Ki mannyer ou kapab pli byen benefisye avek Labib?

Eski ou’n deza anvi konmans en gro proze me ou ti santi ki i tro difisil? Petet pour fer li pli fasil, ou ti pran li bout par bout. I menm parey avek lir Labib. Petet ou kapab demande, ‘Kot mon pou konmanse?’ Dan sa leson, nou pou vwar enn de keksoz senp ki kapab fer li gou pour ou lir e etidye Labib.

1. Akoz nou devret lir Labib regilyerman?

En dimoun ki lir Labib oubyen “lalwa Zeova” regilyerman pou santi li ere e i pou reisi dan son lavi. (Lir Psonm 1:1-3.) Pour konmanse, esey lir li pour enn de minit sak zour. Anmezir ou vin pli familye avek Parol Bondye, i pou pli gou pour ou lir li.

2. Ki mannyer nou kapab pli byen benefisye ler nou lir Labib?

Pour nou benefisye ler nou lir Labib, nou bezwen fer en pti poz e reflesir lo sa ki nou pe lir. Nou bezwen lir li e an menm tan “medit lo la.” (Zozye 1:8) Anmezir ou lir li, ou kapab demann ou lekor sa bann kestyon: ‘Ki sa i dir mwan lo Bondye Zeova? Ki mannyer mon kapab met sa an pratik dan mon lavi? Ki mannyer mon kapab servi sa bann verse pour ed lezot dimoun?’

3. Ki mannyer mon kapab fer letan pour lir Labib?

Eski ou vwar li difisil pour trouv letan pour lir Labib? Bokou nou i santi koumsa. Esey “servi byen [ou] letan.” (Efezyen 5:16) Pour kapab fer sa ou kapab met de kote en ler spesifik sak zour pour lir Labib. Serten dimoun i fer li lo granmaten toulezour. Serten i fer li pli tar pandan lazournen, petet pandan zot ler dezenen. Lezot i lir Labib aswar zis avan zot al dormi. Me ou, ki ler ki pli bon pour ou?

AL PLI O PROFON

4. Fer ou lektir Labib pli gou

I kapab pa fasil pour konmans lir Labib. Me nou kapab “devlop sa dezir” pour fer li, zis parey en dimoun ki gout en nouvo manze e aprann kontan li. Lir 1 Pyer 2:2 e apre reponn sa kestyon:

• Si ou lir Labib toulezour, eski ou krwar avek letan ou pou vreman kontan fer li?

Zwe sa VIDEO pour vwar ki mannyer serten dimoun ti konmans kontan lir Labib. Apre reponn sa bann kestyon.

VIDEO: Bann zenn ki pe aprann kontan Parol Bondye (5:33)

• Dan sa video, ki difikilte bann zenn ti fer fas avek?

• Kwa ki ti ed zot kontinyen lir Labib regilyerman?

• Ki mannyer zot ti fer zot lektir Labib pli enteresan?

Sizesyon pour konmanse:

• Swazir en tradiksyon Labib ki senp e egzakt. Esey lir Tradiksyon nouvo Lemonn an Kreol oubyen dan en lot langaz ki ou konpran byen.

• Konmans par lir bann bout ki ou ou vwar pli enteresan. Pour ganny enn de lide, vwar sa latab “Konmans lir Labib.”

• Ekri kot ou’n arive dan ou lektir Labib. Servi sa latab “Kot ou’n arive dan ou lektir Labib” dan sa piblikasyon.

• Servi JW Library^® app. Avek sa app, ou kapab lir e ekout lektir Labib partou kot ou ete an servan ou telefonn oubyen lezot lekipman elektronik.

• Servi En led pour etidye Labib oubyen Lezot lenformasyon dan Labib—Tradiksyon nouvo lemonn. I enkli bann map, latab ek en pti diksyonner ki kapab fer ou lektir Labib pli enteresan.

5. Prepar byen ou letid Labib

Lir Psonm 119:34 e apre reponn sa kestyon:

• Akoz i byen priye avan ou lir Labib oubyen avan ou prepar ou letid Labib?

Ki mannyer ou kapab benefisye avek sak leson dan ou letid Labib? Ler ou prepar en leson, esey swiv sa metod:

1. Lir bann paragraf o konmansman sa leson.

2. Rod e lir bann verse Labib. Esey konpran ki mannyer zot relye avek sa lenformasyon.

3. Souliny bann mo enportan oubyen bann bout fraz ki reponn sak kestyon. Sa pou ed ou pour diskit sa leson avek ou ansenyan.

Eski ou ti konnen?

Temwen Zeova in servi diferan tradiksyon Labib. Me nou pli apresye Labib—Tradiksyon nouvo lemonn akoz i egzakt, i kler e i servi non Bondye.​—Vwar lartik lo jw.org “Do Jehovah’s Witnesses Have Their Own Bible?”

REZIMEN

Pour ou pli byen benefisye avek Labib, fer en letan pour lir li, priye pour ou konpran sa ki ou lir e prepare pour sak leson dan ou letid.

Revizyon

• Kwa ki pou ed ou pli byen benefisye avek Labib?

• Kan ki ou kapab met en letan dekote pour lir e etidye Labib?

• Akoz i vo lapenn prepare pour sak leson dan ou letid Labib?

FER PLIS RESERS

Revwar serten lide ki kapab ed ou pour kapab pli byen benefisye avek ou lektir Labib.

“Ki mannyer mon kapab benefisye ler mon lir Labib” (Latour Veyer No. 1 2017)

Vwar trwa fason ki ou kapab lir Labib.

“Ki mannyer Labib i kapab ed mwan?​—Premye parti: Egzamin ou Labib” (Lartik lo jw.org)

Gete ki mannyer ou kapab fer ou lektir Labib gou.

“Ki mannyer Labib i kapab ed mwan?​—Dezyenm parti: Fer ou lektir Labib vin gou” (Lartik lo jw.org)

Vwar serten sizesyon avek bann dimoun ki pe lir Labib depi lontan.

En bon letid personnel (2:06)

4. Kontinyen kominik avek ou pli bon zanmi

Lapriyer ek letid Labib in ed ou pour vin zanmi Zeova. Ki mannyer sa de keksoz i kapab ed ou pour vin pli pros ankor avek li?

Lir Psonm 62:8 e apre reponn sa kestyon:

• Pour ki ou lanmitye avek Zeova i vin pli for, ki mannyer ou kapab amelyor kalite ou lapriyer?

Lir Psonm 1:2 e apre reponn sa kestyon:

• Ki mannyer ou kapab amelyor ou lektir Labib pour fer ou lanmitye avek Zeova vin pli for?

Ki mannyer ou kapab ganny plis byenfe avek ou letid personnel? Pour vwar enn de lide, zwe sa VIDEO e apre reponn sa bann kestyon.

VIDEO: Amelyor ou letid personnel (5:22)

• Ki sizesyon dan sa video ou kapab met an pratik?

• Ki topik ou ti a kontan etidye?