Akoz nou devret demontre lapresyasyon anver lezot?

 1. Ki mannyer en Samariten ki Zezi ti geri ti demontre lapresyasyon?

SA DIS zonm ti dan en sityasyon terib. Zot ti annan lalep e zot ti napa okenn lespwar ki zot lasante ti pou amelyore a lavenir. Me en zour, dan lwen, zot ti vwar Zezi, sa Gran Ansenyan. Zot ti’n tande ki Zezi ti’n geri tou sort kalite maladi e zot ti konvenki ki i kapab geri zot osi. Alor zot ti kriye: “Ansenyan, Zezi, pran pitye pour nou!” Sa dis zonm ti ganny geri konpletman. San dout, zot tou zot ti apresye labonte ki Zezi ti demontre anver zot. Par kont, enn parmi zot ti fer plis ki zis annan sa santiman lapresyasyon,b i ti eksprim son lapresyasyon avek Zezi. Sa Samariten ki ti ganny geri ti santi li oblize pour glorifye Bondye “avek en lavwa for.”​—Lik 17:12-19.

2-3. (a) Akoz i kapab difisil pour demontre lapresyasyon? (b) Ki nou pou diskite dan sa lartik?

² Nou anvi demontre nou lapresyasyon anver sa bann ki fer dibyen, zis parey sa Samariten. Me par ler, nou kapab oubliye pour dir mersi oubyen montre lezot ki mannyer nou santi anver zot zenerozite.

³ Dan sa lartik, nou pou egzaminen akoz i enportan pour nou demontre nou lapresyasyon par sa ki nou fer e dir. Nou pou osi diskit lo legzanp bann personnaz dan Labib, ki ti demontre lapresyasyon e osi bann ki pa ti fer li. Nou pou osi vwar bann fason pratik ki nou kapab demontre lapresyasyon.

4-5. Akoz nou devret demontre lapresyasyon?

⁴ Zeova in kit en legzanp pour nou swiv an sa ki konsern demontre lapresyasyon. En fason ki i fer sa, i par rekonpans sa bann ki fer li plezir. (2 Sam. 22:21; Ps. 13:6, NWT; Mat. 10:40, 41) Labib i dir, parey “bann zanfan ki Bondye i kontan, swiv son legzanp.” (Efe. 5:1) Alor, en rezon enportan akoz nou devret demontre lapresyasyon i akoz nou anvi swiv legzanp Zeova.

⁵ Annou vwar en lot rezon akoz nou anvi demontre lapresyasyon anver lezot. Lapresyasyon i parey en bon pla, i pli goute ler ou partaz li avek lezot. Ler nou konnen ki lezot i apresye sa ki nou fer, nou vreman kontan. Kan nou demontre nou lapresyasyon, nou fer lezot osi kontan. Ler nou demontre nou lapresyasyon anver en dimoun, sa dimoun i konnen ki son zefor pour ed nou oubyen pour donn nou sa ki nou ti bezwen ti vreman vo lapenn. Alor, nou lanmitye avek sa dimoun i vin pli for.

 6. Ki mannyer eksprim nou lapresyasyon i parey bann ponm annor?

⁶ I byen ler nou eksprim nou lapresyasyon anver lezot. Labib i dir: “En parol byen apropriye i parey en ponm annor lo en dekor annarzan.” (Prov. 25:11) Zis mazinen ki mannyer bann ponm annor ki’n ganny mete dan en zoli pannyen annarzan i zoli! Mazin osi ki kantite valer i pou annan! Ki mannyer ou ti pour santi ou si ou ti’n ganny en kado parey? Ler ou eksprim ou lapresyasyon anver lezot, sa osi i annan en kantite valer. Mazin sa: En ponm annor i kapab dire pour bokou letan. Pareyman, ler ou eksprim ou lapresyasyon anver en dimoun, i kapab rapel e kontan sa ki ou’n dir li pour larestan son lavi.

