Met ou Lespwar dan Zeova e pran Kouraz

“Met ou lespwar dan Zeova; pran kouraz e fodre ki ou leker i for. Wi, met ou lespwar dan Zeova.”—PSONM 27:14.

 1. Akoz lespwar i enportan, e ki i vedir?

VRE lespwar i parey en lalimyer briyan. I ed nou get pli lwen olye konsantre zis lo nou leprev, i donn nou kouraz ek lazwa pour fer fas avek lavenir. Zis Zeova ki kapab donn nou en vre lespwar, e i fer sa par mwayen son Parol enspire.a (2 Timote 3:16) Sa mo lespwar i aparet plis ki 160 fwa dan Labib. I refer avek en dimoun ki pe esper en bon keksoz avek leksitasyon ek lasirans, e i osi refer avek sa keksoz ki i pe espere. Sa lespwar i pa en rev ki nou ti a kontan i arive, ki napa okenn fondasyon oubyen posibilite pour vin vre.

 2. Vi ki Zezi ti annan lespwar, ki lefe sa ti fer lo son lavi?

² Kan i ti rankontre leprev ek difikilte, olye konsantre lo son sitiasyon difisil Zezi ti get pli lwen ki sa e i ti met son lespwar dan Zeova. ‘Olye lazwa ki i merite, i’n sibir lanmor lo poto san pran kont laont e la i’n asiz dan kote drwat tronn Bondye.’ (Ebre 12:2) Lefe ki i ti telman anvi defann drwa Zeova pour dirize e sangtifye Son non, menm si i ti pas dan bokou difikilte, Zezi pa ti zanmen dezobei Bondye.

 3. Ki rol lespwar i zwe dan lavi bann serviter Bondye?

³ Lerwa David ti fer resorti sa lyen ki egziste ant lespwar ek kouraz. I ti dir: “Met ou lespwar dan Zeova; pran kouraz e fodre ki ou leker i for. Wi, met ou lespwar dan Zeova.” (Psonm 27:14) Si nou anvi nou leker i vin for, nou pa devret zanmen les nou lespwar vin sonm, okontrer nou bezwen toultan gard li kler dan nou lespri e ofon nou leker. Kan nou fer sa, nou pou kapab imit Zezi par demontre kouraz ek devouman dan predikasyon. (Matye 24:14; 28:19, 20) Anfet, dan Labib, lespwar i ganny mansyonnen ansanm avek lafwa ek lanmour, konman en kalite tre enportan ki dirab e ki vreman evidan dan lavi bann serviter Bondye.—1 Korentyen 13:13.

Eski ou “ris avek Lesperans”?

 4. Ki bann Kretyen swazir ek ‘lezot mouton’ pe espere avek enpasyans?

⁴ Pep Bondye i annan en lavenir merveye devan zot. Bann Kretyen swazir pe esper avek enpasyans pour rennyen ansanm avek Kris dan lesyel. Me ‘lezot mouton,’ zot zot annan lespwar pour ‘ganny libere en zour avek pouvwar destrikter ki pe gard zot dan lesklavaz, pour partisip dan laliberte ek laglwar bann zanfan Bondye [lo later].’ (Zan 10:16; Romen 8:19-21; Filipyen 3:20) Sa “laliberte” i enplik ganny delivre avek pese ek son bann konsekans terib ki i’n anmenn lo nou. Deplis, Zeova sa enn ki donn “tou don ekselan, tou kado parfe,” pou toultan donn son bann serviter fidel sa pli bon kado.—Zak 1:17; Izai 25:8.

