Onor Zeova par montre ki nou annan dinyite

“Tou sa ki Zeova i fer i ranpli avek dinyite ek splander.”—PS. 111:3.

1, 2. (a) Ki savedir “dinyite”? (b) Ki kestyon nou pou egzaminen dan sa lartik?

KAN zot ti demann Madison ki ti annan di-z-an ki savedir dinyite, i ti reponn: “Kan nou byen sanze.” Sa ki sa pti fiy pa konnen se ki Labib i dir ki Bondye in ‘abiy li avek dinyite.’ (Ps. 104:1) Pour bann imen, montre ki zot annan dinyite, sa i kapab parfwa vedir byen sanze. Par egzanp, zapot Pol ti anvi ki bann madanm Kretyen ‘i abiy zot desaman, dan en fason respektab, konvenab e senp. Pa bezwen ki zot orn zot avek lanmod seve konplike, avek bizou annor, ou perl ek labiyman byen ser.’ (1 Tim. 2:9) Me pour annan en bon kondwit ki onor “dinyite ek splander” Zeova, i enplik plis ki sa.—Ps. 111:3.

² Sa mo Ebre dan Labib ki’n ganny tradwir “dinyite,” i kapab osi ganny tradwir konman “splander,” “labote,” “laglwar,” ek “loner.” Dapre en diksyonner, “dinyite” i kan “en dimoun i santi ki i annan valer, i resevwar loner oubyen ki lezot i annan respe pour li.” E napa en dimoun ki merit resevwar plis loner ek respe ki Zeova. Alors, konman son bann serviter ki’n dedye nou lavi avek li, nou devret koz e azir dan en fason ki anmenn loner lo li. Be kwa ki fer imen kapab montre ki zot annan dinyite? Ki mannyer nou kapab vwar ki Zeova i annan dinyite ek splander? Lefet ki Bondye i annan dinyite ki lefe sa i devret annan lo nou? Ki nou kapab aprann avek Zezi Kri lo lafason pour demontre sa kalite? E konman nou kapab montre ki nou annan dinyite parey Bondye?

Kwa ki fer nou kapab montre ki nou annan dinyite

3, 4. (a) Ki mannyer nou devret reazir anver loner ki nou’n resevwar? (b) Psonm 8:5-9 ti pe koz konsernan lekel? (Vwar not anba lo paz.) (c) Lekel ki ti resevwar loner sorti kot Zeova dan lepase?

³ Lefet ki tou imen in ganny kree dan resanblans Bondye zot annan sa abilite pour montre ki zot annan dinyite. Zeova ti donn loner sa premye zonm par donn li sa responsabilite pour pran swen avek later. (Zen. 1:26, 27) Menm apre ki bann imen ti’n vin enparfe, Zeova ti repet responsabilite ki zot annan an rapor avek later. Alors, Bondye i touzour ‘donn loner’ bann imen par fer zot santi ki zot annan valer. (Lir Psonm 8:5-9.)a Loner ki nou resevwar avek Zeova i devret an retour pous nou pour donn li loner dan sa bon fason, setadir ki nou loue Son non eksepsyonnel avek ladmirasyon ek respe.

⁴ Dan en serten degre, Zeova i partikilyerman donn loner sa bann ki pe ofer li en servis sakre. Bondye ti onor Abel par aksepte son sakrifis e rezet sakrifis ki son frer Kaen ti ofer. (Zen. 4:4, 5) Moiz ti ganny demande pour donn Zozye ‘en pe sa dinyite,’ ki Zeova ti’n donn li avek sa zonm ki ti siksed li pour gid bann Izraelit. (Nom. 27:20) Konsernan Salomon ki ti garson David, Labib i dir: “Zeova ti kontinyen fer Salomon vin vreman tre enportan devan pep Izrael e i ti donn li dinyite rwayal ki okenn lerwa avan li an Izrael pa ti’n deza gannyen.” (1 Kron. 29:25) Bondye pou donn loner bann Kretyen swazir ki’n fidelman fer lezot konn “laglwar konsernan splander son rwayote” dan en fason spesyal, ler zot pou resisite. (Ps. 145:11-13) “Lezot mouton” ki pe deplizanpli ogmante i ganny sa privilez pour pran par dan sa aktivite ki ranpli avek dinyite pour loue Zeova.—Zan 10:16.

