‘Zot in tann koz lo Landirans Zob’

“Zot in tann koz lo pasyans Zob, e zot in war sa ki Senyer in fer pour li alafen, e zot in war ki Senyer i ranpli avek labonte ek konpasyon.”—ZAK 5:11.

1, 2. Ki leprev en koup ti pas ladan Lapolonny?

MWENS ki enn an apre ki Harald Abt ti’n vin Temwen Zeova, larme Hitler ti pran kontrol lo Danzig (konmela apele Gdańsk) dan nor Lapolonny. Apre sa, keksoz ti vin difisil, menm danzere, pour bann vre Kretyen laba. Gestapo ti sey fors Harald pour siny en dokiman pour renons son lafwa, me i ti refize. Apre detrwa semenn dan prizon, Harald ti ganny anvoye dan kan konsantrasyon Sachsenhausen, kot i ti toultan ganny menase e bate. En zofisye ti montre ledwa lo en laseminen kot i bril lekor mor e dir Harald, “Dan 14 zour, ou pou mont laba kot ou Zeova si ou pa renons ou lafwa.”

² Ler Harald ti ganny arete, son madanm, Elsa, ti ankor pe donn tete zot pti fiy dis mwan. Me Gestapo pa ti eparny Elsa. Pa bokou letan apre, zot ti pran son pti baba e anvoy Elsa dan kan eksterminasyon Auschwitz. Me i ti reisi sirviv plizyer lannen, parey Harald. Ou kapab lir plis lo konman zot in andire dan Latour Veyer le 15 Avril, 1980 (Angle/Franse). Harald ti ekrir: “An tou, mon’n pas 14 zan mon lavi dan bann kan konsantrasyon ek prizon akoz mon lafwa dan Bondye. Dimoun i demann mwan si mon madanm in ed mwan andir tousala. Wi, i’n vreman ed mwan! Mon ti konnen depi okonmansman ki i pa pou zanmen fer konpromi son lafwa, e sa ti ede soutenir mwan. Mon ti konnen ki i ti pou pli kontan vwar mwan mor lo en lanmak ki konnen mon’n ganny large akoz mon’n fer konpromi. . . . Elsa ti andir bokou difikilte pandan bann lannen ki i’n pase dan bann kan konsantrasyon Lalmanny.”

3, 4. (a) Ki legzanp ki kapab ankouraz bann Kretyen pour andire? (b) Akoz Labib i konsey nou pour egzamin leksperyans Zob?

³ Parey bokou Temwen i kapab afirmen, soufrans pa zanmen en keksoz fasil pour andire. Pour sa rezon, Labib i konsey tou Kretyen: “Pran konman legzanp lasoufrans ek pasyans bann profet ki’n anons mesaz Senyer.” (Zak 5:10) Diran plizyer syek, bokou serviter Bondye ti ganny persekite san okenn rezon. Legzanp ki sa “gro nyaz temwen” in kite pour nou, i kapab ankouraz nou pour kontinyen tay sa lakours Kretyen avek landirans.—Ebre 11:32-38; 12:1.

⁴ Dan Labib, Zob i en legzanp remarkab en dimoun ki’n andire. Zak ti ekrir: “Wi, nou konsider zot byennere zot ki i’n reste fidel. Zot in tann koz lo pasyans [oubyen landirans] Zob, e zot in war sa ki Senyer in fer pour li alafen, e zot in war ki Senyer i ranpli avek labonte ek konpasyon.” (Zak 5:11) Leksperyans Zob i donn nou en apersi sa rekonpans ki pe esper bann ki reste fidel, ki Zeova i beni. Sa ki pli enportan, se ki i revel serten laverite ki pou benefisye nou dan bann moman difisil. Liv Zob i ed nou reponn sa bann kestyon: Akoz ler nou pe pas dan leprev, nou bezwen sey konpran sa kestyon enportan ki enplike? Ki bann kalite ek latitid ki ed nou pour andire? Ki mannyer nou kapab fortifye nou bann frer ek ser ki pe soufer?

Konpran tou sa ki enplike

 5. Ki keksoz prensipal nou bezwen gard antet ler nou fer fas avek leprev ek tantasyon?

⁵ Pour gard nou balans spirityel ler nou pas dan difikilte, nou bezwen konpran tou sa ki enplike. Si non, bann problenm ki nou gannyen i kapab bar nou vizyon spirityel. Nou fidelite anver Bondye i keksoz pli enportan. Nou Papa dan lesyel i demann nou pour fer en keksoz ki nou tou endividyelman nou kapab pran aker: “Vin saz, mon garson, e rezwir mon leker, pour ki mon a kapab reponn sa enn ki pe provok mwan.” (Proverb 27:11) Pa i en loner pour fer sa! Kantmenm nou enparfe e nou annan nou defo, nou kapab fer nou Kreater kontan. Nou fer sa, ler nou lanmour pour Zeova i ed nou reisi fer fas avek leprev ek tantasyon. Vre lanmour Kretyen i siport tou. I reste pour touzour.—1 Korentyen 13:7, 8.