 5. Ki mannyer nou vin “ris avek lesperans”?

⁵ Pa lespwar ki nou annan i devret fer en gro lefe lo nou lavi? Romen 15:13 i dir: “Ki Bondye, ki donn lesperans i ranpli zot avek lazwa ek lape parfe dan lafwa e rann zot ris avek lesperans par pisans Sent-Espri.” (Nou ki’n met an italik) Wi, lespwar i pa parey en labouzi dan fernwanr, me i parey sa laklerte soley ki pe briye dan bomaten, ki donn nou lape, lazwa, kouraz ek en bi dan lavi. Remarke ki nou “ris avek lesperans” kan nou krwar dan Parol Bondye e ganny son lespri sen. Romen 15:4 i dir: “Tou sa ki’n ganny ekri dan lepase in ganny ekri pour nou lansennyman, pour ki par pasyans ek konsolasyon ki Lekritir i donnen nou posed lesperans.” Alors, demann ou lekor: ‘Eski mon kit mon lafwa briye par vin en bon etidyan Labib, e lir Labib toulezour? Eski souvan mon priy Bondye pour ganny son lespri sen?’—Lik 11:13.

 6. Ki nou bezwen fer pour gard nou lespwar briye?

⁶ Parol Bondye ti fortifye Zezi, sa enn ki’n kit en legzanp pour nou swiv. Kan nou egzamin son lavi pli oprofon, sa pou anpes nou ‘dekouraze e dezespere.’ (Ebre 12:3) Lozikman si nou lespwar ki Bondye in donn nou i konmans vin sonm dan nou lespri ek leker, oubyen si nou konmans ganny distrer par lezot keksoz, parey keksoz materyel oubyen pour annan bann lobzektif dan sa lemonn, to-ou-tar nou kapab tonm dormi spirityelman. E finalman nou kapab perdi sa lafors ek kouraz pour swiv bann prensip moral dan nou lavi. Si nou ariv dan en kondisyon parey, nou kapab “perdi [nou] lafwa.” (1 Timote 1:19) De lot kote, vre lespwar i fortifye nou lafwa.

San Lespwar i enposib pour annan Lafwa

 7. Akoz lespwar i enportan pour annan lafwa?

⁷ Labib i dir ki “lafwa i lasirans dan keksoz ki ou pe espere, e sertitid keksoz ki ou pa’n vwar.” (Ebre 11:1) Alors, lespwar i pa zis en senp keksoz ki ou azout avek lafwa, okontrer i en laspe tre enportan dan lafwa. Pran par egzanp Abraam. Kan Zeova ti promet zot ki zot pou ganny en zanfan, nenport imen ti pou dir ki sa i enposib akoz Abraam ek Sara ti’n sot laz fer zanfan. (Zenez 17:15-17) Ki ti reaksyon Abraam? ‘Abraam ti krwar e espere menm kot ti sanble nepli annan lespwar, e alor i ti vin papa en kantite nasyon.’ (Romen 4:18) Wi, sa lespwar ki Bondye ti donn Abraam ti en fondasyon solid pour son lafwa, ki i ti pou annan en desandans. An retour son lafwa ti fortifye sa lespwar e fer li vin pli briye. Abraam ek Sara ti menm annan kouraz pour kit zot lakaz, zot fanmiy, e al reste dan latant dan en lot pei pour larestan zot lavi!

 8. Ki mannyer landirans i fortifye nou lafwa?

⁸ Lespwar Abraam ti reste solid akoz i ti obei Zeova avek tou son leker, menm kan i ti difisil pour obei. (Zenez 22:2, 12) Pareyman si nou kontinyen obei e andire dan servis Zeova, nou kapab annan konfyans ki nou pou ganny rekonpanse. Pol ti ekrir: “Perseverans i prodwi fidelite. . . e fidelite i prodwi lesperans. Sa lesperans pa tronp nou.” (Romen 5:4, 5) Se pour sa rezon Pol ti osi ekrir: ‘Me nou oule ki sakenn antre zot i montre menm lantouzyas ziska lafen pour fer sir ki zot lesperans i realize.’ (Ebre 6:11) Sa lespwar, ki nou annan akoz nou’n devlop en relasyon entim avek Zeova, i kapab ed nou fer fas avek bann difikilte avek kouraz ek lazwa.

