Eski si ou en bon dimoun, sa i garanti en meyer lavenir?

Pour plizyer syek, bokou dimoun in krwar ki si ou en bon dimoun ou kapab annan en meyer lavenir. Par egzanp, bann dimoun dan pei Lazi ti respekte sa ki Confucius, en ansenyan filozofi (551-479 avan Kris) ti dir: “Sa ki ou pa anvi lezot i fer avek ou, pa bezwen fer avek lezot.”a

EN SWA KI BOKOU DIMOUN I FER

Bokou dimoun i ankor krwar ki si zot annan en bon konportman, zot pou annan en meyer lavenir. Zot esey zot mye pour respekte lezot, devlop bann bon kalite, zot rekonnet zot plas dan lasosyete e gard en bon konsyans. Linh, en madanm sorti Vyetnanm i dir: “Mon ti toultan krwar ki si mon onnet e senser, mon ti pou ganny beni an retour.”

Sa menm madanm pe servi manze avek bann dimoun pov ek bann ki napa en landrwa reste.

Serten i esey fer bann bon keksoz akoz zot krwayans relizye. Hsu-Yun, en zonm ki reste Taywann i dir: “Mon ti aprann ki si en dimoun i fer sa ki byen ler i ankor vivan i pou ere apre ki i’n mor me si i fer sa ki mal, i pou soufer.”

ESKI SA FASON FER I VREMAN ED ZOT?

Sa madanm a lafen lazournen, sagren e fatige pe atrap son pti garson.

I vre ki ler nou fer bann bon keksoz pour lezot nou ganny bokou byenfe. Par kont, bann ki senserman esey fer bann bon keksoz pour lezot, zot realize ki lezot pa souvan tret zot parey zot ti pe ekspekte. Shiu Ping, en madanm ki reste Hong Kong i dir: “Mon’n aprann avek mon leksperyans ki bann dimoun ki fer bann bon keksoz pa toultan ganny beni. Mon ti esey mon mye pour fer sa ki byen e pran swen avek mon fanmir, me mon maryaz ti kase e mon msye ti kit mwan avek mon garson.”

Bokou in vwar ki pa tou dimoun relizye ki bann bon dimoun. Etsuko, en madanm ki reste Zapon i dir: “Mon ti zwenn en larelizyon e mon ti konmans organiz bann aktivite pour bann zenn. Mon ti soke pour vwar ki serten dimoun dan sa larelizyon ti imoral, zot ti lager pouvwar e zot ti mal servi larzan legliz.”

“Mon ti esey mon mye pour fer sa ki byen e pran swen avek mon fanmir, me mon maryaz ti kase e mon msye ti kit mwan avek mon garson.”—SHIU PING, HONG KONG

Serten ki vreman relizye e ki esey fer bann bon keksoz, zot dezapwente ler bann move keksoz i arive avek zot. I koumsa ki Van, en madanm sorti Vyetnanm ti santi. Van i dir: “Toulezour mon ti aste fri, fler ek manze e mon ti ofer sa bann keksoz lo lotel mon bann zanset ki’n mor, avek lespwar ki mon ti pou ganny beni a lavenir. Malgre tou sa bann bon keksoz ki mon’n fer pour plizyer lannen, mon msye ti tonm gravman malad. Apre, mon fiy ti mor byen zenn ler i ti pe etidye aletranze.”

AKOZ I PA ASE POUR ZIS VIN EN BON DIMOUN

I enportan pour vin en bon dimoun me sa i pa ase pour garanti en bon lavenir. Akoz non? Annou vwar ki Lekritir Sen i dir.

PA TOU DIMOUN KI SWAZIR POUR FER SA KI BON

“Me en sel dimoun ki annan en move lavi i kapab detri en kantite bon keksoz.”—EKLEZYAST 9:18, NWT.

Menm si ou fer ou mye pour vin en bon dimoun, ou lavenir i kapab ganny afekte par bann aksyon egois ki lezot i fer. Par egzanp, pandan en pandemi, ou kapab swiv lenstriksyon bann lotorite e evit kontak pros avek lezot. Me ki arive si serten i refize swiv sa bann lenstriksyon? Zot konportman i kapab fer bann ki pe esey fer sa ki byen malad.

DIMOUN I KAPAB PA KONPRAN EGZAKTEMAN KWA KI BYEN E KWA KI MAL

“I annan en semen ki paret bon pour en dimoun, me finalman i anmenn ver lanmor.”—PROVERB 14:12, NWT.

Bokou dimoun in fer keksoz ki zot ti krwar i byen, me pli tar zot ti realize ki sa ki zot ti fer ti mal. Menm si zot ti krwar zot in fer sa ki byen zot kontinyen soufer akoz zot bann move desizyon.

IMEN PA KONNEN KI POU ARIVE DAN LAVI

“Zot pa konnen ki mannyer zot lavi pou ete demen.”—ZAK 4:14.

Menm en bon dimoun i kapab mor san ekspekte. Par egzanp, pandan sa pandemi COVID-19, bokou in perdi zot lavi ler zot ti pe esey ed lezot. Annou vwar leksperyans Liting, en madanm Lasin ki ti perdi son papa dan en aksidan loto. Liting i dir: “Mon pa ti kapab konpran ki mannyer en dimoun sitan bon ti kapab mor. Mon papa ti travay dir, i ti annan limite e i ti senser. Zis li dan sa loto ki ti mor.”

Si vin en bon dimoun pa ase pour garanti en meyer lavenir, alor kwa ki kapab garanti en meyer lavenir? Pour reponn sa kestyon, nou bezwen bann lenformasyon ki diny konfyans, ki pou ed nou trouv larepons nou bann kestyon e gid nou ver en meyer lavenir. Kote nou kapab vwar sa bann lenformasyon?

a Pour plis lenformasyon lo sa ki Confucius ti ansennyen, vwar sapit 7, paragraf 31-35 dan liv Mankind’s Search for God, pibliye par Temwen Zeova e ki disponib lo Enternet lo www.jw.org.