneme, Zezi Kri: “Demann mwan, pour ki mon kapab donn ou bann nasyon konman leritaz e later antye konman ou propriyete.” (Psonm 2:8) Se pour sa rezon ki zapot Pol ti dekrir Zezi konman sa enn “ki Bondye in etabli konman zeritye lo tou keksoz.” (Ebre 1:2) Alor, nou kapab annan konfyans total ki ler Zezi ti dir, bann ki annan limilite “pou erit later,” i ti fer sa onnetman e i annan sa lotorite pour akonpli son promes.—Matye 28:18.

Alor, kestyon byen enportan i, Ki mannyer sa promes pou vin vre? Partou kot nou gete ozordi i paret ki bann dimoun agresif e orgeye pe fer plis sikse, e zot pe pran sa ki zot oule. Ki pou reste pour bann ki annan limilite? Deplis, later i ranpli avek bann gro problenm polisyon, e son bann resours pe ganny eksplwate par bann ki voras e ki mank abilite pour fer bon desizyon. Eski pou annan en later ki vo lapenn erite? Nou envit ou pour lir sa lot lartik pour vwar larepons sa bann kestyon ek lezot kestyon enportan.

“Bann ki annan Limilite pou erit Later”—Konman?

“I KAPAB ki ou familye avek sa bann parol tousan ki Zezi ti dir, ‘bann ki dou, pou posed later.’ Me ler nou vwar sa ki dimoun pe fer avek kanmarad e osi avek later, ki ou krwar i pou reste pour bann ki annan limilite erite oubyen posede?”—Matye 5:5; Psonm 37:11, King James Version.

Myriam, ki en Temwen Zeova, ti servi sa kestyon pour konmans en diskisyon lo Labib. Sa zonm ki Myriam ti koz avek ti dir ki si Zezi in fer sa promes, i bezwen ki later pou en bon keksoz pour erite, me non pa en landrwa ki’n fini gate oubyen ki dimoun pa kapab reste lo la.

Sa ti vreman en larepons pozitif. Me eski nou annan rezon pour annan en pwennvi pozitif koumsa? Wi nou annan, parski Labib i donn nou bann rezon solid pour krwar ki sa promes pou vin vre. Annefe, lakonplisman sa promes i relye pros avek plan Bondye pour limanite ek later. Deplis, nou asire ki tou sa ki Bondye in plàn pou akonpli. (Izai 55:11) Alor, ki ti plan Bondye pour limanite e ki mannyer i pou ganny akonpli?

Plan eternel Bondye pour Later

Zeova ti kree later pour en bi spesifik. “La sa ki Zeova in dir, Kreater lesyel, sa vre Bondye, sa enn ki’n form e fer later, sa Enn ki’n etablir li solidman, ki pa’n kree li pour nanryen ditou, ki’n fer li pour dimoun reste lo la: ‘Mwan, mon Zeova, napa en lot.’ ” (Izai 45:18) Alor, later ti ganny kree espesyalman pour imen reste lo la. Deplis, plan Bondye se ki later i vin en landrwa kot imen i kapab reste lo la pour touzour. “I’n met later dan son landrwa fiks; i pou reste stab pour en letan endefini, oubyen pour touzour.”—Psonm 104:5; 119:90.

Lavolonte Bondye pour later i osi evidan dan sa latas ki i ti donn sa premye koup imen. Zeova ti dir Adan ek Ev: “Fer zanfan e vin bokou, ranpli later e domin li. Annan kontrol lo bann pwason dan lanmer ek bann kreatir ki anvole dan lesyel ek tou kreatir vivan ki pe marse lo later.” (Zenez 1:28) Sa later ki Bondye ti donn Adan ek Ev ti pou sa landrwa ki zot ti pou reste lo la pour touzour ansanm avek zot desandans. Plizyer santenn lannen plitar en psalmis ti dir: “An sa ki konsern lesyel, i pour Zeova, me later in donn imen.”—Psonm 115:16.

Pour realiz sa lespwar merveye, Adan ek Ev, osi byen zot desandans, ti bezwen aksepte Zeova, ki Kreater e sa enn ki donn lavi, konman zot Sef e pare pour obeir li. Zeova ti klerman montre sa ler i ti donn zonm sa lord: “Fri dan tou pye dibwa sa zarden, ou kapab manz ziska satisfaksyon. Me an sa ki konsern sa pye konnesans bon e move, ou pa devret manze, parski sa zour ki ou manz son fri, sirman ou pou mor.” (Zenez 2:16, 17) Pour Adan ek Ev kontinyen viv dan zarden Edenn, zot ti bezwen obeir sa lord senp e kler. Si zot ti obeir Zeova zot ti pou demontre zot rekonesans pour tou sa ki zot Papa dan lesyel in fer pour zot.

Kan Adan ek Ev ti volonterman dezobei Bondye par kas son komannman, an realite zot ti rezet sa enn ki ti’n donn zot tou sa ki zot ti annan. (Zenez 3:6) Kan zot ti fer sa, zot e osi zot desandans ti perdi zot landrwa ki ti en zoli Paradi. (Romen 5:12) Eski dezobeisans sa premye koup ti opoz plan Bondye pour kree later?