“Ki ou Lesperans i gard ou dan Lazwa”

 9. Ki nou kapab fer regilyerman pour ki nou ‘lesperans i gard nou dan lazwa?’

⁹ Nou lespwar ki Bondye in donn nou i bokou pli siperyer ki okenn keksoz sa lemonn i kapab ofer nou. Psonm 37:34 i dir: “Met lespwar dan Zeova e swiv son semen, i pou elev ou pour ki ou posed later. Ou pou vwar kan bann mesan i ganny detri.” Wi, nou annan tou rezon pour les nou ‘lesperans gard nou dan lazwa.’ (Romen 12:12) Me pour ki sa i arive, nou bezwen pe toultan mazin nou lespwar. Eski ou regilyerman reflesir lo sa lespwar ki Bondye in donn ou? Eski dan ou lespri ou kapab vwar ou dan Paradi, kot ou annan en bon lasante, ou napa lenkyetid, partou kot ou gete ou vwar bann dimoun ki ou kontan, e ou pe fer en keksoz ki fer ou kontan? Eski ou reflesir lo sa bann portre paradi ki ganny mete dan nou bann piblikasyon? Nou kapab konpar sa kalite refleksyon avek en dimoun ki pe swiy vit pour kapab vwar byen deor. Si nou pa netway nou vit, be dan ankor en pti moman nou pou vwar lapousyer in ranpli partou, e finalman nou pa pou kapab get byen deor. E pour fini kont lezot keksoz ki pou kapte nou latansyon. Annou pa zanmen les sa ariv avek nou!

10. Akoz ler nou reflesir lo nou rekonpans, sa i annan en bon lefe lo nou relasyon avek Zeova?

¹⁰ Byensir, rezon prensipal akoz nou pe servi Zeova se akoz nou kontan li. (Mark 12:30) Me kantmenm sa, avek lantouzyasm nou devret pe toultan mazin nou rekonpans. Anfet, Zeova i ekspekte nou pour gard sa rekonpans antet. Ebre 11:6 i dir: “San lafwa personn pa kapab fer plezir Bondye. Sa ki apros kot Bondye i devre krwar ki i egziste e ki i rekonpans tou bann ki rod li.” Akoz Zeova i anvi nou konsider li konman sa enn ki rekonpans imen? Parski kan nou fer sa, nou montre ki nou konn byen nou Papa dan lesyel. I zenere e i kontan son bann zanfan. Eski ou kapab mazinen ki mannyer nou ti pou sagren e dekouraze si nou ti napa “en lavenir ek en lespwar”?—Zeremi 29:11.

11. Konman sa lespwar ki Bondye ti’n donn Moiz ti ed li fer bon desizyon?

¹¹ Moiz i en legzanp vreman remarkab en serviter Bondye ki ti toultan pe mazin sa lespwar ki Bondye ti’n donn li. Lefe ki i ti “garson fiy Faraon,” Moiz ti annan pouvwar, prestiz, ek tou sa larises Lezip. Eski i ti pou pourswiv sa bann keksoz oubyen servi Zeova? Avek kouraz Moiz ti deside servi Zeova. Akoz? Akoz “son regar ti fikse lo rekonpans dan lavenir.” (Ebre 11:24-26, nou ki’n met an italik) Wi, Moiz pa ti pran sa lespwar ki Bondye ti’n donn li alalezer.

12. Akoz lesperans oubyen lespwar i ganny konpare avek en kas lo nou latet?

¹² Zapot Pol ti konpar lesperans oubyen lespwar avek en kas lo nou latet. Nou kas senbolik i protez nou lespri, i permet nou fer bon desizyon, met sa ki pli enportan premye, e gard nou fidelite. (1 Tesalonisyen 5:8) Eski ou toultan annan ou kas senbolik lo latet? Si wi, parey Moiz ek Pol, ou pa pou met ou lespwar ‘dan sa bann larises enserten, me dan Bondye ki donn tou keksoz an labondans pour nou zouir.’ I vre, i demann kouraz pour rezet bann dezir egois ki tou dimoun pe fer fason pour akonpli. Me i vo lapenn fer li! Apre tou, akfer rod keksoz ki vreman enferyer avek sa “vre lavi” ki pe esper sa bann ki met zot lespwar dan Zeova e ki kontan li?—1 Timote 6:17, 19.

