Zezi Kri sa pli gran misyonner

“Mon sorti kot li e se Li ki’n anvoy mwan.”—ZAN 7:29.

1, 2. Ki si sa en misyonner e lekel ki kapab ganny apele sa pli gran Misyonner?

KWA ki vin dan ou lespri kan ou tann sa mo “misyonner”? Serten i mazin misyonner parmi bann swadizan Kretyen ki bokou parmi i enterfer dan zafer politik ek ekonomik dan pei kot zot pe fer zot servis. Parkont, konman en Temwen Zeova i probab ki ou mazin misyonner ki ganny anvoye par Konsey Direkter dan diferan pei atraver lemonn. (Mat. 24:14) Sa bann misyonner i pare pour dedye zot letan ek lenerzi dan sa travay enportan pour ed dimoun apros avek Zeova e rezwir en bon relasyon avek li.—Zak 4:8.

² Sa mo “misyonner” pa aparet dan New World Translation of the Holy Scriptures. Parkont, dan not anba lo paz pour Efezyen 4:11 dan Reference Bible i fer resorti ki sa mo Grek ki’n ganny tradwir konman “evanzelizater” i kapab osi ganny tradwir konman “misyonner.” Zeova i sa pli gran Evanzelizater, me i pa kapab ganny apele sa pli gran Misyonner akoz i pa’n ganny anvoye par personn. Zezi ti dir sa konsernan son papa dan lesyel: “Mon sorti kot li e se Li ki’n anvoy mwan.” (Zan 7:29) Pour demontre son gran lanmour pour limanite, Zeova ti anvoy son sel Garson lo later. (Zan 3:16) Zezi i kapab ganny apele sa pli gran e pli meyer Misyonner. Nou kapab dir sa akoz enn parmi bann rezon ki i ti ganny anvoye lo later se pour “servi temwen pour laverite.” (Zan 18:37) I ti vreman reisi proklanm sa bon nouvel lo Rwayonm e nou ankor pe benefisye atraver son servis. Par egzanp nou kapab aplik son bann metod lansennyman dan nou minister ki swa nou misyonner oubyen non.

3. Ki kestyon nou pe al egzaminen?

³ Rol ki Zezi ti zwe konman en proklanmater Rwayonm i kapab soulev bann kestyon parey: Ki Zezi ti eksperyanse pandan son minister lo later? Akoz son lansennyman ti efikas? E kwa ki ti fer li reisi dan son minister?

En lespri volonter dan en nouvo lanvironnman

4-6. Ki serten sanzman Zezi ti fer fas avek ler i ti lo later?

⁴ Bann misyonner ozordi ek lezot Kretyen ki’n al servi dan bann teritwar kot i annan bokou demann pour proklanmater Rwayonm, in petet bezwen adapte avek bann nouvo fason viv kot standar lavi i pli ba ki sa ki zot ti konnen avan. Me nou pa ni menm kapab mazin diferans ant sitiasyon lo later e dan lesyel kot Zezi ti viv avek son Papa ek lezot lanz ki ti servi Zeova avek en bon motivasyon. (Zob 38:7) Pa sa ti vreman diferan pour li parmi bann imen peser dan en lemonn koronpi! (Mark 7:20-23) Zezi ti menm bezwen fer fas avek dezakor ant son bann disip ki ti pros avek li. (Lik 20:46; 22:24) E byensir, dan tou sitiasyon ki i ti pas ladan lo later i ti reazir dan en fason parfe.

⁵ Zezi pa ti konmans koz en langaz ki imen ti koze par mirak, plito i ti konmans aprann koze depi ler i ti ankor ptipti. Sa ti en gran sanzman pour li ki oparavan ti pe donn lord bann lanz dan lesyel. Kan i ti lo later, Zezi ti koz omwen ‘en langaz’ ki lezot ti koze. Sa ti konpletman diferan avek ‘langaz bann lanz.’ (1 Kor. 13:1) Parkont, napa personn ki ti kapab koz pli zoli parol ki li.—Lik 4:22.

