Akoz nou devret loue Ya?

1-3. (a) Petet, dan ki letan Psonm 147 ti ganny ekrir? (b) Ki nou kapab aprann ler nou etidye Psonm 147?

SOUVAN nou felisit oubyen koz an byen lo en dimoun ler nou enpresyonnen par sa ki i’n dir ouswa fer. Pa sa i pous nou pour koz an byen oubyen loue Zeova bokou plis! Nou loue li pour son gran pwisans ki nou vwar dan son kreasyon merveye e nou loue li pour son gran lanmour ki i’n demontre anver nou atraver sakrifis son prop Garson.

² Ler nou lir Psonm 147, nou kapab vwar ki sa ekriven ti annan en profon dezir pour loue Zeova. I ti osi ankouraz lezot pour loue Bondye ansanm avek li.​—Lir Psonm 147:1, 7, 12.

³ Nou pa konnen lekel ki’n ekri Psonm 147. Me i posib ki sa ekriven ti viv pandan letan ki bann Izraelit ti retourn Zerizalenm apre ki Zeova ti’n liber zot Babilonn. (Psonm 147:2) Sa psalmis ti loue Zeova parski ankor enn fwa Son pep ti pou kapab ador li dan zot prop pei. Apre, sa psalmis ti donn ankor plis rezon pour loue Zeova. Ki sa bann rezon? Ki bann rezon ou ou annan pour kriy Alelouya! ouswa “loue [Ya]”?​—Psonm 147:1.

 4. Ler Lerwa Siris ti liber bann Izraelit, ki mannyer zot ti’n bezwen santi e akoz?

⁴ Imazin ki mannyer bann Izraelit ti’n bezwen santi ler zot ti an egzil Babilonn. Sa bann dimoun ki ti anmenn zot laba ti sikann zot e dir: “Sant en kantik sorti Siyon.” Me bann Zwif pa ti annan lanvi pour sante. Zerizalenm ki ti zot pli gran rezon pour zwaye, ti’n ganny detrir. (Psonm 137:1-3, 6) Zot leker ti’n kase e zot ti bezwen rekonfor. Me zis parey Parol Bondye ti’n predir, Zeova ti ed son pep. Ki mannyer? Lerwa Siris ki sorti Pers ti konkerir Babilonn e i ti dir sa konsernan Zeova: “I’n ordonn mwan konstri en tanp pour li dan Zerizalenm.” Siris ti osi dir avek bann Izraelit: “Bann parmi zot ki form parti son pep, ale; e ki [Zeova], Bondye i avek zot.” (2 Kronik 36:23) Pa sa ti’n sirman rekonfort bann Izraelit ki ti Babilonn!

 5. Ki sa psalmis ti dir konsernan pwisans Zeova pour geri nou?

⁵ Zeova pa ti zis rekonfort bann Izraelit konman en nasyon me osi konman bann endividi. Zeova i fer menm parey avek nou ozordi. Sa psalmis ti ekri ki Bondye “i geri bann ki leker in perdi lespwar. I pans zot bann blesir.” (Psonm 147:3) Ler nou malad ouswa dan depresyon, nou kapab asire ki Zeova i enterese avek nou. Zeova i anvi rekonfort nou e geri nou bann blesir emosyonnel. (Psonm 34:18; Izai 57:15) I donn nou lasazes ek lafors pour ki nou kapab fer fas avek nenport problenm ki nou annan.​—Zak 1:5.

 6. Ki mannyer nou benefisye avek Psonm 147:4? (Vwar portre o konmansman sa lartik.)

⁶ Apre, sa psalmis ti get lesyel e dir ki Zeova “i kont bann zetwal. I apel zot tou par zot non.” (Psonm 147:4, NWT) Sa psalmis ti kapab vwar bann zetwal, me i ti napa okenn nide lo lakantite ki i annan. Ozordi, bann syantis i konnen ki i annan plizyer bilyon zetwal dan nou galaksi e ki i kapab annan plizyer trilyon galaksi dan liniver! Bann imen pa kapab kont tou sa zetwal, me nou Kreater i kapab. Anfet, i konn tre byen sak zetwal, ki i’n donn sakenn en non. (1 Korentyen 15:41) Sa Bondye ki konnen kote tou zetwal i ete i osi konn ou. I toultan konn egzakteman kote ou ete, ki mannyer ou santi e sa ki ou bezwen!

7, 8. (a) Ki Zeova i konpran konsernan nou? (b) Donn en legzanp ki montre konpasyon Zeova.

