“Desizyon Zeova” pa kapab fel

“Les mwan refer avek desizyon Zeova; I’n dir avek mwan: ‘Ou mon garson . . . Demann mwan, pour ki mon kapab donn ou bann nasyon konman leritaz.’ ”—PSONM 2:7, 8.

 1. Ki diferans i annan ant plan Bondye ek plan bann nasyon?

ZEOVA i annan en plan pour bann imen ek later. Bann nasyon osi i annan en plan. Me sa de plan i vreman diferan! Nou ekspekte sa, parski Bondye i dir: “Zis parey lesyel i pli o ki later, pareyman mon semen i pli o ki zot semen, e mon panse i pli o ki zot panse.” Definitivman plan Bondye pou ganny akonpli akoz i kontinyen par dir: “Zis parey lapli toransyel ek lanez i desann sorti dan lesyel e i pa retournen, san ki i aroz later, fer li fertil, donn legren pour senmen e dipen pour manze, demenm mon parol ki sorti dan mon labous pou parey. I pa pou retourn kot mwan san rezilta, me i pou sirman akonpli sa ki mon’n pran plezir ladan, e i pou sirman annan sikse dan sa ki mon’n anvoy li.”—Izai 55:9-11.

 2, 3. Ki dezyenm psonm i fer kler, me ki kestyon ki ganny demande?

² Dan dezyenm psonm i fer kler ki plan Bondye konsernan son Lerwa Mesyanik pou ganny akonpli. Son konpoziter, Lerwa David dan ansyen Izrael, ti ganny enspire par Bondye pour predir ki ti pou annan en letan remarkab kot bann nasyon ti pou azite. Zot dirizan ti pou pran en pozisyon kont Zeova e kont sa Enn ki i’n swazir. Me sa psalmis ti osi sante: “Les mwan refer avek desizyon Zeova; I’n dir avek mwan: ‘Ou mon garson . . . Demann mwan, pour ki mon kapab donn ou bann nasyon konman leritaz e bann kwen later konman ou propriyete.’ ”—Psonm 2:7, 8.

³ Ki “desizyon Zeova” i vedir pour bann nasyon? Ki lefe i annan lo bann imen an zeneral? Anfet, ki sa bann devlopman i vedir pour tou serviter Bondye ki lir dezyenm psonm?

Bann Nasyon i azite

 4. Ki mannyer ou pou rezim bann pwen prensipal dan Psonm 2:1, 2?

⁴ Sa psalmis ti konmans son konpozisyon par refer avek aksyon bann nasyon ek zot dirizan. I ti sante: “Akoz bann nasyon i azite e bann pep in kontinyen mantoun anven? Bann lerwa later i pran zot pozisyon e bann o zofisye in rasanble konman en sel kont Zeova e kont sa enn ki i’n swazir.”—Psonm 2:1, 2.a

 5, 6. Ki bann group nasyonal in kontinyen ‘mantoun anven’?

⁵ Ki sa “mantoun anven” ki bann pep pe kontinyen fer? Olye aksepte sa Enn ki Bondye in swazir—Mesi oubyen Kris—bann nasyon in kontinyen mantoun oubyen fer rezon ki zot pou fer pour gard zot pouvwar. Sa parol dan dezyenm psonm ti osi ganny akonpli premyerman dan premye syek N.L. kan bann dirizan Zwif ek Romen ti travay ansanm pour touy sa Lerwa ki Bondye ti’n swazir, Zezi Kri. Me son lakonplisman mazer ti konmanse an 1914 kan Zezi ti vin Lerwa dan lesyel. Depi sa letan, napa okenn lorganizasyon politik lo later ki’n aksepte sa Lerwa ki Bondye in kouronnen.

⁶ Ki sa psalmis ti oule dir kan i ti demande ‘akoz bann group nasyonal ti pe kontinyen mantoun anven’? Se zot plan ki anven. I initil e i pa pou marse. Zot pa kapab anmenn lape ek larmoni lo sa later. Pourtan, zot al ziska pour reziste dominasyon Bondye. Anfet, zot in zwenn ansanm pour pran en pozisyon ferm kont Bondye Tre O ek sa Enn ki i’n swazir. Pa zot bet!