⁶ Remark lezot fason ki keksoz ti sanz en kantite pour Garson Bondye kan i ti vin lo later. Kantmenm Zezi pa ti erit pese Adan, I ti ne konman en imen zis parey lezot ki pli tar ti pou vin son “bann frer” ouswa Kretyen swazir. (Lir Ebre 2:17, 18.) Sa zour swar avan son lanmor, Zezi pa ti demann son Papa dan lesyel pour anvoy “plis ki douz larme lanz.” Me zis mazin li konman Misel Arkanz ki oparavan ti pe donn lord bann lanz! (Mat. 26:53; Zid 9) I vre Zezi ti fer bann mirak, me pourtan sa ki i ti fer lo later ti limite konpare avek sa ki i ti pou’n kapab fer si i ti dan lesyel.

7. Ki mannyer bann Zwif ti reazir an rapor avek Lalwa?

⁷ Pandan son legzistans dan lesyel konman “Laparol” i posib Zezi li menm ti sa Portparol Bondye ki ti gid bann Izraelit dan dezer. (Zan 1:1; Egz. 23:20-23) Parkont, zot ti “resevwar Lalwa Bondye par lentermedyer bann lanz, [me] zot [pa ti] obei.” (Akt 7:53; Ebr. 2:2, 3) Anfet, bann sef relizye Zwif dan premye syek pa ti reisi konpran vre sinifikasyon Lalwa. En legzanp se lalwa lo Saba. (Lir Mark 3:4-6.) Bann profeser lalwa ek Farizyen “[ti] negliz sa ki pli enportan dan Lalwa, tel ki lazistis, konpasyon, ek fidelite.” (Mat. 23:23) Toudmenm Zezi pa ti abandonnen e aret anons laverite.

8. Akoz Zezi i kapab ed nou?

⁸ Zezi ti annan en lespri volonter. Lanmour ki i ti annan pour lezot ti fer li vreman anvi ed dimoun. I pa ti zanmen bliye ki i ti en evanzelizater. Vi ki i ti reste fidel anver Zeova kan i ti lo later, Zezi “ti vin sours delivrans eternel pour tou bann ki obei li.” Deplis, “i’n soufer limenm, e i’n ganny tante, alor i aprezan kapab vin an ed tou sa [bann parey nou] ki ganny tante.”—Ebr. 2:18; 5:8, 9.

Byen formen konman en ansennyan

9, 10. Ki kalite formasyon Zezi ti gannyen avan vin lo later?

⁹ Denozour, avan ki bann Kretyen i ganny anvoye konman misyonner, Konsey Direkter i fer laranzman pour zot ganny en formasyon. Eski Zezi ti ganny en formasyon? Wi, me i pa ti asiste lekol bann gran profeser lalwa avan ganny swazir konman Mesi, ni menm pas dan lanmen bann sef relizye renonmen. (Zan 7:15; konpar Akt 22:3.) Alors ki mannyer Zezi ti sitan kalifye pour ansennyen?

¹⁰ Apard sa ki i ti’n kapab aprann avek son manman Mari ek son papa sonnyen Zozef, i ti ganny bann lansennyman pli enportan pour son minister sorti kot Zeova. Konsernan sa, Zezi ti dir: “Mon pa’n koz avek mon prop lotorite, me mon Papa ki’n anvoy mwan in donn mwan lord sa ki mon pou dir e ansennyen.” (Zan 12:49) Remarke ki Zezi ti ganny bann lenstriksyon spesifik lo sa ki i ti pou ansennyen. San dout, avan vin lo later Zezi ti’n pas bokou letan pour ekout lenstriksyon son Papa. Ki pli bon formasyon ki sa?

11. Ziska ki degre Zezi ti reflekte latitid son Papa anver limanite?

¹¹ Depi zour ki i ti ganny kree, Zezi ti annan en relasyon spesyal avek son Papa. Pandan son legzistans dan lesyel, Zezi ti ganny sans pour vwar latitid Bondye anver bann imen par regard lafason ki i ti azir avek zot. Lanmour ki Bondye ti annan pour limanite ti ganny byen reflekte dan son Garson ziska en nivo ki li ki ganny apele lasazes parfe, ti kapab dir: “Sa ki ti donn mwan bokou plezir ti annan pour fer avek bann garson zonm.”—Prov. 8:22, 31.