Dinyite ek splander Zeova i evidan

5. Ki kantite gran dinyite Zeova i ete?

⁵ Psalmis David ti fer resorti diferans ki i annan ant grander Bondye ek bann imen ki pli enferyer dan en kantik ki i ti sante: “O Zeova nou Senyer, vreman ou non i eksepsyonnel lo later antye, ou ki ou dinyite pe ganny rakonte parlao lesyel!” (Ps. 8:1) Zeova i sa pli gran Personaz dan liniver e i sa enn ki merit ganny plis loner e sa pa pou zanmen sanze. Sa in leka depi avan kreasyon “lesyel ek later” e i pou reste parey menm apre ki Bondye i akonplir son gran plan kan bann imen pou vin parfe dan paradi lo later.—Zen. 1:1; 1 Kor. 15:24-28; Rev. 21:1-5.

6. Akoz sa psalmis ti dir ki Zeova in abiy li avek dinyite?

⁶ Pa sa psalmis ki ti annan lakrent pour Bondye ti’n bezwen santi li touse ler i ti obzerv pandan en lannwit byen trankil labote en lesyel ranpli avek zetwal, dekore avek sa bann “bizou” ki ti pe klate! Ranpli avek ladmirasyon pour lafason ki Bondye ‘in redi lesyel parey latwal en latant’ sa psalmis ti dir ki Zeova in abiy li avek dinyite e sa se akoz sa gran abilite enpresyonan ki I annan pour kree. (Lir Psonm 104:1, 2.) Nou vwar dinyite ek splander sa Kreater tou pwisan ki envizib dan bann keksoz vizib ki i’n kree.

7, 8. Ki mannyer dinyite ek splander Zeova i evidan dan liniver?

⁷ Pran par egzanp, sa galaksi ki apel Lavwa Lakte. Parmi sa gran kantite zetwal, plannet ek sistenm soler, plannet Later i vreman pti zis parey en gren disab lo en gran lans. Annefe, zis dan sa galaksi tousel i annan apepre plis ki 100 bilyon zetwal. Si ou ti kapab kont en zetwal sak segonn san arete 24 lo 24, i ti pou pran ou plis ki 3,000 an pour arive kont 100 bilyon zetwal.

⁸ Si sa galaksi Lavwa Lakte li tousel i annan 100 bilyon zetwal, ki nou pour dir lo larestan liniver? Bann astrononm i estimen ki Lavwa Lakte i kapab en galaksi parmi 50 bilyon a 125 bilyon galaksi. Konbyen zetwal i annan dan liniver antye? Sertennman larepons i tro konplike pour nou konpran. Me Zeova “pe kont bann zetwal; zot tou, i apel zot par zot non.” (Ps. 147:4) Alors, ler ou konpran ki mannyer Zeova in abiy li avek dinyite ek splander, eski pa sa i pous ou pour loue son gran non?

9, 10. Ki mannyer sa dispozisyon ki’n ganny pran pour nou ganny dipen i montre grander lasazes nou Kreater?

⁹ Aprezan annou les dekote labote lesyel e konsantre lo en keksoz ki tou dimoun i konn byen, sa i dipen. Zeova pa zis “Kreater lesyel ek later” me i osi “sa Enn ki pe donn dipen bann ki lafen.” (Ps. 146:6, 7) Nou kapab vwar “dinyite ek splander” Bondye atraver son bann travay ekstraordiner ki i’n fer, sa i enkli bann plant ki donn lagrenn ki ganny servi pour fer dipen. (Lir Psonm 111:1-5.) Zezi ti ansenny son bann disip pour priye: “Donn nou sak zour nou dipen neseser.” (Mat. 6:11) En kantite dimoun dan letan lontan, ti manz dipen preski tou le zour, sa ti osi enkli bann Izraelit. Menm si dipen i ganny konsidere konman en keksoz senp, sa prosesis kemikal ki transform sa bann zengredyen pour ganny en dipen apetisan pa sitan senp.

¹⁰ Dan letan ki Labib ti pe ganny ekrir, bann Izraelit ti abitye servi lafarin dible oubyen lorz ek delo pour fer dipen. Lelven osi ti ganny servi parler pour fer dipen. Sa bann senp zengredyen i ganny melanze pour prodwir en kantite sibstans ki travay ansanm. I difisil pour konpran egzakteman ki mannyer sa bann sibstans i travay ansanm. Deplis, lafason ki sa dipen i ganny dizere dan lekor en dimoun i en lot prosesis vreman konplike. I pa etonan alor ki sa psalmis ti sante: “Pa ou bann travay i bokou, O Zeova! Ou’n fer zot tou avek lasazes”! (Ps. 104:24) Eski ou osi ou santi ou pouse pour loue Zeova?

Ki lefe dinyite ek splander Bondye i annan lo nou?

11, 12. Ler nou reflesir lo travay kreasyon Bondye, ki lefe sa i kapab annan lo nou?