“Mon pa pou zanmen negliz ou”

13. Ki lasirans Zeova i donn son bann serviter fidel?

¹³ Sa ki met zot lespwar dan sa lemonn i bezwen mazin seryezman zot lavenir, avek sa santiman ki en keksoz vreman efreyan pe al arive, akoz sa ki pe arive dan lemonn i parey “douler ki en madanm ansent i gannyen avan lakousman.” (Matye 24:8) Me bann ki annan lespwar dan Zeova napa lafreyer. Zot pou kontinyen ‘reste an sekirite e viv dan trankilite san ki zot bezwen per maler.’ (Proverb 1:33) Vi ki zot pa met zot lespwar dan sa lemonn, avek lazwa zot swiv konsey ki Pol ti donnen: “Pa les lanmour pour larzan domin zot lavi, me kontant zot avek sa ki zot annan, parski Bondye ti dir: ‘Mon pa pou zanmen negliz ou, mon pa pou zanmen abandonn ou.’”—Ebre 13:5.

14. Akoz nou pa bezwen tro trakase konsernan nou bezwen materyel?

¹⁴ Sa lekspresyon “mon pa pou zanmen,” i met lanfaz lo promes ki Bondye in fer pour pran swen avek nou, ki fer nou napa okenn dout. Zezi ti osi asir nou ki Zeova i pran swen avek nou. I ti dir: “Rod plito Rwayonm Bondye ek son lazistis, e limenm i a donn zot anplis tou lezot keksoz [keksoz materyel ki neseser dan lavi] osi. Alor pa trakas pour demen; demen pou anmenn ase traka par limenm.” (Matye 6:33, 34) Zeova i konnen ki i difisil pour nou devoue pour son Rwayonm e anmenmtan pran swen avek nou bezwen fizik san trakase. Alors, annou met tou nou konfyans dan Zeova, li ki annan sa abilite ek lanvi pour pran swen avek nou bann bezwen.—Matye 6:25-32; 11:28-30.

15. Dan ki fason nou gard nou lavi senp?

¹⁵ Kan nou gard nou lavi senp, nou montre ki nou depan lo Zeova. (Matye 6:22, 23) En dimoun ki senp i senser, i annan bon motivasyon, i napa bann lanvi egois oubyen voras. Kan nou senp i pa vedir ki nou viv dan lanmizer oubyen nou pa pran swen avek nou bann bezwen fizik. Okontrer i vedir ki nou annan “bon zizman” anmezir ki nou kontinyen met servis Zeova premye dan nou lavi.—2 Timote 1:7 NW.

16. Akoz nou bezwen annan lafwa ek kouraz pour gard nou lavi senp?

¹⁶ Nou bezwen annan lafwa ek kouraz pour kapab gard nou lavi senp. Par egzanp, si ou anplwayer i ensiste ki ou vin travay regilyerman dan bann ler ki ou annan renyon, eski avek kouraz ou pou kontinyen met keksoz spirityel premye? Si nou annan dout ki Zeova pou pran swen avek nou, parey i’n promet, alors Satan pou fer sir ki i met plis presyon lo nou pour ki finalman nou aret asiste tou renyon. Wi, si nou mank lafwa, Satan i kapab kontrol nou lavi, e olye Zeova ki montre nou kwa ki pli enportan, aprezan Satan ki pou montre nou. E finalman nou pou mal fini!—2 Korentyen 13:5.

“Met Lespwar dan Zeova”

17. Dan ki fason sa bann ki annan konfyans dan Zeova i ganny beni depi ozordi menm?

¹⁷ Plizyer fwa Labib i fer resorti ki sa bann ki met lespwar dan Zeova e annan konfyans dan li, pa pou zanmen perdi. (Proverb 3:5, 6; Zeremi 17:7) I vre ki parfwa zot bezwen kontant zot avek mwens keksoz materyel, me zot vwar sa en pti sakrifis konpare avek sa kantite benediksyon ki Zeova in anmase pour zot. Alors, zot montre ki zot annan “lespwar dan Zeova” ek konfyans ki alafendizour i pou akonpli bann bon keksoz ki son bann serviter fidel ti anvi depi lontan. (Psonm 37:4, 34) Depi konmela menm zot annan sa vre lazwa. “Bann ki drwat pe esper lazwa, me lespwar bann mesan pou disparet.”—Proverb 10:28.

