Apros avek Bondye

Eski Zeova i annan santiman?

SI LAREPONS i wi, i annan en lot kestyon ki swiv: Eski nou kondwit i annan lefe lo santiman Bondye? Eski nou aksyon i kapab sagrin ouswa fer Bondye kontan? Serten filozof dan letan lontan ti dir ki i pa le ka. Zot ti dir ki personn pa kapab enfliyans Bondye e ki pour sa rezon Bondye pa kapab annan santiman. Me, Labib i annan en lot pwennvi lo Bondye. Se ki Zeova i sansib, i annan santiman e i vreman enterese avek sa ki nou fer. Get par egzanp sa ki Psonm 78:40, 41 i dir.

Psonm 78 i koz lo relasyon ant Bondye ek nasyon Izrael. Apre ki i ti’n delivre zot Lezip, Zeova ti donn zot sa sans pour annan en relasyon spesyal avek li. I ti promet ki si zot ti kontinyen obeir son lalwa, zot ti pou vin son “propriyete spesyal” e ki i ti pou servi zot dan en fason ekstraordiner pour akonplir son plan. Lepep ti dakor e zot ti aksepte pour swiv lalyans Lalwa. Eski zot ti fer zot par pour respekte sa lagreman?​—Egzod 19:3-8.

Sa Psonm i dir: “Konbyen fwa zot ti rebel kont li dan dezer!” (Verse 40) Lot verse ki swiv i azoute: “Zot ti teste Bondye plizyer fwa.” (Verse 41) Ou pou remarke ki sa Psonm i dir ki zot ti annan labitid pour rebele. Sa vilen leta lespri ti vin evidan byen boner apre ki zot ti’n ganny delivre Lezip e ariv dan dezer. Lepep ti konmans mirmire kont Bondye e demande si i ti kapab e anvi pran swen avek zot. (Nonm 14:1-4) En liv pour bann tradikter Labib i dir ki sa lekspresyon “rebel kont li” ti kapab ganny “tradwir literalman ‘ki zot ti fer zot leker vin dir anver Bondye’ oubyen ‘zot ti dir “Non” avek Bondye.’” Pourtan, avek mizerikord, Zeova ti pardonn son pep si zot ti repantir. Me parey zot labitid, zot ti rekonmans fer sa ki mal e rebel ankor.​—Psonm 78:10-19, 38.

Ki mannyer Zeova ti santi sak fwa ki son pep ti rekonmans rebele? Verse 40 i dir: “Zot ti fer li soufer.” En lot tradiksyon i dir ki zot “ti fer li sagren.” En liv lo Labib i dir: “Lide la se konmsi bann Ebre ti fer ekspre pour fer li sagren, parey kondwit en zanfan rebel e dezobeisan.” Parey en zanfan dezobeisan i kapab fer son paran vreman tris, “Sen Izrael ti dan lapenn akoz [bann Izraelit].”​—Verse 41.

Ki nou kapab aprann atraver sa Psonm? Pa i rekonfortan pour vwar ki Zeova i sitan atase avek son serviter e ki i pa deswit abandonn zot! An menm tan, i montre nou ki Zeova i annan santiman e ki nou kondwit i annan en lefe lo li. Ki lefe i annan lo nou lefet ki nou konn sa? Eski sa pou motiv nou pour fer sa ki byen?

Olye kontinyen pratik pese e fer leker Zeova soufer, nou kapab swazir pour fer sa ki byen e fer son leker kontan. Sanmenm ki Zeova i demann son bann serviter: “Vin saz, mon garson e rezwir mon leker.” (Proverb 27:11) Napa nanryen pli presye ki nou kapab donn Zeova ki viv dan en fason ki fer li plezir.

[Ekstre lo paz 32]

Napa nanryen pli presye ki nou kapab donn Zeova ki viv dan en fason ki fer li plezir