 6. Ki mannyer Satan i provok Zeova, e ziska ki degre i fer sa?

⁶ Liv Zob i klerman idantifye Satan konman sa enn ki pe provok Zeova. I osi devwal move karakter sa lennmi envizib ek son dezir pour detrir nou relasyon avek Bondye. Parey nou’n vwar dan ka Zob, dan en sans Satan in dir ki tou serviter Bondye i servi Li pour rezon egois e i pe fer tou pour prouve ki zot lanmour pour Bondye i kapab vin fre. I pe provok Zeova depi byen lontan. Ler Satan ti ganny pouse dan lesyel, en lavwa sorti dan lesyel ti dekrir li konman “lakizater nou bann frer” e dir ki i fer sa bann lakizasyon “devan Bondye lizour konman aswar.” (Revelasyon 12:10) Ler nou andire fidelman, nou kapab montre ki son lakizasyon i fo.

 7. Ki pli bon fason pour nou reziste nou bann febles fizik?

⁷ Annou pa bliye ki Dyab pou profit lo nenport problenm ki nou rankontre pour sey elwanny nou avek Zeova. Kan ki i ti tant Zezi? Ler Zezi ti lafen apre ki i pa ti’n manze pour karant zour. (Lik 4:1-3) Me lafors spirityel Zezi ki ti ed li rezet tantasyon Dyab avek determinasyon. Pa i enportan pour nou reziste okenn febles fizik, petet koze par en maladi oubyen lavyeyes, avek nou lafors spirityel! Kantmenm “nou lekor pe dousman dousman ganny detri,” nou pa abandonnen akoz “lo kote spirityel nou pe ganny renouvle de zour an zour.”—2 Korentyen 4:16.

 8. (a) Ki mannyer bann santiman negatif i kapab afekte nou spirityelman? (b) Ki kalite leta lespri Zezi ti annan?

⁸ Anplis ki sa, bann santiman negatif i kapab afekte nou spirityelman. Petet en dimoun i kapab demande: ‘Akoz Zeova i permet sa?’ En lot ki’n ganny trete dan en move fason i kapab demande: ‘Ki mannyer en frer i kapab tret mwan koumsa?’ Sa bann santiman koumsa i kapab fer nou oubliy sa bann kestyon prensipal ki enplike e konsantre zis lo nou sitiasyon personnel. I paret ki fristrasyon Zob anver son trwa konpanyon ti afekte li otan emosyonnelman ki son maladi ti afekte li fizikman. (Zob 16:20; 19:2) Pareyman, zapot Pol ti endike ki en lakoler ki nou les prolonze i kapab fer “dyab pran lavantaz lo” nou. (Efezyen 4:26, 27) Olye eksprim nou fristrasyon oubyen lakoler lo serten dimoun oubyen tro konsantre lo en sitiasyon ki paret vreman enzis, i pli byen pour nou imit Zezi par “met tou dan lanmen Bondye ki rann lazistis.” (1 Pyer 2:21-23) Ler nou annan menm leta lespri ki Zezi, sa pou vin en gro defans kont bann latak Satan.—1 Pyer 4:1.

 9. Ki lasirans Bondye i donn nou an rapor avek nou bann fardo ek tantasyon ki nou rankontre?

⁹ Pli enportan, nou pa devret zanmen vwar nou problenm konman en laprev ki nou’n perdi faver Bondye. Zob ti pans koumsa en serten letan ler son bann swadizan konsolater ti kritik li dan en fason dir e sa ti bles li en kantite. (Zob 19:21, 22) Me Labib i asir nou: “Bondye pa kapab ganny tante par sa ki mal, e limenm i pa tant personn.” (Zak 1:13) Okontrer, Zeova i promet pour ed nou anmenn nenport fardo ki tonm lo nou e pour ed nou sorti dan okenn tantasyon ki nou rankontre. (Psonm 55:22; 1 Korentyen 10:13) Ler nou apros pli pre avek Bondye dan bann moman detres, nou kapab get keksoz dan en fason balanse e reisi reziste Dyab.—Zak 4:7, 8.

Led pour andire

10, 11. (a) Kwa ki ti ed Zob pour andire? (b) Ki mannyer annan en bon konsyans ti ed Zob?