12, 13. (a) Ki mannyer Zezi ti aprann par obzerv lafason son Papa ti azir anver bann Izraelit? (b) Ki mannyer Zezi ti servi son formasyon ki i ti gannyen?

¹² Formasyon ki sa Garson ti gannyen ti osi enkli obzerv lafason ki son Papa ti rezourd bann sitiasyon difisil. Par egzanp lafason ki i ti azir avek bann Izraelit dezobeisan. Neemya 9:28 i dir: “Me dek ki zot ti ganny repo, zot ti rekonmans fer sa ki mal devan ou [Zeova], e ou ti abandonn zot dan lanmen zot lennmi ki ti oprim zot. Alor zot ti retournen e demann ou led, e ou dan lesyel ou ti tande e plizyer fwa ou ti delivre zot akoz ou gran mizerikord.” Par travay avek e obzerv Zeova, Zezi ti demontre menm konpasyon anver dimoun dan son teritwar.—Zan 5:19.

¹³ Zezi ti met an pratik son formasyon par ansenny son bann disip avek konpasyon. Sa zour swar avan son lanmor, tou son bann zapot ki i ti vreman kontan “ti abandonn li e sove.” (Mat. 26:56; Zan 13:1) Menm zapot Pyer ti dir trwa fwa ki i pa ti konn Zezi! Toudmenm Zezi ti kit laport ouver pour son bann disip. I ti dir Pyer: “Mwan mon’n priy pour ou, pour ki ou pa ava perdi lafwa. E ou kan ou a’n retournen, ankouraz ou bann frer.” (Lik 22:32) Avek sikse Izrael Spirityel in ganny batir lo “bann zapot ek bann profet” e ros fondasyon pour miray Nouvo Zerizalenm i port non sa 12 zapot fidel Lanyo setadir Zezi Kri. Ziska aprezan, bann Kretyen swazir ansanm avek son bann asosye setadir “lezot mouton” pe prospere dan sa travay predikasyon lo Rwayonm anba direksyon Bondye ek dominasyon son Garson byenneme.—Efe. 2:20; Zan 10:16, NW; Rev. 21:14.

Lafason Zezi ti ansennyen

14, 15. Dan ki fason lansennyman Zezi ti diferan avek bann profeser lalwa ek Farizyen?

¹⁴ Ki mannyer Zezi ti met son formasyon an pratik kan i ti ansenny son bann disip? Kan nou konpar lafason ki Zezi ti ansennyen avek fason bann sef relizye Zwif ti ansennyen, nou vwar klerman ki lafason ki i ti ansennyen ti pli siperyer. Bann profeser lalwa ek bann Farizyen ti “detri valer parol Bondye pour swiv zot prop lansennyman.” Kontrerman avek zot, Zezi pa ti dir sa ki li i ti anvi, me plito i ti toultan ansenny mesaz oubyen parol Bondye. (Mat. 15:6, Zan 14:10) Nou osi nou devret fer parey.

¹⁵ En lot fakter ti fer Zezi diferan avek bann sef relizye. I ti dir sa konsernan bann profeser lalwa ek Farizyen: “Fer tou sa ki zot dir fer, me pa imit sa ki zot fer. Akoz zot prese, me zot pa met an pratik sa ki zot prese.” (Mat. 23:3) Zezi ti pratik sa ki i ti ansennyen. Annou egzamin en legzanp ki prouve ki sa i vre.

16. Akoz ou kapab dir ki Zezi ti viv an armoni avek son parol ki i ti dir dan Matye 6:19-21?

¹⁶ Zezi ti ankouraz son bann disip pour “akimil . . . larises dan lesyel.” (Lir Matye 6:19-21.) Eski Zezi ti viv annakor avek son konsey? Wi, akoz i ti kapab dir onnetman lo li menm: “Renar i annan zot trou, zwazo lesyel i annan zot nik, me Fis-de-Lonm napa en landrwa kot i kapab repoz son latet.” (Lik 9:58) Zezi ti viv en lavi senp. I ti preokipe dan sa travay pour anons sa bon nouvel lo Rwayonm e i ti montre konman en dimoun i kapab evit bann traka lavi ler i pa akimil larises lo later. Zezi ti montre akoz i bokou pli meyer pour akimil larises dan lesyel “kot i pa pou ganny detri ni par lever, ni par la­rouy, kot voler pa pou kapab kas laport e vole.” Eski ou pe swiv konsey Zezi pour akimil larises dan lesyel?