Lerwa viktorye Zeova

 7. Ki mannyer bann premye disip Zezi ti aplik Psonm 2:1, 2 letan zot ti pe priye?

⁷ Bann disip Zezi ti aplik sa parol dan Psonm 2:1, 2 avek li. Kan zot ti pe ganny persekite akoz zot lafwa, zot ti priye: “Met, ou ki’n kre lesyel ek later ek lanmer ek tou sa ki lo later e dan lanmer. Oumenm ki par ou Sent-Espri e par labous David, nou zanset, ou serviter, in dir: ‘Akoz bann nasyon i azite? Akoz lepep i fer bann konplo an-ven? Bann lerwa later in prepar lager, bann sef in ini zot ansanm kont Senyer Bondye ek kont son Mesi.’ I byen vre ki Erod [Antipas] ek Pons-Pilat in ini zot ansanm dan sa lavil, avek bann etranze ek pep Izrael, kont Zezi, ou sen serviter ki ou’n swazir konman Mesi.” (Akt 4:24-27; Lik 23:1-12)b Wi, ti annan en konplo kont Zezi, serviter Bondye ki i ti’n swazir, dan premye syek. Me sa psonm ti pou annan en lot lakonplisman plizyer syek plitar.

 8. Ki mannyer Psonm 2:3 i aplik pour bann nasyon denozour?

⁸ Kan ansyen Izrael ti annan en lerwa imen, parey David, bann nasyon ek dirizan payen ti ralye ansanm kont Bondye ek sa lerwa ki i ti swazir. Me dan nou letan? Bann nasyon konmela pa oule fer sa ki Zeova ek Mesi pe demann nou pour fer. Alors, se zot ki’n ganny dekrir pe dir: “Annou kas zot lasenn e anvoy zot lakord lwen avek nou!” (Psonm 2:3) Bann dirizan ek nasyon ti pou opoz nenport restriksyon ki Bondye ek sa Enn ki i’n swazir i mete. Byensir, tou zefor ki zot fer pour kas sa bann lasenn e zet zot lakord pou anven.

Zeova i monk zot

 9, 10. Akoz Zeova i monk bann nasyon?

⁹ Zefor sa bann dirizan pour gouvern dan zot prop fason pa afekte Zeova ditou. Dezyenm psonm i kontinyen: “Sa Enn ki pe asiz dan lesyel pou riye; Zeova li menm pou monk zot.” (Psonm 2:4) Bondye i pourswiv avek son plan konmsi sa bann dirizan pa nanryen pour li. I riy zot telman zot annan lodas e i monk zot. Les zot koz labous plen konsernan zot bann plan. Zot fer Zeova riye. I riy zot akoz zot lopozisyon i anven.

¹⁰ Dan en lot son bann psonm, David i refer avek bann zonm ek nasyon ki opoz Bondye. I sante: “Ou Zeova bann larme, ou Bondye Izrael. Leve e donn ou latansyon tou sa bann nasyon. Pa montre okenn faver sa bann tret pa bon. Zot kontinyen retournen kan fernwanr pe fer. Zot kontinyen aboye parey en lisyen e fer letour lavil. Gete! Dan zot labous pe sorti en kantite parol. I annan lepe lo zot lalev. Lekel ki pe ekoute? Me ou Zeova, ou pou riy zot. Ou pou monk tou sa bann nasyon.” (Psonm 59:5-8) Zeova i riy bann nasyon akoz lorgey ek konfizyon ki zot ladan vi ki zot in fer zot bet pour opoz li.

11. Ki i arive kan bann nasyon i esey opoz plan Bondye?

¹¹ Sa parol dan Psonm 2 i ranforsi nou lafwa ki Bondye i kapab sirmont nenport defi. Nou kapab annan sa lasirans ki i touzour akonpli son lavolonte e i pa zanmen abandonn son bann serviter fidel. (Psonm 94:14) Alors, ki i arive kan bann nasyon i fer zefor pour opoz plan Zeova? Dapre sa psonm, Bondye “pou koz avek zot dan son lakoler.” I pou fer en tapaz parey loraz. Deplis, “dan son gran lakoler i pou trouble zot,” parey ler zekler i frape.—Psonm 2:5.

Lerwa Bondye in ganny enstale

12. Ki kouronnman Psonm 2:6 pe koz lo la?

¹² Sa ki Zeova i dir bann nasyon apre sa atraver sa psalmis, i san dout trouble zot. Bondye i fer en deklarasyon: “Mwan, mon’n enstal mon lerwa lo Siyon, mon montanny sen.” (Psonm 2:6) Montanny Siyon ti an Zerizalenm, kot David ti ganny mete konman lerwa lo Izrael antye. Me sa Lerwa Mesyanik pa pou asiz lo en tronn dan sa lavil oubyen okenn lezot landrwa lo later. Anfet, Zeova in fini enstal Zezi Kri konman son Lerwa Mesyanik lo montanny Siyon dan lesyel.—Revelasyon 14:1.