 7. Parey nou vwar dan Psonm 27:4, ki mannyer David ek lezot ekriven bann psonm ti eksprim zot lapresyasyon?

⁷ Dan lepase, en kantite serviter Zeova ti demontre zot lapresyasyon. David ti enn parmi zot. (Lir Psonm 27:4, NWT.)c I ti vreman apresye ladorasyon pir e i ti demontre son lapresyasyon an aksyon. I ti donn en kantite son larises pour ki tanp i ganny konstrir. Bann desandans Azaf ti osi demontre lapresyasyon par ekri bann psonm oubyen kantik louanz. Dan en kantik, zot ti remersye Bondye e eksprim zot ladmirasyon pour “bann mervey” ki Zeova in fer pour zot. (Ps. 75:1) I kler ki David ek bann desandans Azaf ti anvi montre Zeova ki kantite zot ti apresye tou bann benediksyon ki zot ti’n gannyen avek li. Eski ou kapab mazin diferan fason ki ou kapab imit zot?

8-9. Ki mannyer zapot Pol ti montre lapresyasyon pour son bann frer ek ser? Ki lefe sa ti kapab annan lo zot?

⁸ Zapot Pol ti apresye son bann frer ek ser e i ti montre sa par lafason ki i ti koz lo zot. I ti toultan remersye Bondye akoz zot dan son lapriyer personnel. I ti osi eksprim son lapresyasyon ler i ti ekri zot. Dan sa premye 15 verse dan Romen 16, Pol i mansyonn 27 Kretyen par zot non. Pol ti rapel ki Priska ek Akila ti “riske zot lavi” pour li. I ti osi dir ki Febe “in defann en kantite dimoun,” enkli Pol li menm. I ti felisit sa bann frer ek ser ki i ti kontan akoz zot ti travay vreman dir.​—Rom. 16:1-15.

⁹ Pol ti konnen ki son bann frer ek ser ti enparfe, me ler i ti pe fini ekrir son let pour bann Romen, i ti swazir pour konsantre lo zot bann bon kalite. Zis mazin ki mannyer sa bann frer ek ser ti’n kapab ganny ankouraze ler zot ti tann komanter Pol pe ganny lir aotvwa dan kongregasyon! Alor, i fer sans pour mazinen ki zot lanmitye avek Pol ti vin pli for. Eski ou fer li en labitid pour remersye ou bann frer ek ser pour bann bon keksoz ki zot dir e fer dan ou kongregasyon?

10. Ki nou kapab aprann avek lafason ki Zezi ti eksprim son lapresyasyon pour son bann disip?

¹⁰ Dan son mesaz pour serten kongregasyon Lazi Miner, Zezi ti eksprim son lapresyasyon pour travay ki son bann disip ti fer. Par egzanp, i ti konmans son mesaz pour kongregasyon Tyatir par dir: “Mon konn sa ki ou fer, ou lanmour, lafwa, ou minister ek landirans e ki tou dernyenman, ou’n fer plis ki o konmansman.” (Rev. 2:19) Zezi pa ti zis mansyonnen ki zot pe fer plis ki oparavan me i ti osi felisit zot pour zot bann bon kalite ki ti motiv zot pour fer sa ki byen. Kantmenm Zezi ti bezwen donn konsey bann Kretyen Tyatir, i ti konmans e termin son mesaz avek bann parol lankourazman. (Rev. 2:25-28) Zis mazin lotorite ki Zezi i annan konman sef tou bann kongregasyon. I pa bezwen remersye nou pour travay ki nou fer pour li. Kantmenm sa, i fer sir ki i toultan eksprim son lapresyasyon anver nou. Pa sa i en zoli legzanp pour bann ansyen!

11. Dapre Ebre 12:16, ki latitid Ezai ti annan anver bann keksoz sakre?

¹¹ Malerezman, serten dimoun dan Labib pa ti demontre lapresyasyon. Par egzanp, Ezai ti ganny elve par son paran ki ti kontan e respekte Zeova, me li i pa ti apresye keksoz sakre. (Lir Ebre 12:16.) Ki mannyer nou konnen ki Ezai ti mank lapresyasyon? I ti vann son drwa konman premye ne avek son frer Zakob ki ti pli zenn, pour en bol lasoup. (Zen. 25:30-34) Pli tar, Ezai ti regrete en kantite akoz sa desizyon ki i ti’n fer. Toudmenm, Ezai pa ti’n demontre lapresyasyon pour sa ki i ti annan, alor i ti napa okenn rezon pour li konplent ler i pa ti ganny son benediksyon konman premye ne.