Bann kalite ki ti fer dimoun kontan Zezi

17. Ki bann kalite ki ti fer Zezi en evanzelizater ekstraordiner?

¹⁷ Ki bann kalite ekstraordiner ki ti fer Zezi en bon evanzelizater? Enn parmi ti son latitid anver bann dimoun ki i ti ede. Parmi bann bon kalite Zeova ki Zezi ti imite ti limilite, lanmour ek konpasyon. Remarke ki mannyer sa bann kalite ti atir lezot anver li.

18. Akoz nou kapab dir ki Zezi ti annan limilite?

¹⁸ Par aksepte sa misyon pour vin lo later, Zezi “ti renons tou sa ki i posede pour pran kondisyon lesklav. I ti pran natir imen.” (Fili. 2:7) Sa ti en siny limilite. Deplis, Zezi pa ti tret lezot konman enferyer. I ti napa sa latitid, ‘Mon’n vini sorti dan lesyel alors zot devret ekout mwan.’ Kontrerman avek bann ki ti dir ki se zot mesi, Zezi pa ti pibliy son rol konman sa vre Mesi. Parler i ti demann dimoun pour pa dir lezot lekel li e ki i ti’n fer. (Mat. 12:15-21) Zezi ti anvi lezot i fer zot desizyon pour swiv li baze lo sa ki zot in obzerve. Pa son bann disip ti bezwen vreman ganny ankouraze lefet ki zot Senyer pa ti ekspekte zot pour parey bann lanz parfe ki i ti viv avek dan lesyel!

19, 20. Ki mannyer lanmour ek konpasyon ti pous Zezi pour ed dimoun?

¹⁹ Zezi ti osi demontre sa kalite prensipal ki son Papa dan lesyel i annan e sa se lanmour. (1 Zan 4:8) Zezi ti ansenny son lodyans avek lanmour. Par egzanp, egzamin santiman ki i ti annan pour en zenn dirizan. (Lir Mark 10:17-22.) Zezi “ti kontan li” e i ti anvi ed li, me sa zenn dirizan pa ti pare pour abandonn son bann posesyon pour vin en disip Zezi.

²⁰ Parmi bann kalite ki ti atir lezot ver Zezi, ti konpasyon. Parey tou dimoun enparfe bann ki ti aksepte son lansennyman ti sarze avek problenm. Lefet ki i ti konn sa, sa ti fer Zezi ansenny zot avek konpasyon ek pitye. Pour donn en legzanp: En fwa Zezi ek son bann disip ti sitan okipe ki zot pa ti ni menm annan letan pour manze. Parkont, ki ti reaksyon Zezi kan i ti vwar en gran lafoul ki ti’n rasanble? “I ti pran pitye pour zot, akoz zot ti parey bann mouton ki napa berze; e i ti konmans ansenny zot bokou keksoz.” (Mark 6:34) Zezi ti remarke ki dimoun dan son teritwar ti fer lapenn e i ti servi son lenerzi pour ansenny zot e fer bann mirak pour zot byennet. Serten ti ganny atire par son bann bon kalite, touse par son parol e zot ti vin son disip.

21. Ki nou pou diskite dan prosen lartik?

²¹ I annan bokou plis keksoz nou kapab aprann avek minister Zezi lo later parey lot lartik pou montre. Dan ki lezot fason nou kapab imit sa pli gran Misyonner?

Ki ou pou reponn?

• Ki formasyon Zezi ti gannyen avan vin lo later?

• Ki mannyer lafason Zezi ti ansennyen ti pli siperyer ki bann profeser lalwa ek Farizyen?

• Ki kalite ki ti atir dimoun ver Zezi?

[Portre lo paz 18]

Ki mannyer Zezi ti ansenny lafoul?