13. Ki lalyans Zeova ti fer avek son Garson?

¹³ Aprezan sa Lerwa Mesyanik i koze. I dir: “Les mwan refer avek desizyon Zeova [ki’n fini fer en lalyans avek son Garson pour en Rwayonm]; I’n [Zeova] dir avek mwan: ‘Ou mon garson. Mwan ozordi mon’n vin ou papa.’ ” (Psonm 2:7) Kris ti refer avek sa lalyans Rwayonm kan i ti dir son bann zapot: “Zot, zot bann ki’n reste fidel anver mwan dan tou mon difikilte ek soufrans. Parey mon Papa in donn mwan pouvwar pour gouvern son Rwayonm, mwan osi, mon donn zot menm pouvwar.”—Lik 22:28, 29.

14. Akoz nou kapab dir ki Zezi i definitivman annan sa drwa pour vin Lerwa?

¹⁴ Parey ti ganny predir dan Psonm 2:7, Zeova ti rekonnet Zezi konman Son Garson ler i ti batize e osi par resisit li konman en lespri. (Mark 1:9-11; Romen 1:4; Ebre 1:5; 5:5) Wi, se sa sel Garson Bondye ki Lerwa dan Rwayonm lesyel. (Zan 3:16) Vi ki i desandans rwayal Lerwa David, Zezi i definitivman annan sa drwa pour vin Lerwa. (2 Samyel 7:4-17; Matye 1:6, 16) Dapre sa psonm, Bondye i dir son Garson: “Demann mwan, pour ki mon kapab donn ou bann nasyon konman leritaz e bann kwen later konman ou propriyete.”—Psonm 2:8.

15. Akoz Zezi i demann bann nasyon konman son leritaz?

¹⁵ Lerwa, ki garson Bondye, i dezyenm apre Zeova lo kote pouvwar. Zezi i sa enn ki Zeova in teste, sa enn ki’n reste fidel, e ki diny konfyans. Deplis, Zezi i annan leritaz konman premye ne Bondye. Anfet, Zezi Kri “i resanblans vizib Bondye ki envizib. I premye-ne tou kreasyon.” (Kolosyen 1:15) Sa ki i annan pour fer se demande e Bondye i a ‘donn li bann nasyon konman son leritaz e bann kwen later konman son propriyete.’ Zezi i fer sa demann vi ki i ‘kontan bann keksoz ki annan pour fer avek garson zonm.’ Osi, akoz i vreman anvi akonpli lavolonte son Papa pour later e pour bann imen.—Proverb 8:30, 31.

Desizyon Zeova kont bann Nasyon

16, 17. Dapre Psonm 2:9, kwa ki pe esper bann nasyon?

¹⁶ Vi ki dezyenm psonm pe ganny akonpli dan nou letan, pandan prezans envizib Kris, kwa ki pe esper bann nasyon? Byento Lerwa pou akonpli deklarasyon Bondye: “Ou pou kas zot avek en baton feray, ou pou kraz zot an morso parey resipyan en potye.”—Psonm 2:9.

¹⁷ Lontan, baton lerwa ti senbol lotorite rwayal. Serten baton ti ganny fer avek feray, parey sa enn ki sa psonm i mansyonnen. Sa langaz senbolik ki ganny servi la i endike konman i pou fasil pour sa Lerwa, Kris, detrir bann nasyon. En bon koud baton feray i kapab kraz en resipyan fayans net.

18, 19. Ki bann lerwa later i bezwen fer pour ganny laprouvasyon Bondye?

¹⁸ Eski dirizan bann nasyon i oblize temwanny en tel latak destriktif? Non, parski sa psalmis i lans en lapel avek zot: “Aprezan, zot bann lerwa, servi zot bon zizman; zot bann ziz lo later, les zot ganny korize.” (Psonm 2:10) Bann lerwa i ganny demande pour port byen atansyon, pour montre zot pridan dan sa zafer. Zot devret realize ki zot plan i anven konpare avek sa ki Rwayonm Bondye pou fer pour benefisye limanite.

¹⁹ Pour ganny laprouvasyon Bondye, bann lerwa later pou bezwen sanz direksyon ki zot pe ale. Zot ganny ankouraze pour “servi Zeova avek lakrent e tranble avek lazwa.” (Psonm 2:11) Ki pou arive si zot fer sa? Olye azite oubyen trouble, zot pou kapab rezwir akoz sa lespwar ki Lerwa Mesyanik i met devan zot. Bann dirizan lo later i bezwen rezet sa lorgey ek larogans ki zot demontre dan zot fason dirize. Deplis, zot bezwen pa tarde pour sanze e montre zot pridan an rapor avek dominasyon Zeova ki bokou pli siperyer ki lezot e son pwisans ek pwisans son Lerwa Mesyanik ki personn pa kapab bare.