12-13. Ki mannyer bann Izraelit ti demontre en mank lapresyasyon? Finalman, ki ti arive avek zot?

¹² Bann Izraelit ti annan en kantite rezon pour demontre lapresyasyon anver Zeova. Zot ti’n ganny libere anba lesklavaz Lezip apre ki Zeova ti frap sa pei avek sa Dis Fleo. Apre sa, Bondye ti delivre zot par detri tou sa larme Ezipsyen dan Lanmer Rouz. Sa bann Izraelit ti sitan kontan ki zot ti sant en kantik laviktwar pour Zeova. Me eski zot ti kontinyen demontre lapresyasyon anver Bondye?

¹³ Ler bann Izraelit ti rankontre bann nouvo defi, zot ti oubliy vitman tou bann bon keksoz ki Zeova ti’n fer pour zot. Zot ti nepli demontre lapresyasyon. (Ps. 106:7) Akoz? “Izrael antye ti mirmire kont Moiz ek Aaron.” An realite, zot ti pe mirmire kont Zeova. (Egz. 16:2, 8) Alor Zeova ti dezapwente akoz son pep ti mank lapresyasyon pour tou sa ki i ti’n fer pour zot. Pli tar, Zeova ti dir ki sa zenerasyon antye pep Izrael ti pou mor dan dezer, eksepte Zozye ek Kaleb. (Nom. 14:22-24; 26:65) Annou vwar ki mannyer nou kapab evite swiv sa bann move legzanp e imit sa bann ki bon.

14-15. (a) Ki mannyer bann koup i kapab demontre lapresyasyon anver kanmarad? (b) Ki mannyer bann paran i kapab ansenny zot zanfan pour demontre lapresyasyon?

¹⁴ Dan fanmir. Lafanmir antye i benefisye ler sak manm i eksprim son lapresyasyon anver kanmarad. Pli bann koup i demontre lapresyasyon anver kanmarad, pli zot vin pros avek kanmarad. Zot osi vwar li pli fasil pour pardonn fot kanmarad. En msye ki apresye son madanm pa zis remark bann bon keksoz ki i dir e fer, me i osi “leve e felisit li.” (Prov. 31:10, 28) Osi, en madanm ki saz i fer son msye konnen egzakteman kwa ki i kontan oubyen apresye avek li.

¹⁵ Paran, ki mannyer ou kapab ansenny ou zanfan pour demontre lapresyasyon? Rapel ki ou zanfan pou imit sa ki ou dir e fer. Alor, kit en bon legzanp pour ou zanfan par dir mersi letan ou zanfan i fer keksoz pour ou. Deplis, ansenny ou zanfan pour dir mersi ler lezot i fer keksoz pour zot. Ed ou zanfan konpran ki demontre lapresyasyon i en keksoz ki sorti dan leker e ki zot parol i kapab fer dibyen lezot. Par egzanp, en zenn madanm ki apel Clary i dir: “A laz 32 an, mon manman ti vwar li tousel avek trwa zanfan. Letan mon ti ganny 32 an, mon ti mazinen ki mannyer sa ti’n kapab difisil pour li sa laz. Alor, mon ti dir li ki kantite mon apresye tou sa ki i’n sakrifye pour elve mwan avek mon bann frer. Tou resaman, i ti dir mwan ki sa parol ki mon ti dir li i ankor vreman presye pour li, ki souvandfwa i reflesi lo la e i osi touzour fer li zwaye.”