¹¹ Pa bezwen ki nou en astrononm pour obzerv lesyel aswar avek ladmirasyon, ni en syantis pour apresye dipen. Me pour arive apresye splander nou Kreater, nou bezwen pran letan pour reflesir lo sa kantite travay ki i’n fer. Ki mannyer sa i kapab ed nou? En tel meditasyon i annan sa menm lefe lo nou zis parey ler nou pe medit lo bann travay Zeova dan en lot domenn.

¹² An rapor avek bann keksoz ekstraordiner ki Zeova ti fer pour Son pep, David ti sante: “Mon pou preokip mwan avek sa splander manifik ki ou dinyite i annan ek bann keksoz konsernan ou travay merveye.” (Ps. 145:5) Nou preokip nou avek sa bann travay ler nou etidye e pran letan pour medit lo sa ki nou lir dan Labib. Ki lefe sa refleksyon i annan lo nou? Nou lapresyasyon pour dinyite ek splander Bondye i ogmante. Sertennman alors, nou santi nou pouse pour zwenn ansanm avek David pour onor Zeova par dir: “Mwan mon pou koz lo ou grander.” (Ps. 145:6) Ler nou medit lo bann travay merveye ki Bondye in fer, sa i devret ranforsi nou relasyon avek Zeova e motiv nou pour koz avek lantouzyasm ek determinasyon konsernan li avek lezot. Eski ou pe anons sa bon nouvel avek devouman e pe ed dimoun pour apresye dinyite, splander ek labote Zeova?

Zezi ti parfetman montre ki i annan dinyite parey Bondye

13. (a)Dapre Danyel 7:13, 14, ki Zeova ti donn son Garson? (b) Konman en Lerwa, ki mannyer Zezi i tret son bann sitwayen?

¹³ Zezi Kri, Garson Bondye, ti anons sa bon nouvel avek devouman e i ti onor son Papa dan lesyel ki annan en gran labote e ki ranpli avek dinyite. Zeova ti donn loner son sel Garson dan en fason spesyal par donn li ‘dominasyon ek rwayonm.’ (Lir Danyel 7:13, 14.) Annefe, Zezi pa orgeye e i pa difisil pour apros li. O kontrer i en Dirizan ki annan konpasyon, ki konpran limit son bann sitwayen e i tret zot avek respe ek konsiderasyon. Annou vwar en legzanp konman Zezi, sa enn ki’n ganny swazir pour vin Lerwa ti tret bann dimoun ki i ti zwenn, sirtou bann ki ti ganny rezete ek bann ki dimoun pa ti kontan zot.

14. Ki mannyer bann Izraelit ti konsider bann dimoun ki ti ganny lalep?

¹⁴ Laplipar di tan bann dimoun ki ti ganny lalep dan letan lontan ti soufer en kantite e langir pour mor. Ptitapti, bann diferan parti zot lekor ti ganny afekte. Bann dimoun ti mazinen ki i ti preski enposib pour geri en lepre, zis parey zot ti mazinen ki i ti difisil pour resisit en dimoun mor. (Nom. 12:12; 2 Rwa. 5:7, 14) Bann lepre ti ganny konsidere konman enpir e dimoun dan lasosyete ti ay zot e rezet zot. Ler zot ti pe apros bann dimoun, zot ti bezwen kriye pour averti dimoun: “Enpir, enpir!” (Lev. 13:43-46) En lepre ti parey en dimoun mor. Dapre resi bann sef relizye Zwif, en lepre ti ganny drwa apros zis apepre 1.7 met avek nenport ki dimoun. Sa resi i dir ki menm ler en sef relizye ti vwar en lepre pe vini dan lwen, i ti anvoy ros lo li pour li pa vin pli pros.

15. Ki mannyer Zezi ti azir anver en zonm ki ti ganny lalep?

¹⁵ Me en keksoz remarkab i reaksyon ki Zezi ti annan anver en lepre ki ti vin kot li e sipliy li pour ganny geri. (Lir Mark 1:40-42.) Olye fer sa lepre ale, Zezi ti azir avek konpasyon ek respe anver sa zonm ki ti ganny rezete par lezot. Zezi ti vwar ki sa zonm ti fer lapenn e ki i ti bezwen en soulazman. Lefet ki i ti pran pitye pour sa zonm e sa santiman ranpli avek konpasyon ti pous li pour azir deswit. I ti avans son lanmen, tous sa lepre e geri li.

16. Ki leson ou aprann dan lafason ki Zezi ti azir anver lezot?

¹⁶ Konman bann disip Zezi, ki mannyer nou kapab imit lafason ki Zezi ti montre ki annan dinyite parey son Papa? En fason pour fer sa, se par rekonnet ki tou dimoun, ki swa zot laz, lasante oubyen pozisyon dan lasosyete, zot merit ganny onore e respekte. (1 Pyer 2:17) I sirtou bann ki annan serten lotorite parey bann msye, paran ek ansyen dan kongregasyon ki devret demontre respe ek loner anver sa bann ki zot pe pran swen avek e an retour sa i ava ed zot prezerv zot dinyite. Pour montre lenportans ki sa i devwar tou Kretyen, Labib i dir: “Annan en gran lafeksyon pour kanmarad parey bann frer, e setaki montre plis respe pour kanmarad.”—Rom. 12:10.