En Bondye ki pa’n sanze

Atraver son profet Malaki, Bondye ti dir: “Mwan mon Zeova; mon pa’n sanze.” (Malaki 3:6) En spesyalis Labib Franse apele Louis Fillion ti dir ki sa parol i relye tre pros avek lakonplisman bann promes Bondye. Fillion ti dir: “Zeova ti’n kapab detrir son pep ki ti rebele, me vi ki i pa zanmen sanz son promes, alor nenport keksoz ki arive, i pou reste fidel avek son bann promes ki i’n fer dan lepase.” Promes ki Bondye i fer ki swa avek en dimoun, en nasyon oubyen avek tou imen, pa pou ganny oubliye, me zot pou ganny akonpli dan son letan apropriye. “Menm pour en letan endefini i’n mazin son lalyans, sa parol ki i’n konmande, pour mil zenerasyon.”—Psonm 105:8.

Me ki mannyer nou kapab asire ki Zeova pa’n sanz son plan orizinal konsernan later? Nou kapab asire ki son plan pa’n sanze parski dan Labib, Parol enspire Bondye, nou vwar ki i koz konsernan plan Bondye pour donn later bann imen obeisan. (Psonm 25:13; 37:9, 22, 29, 34) Deplis, Labib i dekrir bann ki’n ganny beni avek Zeova pe reste an sekirite, sakenn pe asiz “anba son pye rezen e anba son pye fig,” e “napa personn ki pou fer zot tranble.” (Mika 4:4; Ezekyel 34:28) Bann ki Zeova in swazir, “pou konstri lakaz e zot pou reste ladan; wi, zot pou plant pye rezen e zot pou manz son fri.” Zot pou rezwir lape menm avek bann zannimo lo later.—Izai 11:6-9; 65:21, 25.

Labib i donn nou en avangou promes Bondye dan en lot fason. Pandan letan ki Lerwa Salomon ti pe dirize, nasyon Izrael ti rezwir en letan lape ek prosperite. Pandan ki i ti pe dirize, “Zida ek Izrael ti kontinyen reste an sekirite, tou dimoun anba son prop pye rezen ek pye fig, depi Dann ziska Ber-seba dan letan Salomon.” (1 Lerwa 4:25) Labib i dir ki Zezi i “pli enportan ki Salomon.” An sa ki konsern dominasyon Zezi, dan en fason profetik en psalmis ti dir: “Dan son letan sa enn ki drwat pou zermen e lape pou an abondans ziska ki lalin i nepli egziste.” Pandan sa letan, “legren pou an abondans lo later; i pou annan en kantite anler lo bout montanny.”—Lik 11:31; Psonm 72:7, 16.

Vi ki Zeova i fidel avek son parol, i pou fer sir ki sa leritaz ki i’n promet, pa pou zis disponib me i pou osi ganny reetablir dan tou son labote. Parol Bondye i dir nou dan Revelasyon 21:4 ki dan sa nouvo lemonn ki’n ganny promet, Bondye “pou eswiy tou larm dan lizye [bann dimoun]. Lanmor pou nepli egziste. Pou nepli annan ni dey, ni plere, ni soufrans.” San dout sa promes ki’n ganny fer i vedir Paradi.—Lik 23:43.

Ki mannyer pour ganny sa Leritaz ki’n ganny promet

Sa travay pour fer later vin en paradi pou ganny fer anba direksyon en gouvernman ki pou egzers son dominasyon depi dan lesyel, e Zezi Kri ki Lerwa dan sa Rwayonm. (Matye 6:9, 10) Premyerman, sa Rwayonm pou “detri bann ki detri later.” (Revelasyon 11:18; Danyel 2:44) Apre, konman sa “Prens Lape,” Zezi pou akonpli sa bann parol profetik: “Pou napa lafen avek renny sa prens e avek lape.” (Izai 9:6, 7) Anba sa Rwayonm, plizyer milyon dimoun enkli bann ki pou resisite, pou ganny sa loportinite pour erit later.—Zan 5:28, 29; Akt 24:15.

Lekel ki pou rezwir sa leritaz merveye? Annou egzamin parol Zezi: “Byennere bann ki dou, akoz zot pou posed later.” (Matye 5:5) Ki savedir en dimoun dous, oubyen en dimoun ki annan limilite? Laplipar-di-tan bann diksyonner i dekrir “limilite” oubyen “dous” konman zantiy, modere, soumet, trankil oubyen menm timid. Me sa mo Grek ki’n ganny servi i enplik plis ki sa. William Barclay’s New Testament Wordbook i dir ki “sa mo i enplik ladouser, me par deryer ladouser i annan en lafors feray.” I enplik en leta lespri ki permet en dimoun andir bann lofans san gard rankin oubyen annan sa lide pour revanze. Tou sa i posib gras a sa bon relasyon ki en dimoun i annan avek Bondye, e sa relasyon i vin en sours ki donn li lafors.—Izai 12:2; Filipyen 4:13.

En dimoun ki annan limilite i aksepte bann standar Bondye dan tou laspe son lavi personnel; i pa ensiste pour fer keksoz dapre son prop pwennvi oubyen dapre lopinyon lezot. I osi pare pour ganny ansennyen par Zeova. Psalmis David ti ekrir: “Bann ki annan limilite [Zeova] pou fer zot mars dan son bann zizman, e i pou ansenny bann ki annan limilite son semen.”—Psonm 25:9; Proverb 3:5, 6.

Eski ou pou parmi sa bann ki annan “limilite” ki pou erit later? Par aprann konn Zeova ek son lavolonte atraver en letid lo son Parol e par met an pratik sa ki ou aprann, ou osi ou kapab esper avek enpasyans pour erit pour touzour en paradi isi lo later.—Zan 17:3.