18, 19. (a) Ki lasirans Zeova i donn nou? (b) Ki mannyer nou kit Zeova dan nou “kote drwat”?

¹⁸ Kan en papa i tyonbo lanmen son pti garson anmezir ki zot pe marse, sa pti garson i santi li an sekirite. Nou osi nou santi parey anmezir ki nou mars avek nou Papa ki dan lesyel. Zeova ti dir pep Izrael: “Pa bezwen per, akoz mon avek ou. . . . Mon pou vreman ed ou. . . . Parski mwan, Zeova, mon ou Bondye, mon pe tyonbo ou lanmen drwat, sa Enn ki pe dir ou, ‘Pa bezwen per. Mon pou ed ou.’”—Izai 41:10, 13.

¹⁹ Zeova pe tyonbo nou lanmen. Pa sa i kree en portre dan nou lespri ki byen tousan! David ti ekrir: “Mon’n toultan met Zeova devan mwan. Parski i dan mon kote drwat, mon pa pou drive.” (Psonm 16:8) Ki mannyer nou kit Zeova dan nou “kote drwat”? I annan de fason ki nou fer sa. Premye fason i kan nou les son Parol gid nou dan tou laspe nou lavi, e dezyenmman kan nou kit nou regar fikse lo sa pri ki Zeova in met devan nou. Psalmis Azaf ti sante: “Me mon toultan avek ou; ou’n tyonbo mon lanmen drwat. Avek ou konsey ou pou gid mwan, e apre ou pou anmenn mwan ver laglwar.” (Psonm 73:23, 24) Vi ki nou annan sa lasirans, avek konfyans nou kapab fer fas avek lavenir.

‘Zot Delivrans pe aprose’

20, 21. Ki pou arive alavenir pour sa bann ki met lespwar dan Zeova?

²⁰ Anmezir ki letan i pase, pli i vin pli irzan pour nou kit Zeova dan nou kote drwat. Byento, apre ki fo larelizyon in ganny detri, sa lemonn Satan pou pas atraver en gran ladetres ki pa’n zanmen egziste avan. (Matye 24:21) Tou sa bann ki napa lafwa dan Bondye pou tranble avek lafreyer. Me pandan sa letan vreman kritik, bann serviter Zeova ki kouraze pou rezwir akoz zot annan lespwar. Zezi ti dir: “Kan sa bann keksoz i a konmans arive, dres zot e lev zot latet anler, akoz zot delivrans i ava pe aprose.”—Lik 21:28.

²¹ Alors, annou rezwir akoz sa lespwar ki Bondye in donn nou e pa les nou ganny anbete oubyen tante par bann distraksyon ki Satan in byen planifye. E anmenmtan annou travay dir pour devlop lafwa, lanmour ek lakrent pour Bondye. Si nou fer sa nou pou ganny sa kouraz pour obei Zeova dan tou sirkonstans e nou pou kapab reziste Dyab. (Zak 4:7, 8) Wi, “pran kouraz, e fotespere zot leker i for, zot tou ki pe esper Zeova.”—Psonm 31:24.

[Not anba lo paz]

Ki ou pou reponn?

• Konman lespwar ki Zezi ti annan ti donn li kouraz?

• Ki mannyer lafwa ek lespwar i relye avek kanmarad?

• Konman lespwar ek lafwa i kapab donn en Kretyen sa kouraz pour met sa ki pli enportan premye dan son lavi?

• Akoz sa bann ki “met lespwar dan Zeova” i kapab get lavenir avek konfyans?

[Portre lo paz 26]

Ki swa ou zenn oubyen aze, eski ou kapab vwar ou

 dan paradi?