⁷ Zeova i konpran sa ki ou pe pas ladan e i annan sa kapasite pour ed ou avek ou bann problenm. (Lir Psonm 147:5.) Ou kapab santi ki ou sityasyon i tro difisil e ki ou pa kapab fer fas avek. Bondye i konpran nou bann limit, “i rapel ki nou zis lapousyer.” (Psonm 103:14) Vi ki nou enparfe, sa i fer nou kontinyelman repet menm fot e nou kapab dekouraze. Pa nou regret serten keksoz ki nou’n fer, bann move dezir ki nou ti annan ouswa bann santiman zalouzi ki nou’n gannyen! Zeova napa okenn febles, me i konpran tre byen mannyer nou santi.​—Izai 40:28.

⁸ Eski ou’n deza personnelman santi lanmen for Zeova pe ed ou rekipere apre ki ou’n pas dan bann leprev? (Izai 41:10, 13) Sanmenm ki ti arive avek en pionye ki apel Kyoko. Apre ki i ti’n al servi dan en lot landrwa, i ti vreman dekouraze. Me ki mannyer Kyoko ti konnen ki Zeova ti konpran son bann problenm? Dan son nouvo kongregasyon, i ti annan plizyer dimoun ki ti kapab konpran son santiman. I ti santi ki Zeova ti pe dir: “Mon kontan ou, pa zis akoz ou en pionye, me akoz ou mon fiy e ou’n dedye ou lavi avek mwan. Mon anvi ki ou ere dan ou lavi konman enn mon Temwen!” Ki mannyer Zeova in montre ou ki son “lentelizans napa okenn limit”?

9, 10. Ki sa fason pli enportan Zeova pou pran swen avek nou? Donn en legzanp.

⁹ Nou tou nou bezwen manze, lenz ek en landrwa reste. Petet ou enkyet ki ou pou napa ase manze. Me Zeova in fer later pour prodwir manze pour nou tou, menm pour “bann pti korbo ler zot lafen.” (Lir Psonm 147:8, 9.) Si Zeova i nouri bann korbo, nou kapab asire ki i pou donn nou nou bezwen materyel.​—Psonm 37:25.

¹⁰ Pli enportan, Zeova i donn nou sa ki nou bezwen pour gard nou lafwa for e i donn nou “lape Bondye ki depas tou sa ki nou kapab konpran.” (Filipyen 4:6, 7) En frer ki apel Mutsuo ek son madanm ti vwar konman Zeova ti ed zot. Ler en tsounami ti tap Zapon an 2011, si zot pa ti’n mont anler lo twa lakaz, zot ti pou’n perdi zot lavi. Sa zour zot ti perdi preski tou sa ki zot ti annan. Zot ti pas lannwit dan dezyenm letaz zot lakaz dan en lasanm ki ti fernwanr e fre. Son bomaten, zot ti rod en keksoz ki ti kapab ankouraz zot. Sel keksoz ki zot ti vwar ti Yearbook of Jehovah’s Witnesses lannen 2006. Anmezir ki Mutsuo ti vir bann paz, i ti vwar sa tit “The Deadliest Tsunamis Ever Recorded.” Sa seksyon ti pe koz lo en tranblemandter ki ti tap Sumatra an 2004 e ki ti fer bann tsounami pli destriktif ki’n deza ganny rikorde. Mutsuo ek son madanm ti plere anmezir ki zot ti lir lo leksperyans bann frer ek ser. Zot ti santi ki Zeova ti pe donn zot egzakteman sa lankourazman ki zot ti bezwen. Zeova ti osi pran swen avek zot dan lezot fason. Zot bann frer ek ser dan lezot parti Zapon ti donn zot manze ek lenz. Sa ki ti donn zot plis lafors ti bann vizit ki zot ti gannyen avek bann frer ki ti’n ganny anvoye par lorganizasyon Zeova. Mutsuo i dir: “Mon ti santi konmsi Zeova ti akote sakenn parmi nou e pe pran swen avek nou. Sa ti en gran rekonfor!” Bondye i premyerman donn nou sa ki nou bezwen pour gard nou lafwa for e apre i donn nou nou bezwen materyel.

11. Ki nou bezwen fer pour benefisye avek led Bondye?

¹¹ Zeova i “relev bann ki annan limilite.” I kontan nou e i toultan pare pour ed nou. (Psonm 147:6a, NWT) Ki mannyer nou kapab benefisye avek son led? Nou bezwen annan en relasyon solid avek li. Pour annan sa bon relasyon, nou bezwen annan limilite. (Zefanya 2:3, NWT) Bann ki annan limilite i depan lo Zeova pour koriz nenport lenzistis e pour termin zot soufrans. Zeova i donn zot son laprouvasyon.

12, 13. (a) Ki nou devret evite pour kapab ganny led Bondye? (b) Dan lekel ki Zeova i pran plezir?