Montre ki nou annan dinyite dan nou ladorasyon

17. Ki nou kapab aprann atraver Labib konsernan demontre respe dan nou ladorasyon pour Zeova?

¹⁷ Nou devret montre ki nou annan dinyite sirtou dan nou ladorasyon pour Zeova. Eklezyast 5:1 i dir: “Vey ou lipye ler ou al kot lakaz vre Bondye.” Tou le de, Moiz ek Zozye ti ganny demande pour tir zot sandalet ler zot ti dan en landrwa ki ti ganny konsidere sen. (Egz. 3:5; Zoz. 5:15) Zot ti fer sa aksyon pour demontre sa gran respe ki zot ti annan. Bann pret Izraelit ti oblize met en lanmores linenn pour kouver serten parti zot lekor. (Egz. 28:42, 43) Sa ti evite ki zot ti akonplir zot servis dan en fason endesan kot lotel. Sak manm dan fanmir en pret ti bezwen soutenir sa standar ki refer avek dinyite ki Bondye in etablir.

18. Ki mannyer nou demontre respe dan nou ladorasyon pour Zeova?

¹⁸ Montre ki nou annan dinyite dan nou ladorasyon i enplik demontre loner ek respe. Nou bezwen azir dan en fason respektab pour lezot demontre loner ek respe anver nou. Sa respe ki nou demontre i pa merit zis pour ki lezot i remark nou. I pa devret zis sa ki imen i kapab vwar, me sa ki Bondye i kapab vwar dan nou leker. (1 Sam. 16:7; Prov. 21:2) Demontre respe pour lezot i devret en laspe dan nou personnalite. Sa i devret annan en lefe lo nou konportman, nou latitid, nou relasyon avek lezot e lopinyon ki nou annan lo nou menm. Annefe nou devret toultan montre ki nou annan respe dan tou sa ki nou dir oubyen fer. Kot i konsern nou kondwit, nou konportman, nou fason sanze ek nou laparans nou devret pran aker sa bann parol zapot Pol: “Nou pa oule plas okenn lobstak devan personn, pour ki nou servis pour Bondye pa ganny blanmen. Me o kontrer nou fer tou nou posib pour viv konman bann serviter Bondye.” (2 Kor. 6:3, 4) Nou “fer loner lansennyman [nou] Bondye, nou Sover” dan tou keksoz.—Tit 2:10.

Kontinyen montre ki nou annan dinyite parey Bondye

19, 20. (a) Ki sa bon fason ki nou kapab demontre respe anver lezot? (b) An rapor avek dinyite, ki nou devret determinen pour fer?

¹⁹ Bann Kretyen swazir ki “bann lanbasader Kris” i montre ki zot annan dinyite. (2 Kor. 5:20) “Lezot mouton” ki fidelman donn sipor sa bann Kretyen swazir i bann reprezantan sa Rwayonm Mesyanik. En anbasader oubyen reprezantan i koz avek respe ek dinyite delapar son gouvernman. Alors, nou devret koz avek respe ek lardyes pour siport Rwayonm setadir gouvernman Bondye. (Efe. 6:19, 20) E ler nou partaz sa “bon nouvel konsernan en keksoz meyer” avek bann dimoun eski pa nou pe demontre loner ek respe anver zot?—Iza. 52:7.

²⁰ Nou devret annan sa determinasyon pour rann glwar Bondye par annan en kondwit ki an armoni avek son dinyite. (1 Pyer 2:12) Annou touzour demontre en gran respe pour li, pour son ladorasyon e pour nou bann frer ek ser. Fotespere lafason ki nou montre ki nou annan dinyite dan nou ladorasyon pour Zeova, ki abiy li avek dinyite ek splander i fer li plezir.

[Not anba lo paz 17]

Ki ou pou reponn?

• Kan nou annan lapresyasyon pour splander ek dinyite Zeova ki lefe sa i devret annan lo nou?

• Lafason ki Zezi ti azir anver en lepre, ki ou’n aprann konsernan dinyite?

• Ki mannyer nou kapab onor Zeova dan en fason ki demontre respe?

[Portre lo az 18]

Ki mannyer Zeova ti donn loner Abel?

[Portre lo paz 20]

Lafason ki Zezi ti azir anver en lepre, ki ou’n aprann konsernan dinyite?