¹⁰ Zob ti dan en sitiasyon dezespere. Deplis son bann swadizan “konsolater” ti pe vreman kraz son moral par sa ki zot dir. Li menm i pa ti konnen vreman akoz tou sa maler ti’n ariv lo li. Malgre tousala, Zob ti reste ferm avek son lentegrite. Ki nou kapab aprann par son landirans? San dout, rezon prensipal pour son sikse ti son fidelite anver Zeova. ‘I ti annan lakrent pour Bondye e detourn kont sa ki mal.’ (Zob 1:1) Sa ti son fason viv. I pa ti oule abandonn Zeova kantmenm i pa ti konpran akoz en sel kou keksoz ti’n al mal. Zob ti krwar i devret servi Bondye dan botan ensi ki movetan.—Zob 1:21; 2:10.

¹¹ En bon konsyans ti osi en rekonfor pour Zob. En letan ler i ti krwar i pe al mor, i ti konsole akoz i ti konnen i ti’n fer son mye pour ed lezot, i ti’n swiv bann standar drwat Zeova, e i ti’n evit okenn form fo larelizyon.—Zob 31:4-11, 26-28.

12. Ki mannyer Zob ti reazir anver led ki i ti gannyen avek Eliou?

¹² Me i vre ki Zob ti bezwen led pour aziste son pwennvi dan serten laspe. E i ti aksepte sa led avek limilite. Sa i en lot keksoz tre enportan ki ti ed li pour reisi andire. Zob ti ekout konsey saz Eliou avek respe, e i ti byen reazir anver koreksyon ki Zeova ti donn li. I ti admet: “Mon ti koze, me mon pa ti pe konpran . . . Pour sa rezon ki mon pe koriz sa ki mon ti’n dir, e mon repantir dan lapousyer ek lasann.” (Zob 42:3, 6) Kantmenm son maladi ti ankor la, Zob ti kontan ki sa sanzman dan son fason panse ti’n fer li vin pli pros avek Bondye. I ti dir: “Mon’n arive konpran ki ou [Zeova] kapab fer tou keksoz.” (Zob 42:2) Granmersi Zeova ti’n dekrir Son grander avek Zob. Sa ti ed Zob pli byen konpran son pozisyon an rapor avek son Kreater.

13. Ki mannyer Zob ti benefisye ler i ti pran pitye?

¹³ Finalman, Zob in donn en legzanp remarkab lo pran pitye. Son bann fo konsolater ti bles li en kantite. Pourtan ler Zeova ti dir li priy pour zot, i ti fer li. Apre Zeova ti fer Zob reganny son lasante. (Zob 42:8, 10) I kler ki rankin pa pou ed nou andire, me lanmour ek pitye ki ede. Ler nou pa gard rankin, sa i donn nou lafors spirityelman, e Zeova i beni nou.—Mark 11:25.

Bann bon Konsey ki ed nou andire

14, 15. (a) Ki bann kalite ki pou ed en dimoun ki pe donn konsey pour geri lezot? (b) Eksplike akoz Eliou ti reisi ed Zob.

¹⁴ En lot leson ki nou kapab aprann dan resi Zob i lenportans annan bann dimoun ki donn nou bann bon konsey. Sa bann dimoun i bann frer ki’n “ne pour letan ladetres.” (Proverb 17:17) Me parey leksperyans Zob i montre, serten dimoun i kapab donn bann konsey ki blese olye geri. En bon konseye i bezwen kapab santi problenm sa dimoun, i bezwen respe li e zantiy avek li, zis parey Eliou. Petet bann ansyen ek lezot Kretyen matir i bezwen aziste fason panse bann frer ki akable avek problenm, e zot kapab aprann bokou lo konman fer sa dan liv Zob.—Galat 6:1; Ebre 12:12, 13.

¹⁵ I annan bann bon leson lo konman Eliou ti fer sa. Avek pasyans, i ti ekout sa trwa konpanyon Zob avan koriz zot lerer. (Zob 32:11; Proverb 18:13) Eliou ti servi non Zob e sipliy li konman en zanmi pour ekout li. (Zob 33:1) Kontrerman avek sa trwa fo konsolater, Eliou pa ti vwar li pli siperyer ki Zob. I ti dir: “Mwan osi mon’n ganny formen avek larzil.” I pa ti anvi fer Zob soufer plis ankor par bann parol san reflesir. (Zob 33:6, 7; Proverb 12:18) Olye kritik sa ki Zob ti fer avan, Eliou ti felisit li pour son ladrwatir. (Zob 33:32) Pli enportan ankor, Eliou ti vwar keksoz parey Bondye i vwar, e i ti ed Zob pour konsantre lo lefe ki Zeova pa zanmen azir dan en fason enzis. (Zob 34:10-12) I ti ankouraz Zob pour esper Zeova olye esey prouv son prop ladrwatir. (Zob 35:2; 37:14, 23) Sirman, bann ansyen ek lezot i kapab benefisye avek bann tel leson.