“Anbras son Garson”

20, 21. Ki savedir “anbras son garson”?

²⁰ Aprezan Psonm 2 i lans en lenvitasyon avek dirizan bann nasyon. Olye zwenn ansanm pour opoz Zeova, zot ganny sa konsey: “Anbras son garson, pour ki I [Zeova] pa ankoler e pour ki zot pa mor lwen avek sa semen, parski son lakoler i mont fasilman.” (Psonm 2:12a) Kan Souvren Senyer Zeova i anons son desizyon, nou devret ekoute. Letan Bondye ti met son Garson lo tronn, bann dirizan lo later ti’n devret aret “mantoun anven.” Zot ti’n devret aksepte sa Lerwa deswit e donn li tou zot lobeisans.

²¹ Akoz “anbras son garson”? Kan sa psonm ti ganny konpoze, anbrase ti en fason pour eksprim lanmitye e dimoun ti anbras zot bann envite pour akey zot se zot, kot zot ti pou al byen pase. Anbrase ti osi en siny fidelite. (1 Samyel 10:1) Dan sa verse dan dezyenm psonm, Bondye pe demann bann nasyon pour anbras, oubyen akey, son Garson konman sa Lerwa swazir.

22. Ki lavertisman dirizan bann nasyon i bezwen ekoute?

²² Bann ki refize aksepte lotorite Lerwa swazir Bondye, pe ensilte Zeova. Zot pa oule rekonnet drwa Zeova pour diriz liniver ek son lotorite ek abilite pour swazir sa pli bon Lerwa ki kapab diriz limanite. Dirizan bann nasyon pou vwar ki lakoler Bondye pou vin lo zot en sel kou, kan zot pe sey realiz zot prop plan. “Son lakoler i mont fasilman,” e personn pa kapab bar li. Bann dirizan i bezwen aksepte sa lavertisman avek lapresyasyon e azir an armoni avek li. Fer sa i vedir lavi pour zot.

23. I ankor annan ase letan pour fer kwa?

²³ Sa psonm enteresan i konklir par dir: “Byennere tou bann ki pran refiz dan li [Zeova].” (Psonm 2:12b) I ankor annan ase letan pour bann dimoun ganny proteze. Sa i leka menm pour bann dirizan ki pe kontinyen pourswiv zot plan. Zot kapab tay kot Zeova, ki donn refiz anba dominasyon Rwayonm. Me zot bezwen azir avan Rwayonm Mesyanik i kraz sa bann nasyon ki pe opoz li.

24. Konman nou kapab viv en lavi pli satisfezan menm dan sa lemonn trouble?

²⁴ Si nou etidye Labib seryezman e aplik son konsey, nou kapab viv en lavi pli satisfezan depi konmela menm dan sa lemonn trouble. Ler nou aplik bann konsey Labib nou annan en pli bon lavi fanmiy e nou ganny libere avek sa lenkyetid ek lafreyer ki lemonn i ladan. Swiv gidans Labib i donn nou sa konfyans ki nou pe fer plezir nou Kreater. Napa personn apard ki Souvren liniver ki kapab garanti nou “lavi dan letan prezan, ek dan lavenir” apre ki i debaras later avek tou bann ki opoz sa ki byen par rezet son Rwayonm.—1 Timote 4:8.

25. Vi ki “desizyon Zeova” pa kapab fel, ki nou ekspekte pou arive dan nou letan?

²⁵ “Desizyon Zeova” pa kapab fel. Vi ki i nou Kreater, Bondye i konn sa ki pli byen pour bann imen e i pou akonpli son plan pour beni bann imen obeisan avek lape, kontantman, e sekirite dirab anba Rwayonm son Garson byenneme. Konsernan nou letan, profet Danyel ti ekrir: “Dan bann zour sa bann lerwa, Bondye lesyel pou etabli en rwayonm ki pa pou zanmen ganny detrir. . . . I pou kraz e met en lafen avek tou sa bann rwayonm, e li menm i pou dire pour en letan endefini.” (Danyel 2:44) Alor, sirman la i lemoman pour “anbras son garson” e servi Souvren Senyer Zeova!

[Not anba lo paz]

Ki ou pou reponn?

• Ki sa “mantoun anven” ki bann group nasyonal pe fer?

• Akoz Zeova i monk bann nasyon?

• Ki desizyon Bondye kont bann nasyon?

• Ki savedir “anbras son garson”?

[Portre lo paz 15]

Bann dirizan ek lepep Izrael ti fer konplo kont Zezi Kri

[Portre lo paz 16]

Zezi in ganny enstale konman Lerwa lo montanny Siyon