16. Donn en legzanp pour montre ki mannyer nou kapab ankouraz lezot par demontre lapresyasyon.

¹⁶ Dan kongregasyon. Nou ankouraz nou bann frer ek ser ler nou demontre lapresyasyon anver zot. Par egzanp, Jorge, en ansyen ti ganny en maladi vreman grav ler i ti annan 28 an. I pa ti kapab asiste renyon pour en mwan. Menm apre ki i ti’n rekonmans asiste renyon, i pa ti kapab partisipe parey avan. Jorge i admet: “Mon ti santi mwan pa vo nanryen akoz mon pa ti kapab desarz mon bann responsabilite dan kongregasyon parey avan. Me apre en renyon, en frer ti dir mwan sa: ‘Mon anvi remersye ou pour sa bon legzanp ki ou’n kite pour mon fanmir. Ou konnen, nou’n vreman apresye bann diskour ki ou’n donnen pandan sa bann dernyen lannen ki’n pase. Sa bann diskour in ed nou pour grandi spirityelman.’ Sa ti tous mwan en kantite, mon larm ti konmans koule. Son parol ti egzakteman sa ki mon ti bezwen tande.”

17. Dapre Kolosyen 3:15, ki mannyer nou kapab demontre lapresyasyon anver Zeova pour son zenerozite?

¹⁷ Anver nou Bondye zenere. Zeova in donn nou en kantite manze spirityel. Par egzanp, nou ganny bann lenstriksyon ki ed nou dan nou renyon, nou magazin e osi lo nou sit Enternet. Eski ou’n deza tann en diskour, lir en lartik oubyen get en progranm lo Televizyon JW e mazinen, ‘Sanmenm ki mon ti bezwen’? Ki mannyer nou kapab demontre nou lapresyasyon anver Zeova? (Lir Kolosyen 3:15.) En fason ki nou kapab fer sa, i par remersye li dan lapriyer pour tou sa bann zoli kado ki i donn nou.​—Zak 1:17.

18. Dan ki fason nou kapab demontre nou lapresyasyon pour nou Lasal Rwayonm?

¹⁸ Nou osi demontre nou lapresyasyon pour Zeova ler nou gard nou Lasal Rwayonm prop e annord. Tanzantan, nou ede pour netway e fer mentenans lo nou Lasal Rwayonm. Bann ki okip bann lekipman elektronik pour son oubyen video i pran prekosyon pour pa andomaz zot. Ler nou pran byen swen avek nou Lasal Rwayonm, i pou dir pli lontan e i pa pou bezwen bann gran reparasyon. Dan sa fason, nou kapab anmas plis larzan pour konstri e repar lezot Lasal Rwayonm dan lezot pei.

19. Ki ou’n aprann avek leksperyans sa sirveyan rezyonal ek son madanm?

¹⁹ Anver sa bann ki travay dir pour nou. Ler nou demontre lapresyasyon, nou parol i kapab sanz lafason ki en dimoun i santi lo bann difikilte ki i rankontre dan lavi. Annou vwar legzanp en sirveyan rezyonal ek son madanm. Apre ki zot ti’n pas en lazournen antye dan predikasyon dan lafreser, zot ti retourn kot lakaz byen fatige. I ti sitan fer fre ki sa madanm ti al dormi dan son coat. Son lannmen bomaten, i ti dir son msye ki i ti santi ki i nepli kapab kontinyen dan sa servis avek son msye konman sirveyan rezyonal. Pli tar sa zour, zot ti ganny en let sorti kot Biro Brans e sa let ti pour sa ser. Dan sa let, i ti ganny felisite pour son bon travay dan predikasyon e osi pour son landirans. I ti osi dir ki i kapab difisil pour deplase sorti dan en lakaz pour al dan en lot tou le semenn. Son msye i dir: “Sa let ti sitan ankouraz li ki i pa ti zanmen koz lo abandonn son servis ankor. Annefe, plizyer fwa mon madanm in ankouraz mwan pour pa abandonnen ler mon mazin pour arete.” Sa koup ti reste dan sa servis konman sirveyan rezyonal pour preski 40 an.

20. Ki nou merit fer sak zour e akoz?

²⁰ Sak zour, nou kapab esey nou mye pour montre nou lapresyasyon par sa ki nou dir e fer. Nou aksyon ek parol senser i kapab ed en lot dimoun pour li kapab fer fas avek bann problenm ek presyon lavi dan sa lemonn kot laplipar dimoun pa demontre lapresyasyon. Deplis, ler nou remersye lezot senserman, nou vin bann bon zanmi pour touzour. Me sa ki pli byen ankor, se ki nou pe imit nou Papa, Zeova ki zenere e ki annan lapresyasyon.