16. Ki mannyer sa trwa fo konsolater ti vin en zouti dan lanmen Satan?

¹⁶ Bann bon konsey ki Eliou ti donnen ti tou lekontrer avek bann parol blesant Elifaz, Bildab, ek Tsofar. Zeova ti dir zot: “Zot pa’n dir laverite lo mwan.” (Zob 42:7) Kantmenm zot ti dir zot annan bon lentansyon, zot ti azir parey bann zouti dan lanmen Satan olye konman bann konpanyon fidel. Zot tou le trwa zot ti prezimen depi okonmansman ki Zob ki ti responsab pour son bann maler. (Zob 4:7, 8; 8:6; 20:22, 29) Dapre Elifaz, Bondye ti napa konfyans dan son bann serviter, e pour Li i pa enportan si nou fer sa ki byen oubyen non. (Zob 15:15; 22:2, 3) Elifaz ti menm akiz Zob pour fer bann fot ki i pa ti’n fer. (Zob 22:5, 9) De lot kote, Eliou ti vreman ed Zob spirityelman. Se sa lobzektif en dimoun ki donn bon konsey.

17. Ki nou devret gard antet ler nou dan leprev?

¹⁷ I annan en lot leson lo landirans ki nou kapab aprann dan liv Zob. Nou Bondye ki kontan nou i vwar nou sitiasyon. I anvi e anmenmtan i kapab ed nou dan plizyer fason. Nou’n koz lo leksperyans Elsa Abt. Reflesir lo sa konklizyon ki i ti tonm lo la: “Avan mon ti ganny arete, mon ti’n lir let en ser ki ti dir ki ler i ti dan en leprev dir, lespri Zeova ti fer li santi en lape lespri. Mon ti mazinen ki i pe egzazer en pe. Me ler mon ti pas dan bann leprev mwan osi, mon ti konnen sa ki i’n dir ti vre. Vre i koumsa. I difisil pour imazin sa, si ou pa’n deza pas ladan. Me i’n vreman ariv avek mwan. Zeova i vreman ede.” Elsa pa ti pe koz lo sa ki Zeova ti kapab fer oubyen ti fer en bann milye lannen pase dan letan Zob. I ti pe koz lo nou letan. Wi, “Zeova i vreman ede!”

Byennere sa Dimoun ki andire

18. Ki byenfe Zob ti gannyen apre ki i ti’n andire?

¹⁸ Napa bokou nou ki bezwen pas dan bann difikilte sitan dir parey Zob. Me nenport leprev sa lemonn i anmenn lo nou, nou annan bon rezon pour reste fidel parey Zob. Anfet landirans ti anrisir lavi Zob. I ti fer li progrese e vin pli konplet. (Zak 1:2-4) I ti fer son relasyon avek Bondye vin pli for. Zob ti dir: “Wi, mon’n tande koze lo ou, me aprezan mon vwar ou avek mon prop lizye.” (Zob 42:5) Satan ti ganny prouve konman en manter dan le sans ki i pa ti kapab kas lentegrite Zob. Plizyer santenn lannen plitar, Zeova ti ankor pe refer avek son serviter Zob konman en legzanp ladrwatir. (Ezekyel 14:14) Son legzanp lentegrite ek landirans i motiv pep Bondye menm ozordi.

19. Dapre ou, akoz i vo lapenn andire?

¹⁹ Ler Zak ti ekrir bann Kretyen premye syek konsernan landirans, i ti koz lo sa satisfaksyon ki landirans i anmennen. I ti servi legzanp Zob pour rapel zot ki Zeova i rekonpans bokou son bann serviter fidel. (Zak 5:11) Nou lir dan Zob 42:12: “Tanka Zeova, i ti beni Zob alafen plis ki okonmansman.” Bondye ti donn Zob de fwa plis sa ki i ti’n perdi, e i ti viv ere e lontan. (Zob 42:16, 17) Pareyman, nenport soufrans oubyen latet fer mal ki nou bezwen andire pandan sa letan lafen pou ganny tire e oubliye dan nouvo lemonn Bondye. (Izai 65:17; Revelasyon 21:4) Nou’n tann koz lo landirans Zob, e nou determinen avek led Zeova pour imit son legzanp. Labib i promet: “Byennere, sa dimoun ki reste ferm dan leprev, parski apre son leprev i pou resevwar kouronn lavi eternel ki Bondye in promet tou bann ki kontan li.”—Zak 1:12.

Ki ou pou reponn?

• Ki mannyer nou kapab fer leker Zeova kontan?

• Akoz nou pa devret konklir ki nou problenm i laprev ki nou’n perdi faver Bondye?

• Kwa ki ti ed Zob andire?

• Ki mannyer nou kapab imit Eliou ler nou fortifye nou bann konpanyon Kretyen?

[Portre lo paz 20]

En bon konseye i santi problenm sa dimoun, respe li, e zantiy avek li

[Portre lo paz 21]

Elsa ek Harald Abt