¹² De lot kote, Bondye “i abes bann malfeter.” (Psonm 147:6b) Nou pa anvi ki sa i arive avek nou! Nou anvi ki Bondye i demontre son lanmour fidel anver nou. Alor nou devret ay sa ki i pa kontan. (Psonm 97:10) Par egzanp, nou bezwen ay imoralite seksyel. Sa i vedir ki nou devret evit nenport keksoz ki kapab fer nou komet imoralite seksyel e sa i enkli pornografi. (Psonm 119:37; Matye 5:28) Sa i kapab en gro konba, me i vo lapenn parski nou pou ganny benediksyon Zeova.

¹³ Nou pa kapab lalit dan sa konba nou tousel. Nou bezwen depan lo Zeova. Eski i pou kontan si nou depan lo bann keksoz ki dimoun dan sa lemonn i depan lo la pou ganny led? Non, Zeova “pa pran plezir dan lafors en seval.” Eski nou devret depan lo nou prop lafors ouswa lo lezot dimoun? Zeova pa “pran plezir . . . dan performans en atlet.” (Psonm 147:10) O kontrer, nou bezwen kontinyen priy Zeova pour son led e sipliy li pour sov nou dan nou bann febles. Zeova pa pou zanmen fatige tann sa bann lapriyer. Zeova “i pran plezir dan dimoun ki annan respe pour li, dan sa bann ki’n met zot lespwar dan son fidelite.” (Psonm 147:11) Vi ki i fidel e i kontan nou, nou konnen ki i pou kontinyen ed nou sirmont nou bann move dezir.

14. Ki sa psalmis ti asire?

¹⁴ Zeova i reasir nou ki i pou ed nou ler nou annan problenm. Ler bann Izraelit ti retourn Zerizalenm, sa psalmis ti mazin lo ki mannyer Zeova ti pe ed zot. Sa psalmis ti sante: “I ranforsi serir ou bann laport; i beni ou bann zanfan. I gard lape dan ou bann frontyer.” (Psonm 147:13, 14) Lefet ki Zeova ti pou ranforsi bann baro lavil sa ti fer sa psalmis santi li an sekirite. Sa ti reasir li ki Zeova ti pou protez son pep.

15-17. (a) Parfwa, ki mannyer nou kapab santi konsernan nou bann leprev, me ki mannyer Zeova i servi son Parol pour ed nou? (b) Donn en legzanp ki montre ki mannyer parol Bondye i “ganny vit egzekite” pour ed nou.

¹⁵ Ou kapab trakase akoz ou bann problenm, me Zeova i kapab montre ou ki mannyer pour fer fas avek ou bann problenm. Sa psalmis i dir ki Bondye “i donn son lord lo later; son parol i ganny vit egzekite.” Apre, sa psalmis ti mansyonn lanez, laroze ek lagrel e i ti dir: “Personn pa kapab tenir son lafreser.” I ti osi dir ki “lo son lord, zot fonn.” (Psonm 147:15-18) Nou Bondye, ki konn tou keksoz e ki kapab fer nenport kwa, ki kontrol lagrel ek lanez i sirman kapab ed ou pour sirmont nenport problenm.

¹⁶ Ozordi, Zeova i gid nou avek son Parol, Labib. Sa psalmis ti dir ki parol Zeova i “ganny vit egzekite” pour ed nou. Bondye i gid nou dan sa pli bon fason e dan sa pli bon moman. Reflesir lo ki mannyer ou benefisye avek Labib, bann piblikasyon sorti kot “lesklav fidel e pridan,” JW Broadcasting, jw.org, bann ansyen ek bann frer ek ser. (Matye 24:45) Eski ou’n vwar dan ou prop lavi ki Zeova i vit pour gid ou?

¹⁷ En ser ki apel Simone ti eksperyans lafason ki Parol Bondye ti ed li. I ti santi ki i pa vo nanryen e ki Zeova pa ti pran plezir dan li. Par kont, ler i ti dekouraze i ti kontinyen priy Zeova e sipliy li pour son led. I ti osi kontinyen etidye Labib. Simone ti dir: “Mon pa’n zanmen dan en sityasyon kot mon pa’n santi lafors Zeova ek son gidans.” Sa in ed li pour annan en latitid pli pozitif.

18. Akoz ou santi ki Zeova i pros avek ou e ki rezon ou annan pour “loue [Ya!]”?

¹⁸ Sa psalmis ti konnen ki dan tou nasyon lo later, Zeova ti’n swazir ansyen nasyon Izrael pour vin son pep. Zot ti sa sel nasyon ki ti’n ganny “parol” Bondye ek son “bann regleman.” (Lir Psonm 147:19, 20.) Ozordi nou annan sa gran loner pour ganny apele par non Bondye. Nou rekonesan ki nou konn li, ki nou annan son Parol pour gid nou e ki nou kapab annan en relasyon pros avek li. Parey sa ekriven Psonm 147, ou annan plizyer rezon pour “loue [Ya!]” e ankouraz lezot fer parey.